ନୂଆଦିଲ୍ଲୀ: ପଞ୍ଚାୟତିରାଜ ମନ୍ତ୍ରୀ ରାଜୀବ ରଞ୍ଜନ ସିଂହ ଓରଫ ଲଲନ ସିଂହ, ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଓ ପୃଥିବୀ ବିଜ୍ଞାନ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଜିତେନ୍ଦ୍ର ସିଂହ ଏବଂ ପଞ୍ଚାୟତିରାଜ ରାଷ୍ଟ୍ରମନ୍ତ୍ରୀ ପ୍ରଫେସର ଏସ୍ ପି ସିଂହ ବାଘେଲ ଆଜି ନୂଆଦିଲ୍ଲୀସ୍ଥିତ ବିଜ୍ଞାନ ଭବନରେ ଗ୍ରାମ ପଞ୍ଚାୟତ ସ୍ତରୀୟ ପାଣିପାଗ ପୂର୍ବାନୁମାନ ବ୍ୟବସ୍ଥାର ଶୁଭାରମ୍ଭ କରିଛନ୍ତି। ପଞ୍ଚାୟତିରାଜ ମନ୍ତ୍ରଣାଳୟ ଏବଂ ଭୂବିଜ୍ଞାନ ମନ୍ତ୍ରଣାଳୟ ଅଧୀନ ଭାରତୀୟ ପାଣିପାଗ ବିଭାଗ (ଆଇଏମଡି)ର ମିଳିତ ସହଯୋଗରେ ବିକଶିତ ଏହି ବ୍ୟବସ୍ଥା ତୃଣମୂଳ ସ୍ତରରେ ଜଳବାୟୁ ଜନିତ ପ୍ରସ୍ତୁତିରେ ଏକ ବଡ଼ ପଦକ୍ଷେପ।
ଏହି ଗୁରୁତ୍ୱପୂର୍ଣ୍ଣ ପ୍ରୟାସ ସରକାରଙ୍କ ୧୦୦ ଦିନିଆ କାର୍ଯ୍ୟସୂଚୀର ଏକ ଅଂଶ ଏବଂ ଏକ ସମଗ୍ର ସରକାରୀ ଆଭିମୁଖ୍ୟକୁ ପ୍ରତିଫଳିତ କରେ, ପଞ୍ଚାୟତିରାଜ ମନ୍ତ୍ରଣାଳୟ ତୃଣମୂଳ ଶାସନରେ ପରିବର୍ତ୍ତନ ଆଣିବା ପାଇଁ ବିଶେଷଜ୍ଞ ବିଭାଗଗୁଡିକ ସହିତ ଘନିଷ୍ଠ ଭାବରେ କାର୍ଯ୍ୟ କରୁଛି। ଏହି ପଦକ୍ଷେପ ଗ୍ରାମ ପଞ୍ଚାୟତଗୁଡ଼ିକୁ ପାଞ୍ଚ ଦିନିଆ ପାଣିପାଗ ପୂର୍ବାନୁମାନ ଏବଂ ଘଣ୍ଟା ପ୍ରତି ସଦ୍ୟତମ ସୂଚନା ପ୍ରଦାନ କରିବ, ଯାହାଦ୍ୱାରା ଗ୍ରାମୀଣ ଜନସାଧାରଣ କୃଷି କାର୍ଯ୍ୟକଳାପ ସମ୍ପର୍କରେ ଉତ୍ତମ ଭାବରେ ଯୋଜନା କରିବା ଏବଂ ପାଣିପାଗ ସମ୍ବନ୍ଧୀୟ ବିପଦ ପାଇଁ ପ୍ରସ୍ତୁତି କରିବାରେ ସକ୍ଷମ ହୋଇପାରିବେ।
କେନ୍ଦ୍ର ପଞ୍ଚାୟତିରାଜ ମନ୍ତ୍ରୀ ରାଜୀବ ରଂଜନ ସିଂ କାର୍ଯ୍ୟକ୍ରମକୁ ସମ୍ବୋଧିତ କରି କହିଥିଲେ ଯେ ‘‘ଗ୍ରାମ ପଞ୍ଚାୟତ ସ୍ତରରେ ପାଣିପାଗ ପୂର୍ବାନୁମାନ’’ ଭାରତୀୟ ଅର୍ଥବ୍ୟବସ୍ଥାକୁ ସଶକ୍ତ କରିବା ଏବଂ ଗ୍ରାମୀଣ ଜନସଂଖ୍ୟା ପାଇଁ ସହଜ ଜୀବନଧାରଣକୁ ବୃଦ୍ଧି କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହି ପଦକ୍ଷେପ ଜଳବାୟୁ ଆହ୍ୱାନର ମୁକାବିଲା କରିବା ଏବଂ କୃଷି ଓ ବିପର୍ଯ୍ୟୟ ମୁକାବିଲା ପ୍ରସ୍ତୁତି ପାଇଁ ନିଷ୍ପତ୍ତି ନେବାରେ ସୁଧାର ଆଣିବା ଦ୍ୱାରା ଗ୍ରାମୀଣ ପ୍ରଶାସନରେ ପରିବର୍ତ୍ତନ ଆଣିବ।’’ ଗ୍ରାମୀଣ ନାଗରିକମାନଙ୍କ ପାଖରେ ଠିକ୍ ସମୟରେ ପାଣିପାଗ ସୂଚନା ପହଞ୍ଚାଇବା, ଶେଷରେ ଜୀବିକାରେ ଉନ୍ନତି ଆଣିବା ଏବଂ ନିରନ୍ତର ବିକାଶକୁ ପ୍ରୋତ୍ସାହିତ କରିବାରେ ପଞ୍ଚାୟତିରାଜ ଅନୁଷ୍ଠାନ (ପିଆରଆଇ)ର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଶ୍ରୀ ସିଂହ ଆଲୋକପାତ କରିଥିଲେ। ଗ୍ରାମ ପଞ୍ଚାୟତ ସ୍ତରରେ ପାଣିପାଗ ପୂର୍ବାନୁମାନ ଗ୍ରାମାଞ୍ଚଳକୁ ସଶକ୍ତ କରିବା ଏବଂ କୃଷି ଭିତ୍ତିକ ଅର୍ଥନୀତିକୁ ପ୍ରୋତ୍ସାହିତ କରିବାରେ ଏକ ମାଇଲଖୁଣ୍ଟ ହେବ ବୋଲି ସେ କହିଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ଏକ ପେଡ୍ ମା କେ ନାମ’ ଏକ ଐତିହାସିକ ପଦକ୍ଷେପ ବୋଲି କେନ୍ଦ୍ରମନ୍ତ୍ରୀ ପ୍ରଶଂସା କରିଛନ୍ତି, ଯାହା ପରିବେଶ ସୁରକ୍ଷାକୁ ଭାବନାତ୍ମକ ମୂଲ୍ୟବୋଧ ସହିତ ଯୋଡ଼ିଛି। ଏହି ପଦକ୍ଷେପ ପାଇଁ ପଞ୍ଚାୟତିରାଜ ମନ୍ତ୍ରଣାଳୟ ଏବଂ ଆଇଏମଡିର ମିଳିତ ପ୍ରୟାସକୁ ସେ ପ୍ରଶଂସା କରିବା ସହ ପାଣିପାଗ ଅନିଶ୍ଚିତତା କାରଣରୁ କୃଷକମାନଙ୍କୁ ଅଧିକ ପ୍ରଭାବଶାଳୀ ଭାବରେ ଯୋଜନା କରିବା ଏବଂ କୃଷିଜନିତ କ୍ଷୟକ୍ଷତି ହ୍ରାସ କରିବାରେ ସାହାଯ୍ୟ କରିବାର ସମ୍ଭାବନା ଉପରେ ସେ ଆଲୋକପାତ କରିଥିଲେ।
ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଏବଂ ଭୂବିଜ୍ଞାନ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଡକ୍ଟର ଜିତେନ୍ଦ୍ର ସିଂ ପଞ୍ଚାୟତିରାଜ ମନ୍ତ୍ରଣାଳୟ ଏବଂ ଆଇଏମଡି ମଧ୍ୟରେ ସହଯୋଗକୁ ପ୍ରଶଂସା କରି କହିଥିଲେ ଯେ ଗ୍ରାମ ପଞ୍ଚାୟତ ସ୍ତରରେ ପାଣିପାଗ ପୂର୍ବାନୁମାନର ଉପଲବ୍ଧତା ବିପର୍ଯ୍ୟୟ ପ୍ରସ୍ତୁତିକୁ ଯଥେଷ୍ଟ ବୃଦ୍ଧି କରିବ ଏବଂ ସମଗ୍ର ଭାରତରେ ଜଳବାୟୁ ପରିବର୍ତ୍ତନ ମୁକାବିଲା କରିବାରେ ସକ୍ଷମ ଜନସମାଜ ସୃଷ୍ଟିରେ ଯୋଗଦାନ କରିବ। ଗତ ଏକ ଦଶନ୍ଧି ମଧ୍ୟରେ ପାଣିପାଗ ପୂର୍ବାନୁମାନର ସଠିକତାରେ କ୍ରମାଗତ ଉନ୍ନତି ପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦର୍ଶୀ ନେତୃତ୍ୱକୁ ଶ୍ରେୟ ଦେଇଥିଲେ।
ଏଆଇ, ମେସିନ୍ ଲର୍ଣ୍ଣିଂ ଏବଂ ଏକ ବିସ୍ତାରିତ ପର୍ଯ୍ୟବେକ୍ଷଣ ନେଟୱର୍କ ଭଳି ଉନ୍ନତ ଜ୍ଞାନକୌଶଳ ପାଣିପାଗ ପୂର୍ବାନୁମାନ ସମେତ ବିଭିନ୍ନ କ୍ଷେତ୍ରରେ ଭାରତର ବିଶ୍ୱସ୍ତରୀୟ ସ୍ଥିତିକୁ ସୁଦୃଢ଼ କରିଛି ବୋଲି ଡ. ସିଂହ ଆଲୋକପାତ କରିଥିଲେ। ଖରାପ ପାଣିପାଗର ପ୍ରତିକୂଳ ପ୍ରଭାବରୁ ଗ୍ରାମୀଣ ଜନସଂଖ୍ୟାକୁ ରକ୍ଷା କରିବା ଏବଂ କୃଷି ଉତ୍ପାଦକତାକୁ ଆହୁରି ସୁଦୃଢ଼ କରିବା ପାଇଁ ଏହି ସୂଚନାର ସକ୍ରିୟ ଉପଯୋଗ କରିବାକୁ ସେ ପଞ୍ଚାୟତିରାଜ ସଂସ୍ଥାଗୁଡ଼ିକୁ ଆହ୍ୱାନ ଦେଇଥିଲେ। ପଞ୍ଚାୟତସ୍ତରୀୟ ପାଣିପାଗ ପୂର୍ବାନୁମାନ ସମେତ କୃଷିର ଆଧୁନିକୀକରଣ ପାଇଁ ସରକାରଙ୍କ ପ୍ରୟାସ ଉପରେ ଡ. ଜିତେନ୍ଦ୍ର ସିଂହ ଆଲୋକପାତ କରିଥିଲେ।
ପଞ୍ଚାୟତିରାଜ ରାଷ୍ଟ୍ରମନ୍ତ୍ରୀ ପ୍ରଫେସର ଏସ୍ ପି ସିଂହ ବାଘେଲ ସ୍ମାର୍ଟ, ସଶକ୍ତ ଏବଂ ଆତ୍ମନିର୍ଭରଶୀଳ ପଞ୍ଚାୟତ ଗଠନ ପାଇଁ ସରକାରଙ୍କ ଦୃଷ୍ଟିକୋଣ ସହିତ ଯୋଡ଼ି ହୋଇଥିବା ଏହି ପଦକ୍ଷେପର ଦୀର୍ଘମିଆଦୀ ଲାଭ ସମ୍ପର୍କରେ ବିସ୍ତୃତ ଭାବେ ସୂଚନା ଦେଇଥିଲେ। ଗ୍ରାମୀଣ ନାଗରିକ, ବିଶେଷ କରି କୃଷକମାନଙ୍କ ଜୀବନ ଉପରେ ସକାରାତ୍ମକ ପ୍ରଭାବ ପକାଇବା ପାଇଁ ଏହି ପଦକ୍ଷେପର ସମ୍ଭାବନା ଉପରେ ସେ ଗୁରୁତ୍ୱାରୋପ କରିଥିଲେ ଏବଂ ଏହାର ଫାଇଦା ବିଷୟରେ ବ୍ୟାପକ ଜନସଚେତନତା ସୃଷ୍ଟି କରିବା ଉପରେ ଗୁରୁତ୍ୱାରୋପ କରିଥିଲେ। ପ୍ରଫେସର ବାଘେଲ କହିଛନ୍ତି ଯେ ଏଭଳି ପ୍ରଗତିଶୀଳ ଚିନ୍ତାଧାରା ଏବଂ ପରିବର୍ତ୍ତନମୂଳକ ପଦକ୍ଷେପ ମାଧ୍ୟମରେ ଗ୍ରାମୀଣ ଭାରତ ଏକ ବିକଶିତ ରାଷ୍ଟ୍ରର ସ୍ୱପ୍ନକୁ ସାକାର କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।
ପଞ୍ଚାୟତିରାଜ ମନ୍ତ୍ରଣାଳୟର ସଚିବ ବିବେକ ଭରଦ୍ୱାଜ ତାଙ୍କ ଅଭିଭାଷଣରେ ପାଣିପାଗ ସମ୍ବନ୍ଧୀୟ ସୂଚନାକୁ ସକ୍ରିୟ ଭାବରେ ଜନସାଧାରଣଙ୍କ ନିକଟରେ ପହଞ୍ଚାଇବାକୁ ପଞ୍ଚାୟତଗୁଡ଼ିକୁ ଆହ୍ୱାନ ଦେଇଥିଲେ। ଭୂ-ବିଜ୍ଞାନ ମନ୍ତ୍ରଣାଳୟର ସଚିବ ଡ. ଏମ୍ ରବିଚନ୍ଦ୍ରନ ଏବଂ ଭାରତୀୟ ପାଣିପାଗ ବିଭାଗର ମହାନିର୍ଦ୍ଦେଶକ ଡ. ମୃତ୍ୟୁଞ୍ଜୟ ମହାପାତ୍ର ‘‘ଗ୍ରାମ ପଞ୍ଚାୟତ ସ୍ତରରେ ପାଣିପାଗ ପୂର୍ବାନୁମାନ’’ର ବୈଷୟିକ ଦିଗ ଓ ଉପକାରିତା ବିଷୟରେ ବିସ୍ତୃତ ସୂଚନା ଦେଇଥିଲେ। ପଞ୍ଚାୟତିରାଜ ମନ୍ତ୍ରଣାଳୟର ଯୁଗ୍ମ ସଚିବ ଆଲୋକ ପ୍ରେମ ନାଗର ଏହି ଅଭିଯାନକୁ ଆଗକୁ ନେବାରେ ପଞ୍ଚାୟତର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ।
ଉନ୍ମୋଚନ ଉତ୍ସବରେ ପଞ୍ଚାୟତିରାଜ, କୃଷି, ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ, ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏନଡିଏମଏ), ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗ (ଡିଏସଟି) ଏବଂ ଅନ୍ୟ ପ୍ରମୁଖ ଅଂଶୀଦାରମାନେ ଉପସ୍ଥିତ ଥିଲେ। ହରିୟାଣା ଏବଂ ଉତ୍ତରପ୍ରଦେଶର ପଞ୍ଚାୟତ ପ୍ରତିନିଧିମାନେ ଏହି କାର୍ଯ୍ୟକ୍ରମରେ ଅତି ଉତ୍ସାହର ସହ ଅଂଶଗ୍ରହଣ କରି କୃଷି ଫଳାଫଳରେ ଉନ୍ନତି ଆଣିବା ଏବଂ ଜଳବାୟୁ ସମ୍ବନ୍ଧୀୟ ଆହ୍ୱାନରୁ ସେମାନଙ୍କ ସମ୍ପ୍ରଦାୟକୁ ରକ୍ଷା କରିବା ପାଇଁ ଏହି ପାଣିପାଗ ପୂର୍ବାନୁମାନ ଉପକରଣଗୁଡ଼ିକର ଉପଯୋଗ କରିବାକୁ ଗଭୀର ଆଗ୍ରହ ପ୍ରକାଶ କରିଥିଲେ।
ନୂଆ ବ୍ୟବସ୍ଥାର ଶୁଭାରମ୍ଭ ବ୍ୟତୀତ ପଞ୍ଚାୟତିରାଜ ବ୍ୟବସ୍ଥାର ନିର୍ବାଚିତ ପ୍ରତିନିଧି ଏବଂ ରାଜ୍ୟ ପଞ୍ଚାୟତିରାଜ ଅଧିକାରୀଙ୍କ ସମେତ ୨୦୦ରୁ ଅଧିକ ଅଂଶଗ୍ରହଣକାରୀଙ୍କ ପାଇଁ ‘‘ଗ୍ରାମ ପଞ୍ଚାୟତ ସ୍ତରରେ ପାଣିପାଗ ପୂର୍ବାନୁମାନ’’ ଶୀର୍ଷକ ଏକ ପ୍ରଶିକ୍ଷଣ କର୍ମଶାଳାର ଆୟୋଜନ କରାଯାଇଥିଲା। ଏହି କର୍ମଶାଳାରେ ପାଣିପାଗ ପୂର୍ବାନୁମାନ ଉପକରଣର ବୁଝାମଣା ଏବଂ ବ୍ୟବହାର ବୃଦ୍ଧି କରିବା ପାଇଁ ପ୍ରଶିକ୍ଷଣ ପ୍ରଦାନ କରାଯାଇଥିଲା, ଯାହା ସେମାନଙ୍କୁ ନିଜ ନିଜ ଅଞ୍ଚଳରେ ଜଳବାୟୁ ସହନଶୀଳତା ସୃଷ୍ଟି କରିବାକୁ ସଶକ୍ତ କରିଥିଲା।
ପାଣିପାଗ ପୂର୍ବାନୁମାନ ତଥ୍ୟ ମେରି ପଞ୍ଚାୟତ ଆପ୍, ଇଗ୍ରାମସ୍ୱରାଜ ଓ ଗ୍ରାମ ମଞ୍ଚିତ୍ରା ଭଳି ଡିଜିଟାଲ ପ୍ଲାଟଫର୍ମ ମାଧ୍ୟମରେ ଉପଲବ୍ଧ ହେବ, ଯାହା ପ୍ରଶାସନକୁ ସୁବ୍ୟବସ୍ଥିତ କରିବା ଏବଂ ତୃଣମୂଳ ସ୍ତରରେ ସ୍ୱଚ୍ଛତାକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଇଗ୍ରାମସ୍ୱରାଜ ପ୍ଲାଟଫର୍ମ ପ୍ରକଳ୍ପ ଟ୍ରାକିଂ ଏବଂ ସମ୍ବଳ ପରିଚାଳନାରେ ସାହାଯ୍ୟ କରୁଥିବା ବେଳେ ମେରି ପଞ୍ଚାୟତ ଆପ୍ ଗୋଷ୍ଠୀ ନିୟୋଜନକୁ ପ୍ରୋତ୍ସାହିତ କରେ। ଗ୍ରାମ ମଞ୍ଚିତ୍ରା ପ୍ଲାଟଫର୍ମ ପଞ୍ଚାୟତ ସ୍ତରରେ ସ୍ଥାନୀୟ ଯୋଜନା ଏବଂ ଉନ୍ନୟନ ମୂଳକ ପ୍ରକଳ୍ପରେ ସହାୟତା ପ୍ରଦାନ କରି ଭୂସ୍ଥାନୀୟ ବୁଝାମଣା ପ୍ରଦାନ କରିଥାଏ।
ଗ୍ରାମ ପଞ୍ଚାୟତସ୍ତରୀୟ ପାଣିପାଗ ପୂର୍ବାନୁମାନ ପ୍ରଣାଳୀର ଶୁଭାରମ୍ଭ ଗ୍ରାମୀଣ ସମୁଦାୟକୁ ସଶକ୍ତ କରିବା ଏବଂ ଜଳବାୟୁ ସହନଶୀଳ ଭାରତ ନିର୍ମାଣରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ। ଏହା ଗ୍ରାମୀଣ ଜନସାଧାରଣଙ୍କୁ କୃଷି କାର୍ଯ୍ୟକଳାପ, ବିପର୍ଯ୍ୟୟ ପ୍ରସ୍ତୁତି ଏବଂ ଭିତ୍ତିଭୂମି ଯୋଜନା ବିଷୟରେ ଅବଗତ ନିଷ୍ପତ୍ତି ନେବାରେ ସାହାଯ୍ୟ କରିବ, ଉନ୍ନତ ମାନର ଜୀବନ ଧାରଣ ସୁନିଶ୍ଚିତ କରିବ ଏବଂ ଦେଶର ପ୍ରଗତିରେ ଯୋଗଦାନ କରିବ।