ଭୁବନେଶ୍ୱର: ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧୀନ ପତ୍ର ସୂଚନା କାର୍ଯ୍ୟାଳୟ (ପିଆଇବି) ଭୁବନେଶ୍ୱର ପକ୍ଷରୁ ଓଡ଼ିଶାର ବିଭିନ୍ନ ଗଣମାଧ୍ୟମ ପ୍ରତିନିଧିଙ୍କୁ ନେଇ ପ୍ରୟାଗରାଜ ମହାକୁମ୍ଭ ପରିଦର୍ଶନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଗଣମାଧ୍ୟମ ପ୍ରତିନିଧିମାନେ ଦିବ୍ୟ ଓ ଭବ୍ୟ ମହାକୁମ୍ଭ କ୍ଷେତ୍ର ବୁଲି ଦେଖିବା ସହିତ ସେଠାକାର ଆଧ୍ୟାତ୍ମିକ ଓ ସାଂସ୍କୃତିକ ପରିବେଶର ପ୍ରତ୍ୟକ୍ଷ ଅନୁଭୂତି ହାସଲ କରିଛନ୍ତି। ବିଶେଷ କରି ମହାକୁମ୍ଭ ଭଳି ବିଶ୍ୱର ସର୍ବବୃହତ ଧାର୍ମିକ କାର୍ଯ୍ୟକ୍ରମ ଆୟୋଜନରେ ଉତ୍ତର ପ୍ରଦେଶ ସରକାର ଓ କେନ୍ଦ୍ର ସରକାରଙ୍କ ପକ୍ଷରୁ କରାଯାଇଥିବା ବ୍ୟାପକ ବ୍ୟବସ୍ଥା ଓଡ଼ିଶାର ଗଣମାଧ୍ୟମ ପ୍ରତିନିଧିମାନଙ୍କୁ ପ୍ରଭାବିତ କରିଛି।
ଓଡ଼ିଶାର ଗଣମାଧ୍ୟମ ପ୍ରତିନିଧିମାନେ ମହାକୁମ୍ଭ ନଗର ପରିସରରେ ଉତ୍ତର ପ୍ରଦେଶ ସରକାରଙ୍କ ଦ୍ୱାରା ସ୍ଥାପିତ ମହାକୁମ୍ଭ ସମନ୍ୱିତ ନିର୍ଦ୍ଦେଶ ଓ ନିୟନ୍ତ୍ରଣ କେନ୍ଦ୍ର ପରିଦର୍ଶନ କରିଥିଲେ । ଏହି କେନ୍ଦ୍ରରେ ସେମାନେ କୁମ୍ଭ ମେଳା ପରିସରରେ ଭିଡ଼ ପରିଚାଳନା, ଟ୍ରାଫିକ ନିୟନ୍ତ୍ରଣ ଓ ସୁରକ୍ଷା ବ୍ୟବସ୍ଥା ସମ୍ପର୍କରେ ଅବଗତ ହୋଇଥିଲେ। ସିସିଟିଭି କ୍ୟାମେରା, ଏଆଇ ଟେକ୍ନୋଲୋଜି ଓ ଡ୍ରୋନ୍ ସହାୟତାରେ ଏହି କେନ୍ଦ୍ରରୁ ସମ୍ପୂର୍ଣ୍ଣ ମହାକୁମ୍ଭ ଆୟୋଜନ କ୍ଷେତ୍ର ଉପରେ ନଜର ରଖାଯାଇଛି । ଏତେ ବଡ଼ ଧାର୍ମିକ କାର୍ଯ୍ୟକ୍ରମ ଆୟୋଜନ ପାଇଁ ପ୍ରଶାସନ ପକ୍ଷରୁ କିଭଳି ଆଧୁନିକ ପ୍ରଯୁକ୍ତିର ଉପଯୋଗ କରାଯାଇ ଶ୍ରଦ୍ଧାଳୁ, ସାଧୁସନ୍ଥ ଓ ଆଗନ୍ତୁକଙ୍କ ପାଇଁ ଉତ୍ତମ ବନ୍ଦୋବସ୍ତ କରାଯାଇଛି ସେ ବିଷୟରେ ଓଡ଼ିଆ ଗଣମାଧ୍ୟମ ପ୍ରତିନିଧିମାନଙ୍କୁ ସୂଚନା ଦିଆଯାଇଥିଲା।
ଓଡ଼ିଶାର ପ୍ରତିନିଧି ଦଳ ମହାକୁମ୍ଭ ପରିସରରେ ଶ୍ରଦ୍ଧାଳୁଙ୍କ ପାଇଁ ନିର୍ମିତ ଅସ୍ଥାୟୀ କେନ୍ଦ୍ରୀୟ ଚିକିତ୍ସାଳୟ ମଧ୍ୟ ବୁଲି ଦେଖିଥିଲେ । ୧୦୦ ଶଯ୍ୟା ବିଶିଷ୍ଟ ଏହି ଆଧୁନିକ ଚିକିତ୍ସାଳୟରେ ସମସ୍ତ ପ୍ରକାର ରୋଗର ଚିକିତ୍ସା ପାଇଁ ବିଶେଷ ସୁବିଧା କରାଯାଇଛି । ରୋଗ ପରୀକ୍ଷା ଠାରୁ ଆରମ୍ଭ କରି ଗୁରୁତର ରୋଗୀଙ୍କୁ ଚିକିତ୍ସା ସୁବିଧା ଯୋଗାଇ ଦେବା ପାଇଁ ଏଠାରେ ବିଶେଷଜ୍ଞ ଡାକ୍ତରମାନଙ୍କୁ ନିଯୁକ୍ତ କରାଯାଇଛି । ପ୍ରାୟତଃ ସବୁ ବିଭାଗର ବିଶେଷଜ୍ଞ ଡାକ୍ତର ଏଠାରେ ନିୟୋଜିତ ରହିଛନ୍ତି । ରୋଗ ପରୀକ୍ଷା ଏବଂ ଚିକିତ୍ସା ପାଇଁ ଅତ୍ୟାଧୁନିକ ଚିକିତ୍ସା ଉପକରଣ ମଧ୍ୟ ଏଠାରେ ଖଞ୍ଜା ହୋଇଛି । ଗୋଟିଏ କେନ୍ଦ୍ରୀୟ ଚିକିତ୍ସାଳୟ ବ୍ୟତୀତ ମହାକୁମ୍ଭ ପରିସରରେ ଛୋଟ ଛୋଟ ପ୍ରାଥମିକ ଏବଂ ଆଶୁ ଚିକିତ୍ସା କେନ୍ଦ୍ର ମଧ୍ୟ ସ୍ଥାପନ କରାଯାଇଛି । ମେଳା ବୁଲିବାକୁ ଆସିଥିବା କୋଟି କୋଟି ଶ୍ରଦ୍ଧାଳୁ ଓ ସାଧୁସନ୍ଥଙ୍କୁ ତ୍ୱରିତ ଚିକିତ୍ସା ସୁବିଧା ଯୋଗାଇ ଦେବାରେ ଏଗୁଡ଼ିକ ସହାୟକ ହେଉଛି । ଆବଶ୍ୟକ ହେଲେ ରୋଗୀମାନଙ୍କୁ ଅନ୍ୟତ୍ର ଚିକିତ୍ସା ପାଇଁ ସ୍ଥାନାନ୍ତର କରିବା ଲାଗି ଆମ୍ବୁଲାନ୍ସ, ବୋଟ ଆମ୍ବୁଲାନ୍ସ ଏବଂ ଏୟାର ଆମ୍ବୁଲାନ୍ସ ସୁବିଧା ମଧ୍ୟ ମହାକୁମ୍ଭ ପରିସରରେ କରାଯାଇଛି ।
ଓଡ଼ିଶାର ଗଣମାଧ୍ୟମ ପ୍ରତିନିଧିମାନେ ମହାକୁମ୍ଭ ପରିସରରେ କେନ୍ଦ୍ର ସରକାରଙ୍କ ସଂସ୍କୃତି ମନ୍ତ୍ରଣାଳୟ ତରଫରୁ ଆୟୋଜିତ କଳାଗ୍ରାମ ବୁଲି ଦେଖିଛନ୍ତି । ଏହି କଳାଗ୍ରାମରେ ସବୁ ରାଜ୍ୟର କଳା ଓ ସଂସ୍କୃତିର ସଂଗମ ଦେଖିବାକୁ ମିଳିଛି । ମହାକୁମ୍ଭ କଳାଗ୍ରାମରେ ଭାରତର ଐତିହ୍ୟକୁ ନେଇ ମଧ୍ୟ ବିବିଧ ପ୍ରଦର୍ଶନୀ ଆୟୋଜନ କରାଯାଇଛି । ୧୦ ଏକର ପରିମିତ ନାଗବାସୁକୀ କ୍ଷେତ୍ରରେ ନିର୍ମିତ କଳାଗ୍ରାମରେ ଭାରତର ହସ୍ତଶିଳ୍ପ, ବ୍ୟଞ୍ଜନ ଓ ସଂସ୍କୃତିର ଅଦ୍ଭୂତ ସମନ୍ୱୟ ଦେଖିବାକୁ ମିଳିଛି । ଆଧୁନିକ ପ୍ରଯୁକ୍ତି ପ୍ରୟୋଗ କଳାଗ୍ରାମକୁ ଆହୁରି ଜୀବନ୍ତ କରିଛି । ଏଠାରେ ଦେଶ ବିଦେଶର କଳାକାରମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଛନ୍ତି । ଓଡ଼ିଶାର ଗଣମାଧ୍ୟମ ପ୍ରତିନିଧିମାନେ ଡିଜିଟାଲ ଅନୁଭୂତି କେନ୍ଦ୍ର ମଧ୍ୟ ବୁଲି ଦେଖିଥିଲେ।
ଅନ୍ୟପକ୍ଷରେ ମହାକୁମ୍ଭ ପରିସରସ୍ଥିତ ତ୍ରିବେଣୀ ମାର୍ଗରେ ଭାରତ ସରକାରଙ୍କ ବିଭିନ୍ନ ମନ୍ତ୍ରଣାଳୟ ଓ ବିଭାଗ ତରଫରୁ ଆୟୋଜିତ ପ୍ରଦର୍ଶନୀକୁ ଓଡ଼ିଶାର ଗଣମାଧ୍ୟମ ପ୍ରତିନିଧିମାନେ ବୁଲି ଦେଖିଛନ୍ତି। ଏହି ପ୍ରଦର୍ଶନୀ କ୍ଷେତ୍ରରେ ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧୀନ କେନ୍ଦ୍ରୀୟ ସଞ୍ଚାର ବ୍ୟୁରୋ ପକ୍ଷରୁ ଏକ ଡିଜିଟାଲ ଫଟୋ ପ୍ରଦର୍ଶନୀ ଆୟୋଜନ କରାଯାଇଛି । ସେହିପରି ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏନଡିଆରଏଫ), ପ୍ରଧାନମନ୍ତ୍ରୀ ଇଣ୍ଟର୍ନସିପ୍ ଯୋଜନା, କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ଏବଂ ପ୍ରକାଶନ ବିଭାଗ ପକ୍ଷରୁ ମଧ୍ୟ ମଣ୍ଡପ କରାଯାଇଛି।
ଓଡ଼ିଶାର ଗଣମାଧ୍ୟମ ପ୍ରତିନିଧିମାନେ ମହାକୁମ୍ଭ ପରିଦର୍ଶନ କରିବା ସହିତ ଗଙ୍ଗା, ଯମୁନା ଓ ସରସ୍ୱତୀ ନଦୀର ସଂଗମ ସ୍ଥଳରେ ବୁଡ଼ ପକାଇବା ସହ ପୂଜାର୍ଚ୍ଚନା ମଧ୍ୟ କରିଥିଲେ। ପିଆଇବି ଭୁବନେଶ୍ୱରର ଗଣମାଧ୍ୟମ ଓ ସଂଚାର ଅଧିକାରୀ ସ୍ୱାଧୀନ ଶକ୍ତିପ୍ରସାଦଙ୍କ ତତ୍ତ୍ୱାବଧାନରେ ଏହି ମହାକୁମ୍ଭ ପରିଦର୍ଶନ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ବରିଷ୍ଠ ସାମ୍ବାଦିକ ସମରେନ୍ଦୁ ଦାସ, ଅନୁପମ ପ୍ରହରାଜ, ସରୋଜ କୁମାର ସାହୁ, କ୍ଷୀତିଶ ରାୟ ଏବଂ ସ୍ଥିତପ୍ରଜ୍ଞ ମିଶ୍ର ପ୍ରମୁଖ ସାମିଲ ହୋଇଥିଲେ।
ସୂଚନାଯୋଗ୍ୟ ବୁଧବାର ପବିତ୍ର ମହାଶିବରାତ୍ରୀ ଉପଲକ୍ଷେ ପ୍ରୟାଗରାଜ ମହାକୁମ୍ଭ ସମାପନ ହେଉଛି। ବର୍ତ୍ତମାନ ସୁଦ୍ଧା ମହାକୁମ୍ଭରେ ୬୫ କୋଟିରୁ ଅଧିକ ଶ୍ରଦ୍ଧାଳୁ ବୁଡ଼ ପକାଇସାରିଛନ୍ତି। ୧୪୪ ବର୍ଷ ପରେ ଆୟୋଜିତ ହେଉଥିବା ପ୍ରୟାଗରାଜ ମହାକୁମ୍ଭ ସନାତନ ଧର୍ମର ସବୁଠୁ ବଡ଼ କାର୍ଯ୍ୟକ୍ରମ ଭାବେ ପ୍ରମାଣିତ ହୋଇଥିବା ବେଳେ ଏହାର ଆୟୋଜନରେ ଉଭୟ ଉତ୍ତରପ୍ରଦେଶ ସରକାର ଏବଂ କେନ୍ଦ୍ର ସରକାରଙ୍କ ବ୍ୟାପକ ସୁବ୍ୟବସ୍ଥାକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
