ଆଠଗଡ: ପୁଅକୁ ହତ୍ୟା କରି ଘର ପଛପଟରେ ଥିବା ବାଡ଼ିରେ ମୃତଦେହକୁ ପୋତିଦେଇଛି ବାପା। କଟକ ଜିଲ୍ଲାର ଆଠଗଡ଼ ବ୍ଲକ ଅନ୍ତର୍ଗତ ଗୁରୁଡିଝାଟିଆ ଥାନା ଅଂଚଳରେ ଏଭଳି ଘଟଣା ଘଟିଥିବାର ଚର୍ଚ୍ଚା ହେଉଛି। ପୁଅକୁ ଜଘନ୍ୟ ହତ୍ୟା କରିବା ପରେ ଉପାୟ ନ ପାଇ ବାପା ଗାତ ଖୋଳି ପୋତିଦେଇଥିବା ଅଭିଯୋଗ ହୋଇଛି ।
ସପ୍ତାହ ତଳେ ୩୦ ବର୍ଷୀୟ ପୁଅକୁ ହତ୍ୟା କରାଯାଇଥିବା କୁହାଯାଉଛି । ସଂପୃକ୍ତ ଯୁବକଙ୍କୁ ଗାଁ ଲୋକେ ୭ ଦିନ ପର୍ଯ୍ୟନ୍ତ ଦେଖି ନଥିବାରୁ ସନ୍ଦେହ କରିଥିଲେ। ଏନେଇ ପୋଲିସକୁ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା । ପୋଲିସ ପୁତ୍ରହନ୍ତା ବାପାକୁ ଜେରା କରିବା ସମୟରେ ଘଟଣା ପଦାକୁ ଆସିଛି। ଏଥି ସହିତ ଘର ପଛରେ ଥିବା ବାଡ଼ିରୁ ପୁଅର ମୃତଦେହ ଠାବ ହୋଇଛି। ହତ୍ୟାକାଣ୍ଡର କାରଣ ଅସ୍ପଷ୍ଟ ଥିବା ବେଳେ ପୋଲିସ ଘଟଣାର ତଦନ୍ତ କରୁଛି।