ରମେଶ ମହାନ୍ତି
ଜଗତସିଂହପୁର: ଗାଁ ଗହଳିର ଉନ୍ନତିକରଣ ନିମନ୍ତେ ସରକାରଙ୍କ ତରଫରୁ କୋଟି କୋଟି ଟଙ୍କାର ଅନୁଦାନ ଆସୁଥିବା ବେଳେ ଠିକାଦାରଙ୍କ ସହ ବିଭାଗୀୟ କିଛି ଅସାଧୁ ଅଫିସରଙ୍କ ମଧୁଚନ୍ଦ୍ରିକା ଯୋଗୁଁ ଯେନତେନ ପ୍ରକାରେ ନିମ୍ନମାନର କାର୍ଯ୍ୟ କରି ସିଂହ ଭାଗ ଅର୍ଥକୁ ଚଳୁ କରିବାରେ ଠିକାଦାର ସଫଳ ହେଉଥିବା ଅଭିଯୋଗ ହେଉଛି।
ଅଭିଯୋଗ ଅନୁଯାୟୀ ତିର୍ତ୍ତୋଲ ବ୍ଳକ ଅନ୍ତର୍ଗତ ସାମନ୍ତରାପୁର ପଞ୍ଚାୟତର ସିରସ୍ତା ଠାରୁ ବଟିରା ପର୍ଯ୍ୟନ୍ତ ପାଇକା ବାମପାର୍ଶ୍ୱ କେନାଲ ଓ ବନ୍ଧର ପୁନଃରୁଦ୍ଧାର ନିମନ୍ତେ (ଏମ୍.ସି.ଆଇ)ମହାନଦୀ ଚିତ୍ରୋତ୍ପଳା ଆଇଲାଣ୍ଡ ଇରିକେସନ ବିଭାଗ ପକ୍ଷରୁ ପାଖାପାଖି ୯କୋଟି ଟଙ୍କା ବ୍ୟୟ ଅଟକଳରେ ଚାଲିଥିବା କାର୍ଯ୍ୟ ଏଷ୍ଟିମେଣ୍ଟ ଅନୁସାରେ କରାନଯାଇ ଅତ୍ୟନ୍ତ ନିମ୍ନମାନର ଭାବେ ଯେନତେନ ପ୍ରକାରେ କାର୍ଯ୍ୟ କରାଯାଉଥିବା କୁହାଯାଉଥିବା ବେଳେ ବିଭାଗୀୟ କିଛି ଅଧିକାରୀଙ୍କୁ କରାୟତ କରି ଠିକାଦାର ଏହି କୋଟି କୋଟି ଟଙ୍କାର ଅର୍ଥକୁ ଚଳୁ କରିଦେବାକୁ ଉଦ୍ୟମ କରୁଥିବା ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି।
ବିଭାଗୀୟ ଏମ୍.ସି.ଆଇ କାର୍ଯ୍ୟାଳୟ ଏସ୍.ଡି.ଓ ଙ୍କ ଠାରୁ ମିଳିଥିବା ସୂଚନା ମୁତାବକ ଏଷ୍ଟିମେଣ୍ଟ ଅନୁଯାୟୀ ଏହି କେନାଲବନ୍ଧ ସୁଦୃଢୀକରଣ, ବନ୍ଧ ମଜବୁତ୍, ମାଟିକାମ, ୫ଟି ବ୍ରିଜ୍ କାର୍ଯ୍ୟ, କେନାଲ୍ ଖୋଳା କାର୍ଯ୍ୟ ସହିତ କେନାଲ ଭିତର ବନ୍ଧ କଡରେ ନିର୍ମାଣ ହେଉଥିବା ଦେବାଲ୍ କାର୍ଯ୍ୟ ଅତ୍ୟନ୍ତ ନିମ୍ନମାନର ଭାବେ କରାଯାଇ ଯଥାଶୀଘ୍ର ଏହାକୁ ଘୋଡାଇବାକୁ ମାଟି ଚଢାଇ ଦିଆଯାଉଛି ବୋଲି କୁହାଯାଉଛି। ଉକ୍ତ କାର୍ଯ୍ୟର ତଦାରଖ ଦାୟିତ୍ବରେ ଥିବା ବିଭାଗୀୟ ଯନ୍ତ୍ରୀଙ୍କୁ କାର୍ଯ୍ୟ ସ୍ଥଳରେ ଦେଖିବାକୁ ମିଳୁନାହିଁ ବୋଲି ସ୍ଥାନୀୟ ବାସିନ୍ଦାଙ୍କଠୁ ଶୁଣିବାକୁ ମିଳୁଛି।
ବିଭାଗୀୟ ଯନ୍ତ୍ରୀ ଓ ଠିକାଦାର ମଧୁଚନ୍ଦ୍ରିକାରେ ଏହି କାର୍ଯ୍ୟ ଚାଲିଥିବା କୁହାଯାଉଥିବା ବେଳେ ଯେନତେନ ପ୍ରକାରେ ନିମ୍ନମାନର କାର୍ଯ୍ୟ କରି ଠିକାଦାର କୋଟି କୋଟି ଟଙ୍କାର ଅର୍ଥକୁ ହଡପ୍ କରି ଚଳୁ କରିଦେବାକୁ ଉଦ୍ୟମ କରୁଥିବା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ସ୍ଥାନୀୟ ଲୋକଙ୍କ ହିତକୁ ଦୃଷ୍ଟିରେ ରଖି ବିଭାଗୀୟ ଉଚ୍ଚପଦାଧିକାରୀ ଉକ୍ତ କାର୍ଯ୍ୟ ଉପରେ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।