ନୂଆଦିଲ୍ଲୀ: ଆନ୍ତର୍ଜାତିକ ଶ୍ରମ ସଂଗଠନ (ଆଇଏଲ୍ଓ)ର ୩୫୩ତମ ପରିଚାଳନା ପରିଷଦ ବୈଠକ ୧୦ ମାର୍ଚ୍ଚ ରୁ ୨୦ ମାର୍ଚ୍ଚ, ୨୦୨୫ ପର୍ଯ୍ୟନ୍ତ ସୁଇଜରଲ୍ୟାଣ୍ଡର ଜେନେଭାରେ ଅନୁଷ୍ଠିତ ହେଉଛି। ଏହି ବୈଠକରେ ଆଇଏଲ୍ଓର ତିନୋଟି ଅଙ୍ଗ ସରକାର, କର୍ମଚାରୀ ଏବଂ ନିଯୁକ୍ତିଦାତାଙ୍କୁ ଏକତ୍ରିତ କରାଯାଇ ଶାସନ ସହିତ ଜଡ଼ିତ ଗୁରୁତ୍ୱପୂର୍ଣ୍ଣ ବିଷୟଗୁଡ଼ିକ ଉପରେ ଆଲୋଚନା ପାଇଁ ସୁଯୋଗ ସୃଷ୍ଟି କରାଯାଇଛି।
ଭାରତ ସରକାରଙ୍କ ଶ୍ରମ ଏବଂ ନିଯୁକ୍ତି ମନ୍ତ୍ରଣାଳୟର ସଚିବ ସୁମିତା ଦାଓରାଙ୍କ ନେତୃତ୍ୱରେ ଭାରତୀୟ ପ୍ରତିନିଧିମଣ୍ଡଳ ପ୍ରମୁଖ ପ୍ରସଙ୍ଗଗୁଡ଼ିକରେ ଆଲୋଚନା ପାଇଁ ସୁଯୋଗ ସୃଷ୍ଟି କରିଥିଲା। ଏଥିରେ ବିଶ୍ୱସ୍ତରରେ ଶ୍ରମ କଲ୍ୟାଣ, ସାମାଜିକ ନ୍ୟାୟ ଏବଂ ଗୁଣାତ୍ମକ ନିଯୁକ୍ତି ସୃଷ୍ଟିକୁ ପ୍ରୋତ୍ସାହିତ କରିବାର ସହଭାଗୀ ଏଜେଣ୍ଡାକୁ ଅଗ୍ରସର କରିବା ପାଇଁ ଭାରତର ସଫଳତା, ଶିକ୍ଷା ଏବଂ ଦୃଷ୍ଟିକୋଣ ପ୍ରଦର୍ଶନ କରାଯାଇଥିଲା।
ସାମାଜିକ ବିକାଶ ପାଇଁ ଦ୍ୱିତୀୟ ବିଶ୍ୱ ସମ୍ମିଳନୀ
ଚଳିତ ବର୍ଷ ଶଷ ଆଡ଼କୁ କାତାରର ଦୋହାଠାରେ ଜାତିସଂଘ ନେତୃତ୍ୱରେ ସାମାଜିକ ବିକାଶ ପାଇଁ ଆୟୋଜିତ ହେବାକୁ ଥିବା ତୀୟ ବିଶ୍ୱ ସମ୍ମିଳନୀ ପାଇଁ ଆଇଏଲ୍ଓକୁ ସମର୍ଥନ କରିଛି। କାରଣ ଏହା ୨୦୩୦ ସୁଦ୍ଧା ସାମାଜିକ ବିକାଶ ପାଇଁ ଏଜେଣ୍ଡାକୁ ସୁଦୃଢ଼ କରିବା ଲକ୍ଷ୍ୟ ରଖିଛି। ସାମାଜିକ ନ୍ୟାୟ ଏବଂ ବିକାଶକୁ ପ୍ରୋତ୍ସାହିତ କରିବାରେ ଭାରତର ପ୍ରେରଣାଦାୟକ ଅଗ୍ରଗତି ଉପରେ ଆଲୋକପାତ କରାଯାଇଥିଲା, କାରଣ ଭାରତ ଏହାର ସାମାଜିକ ସୁରକ୍ଷାର ବଳୟକୁ ଦ୍ୱିଗୁଣିତ କରିଛି ଅର୍ଥାତ୍ ୪୮.୮ ପ୍ରତିଶତକୁ ବୃଦ୍ଧି କରିଛି, ଯାହା ହାରାହାରି ବିଶ୍ୱ ସାମାଜିକ ସୁରକ୍ଷା କଭରେଜକୁ ୫ ପ୍ରତିଶତରୁ ଅଧିକ ବୃଦ୍ଧି କରିଛି।
ଏହି ପରିପ୍ରେକ୍ଷୀରେ, ଭାରତର ପ୍ରମୁଖ ସଂସ୍ଥା ଏବଂ ଯୋଜନା ଯେପରିକି ଇପିଏଫ୍ଓ (୭.୩୭ କୋଟି ସଦସ୍ୟ), ଇଏସ୍ଆଇସି (୧୪.୪ କୋଟି ହିତାଧିକାରୀ), ଇ-ଶ୍ରମ ପୋର୍ଟାଲ (୩୦.୬ କୋଟି ପଞ୍ଜିକୃତ ଅଣସଂଗଠିତ ସଦସ୍ୟ), ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା (୬୦ କୋଟି ହିତାଧିକାରୀ) ଏବଂ ଲକ୍ଷ୍ୟଭିତ୍ତିକ ପିଡିଏସ୍ (୮୧.୩୫ କୋଟି ହିତାଧିକାରୀଙ୍କୁ ଖାଦ୍ୟ ସୁରକ୍ଷା) ର ଅବଦାନକୁ ସ୍ୱୀକାର କରାଯାଇଥିଲା।
ଆଇଏଲ୍ଓ ସ୍ୱଚ୍ଛ ପ୍ରବାସ ଏଜେଣ୍ଡା ଏବଂ କାର୍ଯ୍ୟାନ୍ୱୟନ
ପ୍ରବାସୀ ଶ୍ରମିକଙ୍କ କ୍ଷେତ୍ରରେ ବିଶ୍ୱର ବଡ଼ ଦେଶମାନଙ୍କ ଭିତରେ ଅନ୍ୟତମ ତଥା ସର୍ବାଧିକ ଅର୍ଥ ପ୍ରାପ୍ତିକର୍ତ୍ତା ଭାବରେ ପରିଚିତ ଭାରତ ନିଜର ସୁପରିଚାଳିତ, ଦକ୍ଷତା-ଆଧାରିତ ପ୍ରବାସ ପଥଗୁଡ଼ିକୁ ପ୍ରୋତ୍ସାହିତ କରିବାରେ ଅଧିକ ବିଶ୍ୱସ୍ତରୀୟ ସହଯୋଗ ପାଇଁ ନିଜର ସମର୍ଥନକୁ ପୁନର୍ବାର ଦୋହରାଇଛି। ଦ୍ୱିପାକ୍ଷିକ ଶ୍ରମ ପ୍ରବାସ ଏବଂ ସାମାଜିକ ସୁରକ୍ଷା ଚୁକ୍ତିନାମା ମାଧ୍ୟମରେ ପ୍ରବାସୀ ଶ୍ରମିକଙ୍କ ପାଇଁ ସାମାଜିକ ସୁରକ୍ଷା ଏବଂ ଅଧିକାର ସୁରକ୍ଷିତ କରିବା ପାଇଁ ବିଶ୍ୱ ଗତି ସୃଷ୍ଟି କରିବା ଦିଗରେ ପ୍ରୟାସ ବୃଦ୍ଧି କରିବାକୁ ଆନ୍ତର୍ଜାତିକ ଶ୍ରମ ସଂଗଠନକୁ ଅନୁରୋଧ କରାଯାଇଥିଲା। ବିଶ୍ୱର ଏକ ପ୍ରମୁଖ ଅଂଶୀଦାର ଭାବରେ ଭାରତ ଦ୍ୱାରା ଆଇଏଲଓ ଆଧାରିତ ଗ୍ଲୋବାଲ୍ କୋଆଲିସନ୍ ଫର ସୋସିଆଲ ଜଷ୍ଟିସ୍ ଅଧୀନରେ ପ୍ରବାସ ବିଷୟକୁ ନେଇ ପ୍ରଥମ ତ୍ରିପାକ୍ଷିକ ଗ୍ଲୋବାଲ୍ ଫୋରମ୍ ଆୟୋଜନ କରିବା ପାଇଁ ଆଇଏଲ୍ଓର ପ୍ରସ୍ତାବକୁ ସମର୍ଥନ ଦିଆଯାଇଥିଲା।
ରାସାୟନିକ ପଦାର୍ଥ ଉପରେ ବିଶ୍ୱସ୍ତରୀୟ ଢାଞ୍ଚା
ରାସାୟନିକ ପଦାର୍ଥ ଏବଂ ଏହାର ଅପଚୟ ଜନିତ କ୍ଷତିମୁକ୍ତ ଗ୍ରହ ନିଶ୍ଚିତ କରିବା ଏବଂ ଶ୍ରମିକ, ସମ୍ପ୍ରଦାୟ ଏବଂ ପରିବେଶକୁ ସୁରକ୍ଷା ଦେବା ପାଇଁ ଭାରତ ଏକ ପ୍ରମୁଖ ଭୂମିକା ଗ୍ରହଣ କରିବା ପ୍ରତି ନିଜର ପ୍ରତିବଦ୍ଧତାକୁ ଦୋହରାଇଛି। ‘ବନ୍’ ଘୋଷଣାନାମା ଅନୁସାରେ ଆଇଏଲ୍ଓ ଦ୍ୱାରା ଗ୍ରହଣ କରାଯାଇଥିବା କାର୍ଯ୍ୟଗୁଡ଼ିକୁ ଏଠାରେ ସ୍ୱୀକୃତି ଦିଆଯାଇଥିଲା।
କାରଖାନା ଆଇନ-୧୯୪୮ ଏବଂ ବୃତ୍ତିଗତ ସୁରକ୍ଷା, ସ୍ୱାସ୍ଥ୍ୟ ଏବଂ କାର୍ଯ୍ୟ ପରିସ୍ଥିତି ସଂହିତା-୨୦୨୦ ସମେତ ଶ୍ରମିକଙ୍କ ସ୍ୱାସ୍ଥ୍ୟ ଏବଂ ସୁରକ୍ଷା ପାଇଁ ଭାରତ ଦ୍ୱାରା ନିଆଯାଇଥିବା ପ୍ରମୁଖ ପଦକ୍ଷେପଗୁଡ଼ିକୁ ଗୁରୁତ୍ୱାରୋପ କରାଯାଇଥିଲା। ପ୍ରମୁଖ ଦୁର୍ଘଟଣା ବିପଜ୍ଜନକ (ଏମ୍ଏଏଚ୍) ୟୁନିଟ୍ଗୁଡ଼ିକରେ କର୍ମକ୍ଷେତ୍ର ସୁରକ୍ଷା ସୁନିଶ୍ଚିତ କରିବା ପାଇଁ ବିକଶିତ ଭାରତ-୨୦୪୭ ଯୋଜନା ଅଧୀନରେ ନିଆଯାଉଥିବା କ୍ଷମତା-ନିର୍ମାଣ ପଦକ୍ଷେପଗୁଡ଼ିକ ସମ୍ପର୍କରେ ଆଲୋକପାତ କରାଯାଇଥିଲା।
ଭାରତୀୟ ପ୍ରତିନିଧିମଣ୍ଡଳ ଆନ୍ତର୍ଜାତିକ ଶ୍ରମ ସଂଗଠନର ମହାନିର୍ଦ୍ଦେଶକ ଏବଂ ବରିଷ୍ଠ ବିଶେଷଜ୍ଞଙ୍କ ସମେତ ଶ୍ରମ ଏବଂ ନିଯୁକ୍ତି ପ୍ରସଙ୍ଗରେ ଅନ୍ୟ ଦେଶର ପ୍ରତିନିଧିମାନଙ୍କ ସହିତ ଭାରତୀୟ ପ୍ରତିନିଧି ମଣ୍ଡଳୀ ଅନେକ ଦ୍ୱିପାକ୍ଷିକ ଆଲୋଚନା ମଧ୍ୟ କରିଥିଲେ।
ଆଇଏଲ୍ଓ ମହାନିର୍ଦ୍ଦେଶକଙ୍କ ସହିତ ଦ୍ୱିପାକ୍ଷିକ ଆଲୋଚନା
ସୁଶ୍ରୀ ଦାଓରା ଆନ୍ତର୍ଜାତିକ ଶ୍ରମ ସଂଗଠନର ମହାନିର୍ଦ୍ଦେଶକ ଶ୍ରୀ ଗିଲବର୍ଟ ଏଫ୍. ହୌଙ୍ଗବୋଙ୍କୁ ଭେଟିଥିଲେ ଏବଂ ତାଙ୍କର ପ୍ରମୁଖ ପଦକ୍ଷେପ ଗ୍ଲୋବାଲ୍ କୋଆଲିସନ୍ ଫର ସୋସିଆଲ ଜଷ୍ଟିସ୍ ପାଇଁ ତାଙ୍କୁ ଅଭିନନ୍ଦନ ଜଣାଇଥିଲେ। ଏହି ସଂଗଠନ ସାମାଜିକ ନ୍ୟାୟକୁ ପ୍ରୋତ୍ସାହିତ କରିବା ପାଇଁ ବିଶ୍ୱସ୍ତରୀୟ ସହଯୋଗ ଦିଗରେ ଏକ ଦୃଢ଼ ମଞ୍ଚ ଭାବରେ ଉଭା ହୋଇଛି। ସେ ସାମାଜିକ ସୁରକ୍ଷା ଅନ୍ତର୍ଭୁକ୍ତିକୁ ମୂଲ୍ୟାଙ୍କନ କରିବା ସମୟରେ ଆଇଏଲଓ ଦ୍ୱାରା ବିଭିନ୍ନ ଲାଭକୁ ବିଚାର କରାଯିବାର ଆବଶ୍ୟକତା ବିଷୟରେ ଦୋହରାଇଥିଲେ।
ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାରଣ ଭାରତ ଭାରତର ସାମାଜିକ ସୁରକ୍ଷା ଅନ୍ତର୍ଭୁକ୍ତିର ଠିକଣା ମୂଲ୍ୟାଙ୍କନ ପାଇଁ ଆଇଏଲଓ ସହିତ ସହଯୋଗରେ ଏକ ରାଜ୍ୟ ନିର୍ଦ୍ଦିଷ୍ଟ ଡାଟା ପୁଲିଂ ବ୍ୟବସ୍ଥା ଆରମ୍ଭ କରିଛି।
ଆଇଏଲ୍ଓ ମହାନିର୍ଦ୍ଦେଶକ ଏହି ସହଯୋଗର ପ୍ରମୁଖ ବିଷୟ “ସ୍ଥାୟୀ ଏବଂ ଅନ୍ତର୍ଭୁକ୍ତ ସମାଜ ପାଇଁ ଦାୟିତ୍ୱପୂର୍ଣ୍ଣ ବ୍ୟବସାୟ”କୁ ସମର୍ଥନ କରିବା ସହ ଗତ ମାସରେ ନୂଆଦିଲ୍ଲୀଠାରେ ପ୍ରଥମ “ସାମାଜିକ ନ୍ୟାୟ ସମ୍ପର୍କିତ ଆଞ୍ଚଳିକ ଆଲୋଚନା”କୁ ସଫଳତାର ସହିତ ଆୟୋଜନ କରିଥିବାରୁ ଭାରତକୁ ପ୍ରଶଂସା କରିଛନ୍ତି। ସେ ଆହୁରି ମଧ୍ୟ କହିଛନ୍ତି, “ଏହା ଅନ୍ୟ ସହଯୋଗୀ ଦେଶମାନଙ୍କୁ ସେମାନଙ୍କର ଅବଦାନ ବୃଦ୍ଧି କରିବାକୁ ପ୍ରେରଣା ଦେଇଛି”।
ଖୁବ୍ ଶୀଘ୍ର ଆୟୋଜିତ ହେବାକୁ ଥିବା ସାମାଜିକ ନ୍ୟାୟ ଶୀର୍ଷକ ବାର୍ଷିକ ଫୋରମରେ ଭାରତରର ସକ୍ରିୟ ଅଂଶଗ୍ରହଣ ଏବଂ ଏଠାରେ ଦାୟିତ୍ୱପୂର୍ଣ୍ଣ ବ୍ୟବସାୟ ଆଚରଣ, ଦରମା କ୍ଷେତ୍ରରେ ଭାରତୀୟ ଶିଳ୍ପର ସର୍ବୋତ୍ତମ ଅଭ୍ୟାସ ପ୍ରଦର୍ଶନ କରିବାକୁ ଶ୍ରୀ ହୋଙ୍ଗବୋ ଆମନ୍ତ୍ରଣ କରିଛନ୍ତି।
ଆଇଏଲ୍ଓ ଏବଂ ଓଇସିଡିଦ୍ୱାରା ବୃତ୍ତିର ଆନ୍ତର୍ଜାତୀୟ ସନ୍ଦର୍ଭ ବର୍ଗୀକରଣ ବିକାଶ ଶୀର୍ଷକ ସମ୍ଭାବ୍ୟତା ଅଧ୍ୟୟନ ପାଇଁ ଆଇଏଲ୍ଓକୁ ଭାରତର ପ୍ରଥମ ସ୍ୱେଚ୍ଛାକୃତ ଆର୍ଥିକ ସହାୟତାକୁ ନେଇ ଡିଜି ମଧ୍ୟ କୃତଜ୍ଞତା ପ୍ରକାଶ କରିଥିଲେ। ଏହି ଭାରତ ନେତୃତ୍ୱାଧୀନ ପଦକ୍ଷେପ ଭାରତୀୟ ଯୁବପିଢ଼ିଙ୍କ ପାଇଁ ବୈଶ୍ୱିକ ନିଯୁକ୍ତି ସୁଯୋଗକୁ ବୃଦ୍ଧି କରିବାରେ ସହାୟକ ହେବ, ଏବଂ ଦକ୍ଷତା ଏବଂ ଯୋଗ୍ୟତାର ପାରସ୍ପରିକ ସ୍ୱୀକୃତି ପ୍ରଦାନ କରିବ। ଆନ୍ତର୍ଜାତୀୟ ବର୍ଗୀକରଣର ବିକାଶ ୨୦୨୩ ମସିହାରେ ଭାରତର ଜି-୨୦ ସଭାପତିତ୍ୱରେ ବିଭିନ୍ନ ରାଷ୍ଟ୍ରନେତାମାନଙ୍କ ଦ୍ୱାରା କରାଯାଇଥିବା ଏକ ଐତିହାସିକ ପ୍ରତିବଦ୍ଧତା।
ମଜୁରୀ, ଗିଗ୍ ଏବଂ ପ୍ଲାଟଫର୍ମ ଶ୍ରମିକଙ୍କ କଲ୍ୟାଣ ଏବଂ ମୂଲ୍ୟ ଶୃଙ୍ଖଳରେ ଉପଯୁକ୍ତ କାର୍ଯ୍ୟ ନିର୍ଣ୍ଣୟ, ରୂପାୟନ ସମେତ ଭବିଷ୍ୟତରେ ଆଇଏଲ୍ଓର ବିଭିନ୍ନ ଯୋଜନାରେ କାର୍ଯ୍ୟ କରିବା ଲାଗି ଏହି ଅବସରରେ ଭାରତ ଆଇଏଲ୍ଓ ସହିତ ଆଲୋଚନା କରିଥିଲା। ଭାରତୀୟ ପ୍ରତିନିଧିମଣ୍ଡଳରେ ଶ୍ରମ ଏବଂ ନିଯୁକ୍ତି ମନ୍ତ୍ରଣାଳୟର ଉପନିର୍ଦ୍ଦେଶକ ଶ୍ରୀ ରାକେଶ ଗୌର ସାମିଲ ଥିଲେ।
