ସୀତାରାମ ଅଗ୍ରୱାଲ
ବାଲୁଗାଁ: ସମଗ୍ର ଦେଶ ତଥା ରାଜ୍ୟ ମହାମାରୀ କରୋନାରେ ଆତଙ୍କିତ। ରାଜ୍ୟର ବିଭିନ୍ନ ଜିଲ୍ଲା ଗୁଡିକରେ ପର୍ଯ୍ୟାୟକ୍ରମେ ଲକ୍ଡାଉନ୍ ସାଙ୍ଗକୁ ସପ୍ତାହାନ୍ତ ସଟଡ଼ାଉନ ଜାରି ରହିଛି। ପ୍ରଶାସନ ପକ୍ଷରୁ ସାମାଜିକ ଦୂରତ୍ୱ ରକ୍ଷା କରିବା, ସଦାସର୍ବଦା ମାସ୍କ ପରିଧାନ ଏବଂ ସାନିଟାଇଜର୍ ବ୍ୟବହାର ନିମନ୍ତେ ଜନସଚେତନ କରାଯାଉଛି। ବର୍ତ୍ତମାନ ପରିସ୍ଥିତିରେ କୋଭିଡ୍ ମହାମାରୀରୁ ନିବୃତ୍ତ ରହିବା ପାଇଁ ଏକମାତ୍ର ବିଶଲ୍ୟକରଣୀ ରୂପେ ଟିକାକରଣ ଅପରିହାର୍ଯ୍ୟ ହୋଇପଡ଼ିଛି।
ସରକାରଙ୍କ ନିର୍ଦ୍ଦେଶକ୍ରମେ ଜିଲ୍ଲା ଏବଂ ସ୍ଥାନୀୟ ପ୍ରଶାସନ ବିଭିନ୍ନ ପର୍ଯ୍ୟାୟରେ ବୟୋଜ୍ୟେଷ୍ଠ, ଦିବ୍ୟାଙ୍ଗଙ୍କ ସମେତ ୧୮ରୁ ୪୪ ବର୍ଷ ମଧ୍ୟରେ ନାଗରିକଙ୍କ ଟିକାକରଣ ବ୍ୟବସ୍ଥା କରାଯାଇଛି। ମାତ୍ର ଦୈନନ୍ଦିନ ଅହେତୁକ ଜନସମାଗମକୁ ଲକ୍ଷ୍ୟ ରଖି ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ଟିକାକରଣ କେନ୍ଦ୍ରମାନ ଖୋଲାଯାଇଥିବା ବେଳେ ଏହାର ବ୍ୟତିକ୍ରମ ଭାବେ ଟୀକା କେନ୍ଦ୍ର ଗୁଡିକରେ ସ୍ଥାନୀୟ ଦଲାଲ୍ଙ୍କ ଦୌରାତ୍ମ୍ୟ ଦେଖିବାକୁ ମିଳିଛି।
ସୂଚନା ମୁତାବକ ଚିଲିକା ବ୍ଲକର ନାଗରିକମାନଙ୍କୁ ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପୂର୍ବରୁ ଟିକା ଦିଆଯାଉଥିବା ବେଳେ ଜନସାଧାରଣଙ୍କ ଭିଡ଼କୁ ଦୃଷ୍ଟିରେ ରଖି ବାଲୁଗାଁ ଉଚ୍ଚ ବିଦ୍ୟାଳୟ ସମେତ ଆଖପାଖ ଅଞ୍ଚଳର ବିଭିନ୍ନ ସରକାରୀ ବିଦ୍ୟାଳୟ, ଉପ ସ୍ୱାସ୍ଥ୍ୟ କେନ୍ଦ୍ର, ବିଭିନ୍ନ ବାତ୍ୟା ଆଶ୍ରୟସ୍ଥଳୀ ମାନଙ୍କରେ ଟିକାକରଣ ସୁଚାରୁରୂପେ ପରିଚାଳନା କରିବା ପାଇଁ ସ୍ଥାନୀୟ ପ୍ରଶାସନ ଅହରହ ଉଦ୍ୟମ ଜାରି ରଖିଛି।
ତେବେ ଚିଲିକା ବ୍ଲକର କେତେକ ଟୀକା କେନ୍ଦ୍ରରେ ସ୍ଥାନୀୟ କିଛି ଦଲାଲ୍ ନିଜର ସମ୍ପର୍କୀୟ ତଥା ଟୀକା ନେବାକୁ ଅପେକ୍ଷାରେ ଥିବା ନାଗରିକମାନଙ୍କ ଠାରୁ ହାତଗୁଞ୍ଜା ନେଇ ଟିକାକରଣ କରାଉଥିବା ସାଧାରଣରେ ଅଭିଯୋଗ ହେଉଛି। ଏସବୁ ଦୁର୍ନୀତି ପ୍ରଶାସନର ନାକତଳେ ହେଉଥିବା ବେଳେ ପ୍ରଶାସନ ଏହାର ଟେର ନପାଇବା ଦୁଃଖଦାୟକ।
ସାରା ରାତି ଉଜାଗର ହୋଇ ଅପେକ୍ଷାରତ ସାଧାରଣ ଜନତା ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ବେଳେ କେତେଗୋଟି ଦଲାଲଙ୍କ ଲାଗି ପ୍ରଶାସନକୁ ବଦନାମ ହେବାକୁ ପଡୁଛି। ଅନୁରୂପ ଭାବେ ଟିକାକରଣ କେନ୍ଦ୍ରଗୁଡିକରେ ସାମାଜିକ ଦୂରତା, ମାସ୍କ ପରିଧାନ ଆଦିରେ ଘୋର ଅନିୟମିତତା ମଧ୍ୟ ଦେଖାଯାଉଛି ଯାହାଦ୍ୱାରା କରୋନାରୁ ମୁକ୍ତି ପାଇବା ବଦଳରେ ଜନତା କରୋନାକୁ ଆମନ୍ତ୍ରଣ କରୁଛନ୍ତି। ପ୍ରଶାସନ ଏ ଦିଗରେ ଯଥାଶୀଘ୍ର ଏବଂ ଯଥାସମ୍ଭବ ପଦକ୍ଷେପ ନେବା ସହ ଟୀକା କେନ୍ଦ୍ର ଗୁଡ଼ିକକୁ ଦଲାଲିମୁକ୍ତ କରିବା ପାଇଁ ସାଧାରଣରେ ଦାବି ହେଉଛି।
