ଭୁବନେଶ୍ବର: ଆଜି ଭୁବନେଶ୍ବର ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହ ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ। ଏମାନେ ଭୁବନେଶ୍ବରରେ ଆୟୋଜିତ ସର୍ବଭାରତୀୟ ଡିଜି ସମ୍ମିଳନୀରେ ଯୋଗ ଦେବେ। ସେଥିପାଇଁ ପୁରା ରାଜଧାନୀକୁ ସୁରକ୍ଷା ବଳୟ ମଧ୍ୟରେ ରଖାଯାଇଛି। ଯେପରି କେଉଁଠି କିଛି ଅଘଟଣା ନ ହୁଏ ସେଥିପାଇଁ ଉଭୟ କେନ୍ଦ୍ର ରାଜ୍ୟ ସୁରକ୍ଷା କର୍ମି ସଜାଗ ରହିଛନ୍ତି।
ଆଜି ଅପରାହ୍ନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭୁବନେଶ୍ବର ବିମାନ ବନ୍ଦରରେ ପହଞ୍ଚିବେ। ବିମାନ ବନ୍ଦର ବାହାରେ ଏକ ମଞ୍ଚରେ ଅଳ୍ପ ସମୟ ପାଇଁ ସେ ନିଜର ଅଭିଭାଷଣ ରଖିବେ। ଏହାପରେ ସେ ରାଜଭବନ ଯିବେ। ସେଠାରେ କିଛି ସମୟ ରହଣୀ ପରେ ସେ ବିଜେପି ପାର୍ଟି ଅଫିସ ଆସିବେ। ସେଠାରେ ସେ ବିଜେପି ନେତାମାନଙ୍କ ସହିତ ଦୀର୍ଘ ଆଲୋଚନା କରିବେ। ଏପରିକି ନେତା, ବିଧାୟକ ସାଂସଦଙ୍କ ସହିତ ମୋଦି ରାତ୍ରୀ ଭୋଜନ କରିବେ।
ସେଥିପାଇଁ ରାଜ୍ୟ ବିଜେପି କାର୍ଯ୍ୟାଳୟକୁ ସଜାଇବା ସହିତ ପୁରା ସୁରକ୍ଷା ବଳୟ ମଧ୍ୟରେ ରଖାଯାଇଛି। ଏହି ବୈଠକରେ ଯେଉଁମାନେ ଯୋଗଦେବେ ସେମାନଙ୍କୁ କଡା ଯାଞ୍ଚ କରି ଛଡା ଯିବ ବୋଲି ଜଣାପଡିଛି। ଏହାପରେ ପ୍ରଧାନମନ୍ତ୍ରୀ ରାଜଭବନ ଫେରିଯିବେ। ଏହି ସମ୍ମିଳନୀରେ ଯୋଗଦେବା ପାଇଁ ପ୍ରଧାନମନ୍ତ୍ରୀ ତିନିଦିନ ଧରି ଭୁବନେଶ୍ବରରେ ରହିବାର କାର୍ଯ୍ୟକ୍ରମ ଅଛି।
ସର୍ବଭାରତୀୟ ଡିଜି ସମ୍ମିଳନୀ ଲୋକସେବା ଭବନର ସମ୍ମିଳନୀ କକ୍ଷରେ ଆୟୋଜିତ ହେବ। ସେଥିପାଇଁ ସେହି ସମ୍ମିଳନୀ କକ୍ଷ ଚର୍ତୁପାଶ୍ବକୁ ପୁରା ସୁରକ୍ଷା ବଳୟ ଭିତରେ ରଖାଯାଇଛି। ରାଜ୍ୟ ସରକାରଙ୍କ ତରଫରୁ ସମ୍ମିଳନୀ କକ୍ଷକୁ ପୁରା ସଜାଇ ଦିଆଯାଇଛି। ସେଠାରେ ସମ୍ମିଳନୀ ସହିତ ଚା’ପାନୀୟ ବ୍ୟବସ୍ଥା ମଧ୍ୟ କରାଯାଇଛି। ସେଠାରେ ପ୍ରଧାନମନ୍ତ୍ରୀ ଭାରତର ଡିଜି ପ୍ୟାହା ଅଧିକାରୀଙ୍କୁ ଗୁରୁମନ୍ତ୍ର ପ୍ରଦାନ କରିବେ।
ଗତକାଲି ପୋଲିସ କମିଶନେରଟ ତରଫରୁ ବିମାନ ବନ୍ଦର ସୁରକ୍ଷା ଯାଞ୍ଚ କରାଯାଇଛି। ସେଠାରେ ହୋଇଥିବା ମଞ୍ଚକୁ ମଧ୍ୟ ସୁରକ୍ଷା ବଳୟ ମଧ୍ୟରେ ରଖାଯାଇଛି। ଗତକାଲି ବିମାନ ବନ୍ଦରରୁ ରାଜଭବନ ପର୍ଯ୍ୟନ୍ତ କାରକେଡ କରାଯାଇଥିଲା। ଏଥିରେ ପ୍ରଧାନମନ୍ତ୍ରୀ କିପରି ସୁରକ୍ଷା ବଳୟ ଭିତରେ ଆସିବେ ସେ ନେଇ ପ୍ରସ୍ତୁତି କରାଯାଇଥିଲା। ଆଜି ସକାଳେ ଡିଜିପି ୱା ବି ଖୁରାନିଆ ଭୁବନେଶ୍ବରର ବିଭିନ୍ନ ସ୍ଥାନର ସୁରକ୍ଷା ବ୍ୟବସ୍ଥା ତଦାରଖ କରିଛନ୍ତି।
ଭୁବନେଶ୍ବରରେ ଭିଭିଆଇପିଙ୍କ ସୁବନ୍ଦୋବସ୍ତରେ ଚଳାଚଳ ପାଇଁ ଟ୍ରାଫିକ କଟକଣା ମଧ୍ୟ କରାଯାଇଛି। ଏହି ଭିଭିଆଇପି ଆତଯାତ କରୁଥିବା ରାସ୍ତାରେ ସାଧାରଣ ଗାଡି ଚଳାଚଳ ବାରଣ କରିଯାଇଛି। ଆଜି ଅପରାହ୍ନରୁ ଏହି କଟକଣା ଲାଗୁ ହେବ। ସେହିପରି ରାଜଧାନୀର ସମସ୍ତ ସ୍କୁଲକୁ ମଧ୍ୟ ଛୁଟି ଘୋଷଣା କରାଯାଇଛି। ଏପରିକି ମୋ ବସ ଚଳାଚଳକୁ ନିୟନ୍ତ୍ରଣ କରାଯାଇଛି।
ଏହି ତିନିଦିନିଆ ସମ୍ମିଳନୀ ଓଡିଶା ସରକାରଙ୍କ ପାଇଁ ଏକ ଚ୍ୟାଲେଞ୍ଜ। କାରଣ ଏହି ସମ୍ମିଳନୀକୁ ଭଣ୍ଡୁର କରିବା ପାଇଁ ଖଲିସ୍ଥାନୀ ଆତଙ୍କବାଦୀ ଗୁରୁପତଵନ୍ତ ସିଂ ପନ୍ନୁ ଧମକ ଦେଇଛି। ଏକ ଭିଡିଓ ବାର୍ତ୍ତା ଜାରୀ କରି ସେ ଏହି ସମ୍ମିଳନୀକୁ ଭଣ୍ଡୁର କରିବା ପାଇଁ ଅନ୍ୟ ଆତଙ୍କି ସଂଗଠନକୁ ଅନୁରୋଧ କରିଛି। ଏହି ଭିଡିଓ ଜାରୀ ପରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି।
