Categories
ବିଶେଷ ଖବର ରାଜ୍ୟ ଖବର

ଚଳିତ ବର୍ଷର ଓଡ଼ିଆ ପଦ୍ମ ବିଜେତାଙ୍କ ଉଲ୍ଲେଖନୀୟ ଅବଦାନ ଏବଂ କୃତିତ୍ୱ

ଭୁବନେଶ୍ବର: ଚଳିତ ବର୍ଷ ୪ ଓଡ଼ିଆ ପଦ୍ମ ପୁରସ୍କାର ପାଇବାକୁ ମନୋନିତ ହୋଇଛନ୍ତି। ପ୍ରଖ୍ୟାତ ମୂର୍ତ୍ତିକାର ଅଦ୍ୱୈତ ଚରଣ ଗଡ଼ନାୟକ, ଜଣାଶୁଣା ସ୍ନାୟୁଶଲ୍ୟ ଚିକିତ୍ସକ ଡାକ୍ତର ଅଶୋକ କୁମାର ମହାପାତ୍ର, ଖ୍ୟାତନାମା ଓଡ଼ିଶୀ ନୃତ୍ୟଗୁରୁ ଦୁର୍ଗା ଚରଣ ରଣବୀର ଏବଂ ବିଶିଷ୍ଟ ସାହିତ୍ୟିକା ପ୍ରତିଭା ଶତପଥୀ ପଦ୍ମଶ୍ରୀ ପୁରସ୍କାର ପାଇବେ। ସେମାନେ ନିଜ ନିଜ କ୍ଷେତ୍ରରେ ଶୀର୍ଷସ୍ତରର ସଫଳତା ହାସଲ କରିବା ସହିତ ସମାଜ, ରାଜ୍ୟ ଏବଂ ଦେଶ ପାଇଁ ଉଲ୍ଲେଖନୀୟ ଅବଦାନ ଦେଇଛନ୍ତି।

ମୂର୍ତ୍ତିକାର ଅଦ୍ୱୈତ ଚରଣ ଗଡ଼ନାୟକ

ପ୍ରଖ୍ୟାତ ମୂର୍ତ୍ତିକାର ଅଦ୍ୱୈତ ଚରଣ ଗଡ଼ନାୟକ ପଥର ଦେହରେ ପ୍ରାଣ ସଞ୍ଚାର କରିବାରେ ସିଦ୍ଧହସ୍ତ। କଳା କ୍ଷେତ୍ରରେ ଉଲ୍ଲେଖନୀୟ ଯୋଗଦାନ ପାଇଁ ତାଙ୍କୁ ପଦ୍ମଶ୍ରୀ ପୁରସ୍କାରରେ ସମ୍ମାନିତ କରାଯିବ। ଶ୍ରୀ ଗଡ଼ନାୟକ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଅଧୀନ ଜାତୀୟ ମଡର୍ଣ୍ଣ ଆର୍ଟ ଗ୍ୟାଲେରୀର ମହାନିର୍ଦ୍ଦେଶକ ଭାବେ ଦାୟିତ୍ୱ ନିର୍ବାହ କରିସାରିଛନ୍ତି। ତାଙ୍କର ପ୍ରସ୍ଥର କୃତୀ ଦେଶବିଦେଶର ଗୁରୁତ୍ୱପୂର୍ଣ୍ଣ ସ୍ଥାନରେ ସୁଶୋଭିତ ହୋଇଛି। ଜଣେ ପ୍ରସ୍ଥର ମୂର୍ତ୍ତିକାର ଭାବେ ଦେଶବିଦେଶରୁ ଅନେକ ସମ୍ମାନ ଓ ମାନ୍ୟତା ହାସଲ କରିଛନ୍ତି।

ଡାକ୍ତର ଅଶୋକ କୁମାର ମହାପାତ୍ର

ଜଣାଶୁଣା ଚିକିତ୍ସକ ତଥା ପ୍ରଖ୍ୟାତ ସ୍ନାୟୁଶଲ୍ୟ ବିଶେଷଜ୍ଞ ଡାକ୍ତର ଅଶୋକ କୁମାର ମହାପାତ୍ର ଚଳିତ ବର୍ଷ ସମ୍ମାନଜନକ ପଦ୍ମଶ୍ରୀ ପୁରସ୍କାର ପାଇବା ଲାଗି ମନୋନିତ ହୋଇଛନ୍ତି। ସେ ଏମ୍ସ ଭଳି ପ୍ରତିଷ୍ଠିତ ଜାତୀୟ ଗୁରୁତ୍ୱ ବହନ କରୁଥିବା ଡାକ୍ତରୀ ଶିକ୍ଷାନୁଷ୍ଠାନରେ ନିର୍ଦ୍ଦେଶକ ଦାୟିତ୍ୱ ନିର୍ବାହ କରିସାରିଛନ୍ତି। ଭାରତରେ ପ୍ରଥମ ଥର ପାଇଁ ସେ ମୁଣ୍ଡଯୋଡ଼ା ଦୁଇ ଶିଶୁଙ୍କର ସଫଳ ଅସ୍ତ୍ରୋପଚାର କରି ସେମାନଙ୍କୁ ଅଲଗା କରିଥିଲେ। ଡାକ୍ତରୀ ବୃତ୍ତି ବ୍ୟତୀତ ସମାଜସେବାରେ ମଧ୍ୟ ତାଙ୍କର ମହତ୍ୱପୂର୍ଣ୍ଣ ଯୋଗଦାନ ରହିଛି।

ଦୁର୍ଗା ଚରଣ ରଣବୀର

ଚଳିତ ବର୍ଷ ଭାରତ ସରକାରଙ୍କ ଦ୍ୱାରା ପଦ୍ମଶ୍ରୀ ପୁରସ୍କାର ପାଇବାକୁ ଯୋଗ୍ୟ ବିବେଚିତ ହୋଇଥିବା ଓଡ଼ିଶାର ଆଉ ଜଣେ ବିଶିଷ୍ଟ ବ୍ୟକ୍ତିତ୍ୱ ହେଲେ ଖ୍ୟାତନାମା ଓଡ଼ିଶୀ ନୃତ୍ୟଗୁରୁ ଦୁର୍ଗା ଚରଣ ରଣବୀର। ଦୀର୍ଘ ଛଅ ଦଶନ୍ଧି ଧରି ସେ ଓଡ଼ିଶୀ ନୃତ୍ୟର ପ୍ରଚାର ପ୍ରସାର କ୍ଷେତ୍ରରେ ନିଜକୁ ସମର୍ପି ଦେଇଛନ୍ତି। ଦେଶ ଓ ବିଦେଶରେ ତାଙ୍କର ଅନେକ ଶିଷ୍ୟ ରହିଛନ୍ତି। କଳା କ୍ଷେତ୍ରକୁ ଯୋଗଦାନ ନିମନ୍ତେ ତାଙ୍କୁ ପଦ୍ମଶ୍ରୀ ପୁରସ୍କାର ପାଇଁ ମନୋନିତ କରାଯାଇଛି। ପୂର୍ବରୁ ଓଡ଼ିଶୀ ନୃତ୍ୟକଳାର ପ୍ରସାର ପାଇଁ ତାଙ୍କୁ ଅନେକ ପୁରସ୍କାର, ସମ୍ମାନ ଓ ସ୍ୱୀକୃତି ମିଳିସାରିଛି।

ପ୍ରତିଭା ଶତପଥୀ

ବିଶିଷ୍ଟ ସାହିତ୍ୟିକା ପ୍ରତିଭା ଶତପଥୀ ଓଡ଼ିଆ ସାହିତ୍ୟର ଜଣେ ଅନନ୍ୟ ସୃଜନଶୀଳ ସ୍ରଷ୍ଟା। ଜଣେ ଓଡ଼ିଆ କବୟିତ୍ରୀ ଭାବେ ତାଙ୍କର କବିତା ସର୍ଜନା ୧୧ରୁ ଅଧିକ ଭାଷାରେ ଅନୁବାଦ ହୋଇଛି। ଦୀର୍ଘ ୫୦ ବର୍ଷ ଧରି ସେ ସାହିତ୍ୟ ସାଧନା କରିଆସୁଛନ୍ତି । ତାଙ୍କର କୃତୀ ମଧ୍ୟରେ ଅନେକ କବିତା ସଂକଳନ, ପ୍ରବନ୍ଧ ଓ ଅନୁବାଦ ସାମିଲ ରହିଛି। ସାହିତ୍ୟ କ୍ଷେତ୍ରକୁ ଯୋଗଦାନ ପାଇଁ ତାଙ୍କୁ ରାଜ୍ୟ ତଥା ଦେଶରୁ ବହୁ ସମ୍ମାନ ଓ ସ୍ୱୀକୃତି ମିଳିଛି। ଚଳିତ ଥର ତାଙ୍କୁ ପଦ୍ମଶ୍ରୀ ପୁରସ୍କାର ପାଇଁ ମନୋନିତ କରି ଭାରତ ସରକାର ଉପଯୁକ୍ତ ପ୍ରତିଭାଙ୍କୁ ସମ୍ମାନ ଦେଇଛନ୍ତି।

Categories
ଆଜିର ଖବର ଜାତୀୟ ଖବର ରାଜ୍ୟ ଖବର

ରାଜ୍ୟ ସରକାରଙ୍କ ଘୋଷଣା, ପଦ୍ମ ପୁରସ୍କାରଙ୍କୁ ମିଳିବ ମାସିକ ୩୦ ହଜାର ଟଙ୍କା ସହାୟକ ରାଶି

ଭୁବନେଶ୍ୱର: ରାଜ୍ୟ ସରକାର ରାଜ୍ୟର ସମସ୍ତ ପଦ୍ମ ପୁରସ୍କାର ପ୍ରାପ୍ତ ବ୍ୟକ୍ତିଙ୍କୁ ମାସିକ ୩୦ ହଜାର ଟଙ୍କାର ସମ୍ମାନସୂଚକ ସହାୟକ ରାଶି ଦେବାକୁ ଘୋଷଣା କରିଛନ୍ତି। ଏହି ସହାୟକ ରାଶି ଚଳିତ ଜାନୁଆରୀ ମାସଠାରୁ ପ୍ରଦାନ କରାଯିବ ବୋଲି ସଂସ୍କୃତି ବିଭାଗ ପକ୍ଷରୁ ବିଧିବଦ୍ଧ ଭାବେ ଜାରି କରାଯାଇଥିବା ବିଜ୍ଞପ୍ତିରେ ସୂଚନା ଦିଆଯାଇଛି।

ଘୋଷଣାର ମୁଖ୍ୟାଂଶ

  • ପଦ୍ମଶ୍ରୀ, ପଦ୍ମଭୂଷଣ, ଏବଂ ପଦ୍ମ ବିଭୂଷଣ ସମ୍ମାନ ପ୍ରାପ୍ତ ବ୍ୟକ୍ତିମାନଙ୍କୁ ଏହି ସହାୟକ ରାଶି ପ୍ରଦାନ କରାଯିବ।
  • ରାଜ୍ୟର ୫୫ ଜଣ ଜୀବିତ ପଦ୍ମ ପୁରସ୍କାର ପ୍ରାପ୍ତ ବ୍ୟକ୍ତିଙ୍କୁ ଏହି ଲାଭ ମିଳିବ।
  • ସହାୟକ ରାଶି ପାଇଁ ରାଜ୍ୟ ସରକାର ପ୍ରତିବର୍ଷ ୨ କୋଟି ଟଙ୍କା ଖର୍ଚ୍ଚ କରାଯିବ।

ମୁଖ୍ୟମନ୍ତ୍ରୀଙ୍କ ପ୍ରତିକ୍ରିୟା:

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହାକୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଏହା ଓଡିଶାର ଗର୍ବ ବଢ଼ାଇବ। ରାଜ୍ୟରେ ବିଭିନ୍ନ କ୍ଷେତ୍ରରେ ଅବଦାନ ରଖିଥିବା ପଦ୍ମ ପୁରସ୍କାର ପ୍ରାପ୍ତ ବ୍ୟକ୍ତିମାନଙ୍କୁ ଏହା ଉତ୍ସାହିତ କରିବ।ଏହି ଘୋଷଣା ଦ୍ୱାରା ରାଜ୍ୟରେ ପଦ୍ମ ପୁରସ୍କାର ବିଜେତାଙ୍କ ସମ୍ମାନ ବଢ଼ିବା ସହିତ ନୂଆ ଇତିହାସ ସୃଷ୍ଟି ହେବ।

ପୂର୍ବ ସରକାର ଏହି ପଦ୍ମ ବିଜେତାଙ୍କୁ ଦଶ ହଜାର ଟଙ୍କା ଲେଖାଏଁ ମାସିକ ସହାୟକ ରାଶି ପ୍ରଦାନ କରୁଥିଲେ।

Categories
ଆଜିର ଖବର ଜାତୀୟ ଖବର

ପଦ୍ମ ପୁରସ୍କାର ପାଇଁ ପ୍ରେରଣାଦାୟୀ ବ୍ୟକ୍ତିତ୍ୱଙ୍କୁ ମନୋନୀତ କରିବାକୁ ଦେଶବାସୀଙ୍କୁ ଅନୁରୋଧ କଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମ୍ମାନଜନକ ପଦ୍ମ ପୁରସ୍କାର ପାଇଁ ନାମାଙ୍କନ ପ୍ରକ୍ରିୟାରେ ସକ୍ରିୟ ଭାବରେ ଅଂଶଗ୍ରହଣ କରିବାକୁ ଦେଶବାସୀଙ୍କୁ ଅନୁରୋଧ କରିଛନ୍ତି ।

ସମାଜ ପାଇଁ ଉଲ୍ଲେଖନୀୟ ଅବଦାନ ଦେଇଥିବା ତୃଣମୂଳ ସ୍ତରର ଯୋଦ୍ଧାମାନଙ୍କୁ ସ୍ୱୀକୃତି ଦେବା ଉପରେ ଶ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି। ନାମାଙ୍କନ ପ୍ରକ୍ରିୟାର ସ୍ୱଚ୍ଛ ଏବଂ ସହଭାଗୀ ଆଭିମୁଖ୍ୟ ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ ପୂର୍ବରୁ ମିଳିଥିବା ନାମାଙ୍କନ ସଂଖ୍ୟାକୁ ନେଇ ଖୁସି ବ୍ୟକ୍ତ କରିବା ସହ awards.gov.in ସରକାରୀ ପୋର୍ଟାଲ ମାଧ୍ୟମରେ ସମ୍ମାନଜନକ ପଦ୍ମ ପୁରସ୍କାର ପାଇଁ ଯୋଗ୍ୟ ପ୍ରାର୍ଥୀଙ୍କୁ ମନୋନୀତ କରିବାକୁ ଅଧିକରୁ ଅଧିକ ଲୋକଙ୍କୁ ଅନୁରୋଧ କରିଛନ୍ତି।

ଏକ ଏକ୍ସ ପୋଷ୍ଟରେ ପ୍ରଧାନମନ୍ତ୍ରୀ କହିଛନ୍ତି; ‘‘ଗତ ଏକ ଦଶନ୍ଧି ମଧ୍ୟରେ ଆମେ ଅଗଣିତ ତୃଣମୂଳ ସ୍ତରର ଯୋଦ୍ଧାମାନଙ୍କୁ #PeoplesPadma ରେ ସମ୍ମାନିତ କରିଛୁ। ପୁରସ୍କାର ବିଜେତାଙ୍କ ଜୀବନ ଯାତ୍ରା ଅଗଣିତ ଲୋକଙ୍କୁ ପ୍ରେରଣା ଦେଇଛି। ସେମାନଙ୍କର ଧୈର୍ଯ୍ୟ ଓ ଦୃଢ଼ତା ସେମାନଙ୍କ ସମୃଦ୍ଧ କାର୍ଯ୍ୟରେ ସ୍ପଷ୍ଟ ଭାବେ ଦୃଶ୍ୟମାନ। ବ୍ୟବସ୍ଥାକୁ ଅଧିକ ସ୍ୱଚ୍ଛ ଏବଂ ଅଂଶୀଦାର କରିବା ଉଦ୍ଦେଶ୍ୟରେ ଆମ ସରକାର ବିଭିନ୍ନ ପଦ୍ମ ପୁରସ୍କାର ପାଇଁ ଅନ୍ୟମାନଙ୍କୁ ମନୋନୀତ କରିବା ପାଇଁ ଲୋକଙ୍କୁ ଆମନ୍ତ୍ରଣ କରୁଛନ୍ତି। ଅନେକ ନାମାଙ୍କନ ଆସିଥିବାରୁ ମୁଁ ଖୁସି। ନାମାଙ୍କନ ଦାଖଲର ଶେଷ ଦିନ ହେଉଛି ଚଳିତ ମାସ ୧୫ ତାରିଖ। ମୁଁ ଅଧିକରୁ ଅଧିକ ଲୋକଙ୍କୁ ଅନୁରୋଧ କରୁଛି ଯେ ସେମାନେ ପ୍ରେରଣାଦାୟୀ ବ୍ୟକ୍ତିତ୍ୱଙ୍କୁ ପଦ୍ମ ପୁରସ୍କାର ପାଇଁ ମନୋନୀତ କରନ୍ତୁ। ଆପଣମାନେ ଏହା – awards.gov.in ରେ କରିପାରିବ।’’

Categories
ଆଜିର ଖବର ଜାତୀୟ ଖବର ନିର୍ବାଚନ ଖବର ରାଜ୍ୟ ଖବର ସଂସ୍କୃତି

ବଡ ଘୋଷଣା କଲେ ମୁଖ୍ୟମନ୍ତ୍ରୀ, ଏଣିକି ପଦ୍ମଶ୍ରୀ ପୁରସ୍କୃତଙ୍କୁ ମିଳିବ ମାସକୁ ୨୫ ହଜାର ଟଙ୍କା

ଭୁବନେଶ୍ବର: ପଦ୍ମଶ୍ରୀ ପୁରସ୍କାର ଦେଶର ଗୌରବମୟ ବେସାମରିକ ସମ୍ମାନ। ବିଭିନ୍ନ କ୍ଷେତ୍ରରେ ଦେଶକୁ ଗୌରବାନ୍ବିତ କରିଥିବା ବ୍ୟକ୍ତିବିଶେଷଙ୍କୁ ଏହି ସମ୍ମାନ ମିଳିଥାଏ। ପଦ୍ମଶ୍ରୀ ପୁରସ୍କାରପ୍ରାପ୍ତ କୃତୀ ସନ୍ତାନ ମାନେ ସେମାନଙ୍କ ପ୍ରତିଭା ଓ ସେବା କାର୍ଯ୍ୟ ଦ୍ୱାରା ଓଡିଶାର ଗୌରବ ବୃଦ୍ଧି କରିଛନ୍ତି।

ସମାଜକୁ ସେମାନଙ୍କ ବଳିଷ୍ଠ ଅବଦାନର ସ୍ବୀକୃତି ସ୍ବରୂପ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ସେମାନଙ୍କ ସମ୍ମାନାର୍ଥେ ମାସକୁ ୨୫ ହଜାର ଟଙ୍କା ଲେଖାଏ ଅର୍ଥ ସମ୍ମାନ ରାଶି ପ୍ରଦାନ କରିବା ପାଇଁ ନିଷ୍ପତ୍ତି ଗ୍ରହଣ କରିଛନ୍ତି। ଚଳିତ ବର୍ଷ ଅପ୍ରେଲ ମାସ ଠାରୁ ଏହି ସମ୍ମାନ ରାଶି ପ୍ରଦାନ କରାଯିବ।

Categories
ଆଜିର ଖବର ଜାତୀୟ ଖବର

ପଦ୍ମ ପୁରସ୍କାର ପାଇବା ଗୌରବର ବିଷୟ: ମାଇକ୍ରୋସଫ୍ଟର ସିଇଓ ସତ୍ୟ ନଡେଲା

ନୂଆଦିଲ୍ଲୀ: ମାଇକ୍ରୋସଫ୍ଟ ଚେୟାରମ୍ୟାନ୍ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ସତ୍ୟ ନଡେଲା କହିଛନ୍ତି ଯେ, ଭାରତର ତୃତୀୟ ସର୍ବୋଚ୍ଚ ନାଗରିକ ପୁରସ୍କାର ପଦ୍ମ ଭୂଷଣ ପାଇବା ତାଙ୍କ ପାଇଁ ଗୌରବର ବିଷୟ। ସତ୍ୟ ନଡେଲା ଏହା ମଧ୍ୟ କହିଛନ୍ତି ଯେ, ସେ ଭାରତର ଲୋକଙ୍କ ସହ କାର୍ଯ୍ୟ ଜାରି ରଖିବାକୁ ଚାହୁଁଛନ୍ତି, ଯାହାଫଳରେ ପ୍ରଗତି କରିବା ପାଇଁ ଟେକ୍ନୋଲୋଜି ବ୍ୟବହାର କରିବାରେ ସହାୟକ ହେବ।

ନଡେଲା ଟ୍ୱିଟ୍ କରି କହିଛନ୍ତି, ‘ପଦ୍ମ ଭୂଷଣ ପୁରସ୍କାର ପାଇବା ଏବଂ ଅନେକ ଅସାଧାରଣ ବ୍ୟକ୍ତିଙ୍କ ସହ ସମ୍ମାନିତ ହେବା ଗୌରବର ବିଷୟ। ମୁଁ ରାଷ୍ଟ୍ରପତି, ପ୍ରଧାନମନ୍ତ୍ରୀ ଏବଂ ଭାରତବାସୀଙ୍କୁ ଧନ୍ୟବାଦ ଦେଉଛି। ମୁଁ ଭାରତର ଲୋକଙ୍କ ସହ ଅଧିକ ପ୍ରଗତି ପାଇଁ ଟେକ୍ନୋଲୋଜି ବ୍ୟବହାର କରିବାରେ ସାହାଯ୍ୟ କରିବାକୁ ଅପେକ୍ଷା କରିଛି। ‘

ଦେଶର ୭୩ ତମ ଗଣତନ୍ତ୍ର ଦିବସ ଅବସରରେ ନଡେଲା, ଗୁଗୁଲର ସିଇଓ ସୁନ୍ଦର ପିଚାଇ ଏବଂ ଟାଟା ଗ୍ରୁପ୍ ଚେୟାରମ୍ୟାନ୍ ନଟରାଜନ୍ ଚନ୍ଦ୍ରଶେଖରନଙ୍କୁ ଭାରତ ସରକାର ପଦ୍ମ ଭୂଷଣ ଘୋଷଣା କରିଛନ୍ତି।

ହାଇଦ୍ରାବାଦରେ ଜନ୍ମିତ ନଡେଲା (୫୪) ଫେବୃଆରୀ ୨୦୧୪ରେ ମାଇକ୍ରୋସଫ୍ଟର ସିଇଓ ହୋଇଥିଲେ। ଜୁନ୍ ୨୦୨୧ ରେ ତାଙ୍କୁ କମ୍ପାନୀର ଚେୟାରମ୍ୟାନ୍ ଭାବରେ ମଧ୍ୟ ନାମିତ କରାଯାଇଥିଲା। ଏହି ଅତିରିକ୍ତ ଭୂମିକାରେ ସେ ‘ବୋର୍ଡ ପାଇଁ ଏଜେଣ୍ଡା ନିର୍ଦ୍ଧାରିତ କାର୍ଯ୍ୟର ନେତୃତ୍ୱ ନେବେ’।

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଦିଲ୍ଲୀ ସରକାରଙ୍କ ଅଭିନବ ପ୍ରୟାସ, ପଦ୍ମ ପୁରସ୍କାର ପାଇବେ ଡାକ୍ତର ଏବଂ ସ୍ୱାସ୍ଥ୍ୟକର୍ମୀ!: ମନୋନୀତ କରିବେ ରାଜ୍ୟବାସୀ

ନୂଆଦିଲ୍ଲୀ: ପଦ୍ମ ପୁରଷ୍କାରକୁ ନେଇ ଦିଲ୍ଲୀ ସରକାର ଏକ ବଡ ନିଷ୍ପତ୍ତି ନେଇଛି। ଚଳିତ ପଦ୍ମ ପୁରସ୍କାର ପାଇଁ କେନ୍ଦ୍ର ସରକାରକୁ କେବଳ ଡାକ୍ତର ଏବଂ ସ୍ୱାସ୍ଥ୍ୟକର୍ମୀଙ୍କ ନାମ ଦିଲ୍ଲୀ ସରକାର ସୁପାରିଶ କରିବ। ଏନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ସୂଚନା ଦେଇଛନ୍ତି।

ସେ କହିଛନ୍ତି ଯେ, ଚଳିତ ବର୍ଷ ପଦ୍ମ ପୁରସ୍କାର କେନ୍ଦ୍ରକୁ କେବଳ ଡାକ୍ତର ଏବଂ ସ୍ୱାସ୍ଥ୍ୟ କର୍ମଚାରୀଙ୍କ ନାମ ସୁପାରିଶ କରିବ। ସର୍ବସାଧାରଣଙ୍କ ପାଇଁ ଦିଲ୍ଲୀ ସରକାର ଏକ ଇ-ମେଲ୍ ଆଇଡି ମଧ୍ୟ ଜାରି କରିବ, ଯେଉଁଥିରେ ସିଧା ସଳଖ ଲୋକେ ଏହାର ମତାମତ ଦେବେ। ଇ-ମେଲ୍ ଆଇଡି ମାଧ୍ୟମରେ ଡାକ୍ତରଙ୍କ ନାମ ଲେଖିବା ସହ ସେମାନଙ୍କୁ କାହିଁକି ପଦ୍ମ ପୁରଷ୍କାର ମିଳିବା ଉଚିତ, ତାହାର କାରଣ ଲେଖି ଲୋକେ ସରକାରଙ୍କ ନିକଟକୁ ପଠାଇପାରିବେ। ସେଥିପାଇଁ ଏକ ଇ-ମେଲ୍ ଆଇଡି ଦିଲ୍ଲୀ ସରକାର ଜାରି କରିଛି। ଅଗଷ୍ଟ ୧୫ ସୁଦ୍ଧା PadmaAwards.Delhi@gmail.com ଇ-ମେଲ୍ ଆଇଡି ଜରିଆରେ ଲୋକେ ନିଜର ମତାମତ ଜଣାଇପାରିବେ। ଏହି କୋଭିଡ ସମୟରେ କେଉଁ ଡାକ୍ତର ବା ସ୍ୱାସ୍ଥ୍ୟକର୍ମୀ କଠିନ ପରିଶ୍ରମ କରିଛନ୍ତି ତାଙ୍କୁ କାହିଁକି ପୁରସ୍କାର ମିଳିବା ଉଚିତ, ତାହା ଲେଖି ଲୋକେ ଏହି ମେଲ ମାଧ୍ୟମରେ ଜଣାଇପାରିବେ।

ଦିଲ୍ଲୀ ମୁଖ୍ୟମନ୍ତ୍ରୀ ଆଜି ଏକ ପ୍ରେସ ବିବୃତ୍ତିରେ କହିଛନ୍ତି ଯେ, ଡାକ୍ତର ଏବଂ ସ୍ୱାସ୍ଥ୍ୟ କର୍ମୀଙ୍କୁ ସମ୍ମାନ କରିବାର ଏହା ହେଉଛି ସଠିକ ସମୟ।