Tag: ନାକଟିଦେଉଳ ବ୍ଲକ

ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ପ୍ରଶାସନ ତରଫରୁ ନାକଟିଦେଉଳ ବ୍ଲକ କାର୍ଯ୍ୟାଳୟର ସମ୍ମିଳନୀ କକ୍ଷଠାରେ ଜିଲ୍ଲାପାଳ ଏବଂ ଏସପିଙ୍କ ଯୁଗ୍ମ ଅଭିଯୋଗ ଶୁଣାଣି ଅନୁଷ୍ଠିତ ହୋଇଯାଇଛି। ଜିଲ୍ଲାପାଳ ସିଦ୍ଧେଶ୍ବର ବଳିରାମ ବୋନ୍ଦରଙ୍କ ଅଧ୍ୟକ୍ଷତାରେ ଆୟୋଜିତ ଅଭିଯୋଗ ଶୁଣାଣିରେ ଅନ୍ୟମାନଙ୍କ ମଧ୍ୟରେ ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ପ୍ରସନ୍ନ କୁମାର ପାତ୍ର, ରେଢ଼ାଖୋଲ ଉପଜିଲ୍ଲାପାଳ ରଶ୍ମି ରଞ୍ଜନ ମହାନ୍ତ, ବିଡ଼ିଓ କ୍ଷମାନିଧି ଭୋଇ ନାକଟିଦେଉଳ ବ୍ଲକ ଅଧ୍ୟକ୍ଷା ସ୍ୱରୂପାରାଣୀ ସାହୁ, ଉପାଧ୍ୟକ୍ଷ ଜିତେନ୍ଦ୍ର କୁମାର ପ୍ରଧାନ, ସମେତ ଜିଲ୍ଲା ସ୍ତରୀୟ ଅଧିକାରୀ ମାନେ ଉପସ୍ଥିତ ଥିଲେ।

ଯୁଗ୍ମ ଅଭିଯୋଗ ଶୁଣାଣୀରେ ମୋଟ ୬୨ ଟି ଅଭିଯୋଗ ପଞ୍ଜିକୃତ ହୋଇଥିବା ବେଳେ ସେଥି ମଧ୍ୟରୁ ୪୬ ଟି ବ୍ୟକ୍ତିଗତ ଓ ୧୬ ଟି ସାମୂହିକ ରହିଥିଲା। ୨(ଦୁଇ ) ଜଣଙ୍କୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୨୦ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯାଇଛି।  ବିଶେଷ କରି ଜଳସେଚନ, ବିଦ୍ୟୁତ ଯୋଗାଣ, ପାନୀୟ ଜଳ, ନେଟୱାର୍କ ସମସ୍ୟା, ସମ୍ବଲପୁର ରୁ ନାକଟିଦେଉଳ ସରକାରୀ ବସ ଚାଲିବା, ବାଟଗାଁ ରେ ପୋଲିସ ଫାଣ୍ଡି, ଡାକ୍ତରଖାନାରେ ଡାକ୍ତର ନିଯୁକ୍ତି ଓ ପୋଷ୍ଟ ମୋଟମ ଗୃହ ନିର୍ମାଣ,ଭତ୍ତା, ପିଡିଏସ ଚାଉଳ ଯୋଗାଣ ଭଳି ଅଭିଯୋଗ ପଞ୍ଜିକୃତ ହୋଇଥିଲା।

ପାନୀୟ ଜଳ ଜନିତ ଅଭିଯୋଗ ଆସିଲେ ତାକୁ ଯୁଦ୍ଧକାଳୀନ ଭିତ୍ତିରେ ସମାଧାନ କରିବାକୁ ସମ୍ପୃକ୍ତ ବିଭାଗକୁ ଜିଲ୍ଲାପାଳ କଡା ନିର୍ଦ୍ଦେଶ ଦେଇଛନ୍ତି। ଏହା ଛଡା ଜନଶୁଣାଣୀ ପୋର୍ଟାଲ, ଯୁଗ୍ମ ଅଭିଯୋଗ ଶୁଣାଣୀ ଏବଂ ସିଏମ ପୋର୍ଟାଲରେ ଆସୁଥିବା ସମସ୍ତ ଅଭିଯୋଗ ଗୁଡିକୁ ଗୁରୁତ୍ୱ ଦେଇ ତାର ସମାଧାନ ଦିଗରେ ପଦକ୍ଷେପ ନେବାପାଇଁ ଜିଲ୍ଲାପାଳ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି।

ରେଢ଼ାଖୋଲ (କନ୍ଦର୍ପ ବେହେରା): ନାକଟିଦେଉଳ ବ୍ଲକରେ ବିଡ଼ିଓ କ୍ଷମାନିଧି ଭୋଇଙ୍କ ସଭାପତିତ୍ବ ରେ ଆକାଂକ୍ଷୀ ବ୍ଲକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି।

ଏହି ସମୀକ୍ଷା ବୈଠକ ରେ ୩୯ଟି ଇଣ୍ଡିକେଟର ଉପରେ ସମୀକ୍ଷା ହୋଇଥିଲା। ଗର୍ଭବତୀ ମା ଙ୍କ ସ୍ୱାସ୍ଥ୍ୟ, ଶିଶୁ ମାନଙ୍କ ଯତ୍ନ, ସ୍ୱଚ୍ଛତା, ପାଇଖାନା ଆଦି ୩୯ ଟି ବିଷୟରେ ସମୀକ୍ଷା କରା ଯାଇଥିଲା।

ସମ୍ବଲପୁର ଜିଲ୍ଲା ୯ଟି ବ୍ଲକ ମଧ୍ୟରୁ ନାକଟିଦେଉଳ ବ୍ଲକ ଆକାଂକ୍ଷୀ ବ୍ଲକ (ପଛୁଆ ବ୍ଲକ)ଭାବରେ ସରକାର ହାତକୁ ନେଇଛନ୍ତି।

ଏହି ସମୀକ୍ଷା ବୈଠକରେ ସ୍ୱାସ୍ଥ୍ୟ, ଶିଶୁବିକାଶ, କୃଷି ଆଦି ବିଭାଗ ସହ ଏବିଡ଼ିଓ ବିଦ୍ୟାଧର ରାଉତରାୟ, ଏବିଏଫ କେ. ସି. ପଣ୍ଡା ପ୍ରମୁଖ ଅଧିକାରୀ ମାନେ ଉପସ୍ଥିତ ଥିଲେ।

ରେଢ଼ାଖୋଲ (କନ୍ଦର୍ପ ବେହେରା): ସରକାର ଗ୍ରାମାଞ୍ଚଳର ରାସ୍ତା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଏବେ ବି ସ୍ୱାଧୀନତାର ୭୭ ବର୍ଷ ପରେ ମଧ୍ୟ ଗ୍ରାମାଞ୍ଚଳକୁ ଗମନା ଗମନ ପାଇଁ ଭଲ ରାସ୍ତା ଟିଏ ମଧ୍ୟ ନାହିଁ। ଯା’ ଫଳରେ ରୋଗୀ ଆମ୍ବୁଲାନ୍ସରେ ଡାକ୍ତରଖାନାକୁ ଯାଇପାରୁ ନାହିଁ। ବାଧ୍ୟ ହୋଇ ଆମ୍ବୁଲାନ୍ସ କର୍ମଚାରୀ ରୋଗୀକୁ ଖଟିଆରେ ଭାର କରି ବୋହିବା ଭଳି ଅଭାବନୀୟ ଘଟଣା ଦେଖିବାକୁ ମିଳୁଛି।

ରେଢ଼ାଖୋଲ ସବଡ଼ିଭିଜନ ନାକଟିଦେଉଳ ବ୍ଲକର କିସିଣ୍ଡା ଥାନା ଅଂଚଳରେ ସେମିତି ଏକ ଘଟଣା ଘଟିଛି। ରାସ୍ତା ନ ଥିବାରୁ ପ୍ରସୂତି ମହିଳାଙ୍କୁ ପାଖାପାଖି ୩ କିମି ଖଟିଆରେ ୧୦୮ ଆମ୍ବୁଲାନ୍ସ କର୍ମଚାରୀ ବୋହି ନେଇ ଉଦାହରଣ ପାଲଟିଛନ୍ତି।

ନାକଟିଦେଉଳ ବ୍ଳକ କିସିଣ୍ଡା ପଂଚାୟତ ଅନ୍ତର୍ଗତ କାଙ୍କଦର ଗ୍ରାମର ଲଣ୍ଡାକୋଟ ସାହିର ସୁଜିତ ଲମଗାଙ୍କର ସ୍ତ୍ରୀ ଗୀତା ଲମଗା ଗର୍ଭ ଯନ୍ତ୍ରଣା ହେବାରୁ ତାଙ୍କୁ ଡାକ୍ତରଖାନା ଆଣିବା ପାଇଁ ୧୦୮ ଆମ୍ବୁଲାନ୍ସ କୁ ଫୋନ କରିଥିଲେ। ତୁରନ୍ତ ତାଙ୍କ ପାଇଁ ଆମ୍ବୁଲାନ୍ସ ପଠାଯାଇଥିଲା। ହେଲେ ରାସ୍ତା ନଥିବାରୁ ତାଙ୍କ ଘରଠାରୁ ୩ କିମି ଦୂର କାଙ୍କଦରଠାରେ ଆମ୍ବୁଲାନ୍ସ ଅଟକି ଯାଇଥିଲା।

ମୋବାଇଲ ନେଟୱାର୍କ ନ ଥିବାରୁ ସେଠାରେ କିଛି ସମୟ ଆମ୍ବୁଲାନ୍ସ କର୍ମଚାରୀମାନେ ସୁଜିତଙ୍କ ସହିତ ଯୋଗାଯୋଗ କରିବାରେ ସମସ୍ୟା ସୃଷ୍ଟି ହୋଇଥିଲା। କାଙ୍କଦର ଗ୍ରାମବାସୀଙ୍କ ସହାୟତାରେ ଆମ୍ବୁଲାନ୍ସ କର୍ମଚାରୀ ଲଣ୍ଡାକୋଟ ପହଞ୍ଚିବା ସହ ଏକ ଖଟିଆ ଯୋଗେ ଗର୍ଭବତୀ ମହିଳାଙ୍କୁ ଆମ୍ବୁଲାନ୍ସ ନିକଟକୁ ବୋହି ଆଣିଥିଲେ ଏବଂ ତାଙ୍କୁ ନିକଟସ୍ଥ ନାକଟିଦେଉଳ ଡାକ୍ତରଖାନା ଆଣିବା ସମୟରେ ରାସ୍ତାରେ ଆମ୍ବୁଲାନ୍ସ ଭିତରେ ଶିଶୁକନ୍ୟାକୁ ପ୍ରସବ କରିଥିଲେ। ଏବଂ ପରେ ତାଙ୍କୁ ଆମ୍ବୁଲାନ୍ସ କର୍ମଚାରୀ ସ୍ବାଗତ ସିଂ, ଶ୍ରବଣ ସାହୁ ଓ ଅନିଲ ପ୍ରଧାନ ନିକଟସ୍ଥ ନାକଟିଦେଉଳ ଡାକ୍ତରଖାନାରେ ସକାଳ ୦୮:୪୫ ମିନିଟ୍ ରେ ଭର୍ତ୍ତି କରିଥିଲେ।

ଆମ୍ବୁଲାନ୍ସ କର୍ମଚାରୀଙ୍କ ଏଭଳି ସେବା ମନୋଭାବକୁ ଅଂଚଳବାସୀ ପ୍ରଶଂସା କରିବା ସହିତ ସବୁଦିନିଆ ରାସ୍ତା ନିର୍ମାଣ ପାଇଁ ଦାବି କରିଛନ୍ତି।

ସମ୍ବଲପୁର/ରେଢ଼ାଖୋଲ (କନ୍ଦର୍ପ ବେହେରା): ମହିଳା ସ୍ୱୟଂ ସହାୟିକା ଗୋଷ୍ଠୀଙ୍କ ଖାତାକୁ ଆସିଥିବା ଜଳ ଵିଭାଜିକା ବିଭାଗର ଅର୍ଥକୁ ପଞ୍ଚାୟତର ଏମବିକେ ଓ ସିଆରପି ହେରଫେର କରିଥିବା ଅଭିଯୋଗରେ ଶତାଧିକ ମହିଳା ନାକଟିଦେଉଳ ବ୍ଲକ ଅଫିସ ଘେରାଉ କରିଛନ୍ତି।

ସୂଚନା ଥାଉକି, ଗତ ଜୁନ ୨୬ ତାରିଖରେ ଦେଇଥିବା ଦାବୀ ପତ୍ର ସମାଧାନ ନ ହେବାରୁ ଶୁକ୍ରବାର ସମ୍ବଲପୁର ଜିଲ୍ଲା, ନାକଟିଦେଉଳ ବ୍ଲକ ଗିରିଶ୍ଚନ୍ଦ୍ରପୁର ପଞ୍ଚାୟତର‌ ଶତାଧିକ ମହିଳା ସ୍ଥାନୀୟ ହାଟପଦାରୁ ଏକ ପ୍ରତିବାଦ ଶୋଭାଯାତ୍ରାରେ ବାହାରି ବ୍ଲକ ଘେରାଉ କରିଛନ୍ତି। ପରିସ୍ଥିତି ଏପରି ହେଲା ଯେ ପୋଲିସ ଉପସ୍ଥିତିରେ ମହିଳା ମାନେ ବିଡ଼ିଓ ଙ୍କ ଚ୍ୟାମ୍ଵର କୁ ଧସେଇ ପଶିବାକୁ ଚେଷ୍ଟା କରିଥିଲେ।

ସୂଚନାରୁ ପ୍ରକାଶ ଜଳ ବିଭାଜିକା ମିଶନରୁ ପ୍ରତ୍ୟେକ ମହିଳା ସଂଘ ଖାତାକୁ ୪ ଲକ୍ଷ ଟଙ୍କା ଆସିଥିବା ବେଳେ, ଚଞ୍ଚକତା କରି ଏହି ପଞ୍ଚାୟତର ଏମବିକେ ଓ ସିଆରପି ସେହି ଅର୍ଥକୁ ଉଠାଇ ନେଇଥିବା ଅଭିଯୋଗ କରିଛନ୍ତି ମହିଳା ସଂଘ। ଏହି ଦୁଇ ସିଆରପି ଓ ଏମଵିକେ କୁ ବହିଷ୍କାର ଦାବି ନେଇ ମହିଳା ସଂଘ ଦାବି କରିଛନ୍ତି।

ଆମ ଦାବି ପୂରଣ ନହେଲେ ଆମେ ଗୃପ ଭାଂଗି‌ ଦେଵୁ ବୋଲି ଆନ୍ଦୋଳନ କାରୀ ମହିଳାମାନେ କହୁଥିବା ବେଳେ ଅନ୍ୟ ପଟରେ ମହିଳା ସଂଘର ଅଭିଯୋଗ ନେଇ ତଦନ୍ତ ହୋଇଛି। ତଦନ୍ତ ରିପୋର୍ଟ ଜିଲ୍ଲାପାଳ ଓ ଉପଜିଲ୍ଲାପାଳଙ୍କୁ ପ୍ରଦାନ କରାଯାଇଛି।

ଅଭିଯୋଗରେ କୈାଣସି ସତ୍ୟା ସତ୍ୟ ନାହଁ ବୋଲି ନାକଟିଦେଉଳ ବିଡିଓ ଧନେଇ ଚରଣ ଟୁଡୁ ପ୍ରକାଶ କରିଅଛନ୍ତି। ଆସନ୍ତାକାଲି ବ୍ୟାଙ୍କ ଷ୍ଟେଟମେଣ୍ଟ ଆଣି ସତ୍ୟାସତ୍ୟର ପ୍ରମାଣ ଦେବି ବୋଲି ବିଡ଼ିଓ କହିବାରୁ ଆନ୍ଦୋଳନକାରୀ ସଦସ୍ୟାମାନେ ଆନ୍ଦୋଳନରୁ ଓହରି ଥିଲେ।

ସେହିପରି ସେହି ଗିରିଶ୍ଚନ୍ଦ୍ରପୁର ପଞ୍ଚାୟତର କଞ୍ଚନପୁର ଓ ପାଣିଗ୍ରାହୀପାଲି ଗ୍ରାମର ଏସଏଚଜି ସଦସ୍ୟା ମାନେ ଜଳ ଵିଭାଜିକା ଅର୍ଥ ହେରଫେର ନେଇ ବିଡ଼ିଓଙ୍କ ଠାରେ ଏକ ଦାବୀ ପତ୍ର ଦେଇଥିବା ଜଣା ପଡିଛି।

ରେଢ଼ାଖୋଲ (କନ୍ଦର୍ପ ବେହେରା): ନାକଟିଦେଉଳ ବ୍ଲକ କିସିଣ୍ଡା ଥାନା ଅନ୍ତର୍ଗତ କୁସୁମ ପଡା ଛକରେ ଆଜି ଅପରାହ୍ନରେ ବାଇକ୍ ଦୁର୍ଘଟଣାରେ ଜଣେ ଯୁବକର ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ହୋଇ ବୁର୍ଲା ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ମୃତ ଯୁବକ ଜଣକ ହେଲେ ଖନ୍ଦିବାହାଲ ଗ୍ରାମର ଦିବ୍ୟସିଂହ ରାଉଳ ଓ ଆହତ ଜଣକ ହେଲେ ଦୁର୍ବାଦଳ ମଲ୍ଲିକ।

ସୂଚନାଯୋଗ୍ୟ ଯେ, ଖନ୍ଦିବାହାଲ ଗ୍ରାମର ଦୁଇ ଯୁବକ କିସିଣ୍ଡାରୁ ବାଇକ୍ ଯୋଗେ ଖନ୍ଦିବାହାଲ ନିଜ ଘରକୁ ଆସୁଥିବା ବେଳେ ବାଇକଟି ଦ୍ରୁତ ଗତିରେ ଥିବାରୁ ଭାରସାମ୍ୟ ହରାଇ ରାସ୍ତା ପାର୍ଶ୍ଵରେ ଥିବା ଏକ ଘର କାନ୍ଥରେ ଧକ୍କା ହୋଇଥିଲା। ଫଳରେ ଘଟଣା ସ୍ଥଳରେ ଦିବ୍ୟସିଂହ ରାଉଳ ଙ୍କ ମୃତ୍ୟୁ ହୋଇଥିବା ବେଳେ ଦୁର୍ବାଦଳ ମଲ୍ଲିକ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ଉଦ୍ଧାର କରି ରେଢ଼ାଖୋଲ ଡାକ୍ତରଖାନା ପଠାଇ ଥିବାବେଳେ ଅବସ୍ଥା ଗୁରୁତର ଥିବାରୁ ବୁର୍ଲା ସ୍ଥାନାନ୍ତରିତ କରାଯାଇଛି।

ତେବେ କିସିଣ୍ଡା ପୋଲିସ କେସ ନ -୩୩/୨୪, ୟୁ/ଏସ ୨୭୯/୩୨୩/୩୦୪(ଏ)ଆଇ ପି ସି ଆକ୍ଟ ରେ ମାମଲା ରୁଜୁ କରି ଶବ ବ୍ୟବଛେଦ ପାଇଁ ରେଢ଼ାଖୋଲ ପଠାଇଥିବା ଜଣା ପଡିଛି।

କନ୍ଦର୍ପ ବେହେରା
ରେଢାଖୋଲ: ରାଜ୍ୟରେ ଦୁର୍ନୀତିଗ୍ରସ୍ତ, ଭ୍ରଷ୍ଟାଚାରୀ ଓ ଅଗଣତାନ୍ତ୍ରିକ ସରକାର ଚାଲିଥିବା ଅଭିଯୋଗ କରି ରାଜ୍ୟ ସରକାର ବିରୁଦ୍ଧରେ ବିଜେପି ନାକଟିଦେଉଳ ବ୍ଲକ ଅଫିସ ଘେରାଉ କରିଛି। ରାଜ୍ୟ କାର୍ଯ୍ୟକାରିଣୀ ସଦସ୍ୟ ତଥା ରେଢ଼ାଖୋଲ ବିଧାନସଭା ବିଧାୟକ ପ୍ରାର୍ଥୀ ଦେବେନ୍ଦ୍ର ମହାପାତ୍ରଙ୍କ ନେତୃତ୍ୱରେ ବହୁ ସଂଖ୍ୟାରେ ମହିଳା ଓ ସାଧାରଣ ଜନତା ନାକଟିଦେଉଳ ହାଟପଦାରୁ ଏକ ବିଶାଳ ଶୋଭାଯାତ୍ରାରେ ନାକଟିଦେଉଳ ଛକ ଦେଇ ବ୍ଲକ କାର୍ଯ୍ୟାଳୟରେ ପହଞ୍ଚି ଥିଲେ। ବ୍ଲକ ପରିସରରେ ଏକ ପ୍ରତିବାଦ ସଭା ଆୟୋଜନ କରଯାଇଥିଲା।

ପ୍ରତିବାଦ ସଭାରେ ପୂର୍ବତନ ଜିଲ୍ଲା ପରିଷଦ ସଭ୍ୟ ପ୍ରମୋଦ କୁମାର ସାହୁ ସଭାପତିତ୍ୱ କରିଥିଲେ। ବିଜେପି ଜିଲ୍ଲା ସଭାପତି ଗିରିଶ ପଟେଲ ଯୋଗଦେଇ ରାଜ୍ୟ ସରକାରଙ୍କ ଅପାରଗତା, ଭ୍ରଷ୍ଟାଚାର ଓ ଦୁର୍ନୀତି ବିରୁଦ୍ଧରେ ଏହି ସମାବେଶ କରାଯାଇଥିବା କହିଥିଲେ ଏବଂ କେନ୍ଦ୍ର ସରକାରଙ୍କ ଲୋକାଭିମୁଖୀ ଯୋଜନା ସମ୍ପର୍କରେ କହିଥିଲେ।

ଏହି କାର୍ଯ୍ୟକ୍ରମରେ ଦେବେନ୍ଦ୍ର ମହାପାତ୍ରଙ୍କ ସହ ଓବିସି ରାଜ୍ୟ ବିଜେପି ମୋର୍ଚ୍ଚା ସମ୍ପାଦିକା ତଥା ସାଂସଦ ପ୍ରତିନିଧି ସସ୍ମିତା ଦେହୁରୀ, ଜୋନ -୧ ମଣ୍ଡଳ ସଭାପତି ନେତ୍ରାନନ୍ଦ ରାଉଳ, ବ୍ଲକ ଯୁବ ମୋର୍ଚ୍ଚା ସଭାପତି ପ୍ରଶାନ୍ତ କୁମାର ଦାସ, ଅଶୋକ କୁମାର ପ୍ରଧାନ, ବିଜୟ କୁମାର ପଣ୍ଡା ପ୍ରମୁଖ ସାମିଲ ଥିଲେ। ନାକଟିଦେଉଳ ବିଡ଼ିଓ ଧନେଇ ଚରଣ ଟୁଡୁ ଆନ୍ଦୋଳନକାରିଙ୍କ ଠାରୁ ରାଜ୍ୟପାଳଙ୍କ ଉଦ୍ଦେଶ୍ୟରେ ୧୦ ଦଫା ଦାବୀ ସମ୍ବଳିତ ଦାବିପତ୍ର ଗ୍ରହଣ କରିଥିଲେ।

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ବ୍ଲକରେ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନଫରେନସିଂ ଯୋଗେ “ଆମ ଓଡିଶା ନବୀନ ଓଡିଶା” କାର୍ଯ୍ୟକ୍ରମ ଉଦଘାଟନ କରିଛନ୍ତି।  ବ୍ଲକର ୧୪ଟି ପଂଚାୟତ କୁ ୧୭୬ଟି ପ୍ରକଳ୍ପ ପାଇଁ ପ୍ରତି ପଂଚାୟତ କୁ ୫୦ଲକ୍ଷ ଲେଖାଏଁ ମୋଟ ୭କୋଟି ଟଙ୍କା ମଂଜୁର କରିଛନ୍ତି। ମିନି ଷ୍ଟାଡିୟମ ଠାରେ ଆୟୋଜିତ କାର୍ଯ୍ୟକ୍ରମରେ ଜୋନ -୨ଜିଲ୍ଲା ପରିଷଦ ସଭ୍ୟା ଟିକେଶ୍ବରୀ ମେହେର ସ୍ୱାଗତ ଭାଷଣ ଦେଇଥିଲେ।

ରେଢ଼ାଖୋଲ ବିଧାୟକ ଇଂ ରୋହିତ ପୂଜାରୀ ଏଥିପାଇଁ ମୁଖ୍ୟମନ୍ତ୍ରୀ ଓ ୫ଟି ଅଧ୍ୟକ୍ଷ ଙ୍କୁ ଭିଡିଓ କନଫରେନସି ଜରିଆରେ କୃତଜ୍ଞତା ଜଣାଇଥିଲେ। ନାକଟିଦେଉଳ ବିଡ଼ିଓ ଦନେଇ ଚରଣ ଟୁଡୁଙ୍କ ତତ୍ୱାବଧାନରେ ଅନୁଷ୍ଠିତ କାର୍ଯ୍ୟକ୍ରମ ରେ ଜୋନ -୧ ଜିଲ୍ଲା ପରିଷଦ ସଭ୍ୟା ପ୍ରିୟମ୍ବଦା ସାହୁ ଜୋନ -୨ ସଭ୍ୟା ଟିକେଶ୍ବରୀ ମେହେର, ଉପଜିଲ୍ଲାପାଳ ରଶ୍ମିରଂଜନ ମହନ୍ତ, ତହସିଲଦାର ଅମର ଡୁଙ୍ଗଡୁଙ୍ଗ, ଜିଲ୍ଲା ବିଜେଡି ଉପସଭାପତି ଅନାଦି ଚରଣ ସାହୁ, ବ୍ଲକ ଉପାଧ୍ୟକ୍ଷ ଜିତେନ୍ଦ୍ରିୟ ପ୍ରଧାନ, ଏମ ବି କେ, ସିଆରପି, ମିଶନ ଶକ୍ତି, ଏସଏଚଜି, ଦଳୀୟ କର୍ମୀ ଓ ଜନସାଧାରଣ ଉପସ୍ଥିତ ଥିଲେ।

ବ୍ଲକର ସବୁ ପଂଚାୟତର ସରପଞ୍ଚ ମାନେ ଅନୁପସ୍ଥିତ ଥିବାରୁ ବେଶ୍ ଚର୍ଚ୍ଚା ହୋଇଥିଲା।  ନାକଟିଦେଉଳ କଲେଜର ଛାତ୍ର ଛାତ୍ରୀମାନେ ମଧ୍ୟ ଉପସ୍ଥିତ ଥିଲେ। ଶେଷରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା।

କନ୍ଦର୍ପ ବେହେରା
ରେଢ଼ାଖୋଲ: ରେଢ଼ାଖୋଲ ବନଖଣ୍ଡ ନାକଟିଦେଉଳ ବ୍ଲକ ଅଞ୍ଚଳରେ ଦିନକୁ ଦିନ ଝାଡଖଣ୍ଡ ଅନୁପ୍ରବେଶକାରୀଙ୍କ ପ୍ରାଦୁର୍ଭାବ ଯୋଗୁଁ ପ୍ରଶାସନର ମୁଣ୍ଡବ୍ୟଥାର କାରଣ ହୋଇଛି। ପୂର୍ବରୁ ମଧ୍ୟ ସେଇ ସଂରକ୍ଷିତ ଜଙ୍ଗଲରୁ ପ୍ରଶାସନ ଅନୁପ୍ରବେଶ କାରୀମାନଙ୍କୁ ହଟାଇଥିଲା। ଏବେ ପୁଣି ସେଇ ସଂରକ୍ଷିତ ଜଙ୍ଗଲକୁ ସେମାନେ ପଦା କରି ବସତି ସ୍ଥାପନ କରିଥିବାରୁ ପ୍ରଶାସନ କୌଣସି ସୂତ୍ରରୁ ଖବର ପାଇ ଆଜି ଚଢ଼ଉ କରି ୧୫ ଘର ଭାଙ୍ଗି ଦେଇଥିବା ଜଣା ପଡ଼ିଛି।

ବନବିଭାଗ ସୂତ୍ରରୁ ପ୍ରକାଶ ଯେ, ନାକଟିଦେଉଳ ବ୍ଲକ୍ କିସିଣ୍ଡା ନିକଟସ୍ଥ ଲଣ୍ଡାକୋଟ ସଂରକ୍ଷିତ ଜଙ୍ଗଲରେ ଅନୁପ୍ରବେଶକାରୀମାନେ ଘର କରି ସେଠାରେ ଜଙ୍ଗଲକୁ ପଦା କରି ଚାଷ ଜମି କରିବା ଉଦ୍ଦେଶ୍ୟରେ ରହି ଆସୁଥିଲେ। ଆଜି ପ୍ରଶାସନ ଲଣ୍ଡାକୋର୍ଟ ସଂରକ୍ଷିତ ଜଙ୍ଗଲକୁ ଯାଇ ୧୫ ଘର ଭାଙ୍ଗିଥିଲା ପ୍ରଶାସନ। ଏହି ଚଢ଼ଉରେ ରାଜସ୍ବ ବିଭାଗ, ବନବିଭାଗ, ପୋଲିସ୍ ପ୍ରଶାସନ ଆଦିର ବରିଷ୍ଠ ଅଧିକାରୀ ତଥା ଅନ୍ୟାନ୍ୟ କର୍ମଚାରୀମାନେ ସାମିଲ୍ ହୋଇଥିଲେ।

ସୂଚନା ଥାଉକି ପୂର୍ବରୁ ବନ ବିଭାଗ ଚଢ଼ାଉ କରି ଅନେକ ଥର ଉଚ୍ଛେଦ କରିଥିବା ବେଳେ ଗତ ତା୦୯.୦୧.୨୨ରିଖରେ ୩୦ ଘର ଭାଙ୍ଗିଥିଲା ଏବଂ ୭୦ ଅନୁପ୍ରବେଶକାରୀଙ୍କୁ ହଟାଇଥିଲା। ବନ ବିଭାଗ ଦୀର୍ଘ ଦିନର ନୀରବତା ପରେ ପୁଣି ଏହି ଅନୁପ୍ରବେଶକାରୀଙ୍କ ବେଆଇନ ବସତି ସ୍ଥାପନ କରି ଥିବା ସ୍ଥାନ ଉପରେ ବନ ବିଭାଗ ପୁଣି ଥରେ ଅଣ୍ଟା ଭିଡି ଉଚ୍ଛେଦ ପ୍ରକ୍ରିୟାକୁ ତୀବ୍ରତର କରିଛି। ଏହାକୁ ନେଇ ଅଞ୍ଚଳବାସୀ ପୂର୍ବରୁ ଉପରିସ୍ଥ ବନ ବିଭାଗ ଅଧିକାରୀ, ଉପଖଣ୍ଡ ଓ ଜିଲ୍ଲା ପ୍ରଶାସନ ପାଖରେ ଅନୁପ୍ରବେଶକାରୀ ଙ୍କୁ ହଟାଇବା ପାଇଁ ଲିଖିତ ଅଭିଯୋଗ କରି ରାଜପଥ ଅବରୋଧ, ଶୋଭାଯାତ୍ରା ଓ ଅନଶନ ଆଦି କାର୍ଯ୍ୟକ୍ରମ ହାତକୁ ନେଇ ବିରୋଧ କରିଥିଲେ। ଫଳରେ ବନ ବିଭାଗ ଓ ପ୍ରଶାସନ ପକ୍ଷରୁ ଚଢ଼ାଉ କରି କିଛି ଘରକୁ ଉଚ୍ଛେଦ କରିଥିଲେ। ତଥାପି ଅନୁପ୍ରବେଶ କାରୀ ମାନଙ୍କର ଅବାଧରେ ପ୍ରବେଶ କରିବା ପ୍ରଶାସନକୁ ଏକ ଚ୍ୟାଲେଞ ସ୍ରୁଷ୍ଟି କରିଛି।

କନ୍ଦର୍ପ ବେହେରା
ରେଢ଼ାଖୋଲ: ନାକଟିଦେଉଳ ବ୍ଲକ ଅନ୍ତର୍ଗତ ସରାପାଲି ପଞ୍ଚାୟତ ଅଞ୍ଚଳର ବିଭିନ୍ନ ଗ୍ରାମରେ କାଳ ବୈଶାଖୀର ବ୍ୟାପକ କ୍ଷୟକ୍ଷତି ହୋଇଛି। ଥରେ ନୁହେଁ ବରଂ ୩ ଥର କାଳ ବୈଶାଖୀର ତାଣ୍ଡବରେ ଘର ଦ୍ୱାରର ଚାଳ ଛପର ଉଡିଯିବା ସହ ପନି ପରିବା ଚାଷ ଓ ଡାଲି ଜାତୀୟ ଫଲଲ ଉଜୁଡି ଯାଇଛି। ହେଲେ କ୍ଷତିଗ୍ରସ୍ତଙ୍କୁ ସରକାରୀ ସହାୟତା ଯୋଗାଇ ଦେବାକୁ ଲୋକମାନେ ପୂର୍ବରୁ ଦାବୀ କରିଥିବା ବେଳେ ରାଜସ୍ୱ ବିଭାଗର ନାକଟିଦେଉଳ ତହସିଲଦାର ଓ ଆରଆଇଙ୍କ ନିକଟକୁ କ୍ଷତିଗ୍ରସ୍ତ ଲୋକେ ସହାୟତା ପାଇଁ ଦୌଡ଼ି ଦୌଡ଼ି ନୟାନ୍ତ ହେଉ ଥିଲେ ମଧ୍ୟ ରାଜସ୍ୱ ବିଭାଗର ଅବହେଳାରୁ କୌଣସି ଆର୍ଥିକ ସହାୟତା ମିଳି ପାରିଲା ନାହିଁ।

ଏପରିକି ଘର ଛପର ଉପରେ ପକାଇବା ପାଇଁ ପଲିଥିନ ଖଣ୍ଡେ ମଧ୍ୟ ମିଳି ପାରିଲା ନାହିଁ। ଏଣୁ କ୍ଷତିଗ୍ରସ୍ତ ପରିବାର ଲୋକଙ୍କ ମଧ୍ୟରେ ଅସନ୍ତୋଷ ଦେଖା ଦେଇ ଥିଲା। ଏହି ପରିପ୍ରେକ୍ଷୀରେ ବିଜେପି ବରିଷ୍ଠ ନେତା ଗୋବିନ୍ଦ ଅଗ୍ରୱାଲଙ୍କ ନେତୃତ୍ୱରେ ଶନିବାର ଦିନ ସରାପାଲି ପଞ୍ଚାୟତର ଜୁରାପାଲି , ପଣ୍ଡୁଆଖୋଳ,ପୁଡ଼ାଖୋଳ ,କତରାପାଲି,ଦୁମାମହୁଲ, ଘସିଆପଡାଓ ବଳମ ପଞ୍ଚାୟତର ଗଡଖୋଳ ଆଦି ଗ୍ରାମର କ୍ଷତିଗ୍ରସ୍ତ ଲୋକେ ନାକଟିଦେଉଳ ତହସିଲଦାରଙ୍କ ଦ୍ୱାରସ୍ଥ ହୋଇ ସହାୟତା ପାଇବା ପାଇଁ ଏକ ଦାବିପତ୍ର ଦେବା ସହ ତହସିଲ କାର୍ଯ୍ୟାଳୟକୁ ଘେରାଉ କରିଥିଲେ।

ଦାବିପତ୍ରରେ ଉଲ୍ଲେଖ କରାଯାଇଛି ଯେ ନାକଟିଦେଉଳ ବ୍ଲକ ଅନ୍ତର୍ଗତ ସରାପାଲି ଓ ବଳମ ପଞ୍ଚାୟତ ଅଞ୍ଚଳରେ ଗତ ଫେବୃୟାରୀ ୪ତାରିଖ, ମେ ୩ତାରିଖ ଓ ମେ ୨୨ତାରିଖରେ କାଳ ବୈଶାଖୀର ବର୍ଷା ଝଡ଼ ପବନ ଓ କୁଆ ପଥର ମାଡ଼ ଯୋଗୁଁ ଘର ଦ୍ୱାର ଛପର ଉଡି ଯିବା ସହ ଅନେକ ପନି ପରିବା ଚାଷ ଓ ଡାଲି ଜାତୀୟ ଫସଲ ଉଜୁଡି ଯାଇଛି। ହେଲେ କାଳ ବୈଶାଖୀରେ କ୍ଷତିଗ୍ରସ୍ତ ହୋଇ ଥିବା ସବୁକୁ ତଦାରଖ କରି କ୍ଷତି ପୂରଣ ଯୋଗାଇ ଦେବାକୁ ରାଜସ୍ୱ ବିଭାଗ ପାଖରେ କ୍ଷତିଗ୍ରସ୍ତ ଲୋକେ ଦାବି କରିଥିଲେ।

ଏହାର କୌଣସି ସୁଫଳ ନ ମିଳିବାରୁ ପୁନଶ୍ଚ କ୍ଷତିଗ୍ରସ୍ତ ଲୋକେ ପୁନର୍ବାର ଦାବି କରିଥିଲେ ମଧ୍ୟ କୌଣସି ସହାୟତା ମିଳି ନ ଥିଲା। ଏଣୁ ବାଧ୍ୟ ହୋଇ କ୍ଷତିଗ୍ରସ୍ତ ଲୋକେ ତହସିଲଦାରଙ୍କ ଦ୍ୱାରସ୍ଥ ହୋଇ ଲିଖିତ ଅଭିଯୋଗ କରିବା ସହ ତହସିଲ କାର୍ଯ୍ୟାଳୟ ଘେରାଉ କରିଥିଲେ।

ଏ ସଂକ୍ରାନ୍ତରେ ନାକଟିଦେଉଳ ତହସିଲଦାର ସୁକାନ୍ତ କୁମାର ନାଏକଙ୍କୁ ପଚରା ଯିବାରେ କ୍ଷତିଗ୍ରସ୍ତଙ୍କ ତଦନ୍ତ କରି ଖୁବ ଶୀଘ୍ର କ୍ଷତି ପୂରଣ ଯୋଗାଇ ଦିଆଯିବ ବୋଲି ପ୍ରକାଶ କରିଥିଲେ।