Tag: ଦୁଗ୍ଧ ଉତ୍ପାଦନ

ଭୁବନେଶ୍ୱର: ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ ଗାଈ, ମଇଁଷି କିମ୍ବା କୁକୁଡା ଫାର୍ମ କଲେ 1 କୋଟି ଟଙ୍କା ପର୍ଯ୍ୟନ୍ତ ରିହାତି ମିଳିବ। କେବଳ ସେତିକି ନୁହେଁ, ଚଳିତ ମାସ 1 ତାରିଖରୁ ପଶୁ ଚିକିତ୍ସା ପାଇଁ ଏଣିକି କୌଣସି ଦେୟ ଦେବାକୁ ପଡିବ ନାହିଁ ବୋଲି କହିଛନ୍ତି ମତ୍ସ ପ୍ରାଣିସଂପଦ ବିକାଶ ଏବଂ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ। ଆଜି ଗଞ୍ଜାମ ଜିଲ୍ଲା ବ୍ରହ୍ମପୁର ମହାନଗର ନିଗମ ସମ୍ମିଳନ କକ୍ଷରେ ଆୟୋଜିତ ମୁଖ୍ୟମନ୍ତ୍ରୀ କାମଧେନୁ ଯୋଜନା ଓ ଓମଫେଡ୍ ପକ୍ଷରୁ ଚାଷୀଙ୍କୁ ପ୍ରୋତ୍ସାହନ ପ୍ରଦାନ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ସେ ଏହି କଥା କହିଛନ୍ତି। ଓମଫେଡ୍ ହେଉଛି ରାଜ୍ୟ ସରକାରଙ୍କ ପରିଚାଳନାଧିନ ଏକ ସମବାୟ ସଂସ୍ଥା। ଏହା 1980 ମସିହାରେ ଗଠିତ ହୋଇଥିଲା। ଦୀର୍ଘ 45 ବର୍ଷ ହେଲା ଏହି ସଂସ୍ଥା ଲକ୍ଷ ଲକ୍ଷ ଦୁଗ୍ଧ ଚାଷୀଙ୍କୁ ଲାଭ ଦେଇ ଆସିଛି। ତାଙ୍କର ଭଲମନ୍ଦ, ସୁଖଦୁଃରେ ଠିଆ ହୋଇଛି। ଆଜିର ଦିନରେ ସମଗ୍ର ରାଜ୍ୟରେ ମୋଟ 4 ହାଜର 5ଟି ସମବାୟ ସମିତି ଗଠନ ହୋଇଛି। ଏଥିରେ 3 ଲକ୍ଷ 32 ହାଜର 107 ସଦସ୍ୟ ପ୍ରତ୍ୟକ୍ଷ ଭାବେ ଜଡିତ ରହିଛନ୍ତି। ପରୋକ୍ଷରେ ଦେଖିବାକୁ ଗଲେ, ବିକ୍ରେତା, କର୍ମଚାରୀ, ଡିଷ୍ଟ୍ରିବ୍ୟୁଟର, ଘରୋଇ ଡ୍ରାଇଭର ଶହ ଶହ ଗାଡିର ମାଲିକ ଆଦି ଆହୁରି ଦୁଇ ଲକ୍ଷରୁ ଅଧିକ ପରିବାର ଜଡିତ ଅଛନ୍ତି। ଏହା ଏକ ବିଶାଳ ସଂସ୍ଥା ଭାବେ ରାଜ୍ୟରେ ଠିଆ ହୋଇଛି ଏବଂ ଲୋକଙ୍କୁ କର୍ମ ନିଯୁକ୍ତି ଯୋଗାଇ ଆସୁଛି । ଏବେ ରାଜ୍ୟରେ 13ଟି ଡେରୀ ପ୍ଲାଣ୍ଟ ରହିଥିବା ବେଳେ 397ଟି ଚିଲ୍ଲିଙ୍ଗ ପ୍ଲାଣ୍ଟ ବା ବଲ୍କ ମିଲ୍କ ଚିଲିଙ୍ଗ ପ୍ଲାଣ୍ଟ ରହିଛି।

ରାଜ୍ୟ ସରକାର ସେ ଏହି ସଂସ୍ଥାକୁ ଆଗକୁ ନେବା ପାଇଁ ଆପ୍ରାଣ ଉଦ୍ୟମ ଆରମ୍ଭ କରିଛନ୍ତି। ଖାଲି ଉଦ୍ୟମ ନୁହେଁ, ଏଥିପାଇଁ ଆର୍ଥିକ ସହାୟତା ମଧ୍ୟ ଦେଇଛନ୍ତି। ଚଳିତ ବଜେଟରେ ଓମଫେଡ୍ ପାଇଁ 65 କୋଟି ଟଙ୍କାର ବ୍ୟବସ୍ଥା କରିଛନ୍ତି। କାମଧେନୁ ଯୋଜନାରେ ମଧ୍ୟ ଓମଫେଡକୁ ସାମିଲ କରିଛନ୍ତି। ଦୁଗ୍ଧ ଉତ୍ପାଦନର ତିରୋଟ ସମୟରେ ଚାଷୀମାନଙ୍କୁ ଲିଟର ପିଛା  5 ଟଙ୍କା ପର୍ଯ୍ୟନ୍ତ ଅତିରିକ୍ତ ସହାୟତା ପ୍ରଦାନ ପାଇଁ ସ୍ୱୀକୃତି ଦେଇଛନ୍ତି। ଗଞ୍ଜାମ ଜିଲ୍ଲାର ଚାଷୀଭାଇମାନଙ୍କୁ ଦୁଗ୍ଧର ଗୁଣବତ୍ତା ମାପିବା ପାଇଁ ଅତ୍ୟାଧୁନିକ ଯନ୍ତ୍ର କ୍ରୟ ବାବଦରେ ଜିଲ୍ଲାପାଳ 45 ଲକ୍ଷ ଟଙ୍କା ସହାୟତା ପ୍ରଦାନ କରିବା ପାଇଁ ପ୍ରତିଶୃତି ଦେଇଛନ୍ତି। ଗଞ୍ଜାମ-ଗଜପତି ଜିଲ୍ଲାର ଓମଫେଡ୍ ଦୁଗ୍ଧ ଚାଷୀମାନଙ୍କୁ ଦୁଗ୍ଧ ବିଲ୍ ବାବଦକୁ ବିଭାଗୀୟ ମନ୍ତ୍ରୀ 68 ଲକ୍ଷ ଟଙ୍କା ପ୍ରଦାନ କରିଛନ୍ତି।

ଆମ ରାଜ୍ୟରେ ମୁଖ୍ୟମନ୍ତ୍ରୀ କାମଧେନୁ ଯୋଜନା  କାର୍ଯ୍ୟକାରୀ ହେବା ଆମ ସରକାରର ଏକ ଯୁଗାନ୍ତକାରୀ ପଦକ୍ଷେପ। ବିକଶିତ ଓଡିଶାର ଭିତ୍ତି ପ୍ରସ୍ତର ସ୍ଥାପନ ହେବ ଏହି କାମଧେନୁ ଯୋଜନା। କାରଣ ଚାଷୀର ବିକାଶ ହେଲେ, ରାଜ୍ୟ ବିକଶିତ ହେବ। ଏଣୁ ସରକାର ଚାଷୀମାନଙ୍କର ସର୍ବାଙ୍ଗୀନ ଉନ୍ନତି ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ କରିବାକୁ ଯାଉଛନ୍ତି। ତା ମଧ୍ୟରେ ଏହି ମୁଖ୍ୟମନ୍ତ୍ରୀ କାମଧେନୁ ଯୋଜନା ଅନ୍ୟତମ। ରାଜ୍ୟରେ ଏହି ଯୋଜନା କାର୍ଯ୍ୟକାରୀ ହେଲେ ଦୁଗ୍ଧ ଉତ୍ପାଦନ ବୃଦ୍ଧି ପାଇବ। ଦୁଗ୍ଧ ଉତ୍ପାଦନ କ୍ଷେତ୍ରରେ ଆମ ରାଜ୍ୟ ସ୍ୱାବଲମ୍ବି ହେବା ସହ ଚାଷୀମାନଙ୍କର ଆର୍ଥିକ ମାନଦଣ୍ଡ ସୁଦୃଢ ହେବ। ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ମତ୍ସ୍ୟ ଓ ପ୍ରାଣିସଂପଦ ବିକାଶ ବିଭାଗ ଦ୍ୱାରା ଗୋପାଳକଙ୍କ ପାଇଁ ଏକାଧିକ ଆର୍ଥିକ ସହାୟତା ପ୍ରଦାନ କରାଯାଉଛି।

• ଗୋପାଳନ, ମଇଁଷ ପାଳନ, ଗାଈ ମିଇଁଷିଙ୍କ ବୀମାକରଣ, ମାଈ ବାଛୁରୀ ପାଳନ ଏବଂ ଘାସ ଚାଷ ପାଇଁ ସରକାରଙ୍କ ପକ୍ଷରୁ ସହାୟତା ଯୋଗାଇ ଦିଆଯାଉଛି ।
• ଗୋପାଳନ ଓ ମଇଁଷି ପାଳନ ପାଇଁ 60ରୁ 70 ପ୍ରତିଶତ ରିହାତି ଦିଆଯାଉଛି ।
• ଗାଈ ମଇଁଷିଙ୍କ ବୀମାକରମ ପାଇଁ 85 ପ୍ରତିଶତ ରିହାତି ଦିଆଯାଉଛି ।
• ଅଭାବୀ ସମୟରେ ଓମ୍ଫେଡ୍, ଦୁଗ୍ଧଚାଷୀଙ୍କୁ ଲିଟର ପ୍ରତି ଅତିରିକ୍ତ 5 ଟଙ୍କା ପର୍ଯ୍ୟନ୍ତ ସହାୟତା ପ୍ରଦାନ କରିବ । ଏହା ଦ୍ୱାରା ଯେଉଁ ଦୁଗ୍ଧଚାଷୀମାନେ ସମବାୟ ସମିତି ଜରିଆରେ ଓମ୍ଫେଡକୁ ନିୟମତ କ୍ଷୀର ଦେଉଥିବେ ଏବଂ ଦୁଗ୍ଧର ସର୍ବନିମ୍ନ ଗୁଣବତ୍ତା ମାନକ ରକ୍ଷାକରୁଥିବେ, ସେମାନେ ଏହି ଅତିରିକ୍ତ ଅର୍ଥ ପାଇପାରିବେ । ଏହି ଅର୍ଥ ଡିବିଟି ମାଧ୍ୟମରେ ସିଧାସଳଖ ଚାଷୀଙ୍କ ଆକାଉଣ୍ଟକୁ ଯିବ ।
• ଘାସ ଚାଷ ପାଇଁ ବାର୍ଷିକ 2 ଲକ୍ଷ ମିନ୍ କିଟ୍ ବିନା ଦେୟରେ ପ୍ରଦାନ କରାଯାଇଛି ।
• ଘାସଚାଷ ଉଦ୍ୟୋଗ ପାଇଁ ଏକର ପ୍ରତି 3 ବର୍ଷରେ 35 ହଜାର ଟଙ୍କାର ସହାୟତା ପ୍ରଦାନ କରାଯାଉଛି।

ଏହାର ଲାଭ ଚାଷୀମାନେ ଉଠାଇବା ଦରକାର । ଗଞ୍ଜାମ ଜିଲ୍ଲାରେ କ୍ଷୀର ଘୋର ଅଭାବ ରହିଛି । ଅନ୍ୟ ଜିଲ୍ଲାରୁ ଦୁଗ୍ଧ ଆସୁଛି ଗଞ୍ଜାମ ଜିଲ୍ଲାକୁ । କେବଳ ସେତିକି ନୁହେଁ, ଖାସ୍ ଗଞ୍ଜାମ ଜିଲ୍ଲାର ଚାଷୀଙ୍କୁ ପୁନଃ ସଂଗଠିତ କରିବା ପାଇଁ ଓମ୍ଫେଡ୍ ପକ୍ଷରୁ ବିଭିନ୍ନ ସହାୟତା ପ୍ରଦାନ ପାଇଁ ବ୍ୟବସ୍ଥା ହୋଇଛି । ଏବେ ଗଞ୍ଜାମ ଜିଲ୍ଲାରେ 127ଟି ସମବାୟ ସମିତି କାର୍ଯ୍ୟକ୍ଷମ ରହିଥିବା ବେଳେ 60ରୁ ଅଧିକ ସମବାୟ ସମିତି ଅଚଳ ହୋଇଯାଇଛି । ସେଗୁଡିକୁ ପୁନଃ ସଂଗଠିତ କରିବା ସହ ଆହୁରି ନୂଆ ସମବାୟ ସମିତି ଗଠନ କରିବାକୁ ନିଷ୍ପତ୍ତି ହୋଇଛି । ଜିଲ୍ଲାର 22ଟି ବ୍ଲକରୁ 20ଟିରେ 127ଟି ସମବାୟ ସମିତି ରହିଛି । ଏଥିରେ ମୋଟ 148ଟି ଗ୍ରାମ ପଞ୍ଚାୟତରୁ ଓମ୍ଫେଡ୍ ଦୁଗ୍ଧ ସଂଗ୍ରହ କରୁଛି । ଏବେ ଜିଲ୍ଲାରେ ଦୈନିକ ପ୍ରାୟ 40 ହଜାର ଲିଟର ଦୁଗ୍ଧର ଆବଶ୍ୟକତା ରହିଥିବା ବେଳେ ଉତ୍ପାଦନ ହେଉଛି ମାତ୍ର 7ରୁ 8 ହଜାର ଲିଟର । ଅବଶିଷ୍ଟ ଦୁଗ୍ଧ ଆସୁଛି ଅନ୍ୟ ଜିଲ୍ଲାରୁ  ।

ବ୍ରହ୍ମପୁରରେ ଦୁଗ୍ଧ ପ୍ରକ୍ରିୟାକରଣ କେନ୍ଦ୍ର ରହିଛି । ଦୈନିକ 50 ହଜାର ଲିଟର ଦୁଗ୍ଧ ପ୍ରକ୍ରିୟାକରଣ ହେବାର କ୍ଷମତା ମଧ୍ୟ ରହିଛି । ଦୁଗ୍ଧଜାତ ପଦାର୍ଥ ଯଥା-ଖଟା ଓ ମିଠା ଦହି, ଖୁଆ, ପନୀର, ଛେନାପୋଡ, ଘୋଳ ଦହି, ଫ୍ଲେଭର ମିଲ୍କ ଆଦି ଉତ୍ପାଦନ ପାଇଁ ଅତ୍ୟାଧୁନିକ ଯନ୍ତ୍ରପାତି ମଧ୍ୟ ରହିଛି । ମାତ୍ର ଆବଶ୍ୟକ ପରିମାଣର ଦୁଗ୍ଧ ଉତ୍ପାଦନ ହୋଇପାରୁ ନାହିଁ । ଚାଷୀମାନଙ୍କୁ ସକ୍ରିୟ କରିବା ପାଇଁ ସରକାର ସବୁ ପ୍ରକାର ସହାୟତା ପ୍ରଦାନ କରୁଛନ୍ତି । ଚାଷୀମାନେ ଏଥିପାଇଁ ଆଗେଇ ଆସିବା ଦରକାର ବୋଲି କହିଛନ୍ତି ମାନ୍ୟବର ମତ୍ସ୍ୟ ଓ ପ୍ରାଣିସଂପଦ ମନ୍ତ୍ରୀ । ଯୁବଗୋଷ୍ଠୀ ଚାକିରୀ ପଛରେ ନଯାଇ ଚାଷ ପ୍ରତି ମନ ବଳାଇବାର ସମୟ ଆସିଯାଇଛି । ଗୋପାଳନ, ଘାସ ଚାଷ ଆଦି କରି ଉଭୟ ବାଣିଜ୍ୟ ଓ ଚାଷକୁ ଆପଣେଇ ନେବା ଉଚିତ୍ । ବିକଶିତ ଓଡିଶାର ସ୍ୱପ୍ନ ସେତେବେଳେ ସାକାର ହେବ, ଯେତେବେଳେ ଶିକ୍ଷିତ ଯୁବକ ଯୁବତୀମାନେ ଚାଷ ପ୍ରତି ଆଗ୍ରହ ପ୍ରକାଶ କରିବେ । ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ ଗୋ-ମଇଁଷି ଫାର୍ମ ପାଇଁ  1 କୋଟି ଟଙ୍କା ପର୍ଯ୍ୟନ୍ତ ରିହାତି ଦିଆଯାଉଥିବା ମନ୍ତ୍ରୀ କହିଛନ୍ତି । ତେଣୁ ଯୁବଗୋଷ୍ଠୀ ଚାଷ କରିବା ପାଇଁ ଆଗେଇ ଆସିବାକୁ ଆହ୍ୱାନ ଦେଇଛନ୍ତି ମନ୍ତ୍ରୀ । ଏଣିକି ପଶୁମାନଙ୍କୁ ମାଗଣାରେ ଚିକିତ୍ସା କରାଯିବ ବୋଲି ଘୋଷଣା କରିଛନ୍ତି ।

ଖାସ୍ କରି ଗଞ୍ଜାମ ଜିଲ୍ଲାରେ ଆଗାମୀ ତିନି ବର୍ଷ ମଧ୍ୟରେ ଅତିରିକ୍ତ 157ଟି ସମବାୟ ସମିତି ଗଠନ କରିବାକୁ ଲକ୍ଷ୍ୟ ରଖିଛୁ । ଏଥିରେ ପ୍ରାୟ 6 ହଜାର ଚାଷୀ ରହିବେ । ଏଥିରେ 2 ହଜାରର 355 ଜଣ ସଦସ୍ୟ ରହିବେ । ଦୁଗ୍ଧ ଉତ୍ପାଦନ ଦୈନିକ 15 ହଜାର ଲିଟରକୁ ବୃଦ୍ଧି କରିବା ପାଇଁ ଯୋଜନା କରାଯାଇଛି । ଉଭୟ ପ୍ରାଣୀ ସଂପଦ ଓ ଓମ୍ଫେଡ୍ ପକ୍ଷରୁ ବିଭିନ୍ନ ସୁବିଧା ଓ ସହାୟତା ଯୋଗାଇ ଦେବାକୁ ବ୍ୟବସ୍ଥା କରାଯାଇଛି । ଗୋପାଳନକୁ ପ୍ରୋତ୍ସାହିତ କରିବା ସହ ତାର ଆନୁସଂଗୀକ ବ୍ୟବସ୍ଥା କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଓମ୍ଫେଡକୁ 65 କୋଟି ଟଙ୍କା ଦିଆଯାଇଛି । ବନ୍ଦ ହୋଇପଡିଥିବା 60ଟି ସମବାୟ ସମିତିଗୁଡିକୁ ପୁନଃଗଠନ ସହ ନୂଆ ସମବାୟ ସମିତି ଗଠନ କରାଯିବ । ଏହା ଦ୍ୱାରା ଦୁଗ୍ଧ ଉତ୍ପାଦନ କ୍ଷମତା 8 ହଜାର ଲିଟରରୁ 15 ହଜାର ଲିଟରକୁ ବୃଦ୍ଧି ପାଇବ । ଚାଷୀମାନଙ୍କୁ ଆର୍ଥିକ ପ୍ରୋତ୍ସାହନ ପ୍ରଦାନ କରାଯିବ ।

ଗୁଜୁରାଟର ଆନନ୍ଦ ପ୍ରଣାଳୀରେ ଦୁଗ୍ଧଚାଷୀମାନଙ୍କଠାରୁ ସଂଗୃହୀତ ଦୁଗ୍ଧର ମାନ ପରୀକ୍ଷା କରିବା ଏବଂ ଦୁଗ୍ଧ ବିଲ୍ ବ୍ୟାଙ୍କ ଜରିଆରେ ପଇଠ କରିବାକୁ ପ୍ରଥମ ପର୍ଯ୍ୟାୟରେ 60 ଗୋଟି ଅତ୍ୟାଧୁନିକ ଦୁଗ୍ଧ ପରୀକ୍ଷା ଯନ୍ତ୍ର ପ୍ରଦାନ କରାଯାଇଛି । ସେହି ପରି 53 ଜଣ ଚାଷୀଙ୍କୁ  କାର୍ଯ୍ୟ ଆଗେଇ ନେବା ପତ୍ର (Go Ahead Letter) । ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ 3 ଟି ସୋସାଇଟକୁ 70 ଲକ୍ଷରୁ ଉର୍ଦ୍ଧ୍ୱ ଟଙ୍କା ପ୍ରଦାନ କରାଯାଇଥିବା ବେଳେ 17ଟି ସୋସାଇଟକୁ ପୁନଃ ଗଠନ ପାଇଁ 68 ଲକ୍ଷ ଟଙ୍କାର ଚେକ୍ ପ୍ରଦାନ କରାଯାଇଛି।

ଏହି କାର୍ଯ୍ୟକ୍ରମରେ ମାନ୍ୟବର ମତ୍ସ୍ୟ, ପ୍ରାଣିସଂପଦ ବିକାଶ ବିଭାଗ ଏବଂ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, ମାନ୍ୟବର ବିଧାୟକ, ଚିକିଟି ମନୋରଂଜନ ଦ୍ୟାନ ସାମନ୍ତରାୟ, ମାନ୍ୟବର ବିଧାୟକ, ବ୍ରହ୍ମପୁର କେ. ଅନୀଲ କୁମାର, କବିସୂର୍ଯ୍ୟ ନଗର ବିଧାୟକ ପ୍ରତାପ ଚନ୍ଦ୍ର ନାୟକ,  ବ୍ରହ୍ମପୁର ମହାନର ନିଗମ ମେୟର ଶ୍ରୀମତୀ ସଂଘମିତ୍ରା ଦଳେଇ, ଓମଫେଡର ସଭାପତି କିଶୋରଚନ୍ଦ୍ର ପ୍ରଧାନୀ, ଓମ୍ ଫେଡର ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ, ଗଞ୍ଜାମ ଜିଲ୍ଲାପାଳ ଦିବ୍ୟଜ୍ୟୋତି ପରିଡା ପ୍ରମୁଖ ମଂଚାସୀନ ଥିଲେ। ଅନ୍ୟମାନଙ୍କ ମଧ୍ୟରେ ଓମଫେଡର ଜେନେରାଲ ମ୍ୟାନେଜର(ଫାଇନାନ୍ସ) ସୁରେଶ କୁମାର ଅଲଟିଆ, ଡେପୁଟି ଜେନେରାଲ ମ୍ୟାନେଜର (ମାନବସମ୍ବଳ)ଜୟକୃଷ୍ଣ ପଟ୍ଟନାୟକ, ଡେପୁଟି ଜେନେରାଲ ମ୍ୟାନେଜର ବିଶ୍ୱରଂଜନ ତ୍ରିପାଠୀ, ନିତ୍ୟାନନ୍ଦ ମିଶ୍ର, ପ୍ରାଣିସଂପଦ ବିଭାଗ ଉପନିର୍ଦ୍ଦେଶକ ମଦନମୋହନ ମହାପାତ୍ର, ବ୍ରହ୍ମପୁର ପ୍ଲାଣ୍ଟ ପରିଚାଳକ ହେମନ୍ତ କୁମାର ଓଝାଙ୍କ ସହ ଟିମ୍ ଓମଫେଡ୍ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମରେ ଜିଲ୍ଲାର ଶହ ଶହ ଚାଷୀ ଭାଇ ଭଉଣୀମାନେ ଯୋଗଦେଇଥିଲେ।

ଭୁବନେଶ୍ୱର: ଦୁଗ୍ଧ ଉତ୍ପାଦନ ଓ ସଂଗ୍ରହ ବୃଦ୍ଧି କରିବା ଉପରେ ଗୁରୁତ୍ୱାରୋପ କରିଛନ୍ତି ଓମ୍ଫେଡ୍ ର ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ। ରାଜ୍ୟରେ ଅଧିକ ଦୁଗ୍ଧ ଚାଷୀ ସୃଷ୍ଟି କରିବା ସହ ଦୁଗ୍ଧ ସଂଗ୍ରହ ବୃଦ୍ଧି କରିବା ଦରକାର। ଏଥିପାଇଁ ତୃଣମୂଳସ୍ତରରୁ ଯୋଜନା ପ୍ରସ୍ତୁତ କରିବାକୁ ସେ ସମସ୍ତଙ୍କୁ ପରାମର୍ଶ ଦେଇଛନ୍ତି। ଆଜି କଟକ ମିଲ୍କ ୟୁନିୟନ ମୁଖ୍ୟ କାର୍ଯ୍ୟାଳୟଠାରେ ସମସ୍ତ ୟୁନିଟ୍ ଇନ୍-ଚାର୍ଯ୍ୟ ଓ ସୁପରଭାଇଜରଙ୍କୁ ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ଏଥିରେ ଦୁଗ୍ଧ ସଂଗ୍ରହ ପାଇଁ ପ୍ରତ୍ୟେକ ୟୁନିଟ୍ ତୃଣମୂଳସ୍ତରରୁ କେମିତି ଯୋଜନା ପ୍ରସ୍ତୁତ କରିବେ, ସେ ସଂପର୍କରେ ବିସ୍ତୃତ ଭାବେ ବୁଝାଇଥିଲେ। ଦୁଗ୍ଧ ଉତ୍ପାଦନ ବୃଦ୍ଧି କରିବା ସହ ଘାସ ଚାଷ ଉପରେ ମଧ୍ୟ ସେ ଗୁରୁତ୍ୱାରୋପ କରିଛନ୍ତି। ଗାଈମାନେ ଉପଯୁକ୍ତ ଗୋ ଖାଦ୍ୟ ପାଇଲେ, ଦୁଗ୍ଧ ଉତ୍ପାଦନ କିଛି ମାତ୍ରାରେ ବୃଦ୍ଧି ପାଇବ ବୋଲି ସେ ମତଦେଇଥିଲେ।

କ୍ଷୀରଧାରା କେନ୍ଦ୍ର ଖୋଲିବା ପାଇଁ ମଧ୍ୟ ଓମ୍ଫେଡ୍ ପକ୍ଷରୁ ପଦକ୍ଷେପ ନିଆଯାଉଛି। ବିଭିନ୍ନ ପଞ୍ଚାୟତରେ କ୍ଷୀର ଧାରା କେନ୍ଦ୍ର ସୃଷ୍ଟି କରାଗଲେ, ଦୁଗ୍ଧ ସଂଗ୍ରହ ଓ ବିକ୍ରି ବୃଦ୍ଧି ପାଇବ ବୋଲି ସେ କହିଛନ୍ତି। ତୃଣମୂଳ ସ୍ତରରେ ଚାଷୀମାନଙ୍କୁ ଚିହ୍ନଟ କରିବା ଏବଂ ସେମାନଙ୍କୁ ମୁଖ୍ୟମନ୍ତ୍ରୀ କାମଧେନୁ ଯୋଜନା ଓ ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ ସାମିଲ କରିବା ପାଇଁ ପଦକ୍ଷେପ ନେବାକୁ ସେ ନିର୍ଦେଶ ଦେଇଛନ୍ତି। ଏହା ଦ୍ୱାରା ରାଜ୍ୟରେ ଦୁଗ୍ଧ ଚାଷୀ ସଂଖ୍ୟା ବୃଦ୍ଧି ପାଇବା ସହ ଦୁଗ୍ଧ ଉତ୍ପାଦନ ବୃଦ୍ଧି ପାଇବ।

କେବଳ ସେତିକି ନୁହେଁ, ମାଈ ବାଛୁରୀ ପ୍ରଜନନ ପାଇଁ ଚାଷୀମାନଙ୍କୁ ଉତ୍ସାହିତ କରାଯାଉଛି। ମାଈ ବାଛୁରୀ ପ୍ରଜନନ ଏବଂ ସେମାନଙ୍କର ରକ୍ଷଣାବେକ୍ଷଣ ପାଇଁ ଓମ୍ଫେଡ ପକ୍ଷରୁ ଚାଷୀମାନଙ୍କୁ ବିଭିନ୍ନ ସୁବିଧା ଯୋଗାଇ ଦିଆଯାଉଛି। ସେହି ସୁବିଧାଗୁଡିକ ଯେପରି ପ୍ରତ୍ୟେକ ଚାଷୀଙ୍କ ନିକଟରେ ପହଞ୍ଚିବ ସେଥିପ୍ରତି ମଧ୍ୟ ସମସ୍ତେ କାମ କରିବା ଦରକାର। ମାଈ ବାଛୁରୀ ସଂଖ୍ୟା ବୃଦ୍ଧି ପାଇଲେ ଦୁଗ୍ଧ ଉତ୍ପାଦନ ବୃଦ୍ଧି ପାଇବ। ସେଥିପାଇଁ ଓମ୍ଫେଡ୍ ପକ୍ଷରୁ ରିହାତି ଦରରେ ଗୋଖାଦ୍ୟ, ଔଷଧ, ଚିକିତ୍ସା ସୁବିଧା ଆଦି ପ୍ରଦାନ କରାଯାଉଛି। ଓମ୍ଫେଡ୍ ଉତ୍ପାଦର ଚାହିଦା ଦିନକୁ ଦିନ ବୃଦ୍ଧି ପାଉଥିବା ବେଳେ ସେହି ଅନୁସାରେ ଦୁଗ୍ଧ ଉତ୍ପାଦନ ଓ ସଂଗ୍ରହ ଉପରେ ମଧ୍ୟ ଓମ୍ଫେଡ୍ ଗୁରୁତ୍ୱାରୋପ କରୁଛି। ଏହା ଦ୍ୱାରା ଅଧିକ ଚାଷୀ ସୃଷ୍ଟି ହୋଇପାରିବେ ଏବଂ ବର୍ଷସାରା ସେମାନେ ରୋଜଗାର ପାଇବେ। ଫଳରେ ରାଜ୍ୟର ଆର୍ଥିକ ବିକାଶ ଘଟିବା ସହ ଶିକ୍ଷିତ ବେକାରମାନେ ଆତ୍ମ ନିଯୁକ୍ତି ପାଇପାରିବେ ବୋଲି କରିଛନ୍ତି ଓମ୍ଫେଡ୍ ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ।

ଅନ୍ୟମାନଙ୍କ ମଧ୍ୟରେ ଓମ୍ଫେଡ୍ ର ବୈଷୟିକ ପରାମର୍ଶଦାତା ତଥା କଟକ ମିଲ୍କ ୟୁନିୟନର ଜେନେରାଲ ମ୍ୟାନେଜର ଡକ୍ଟର ଦିଗମ୍ବର ନାୟକ, ସମସ୍ତ ୟୁନିଟ୍ ଇନ-ଚାର୍ଯ୍ୟ, ସୁପରଭାଇଜର ପ୍ରମୁଖ ଉପସ୍ଥିତ ଥିଲେ।