ରେଢ଼ାଖୋଲ (କନ୍ଦର୍ପ ବେହେରା): ଜନୈକ ନାବାଳିକାକୁ ବିବାହ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖି ଶେଷରେ ପ୍ରତାରଣା କରିବା ଅଭିଯୋଗରେ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ନାକଟିଦେଉଳ ପୋଲିସ। ଗିରଫ ଅଭିଯୁକ୍ତ ମାରୁଆଡ଼ିମୁଣ୍ଡା ଗାଁର ପ୍ରଶାନ୍ତ ମୁଣ୍ଡା ଓରଫ ମଣ୍ଟୁ।
ସୂଚନା ଅନୁସାରେ ପ୍ରଶାନ୍ତ ମୁଣ୍ଡା ଜଣେ ନାବାଳିକାକୁ ବିବାହ ପ୍ରଲୋଭନ ଦେଖାଇ ଆଜକୁ ପ୍ରାୟ ଏକ ବର୍ଷରୁ ଊର୍ଦ୍ଧ୍ଵ ହେବ ଶାରୀରିକ ସମ୍ପର୍କ ରଖି ଆସୁଥିଲା। ତେବେ ନାବାଳିକା ଜଣଙ୍କ ଗର୍ଭବତୀ ଥିବା ଜାଣିବା ପରେ ପ୍ରେମିକ ପ୍ରଶାନ୍ତକୁ ଶୀଘ୍ର ବିବାହ କରିବାକୁ ଅଡ଼ି ବସିଥିଲା।
ତେବେ ଅଭିଯୁକ୍ତ ପ୍ରଶାନ୍ତ ଯୁବତୀ ଜଣଙ୍କୁ ବିବାହ କରିବାକୁ ମନା କରିଦେବା ସହ ଆଉ ଧରା ଛୁଆଁ ଦେଉ ନ ଥିବାରୁ ସମ୍ପୃକ୍ତା ନାବାଳିକା ଏ ସମ୍ପର୍କରେ ନାକଟିଦେଉଳ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ପୁଲିସ୍ ଏ ନେଇ ଥାନାରେ ଏକ ମାମଲା ରୁଜୁ କରି ଘଟଣାର ତଦନ୍ତ କରି ଅଭିଯୁକ୍ତ ପ୍ରଶାନ୍ତ ମୁଣ୍ଡାଙ୍କୁ ଗିରଫ କରିଥିଲା।
ପୁଲିସ ଉଭୟ ଅଭିଯୁକ୍ତ ଏବଂ ପୀଡିତା ନାବାଳିକାର ଡାକ୍ତରୀ ମାଇନା କରାଇବା ସହ ଗିରଫ ଅଭିଯୁକ୍ତ ପ୍ରଶାନ୍ତ ମୁଣ୍ଡାଙ୍କୁ ସମ୍ବଲପୁର ପକ୍ସୋ କୋର୍ଟକୁ ଚାଲାଣ କରିଥିବା ଥାନା ଅଧିକାରୀ ସୂଚନା ଦେଇଛନ୍ତି।