ଭୁବନେଶ୍ୱର: ୧୯୯୭ ମସିହା ଠାରୁ ଆଜକୁ ୨୫ବର୍ଷରୁ ଉର୍ଦ୍ଧ୍ୱ ହେବ ଖୋର୍ଦ୍ଧା ଜିଲ୍ଲା ଅଧିନସ୍ଥ ଜଟଣୀ ବ୍ଲକ ଅନ୍ତର୍ଗତ ପଧାନସାହି ଗ୍ରାମପଞ୍ଚାୟତରେ କେବଳ ତପସିଲଭୁକ୍ତ ଶ୍ରେଣୀକୁ ବାଦ୍ ଦେଇ ବାକି ସମସ୍ତ ବର୍ଗଙ୍କ ନିମନ୍ତେ ସ୍ଥାନ ସଂରକ୍ଷଣ ରହି ଆସୁଥିଲା। କିନ୍ତୁ ଦୁଃଖର ବିଷୟ ଖୋର୍ଦ୍ଧା ଜିଲ୍ଲା ପ୍ରଶାସନ ତରଫରୁ ପ୍ରଥମ ପବ୍ଲିକେଶନ ନୋଟିଫିକେଶନରେ ପଧାନସାହି ଗ୍ରାମ ପଞ୍ଚାୟତ ସରପଞ୍ଚ ପଦବୀ ନିମନ୍ତେ ଅନୁସୂଚିତ ଜାତିଙ୍କ ପାଇଁ ସ୍ଥାନ ସଂରକ୍ଷଣ ରହିଥିଲା।
ଉଚ୍ଚତମ ନ୍ୟାୟାଳୟ କଟକଙ୍କ ଆଦେଶ ଅନୁଯାୟୀ କେବଳ ପଛୁଆବର୍ଗଙ୍କୁ ଚଳିତ ପଞ୍ଚାୟତ ନିର୍ବାଚନରେ ବାଦ୍ ଦେବା ପାଇଁ ଆଦେଶ ଥିଲେ ସୁଦ୍ଧା ଖୋର୍ଦ୍ଧା ଜିଲ୍ଲା ପ୍ରଶାସନ ଏହାକୁ ବେଖାତିର କରି ଦ୍ୱିତୀୟ ପର୍ଯ୍ୟାୟରେ ଜଟଣୀ ବ୍ଲକ ଅଧିନରେ ଥିବା ୧୫ଟି ପଞ୍ଚାୟତରେ କୌଣସି ସ୍ଥାନ ସଂରକ୍ଷଣ ପରିବର୍ତ୍ତନ କରିନଥିବା ବେଳେ କେବେଳ ଏକମାତ୍ର ସରପଞ୍ଚ ପଦବୀ ନିମନ୍ତେ ପଧାନସାହି ପଞ୍ଚାୟତରେ ତପସିଲଭୁକ୍ତ ଶ୍ରେଣୀକୁ ବାଦ୍ ଦେଇ ଉକ୍ତ ସ୍ଥାନରେ ସାଧାରଣବର୍ଗଙ୍କ ପାଇଁ ଉଦ୍ଦିଷ୍ଟ କରିଥିଲେ। ଯାହା ଉକ୍ତ ସାମ୍ବିଧାନିକ ଅଧିକାର ପାଇବା ପାଇଁ ସାମାଜିକ କର୍ମୀ ସୁରେନ୍ଦ୍ର ଭଞ୍ଜ ଜିଲ୍ଲା ପ୍ରଶାସନର କାର୍ଯ୍ୟାଳୟ ଆଗରେ ଉକ୍ତ ଘଟଣାବଳୀକୁ ନେଇ ଧାରଣା ଓ ପ୍ରତିବାଦ କରିବା ସହିତ ଦାବିପତ୍ର ପ୍ରଦାନ କରିଥିଲେ।
କିନ୍ତୁ ଜିଲ୍ଲା ପ୍ରଶାସନ ସ୍ଥାନୀୟ ରାଜନେତାଙ୍କ ଚାପରେ ପ୍ରଭାବିତ ହୋଇ ପଧାନସାହି ଗ୍ରାମ ପଞ୍ଚାୟତର ସମସ୍ତ ତଫସିଲଭୁକ୍ତ ଶ୍ରେଣୀକୁ ଅଣଦେଖା କରି ସେମାନଙ୍କ ସାମ୍ବିଧାନିକ ଅଧିକାରକୁ କ୍ଷୁର୍ଣ୍ଣ କରିବା ସହ ମାନସିକ ଆଘାତ ପହଞ୍ଚାଇଥିଲେ। ତେଣୁ ଉକ୍ତ ଘଟଣାବଳୀକୁ ନେଇ ଶ୍ରୀ ଭଞ୍ଜ ମାନନୀୟ ଉଚ୍ଚତମ ନ୍ୟାୟାଳୟ କଟକଙ୍କ ଅଦାଲତର ଦ୍ୱାରସ୍ଥ ହୋଇ କେସ୍ ନଂ-ଡବ୍ଲୁ.ପି.(ସି) ନଂ-୧୨୬୯/୨୦୨୨ରେ ମାମଲା ରୁଜୁ କରିଥିଲେ।
ଉକ୍ତ ମାମଲାରେ ଉଚ୍ଚତମ ନ୍ୟାୟାଳୟ ଜିଲ୍ଲା ପ୍ରଶାସନକୁ ଏହି ଘଟଣାର ପୁର୍ନବିଚାର କରିବା ସହିତ ସାମ୍ବିଧାନିକ ଓ ମୌଳିକ ଅଧିକାରକୁ ଅକ୍ଷୁର୍ଣ୍ଣ ରଖିବା ପାଇଁ ଆଦେଶ ପ୍ରଦାନ କରିଛନ୍ତି ଏବଂ ଉକ୍ତ ଘଟଣାରେ ଆବେଦନକାରୀ ଚାହିଁଲେ ଉପରିସ୍ଥ ଅଦଲାତର ଆଶ୍ରୟ ନେଇପାରିବେ ବୋଲି ଉଚ୍ଚତମ ନ୍ୟାୟାଳୟ ତାଙ୍କ ରାୟରେ ପ୍ରକାଶ କରିଛନ୍ତି।
ଶ୍ରୀଯୁକ୍ତ ଭଞ୍ଜ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ମୋର ଆଇନ ଉପରେ ସମ୍ପୂର୍ଣ୍ଣ ଭରସା ରହିଛି। ନିଶ୍ଚିତ ପଧାନସାହି ଗ୍ରାମ ପଞ୍ଚାୟତ ତଫସିଲଭୁକ୍ତ ଶ୍ରେଣୀର ଲୋକମାନଙ୍କୁ ସେମାନଙ୍କର ସାମ୍ବିଧାନିକ ଅଧିକାର ମିଳିବା ସହିତ ଯେଉଁମାନେ ସାମାଜିକ, ଆର୍ଥିକ କ୍ଷେତ୍ରରେ ଦୁର୍ବଳ ଅଛନ୍ତି, ସେମାନଙ୍କୁ ନିଶ୍ଚିତ ନ୍ୟାୟ ମିଳିବ ବୋଲି ଶ୍ରୀଯୁକ୍ତ ଭଞ୍ଜ ଆଶାପ୍ରକଟ କରିଛନ୍ତି।
