ଥାନେ: ମହାରାଷ୍ଟ୍ରର ଅହମ୍ମଦନଗର ଜିଲ୍ଲାର ଶିରିଡି ସହରରେ ଦାରିଦ୍ର୍ୟତା ହେତୁ ଜଣେ ମହିଳା ନିଜର ତିନି ଦିନର ଶିଶୁକୁ ବିକ୍ରି କରିଦେଇଥିବା ଅଭିଯୋଗ ହୋଇଛି। ମହିଳାଜଣଙ୍କ ମୁମ୍ବାଇର ଜଣେ ବ୍ୟକ୍ତିଙ୍କୁ ୧.୭୮ ଲକ୍ଷ ଟଙ୍କାରେ ବିକ୍ରି କରିଥିବା ଅଭିଯୋଗ ହୋଇଛି। ବୁଧବାର ପୋଲିସ ଏହି ସୂଚନା ଦେଇଛି। ନଭେମ୍ବର ୭ ତାରିଖରେ ଥାନାର ଡୋମ୍ବିଭଲି ସହରର ମନପଡା ପୋଲିସ ଷ୍ଟେସନରେ ଏ ସମ୍ପର୍କରେ ଏଫଆଇଆର ଦାଖଲ କରାଯାଇଛି। ଏହି ମାମଲାରେ ପୋଲିସ ମହିଳାଙ୍କୁ, ପିଲା କିଣିଥିବା ବ୍ୟକ୍ତିଙ୍କୁ ଏବଂ ଅନ୍ୟ ଚାରି ଜଣଙ୍କୁ ଅଟକ ରଖିଛି।
ମନପଡା ପୋଲିସ ଷ୍ଟେସନର ଜଣେ ଅଧିକାରୀ କହିଛନ୍ତି ଯେ, ପରିବାରର ଆର୍ଥିକ ଅବସ୍ଥା ଭଲ ନ ଥିବାରୁ ମହିଳା ପ୍ରସବ ପରେ ଶିଶୁର ଯତ୍ନ ନେବା ସ୍ଥିତିରେ ନଥିଲେ। ଏହା ପରେ ସେ ପିଲାଟିକୁ ବିକ୍ରୟ କରିବା ପାଇଁ ଗ୍ରାହକ ଖୋଜିବା ଆରମ୍ଭ କରିଥିଲେ। ସମ୍ପୃକ୍ତ ମହିଳାଙ୍କୁ ଏହି କାର୍ଯ୍ୟରେ ତିନିଜଣ ମହିଳା ସାହାଯ୍ୟ କରିଥିଲେ। ତା’ପରେ ସେମାନେ ଶିଶୁଟିକୁ ମୁଲୁଣ୍ଡରେ ରହୁଥିବା ବ୍ୟକ୍ତିଙ୍କ ନିକଟରେ ବିକ୍ରୟ କରିବାକୁ ଚୁକ୍ତି କରିଥିଲେ। ଅନ୍ୟ ଅଭିଯୁକ୍ତଙ୍କ ସହାୟତାରେ ଶିଶୁର ମା’ କୌଣସି ଆଇନଗତ ଔପଚାରିକତା ବିନା ପିଲାଟିକୁ ୧.୭୮ ଲକ୍ଷ ଟଙ୍କାରେ ବିକ୍ରି କରିଦେଇଥିଲେ।
