ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ନୂଆବର୍ଷ ଆରମ୍ଭରୁ ରାଜ୍ୟରେ ନୂତନ ଟ୍ରାଫିକ୍ ନିୟମ ଲାଗୁ ହେବା ପରେ ପୋଲିସ୍ ଏବଂ ଟ୍ରାଫିକ୍ ବିଭାଗ ପକ୍ଷରୁ ଚେକିଂ ଜୋର୍ଦାର କରାଯାଇ ନିୟମ ଖିଲାପକାରୀଙ୍କଠାରୁ ଜୋରିମାନା ଆଦାୟ କରାଯାଉଛି। ବିଶେଷ କରି ଗାଡ଼ି ଚଳାଇବାବେଳେ ଡ଼ବଲ୍ ହେଲ୍ମେଟ୍ ବ୍ୟବହାର ନେଇ ପୋଲିସ୍ ପକ୍ଷରୁ ଗୁରୁତ୍ୱ ଦିଆଯିବା ସହ ନିୟମ ଉଲ୍ଲଂଘନକାରୀଙ୍କଠାରୁ ତଣ୍ଡ ଆଦାୟ କରାଯାଉଛି।
ବ୍ରହ୍ମପୁର ଟ୍ରାଫିକ୍ ପୋଲିସ୍ ପକ୍ଷରୁ ଆଜି ଇଂଜିନିୟରିଂ ସ୍କୁଲ ମୁଖ୍ୟଛକଠାରେ ଗାଡ଼ି ଯାଞ୍ଚ କରାଯାଇଥିଲା। ଯାଞ୍ଚ ସମୟରେ ନିୟମ ମାନୁନଥିବା ଅଭିଯୋଗରେ ୧୭ହଜାର ୭୦୦ ଟଙ୍କା ଜୋରିମାନା ଆଦାୟ କରାଯାଇଥିବାବେଳେ ମାସ୍କ ପରିଧାନ କରିନଥିବା ବ୍ୟକ୍ତିବିଶେଷଙ୍କଠାରୁ ୨୩୦୦ ଟଙ୍କା ଆଦାୟ ହୋଇଛି।
ସେହିପରି ନିୟମ ଭଂଗ କରିଥିବା ୨୦ଟି ଲାଇସେନସ୍ ରଦ୍ଧ ପାଇଁ ସୁପାରିଶ ହୋଇଥିବା ଟ୍ରାଫିକ୍ ପୋଲିସ୍ ପକ୍ଷରୁ ସୂଚନା ମିଳିଛି। ବାରମ୍ବାର ସଚେତନ କରାଗଲେ ମଧ୍ୟ ଲୋକେ ବିନା ହେଲ୍ମେଟ ଓ ବିନା ମାସ୍କରେ ସହରରେ ଖୁଲମ୍ ଖୁଲା ନିୟମ ନ ମାନି ବୁଲୁଥିବା ଦେଖିବାକୁ ମିଳୁଛି। ଯାହାଫଳରେ ପୋଲିସ୍ ପ୍ରତିଦିନ ଏଭଳି ଅମାନିଆ ଲୋକଙ୍କଠାରୁ ଜୋରିମାନା ଆଦାୟ କରୁଛି। ଜୋରିମାନା ଆଦାୟ ସହ ସେମାନଙ୍କୁ ଆଗାମୀ ସମୟରେ ମାସ୍କ ଓ ହେଲ୍ମେଟ୍ ପିନ୍ଧିବାକୁ ସଚେତନ କରାଯିବା ମଧ୍ୟ ଦେଖିବାକୁ ମିଳିଛି।