ନୂଆଦିଲ୍ଲୀ: ଆଜି ଆର. ଜି କର ମହିଳା ଡାକ୍ତରଙ୍କ ବଳତ୍କାର ଓ ହତ୍ୟା ଘଟଣା ମାମଲା ସୁପ୍ରିମକୋର୍ଟରେ ଶୁଣାଣି ଚାଲିଥବା ବେଳେ ଏକ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି।ସିବିଆଇର ତରଫରୁ ମାମଲା ଲଢୁଥିବା ସଲିସିଟର ଜେନେରାଲ ତୁଷାର ମେହେଟ୍ଟା ଏବଂ ପଶ୍ଚିମବଙ୍ଗର ସରକାରୀ ପରାମର୍ଶଦାତା କପିଲ ସିବଲଙ୍କ ମଧ୍ୟରେ ଏହି ଘଟଣା ଘଟିଛି। ମାମଲାର ଶୁଣାଣି ଚାଲିଥିବା ବେଳେ କପିଲ ସିବଲ କୌଣସି କଥାରେ ହସିଥିଲେ।
ସିବଲ ହସୁଥିବାର ଦେଖି ଏସଜେ ତୁଷାର ମେହେଟ୍ଟା ଅସନ୍ତୋଷ ପ୍ରକାଶ କରିଥିଲେ। ସେ ସିବଲଙ୍କୁ କହିଥିଲେ ଯେ, “କେହି ଜଣେ ପ୍ରାଣ ହରାଇଛନ୍ତି, ଅତି କମରେ ହସନ୍ତୁ ନାହିଁ।” ଗୁରୁବାର ଦିନ ଏହି ବଳାତ୍କାର ଓ ହତ୍ୟା ମାମଲାର ଶୁଣାଣି ସମୟରେ ସୁପ୍ରିମକୋର୍ଟରେ ମେହେଟ୍ଟା କିପଲ ସିବଲଙ୍କୁ ତାଗିଦ କରିଛନ୍ତି। ଯାହାକୁ ନେଇ ସେଠାରେ ଉପସ୍ଥିତ ଅନ୍ୟ ଓକିଲ ତାଜୁବ ହୋଇପଡିଥିଲେ।
“Somebody has lost their life. Don’t at least laugh,” says Solicitor General Tushar Mehta to Weat Bengal Govt counsel Kapil Sibal in Supreme Court just now: pic.twitter.com/W9LIcXDYPB
— Shiv Aroor (@ShivAroor) August 22, 2024
ଦୁଇ ବରିଷ୍ଠ ଓକିଲଙ୍କ ମଧ୍ୟରେ ପୋଲିସ ଦ୍ୱାରା ଏଫଆଇଆର ପଞ୍ଜିକରଣ ବିଳମ୍ବ ନେଇ ଯୁକ୍ତି ତର୍କ ଚାଲିଥିବା ବେଳେ ଏହି ଘଟଣା ଘଟିଥିଲା।
କୋଲକାତାର ଆର.ଜି କର ମେଡିକାଲ କଲେଜ ଏବଂ ହସ୍ପିଟାଲରେ ଜଣେ ମହିଳା ଡାକ୍ତରଙ୍କ ବଳାତ୍କାର ଓ ହତ୍ୟା ଘଟଣାର ତଦନ୍ତର ଅଗ୍ରଗତି ସମ୍ପର୍କରେ ସିବିଆଇ ଗୁରୁବାର ସୁପ୍ରିମକୋର୍ଟରେ ଏହାର ସ୍ଥିତି ରିପୋର୍ଟ ଦାଖଲ କରିଛି। ଏହି ରିପୋର୍ଟରେ ଏଜେନ୍ସି ଅନେକ ଗୁରୁତ୍ବପୂର୍ଣ୍ଣ ତଥ୍ୟ ହାସଲ କରିଛି।
ଭାରତର ମୁଖ୍ୟ ବିଚାରପତି ୱାଇ ବି ଚନ୍ଦ୍ରଚୂଡଙ୍କ ନେତୃତ୍ୱରେ ସର୍ବୋଚ୍ଚ ଅଦାଲତର ଡିଭିଜନ୍ ବେଞ୍ଚ ଏହି ମାମଲାର ଶୁଣାଣି କରୁଛନ୍ତି। ସିବିଆଇ ଏହାର ସ୍ଥିତି ରିପୋର୍ଟରେ କହିଛି ଯେ କ୍ରାଇମବ୍ରାଞ୍ଚରେ ପରିବର୍ତ୍ତନ କରାଯାଇଛି ଏବଂ ଝିଅର ମୃତ୍ୟୁକୁ ନେଇ ପୀଡିତାଙ୍କ ପରିବାର ଭ୍ରମିତ ହୋଇଛନ୍ତି। ଆତ୍ମହତ୍ୟା କାରଣରୁ ସେମାନଙ୍କ ଝିଅ ମୃତ୍ୟୁ ହୋଇଥିବା ପରିବାର ଲୋକଙ୍କୁ ସୂଚନା ଦିଆଯାଇଥିଲା ବୋଲି ସିବିଆଇ କୋର୍ଟକୁ ଜଣାଇଛି।
