Tag: ପୁରୀ

ପୁରୀ: ଶ୍ରୀମନ୍ଦିରରେ ଆଗାମୀ ଦୋଳପୂର୍ଣ୍ଣିମାକୁ ନେଇ ଅନୁଷ୍ଠିତ ହେବାକୁ ଥିବା ସମସ୍ତ ନୀତି ନିର୍ଘଣ୍ଟକୁ ଗୁରୁବାର ଛତିଶା ନିଯୋଗ ବୈଠକରେ ଅନୁମୋଦନ ମିଳିଅଛି। ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ଅଧ୍ୟକ୍ଷତାରେ ଶ୍ରୀମନ୍ଦିର କାର୍ଯ୍ୟାଳୟରେ ଅନୁଷ୍ଠିତ ବୈଠକରେ ଆସନ୍ତା ମେଣ୍ଢା ପୋଡ଼ି, ଦୋଳପୂର୍ଣ୍ଣିମା ନୀତି ନିର୍ଘଣ୍ଟ ଚୁଡାନ୍ତ ହୋଇଅଛି। ଆସନ୍ତା ୧୩ ଓ ୧୪ ତାରିଖ ମେଣ୍ଢା ପୋଡ଼ି ଓ ଦୋଳପୂର୍ଣ୍ଣିମା ନୀତି ନିର୍ଘଣ୍ଟ ଉପରେ ମୋହର ମାରିଛି ଛତିଶା ନିଯୋଗ। ୧୩ ଓ ୧୪ ତାରିଖ ରାତି ୩ ଟାରୁ ଶ୍ରୀମନ୍ଦିର ଦ୍ଵାର ଫିଟା ନୀତି ସମ୍ପାଦନ କରାଯାଇ ଅନ୍ୟାନ୍ୟ ନୀତି କାନ୍ତି ହେବ।

ସେହିପରି ୧୪ ତାରିଖ ଦୋଳପୂର୍ଣ୍ଣିମା ଦିନ ଦୋଳବେଦୀ ରାତ୍ର ୩ ରୁ ଦ୍ୱାରଫିଟା ନୀତି ଅନୁଷ୍ଠିତ ହେବା ପରେ ୪ ଟା ସୁଦ୍ଧା ମଙ୍ଗଳ ଆଳତି ହୋଇ ସକାଳ ୮ ରୁ ୯ ଟା ସୁଦ୍ଧା ହେବ ରାଜାଧିରାଜବେଶ ବା ସୁନାବେଶ। ଅପରାହ୍ନ ୧୨ ଟା ୩୦ ସୁଦ୍ଧା ଦୋଳବେଦୀକୁ ବିମାନରେ ଦୋଳଗୋବିନ୍ଦ ବିଜେ ନୀତି ହେବ। ଅନ୍ୟପକ୍ଷରେ ଶ୍ରୀମନ୍ଦିରରେ କେବଳ ଓମଫେଡ ଘିଅ ବ୍ୟବହାର ଓ ଏଥିରେ ମହାପ୍ରଭୁଙ୍କର ଫୋଟୋ ବ୍ରାଣ୍ଡିଂ କୁ ନେଇ ବୈଠକରେ ଆଲୋଚନା ହୋଇଥିଲା। ଓମଫେଡ ଘିଅ ବ୍ୟବହାର କରିସାରିବା ପରେ ଫୋଟୋ ଥିବା ଡବା ଗୁଡ଼ିକ ଏଣେତେଣେ ପଡ଼ିବା ସହ ଏଥିରେ ବର୍ଜ୍ୟ ଉଠାଇବା କାର୍ଯ୍ୟରେ ବ୍ୟବହାର କରାଯାଉଅଛି ବୋଲି ସେବାୟତ ଅଭିଯୋଗ କରିଥିଲେ। ଏଣୁ ଧାର୍ମିକ ଭାବନାକୁ କୁଠାରଘାତ ନ ହେବା ଭଳି ପଦକ୍ଷେପ ନେବାକୁ ଓମଫେଡ୍ ସହ ଆଲୋଚନା କରାଯିବ ବୋଲି ଜିଲ୍ଲାପାଳ ମତ ରଖିଥିଲେ।

ସେହିପରି ଆଗକୁ ଖରାଦିନ ପାଇଁ ଭକ୍ତଙ୍କ ନିମନ୍ତେ ସ୍ୱତନ୍ତ୍ର ବ୍ୟବସ୍ଥା କରାଯିବା ସହ ସ୍ୱତନ୍ତ୍ର ସେଡ୍ ଠାରୁ ଆରମ୍ଭ କରି ପାଣି ବଣ୍ଟନ ପାଇଁ ବ୍ୟବସ୍ଥା କରାଯାଇଅଛି ।୧୦ ଟି ୱାଟର ଡିସ୍ପେନସର ମାଧ୍ୟମରେ ଭକ୍ତ ଙ୍କୁ ପାଣି ଯୋଗାଇ ଦେବାକୁ ନିଷ୍ପତ୍ତି ନିଆଯାଇଥିବା ପୁରୀ ଜିଲ୍ଲାପାଳ ତଥା ଶ୍ରୀମନ୍ଦିର ଉପ ମୁଖ୍ୟପ୍ରଶାସକ ମତ ରଖିଛନ୍ତି।

ପୁରୀ: କେନ୍ଦ୍ର ବଜେଟକୁ ନେଇ ଶନିବାର ପୁରୀରେ ପ୍ରେସମିଟ୍ ଅନୁଷ୍ଠିତ ହୋଇଥିବା ବେଳେ ଏଥିରେ ଶିଳ୍ପମନ୍ତ୍ରୀ ସମ୍ପଦ ସ୍ୱାଇଁ ଓ ପୁରୀ ସାଂସଦ ସମ୍ବିତ ପାତ୍ର ବଜେଟ୍ ରେ ଓଡ଼ିଶା ତଥା ପୁରୀକୁ ମିଳିବାକୁ ଥିବା ଲାଭ ଉପରେ ସୂଚନା ଦେଇଛନ୍ତି। ୨୦୨୫-୨୬ କେନ୍ଦ୍ର ବଜେଟ୍ ରୁ ଓଡ଼ିଶା ସିଂହଭାଗ ପାଇବା କୁ ଥିବା ବେଳେ ପୁରୀ ଜିଲ୍ଲାକୁ ମଧ୍ୟ ବଜେଟ୍ରେ ଫାଇଦା ମିଳିଅଛି।

ଖୋର୍ଦ୍ଧା, ପୁରୀ, କଟକ ଭଳି ସହରକୁ ନେଇ ୭ ହଜାର କିଲୋମିଟର ପରିମିତ ଏକ ମହାନଗରୀ ପରିକଳ୍ପନା କରାଯାଉଥିବା ବେଳେ ପୁରୀ ଏଥିରେ ସାମିଲ ରହିଛି। ରାଜ୍ୟର ବିଭିନ୍ନ ସହରକୁ ସମୃଦ୍ଧ ସହର ଭାବରେ ଗଢିବାକୁ ବଜେଟ୍ ରେ ପ୍ରାବଧାନ ରହିଥିବା ବେଳେ ଏଥିରେ ମଧ୍ୟ ପୁରୀ ସାମିଲ ରହିଛି।

ସେହିପରି ଜଗନ୍ନାଥ ଦର୍ଶନ ଯୋଜନାରେ ସଦର ମହକୁମାରୁ ଲୋକଙ୍କୁ ବସ୍ ରେ ଆଣି ଜଗନ୍ନାଥ ଦର୍ଶନ କରାଇବା ସହ ମହାପ୍ରସାଦ ସେବନ ପାଇଁ ୩୦ କୋଟି ବଜେଟ୍ କରାଯାଇଛି। ବକୁଳ ବନ ଉନ୍ନୟନ ଯୋଜନା ମାଧ୍ୟମରେ ବକୁଳ ବନ ଉନ୍ନତିକରଣ ପାଇଁ ମଧ୍ୟ ବଜେଟ୍ ରେ ସ୍ଥାନ ଦିଆଯାଇଛି।

ସେହିପରି ହୋମ୍ ଷ୍ଟେ ପାଇଁ ମୁଦ୍ରା ଲୋନ୍ ମିଳିବାକୁ ଥିବାବେଳେ ପର୍ଯ୍ୟଟନ ହବ, ଯୁବ ବ୍ୟବସାୟୀ, ଇକୋ ଟୁରିଯିମ୍ ଉନ୍ନତି ପାଇଁ ବଜେଟରେ ସ୍ୱତନ୍ତ୍ର ବ୍ୟବସ୍ଥା ରହିଥିବା ବେଳେ ଏଥିରେ ମଧ୍ୟ ପୁରୀବାସୀ ଲାଭ ଉଠାଇ ପାରିବେ ବୋଲି ସାମ୍ବାଦିକ ସମ୍ବିଳନୀରେ ମନ୍ତ୍ରୀ ସୂଚନା ଦେଇଛନ୍ତି।

ଭୁବନେଶ୍ଵର: ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ, ଭାରତ ସରକାରଙ୍କ ପକ୍ଷରୁ ଆଜି ଓ ମାର୍ଚ୍ଚ ୧ ତାରିଖରେ ଓଡ଼ିଶାର ପୁରୀଠାରେ ଜନସ୍ୱାସ୍ଥ୍ୟ ସେବା ବ୍ୟବସ୍ଥାରେ ଉତ୍ତମ ଓ ଅନୁକରଣୀୟ ଅଭ୍ୟାସ ଓ ଉଦ୍ଭାବନ ସମ୍ପର୍କିତ ନବମ ଜାତୀୟ ଶିଖର ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି। ଏହି ସମ୍ମାନଜନକ କାର୍ଯ୍ୟକ୍ରମ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକ ପାଇଁ ସେମାନଙ୍କର ଅଭିନବ ଅଭ୍ୟାସ ଏବଂ ସାର୍ବଜନୀନ ସ୍ୱାସ୍ଥ୍ୟସେବା ଯୋଗାଣ ବୃଦ୍ଧି ଉଦ୍ଦେଶ୍ୟରେ ପ୍ରଭାବଶାଳୀ ରଣନୀତି ପ୍ରଦର୍ଶନ କରିବା ପାଇଁ ଏକ ପ୍ଲାଟଫର୍ମ ଭାବରେ କାର୍ଯ୍ୟ କରିବ।

ନବମ ଜାତୀୟ ଶିଖର ସମ୍ମିଳନୀକୁ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଜଗତ ପ୍ରକାଶ ନଡ୍ଡା ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ. ମୁକେଶ ମହାଲିଙ୍ଗଙ୍କ ଉପସ୍ଥିତିରେ ଉଦଘାଟନ କରିବେ। ଏହି କାର୍ଯ୍ୟକ୍ରମରେ ଅତିରିକ୍ତ ମୁଖ୍ୟ ଶାସନ ସଚିବ/ପ୍ରମୁଖ ସଚିବ, ମିଶନ ନିର୍ଦ୍ଦେଶକ, ବରିଷ୍ଠ ରାଜ୍ୟ/କେନ୍ଦ୍ରଶାସିତ ଅଞ୍ଚଳର ନୋଡାଲ ଅଧିକାରୀ (ଏନ୍ଏଚ୍ଏମ୍ ଅଧିକାରୀ) ଏବଂ ମନ୍ତ୍ରଣାଳୟ, ଏନ୍ଏଚ୍ଏସ୍ଆରସି ଏବଂ ଆରଆରସି-ଏନଇର ବରିଷ୍ଠ ପ୍ରତିନିଧିମାନେ ଅଂଶଗ୍ରହଣ କରିବେ।

୨୦୧୩ ମସିହାରେ ଏହାର ଆରମ୍ଭ ପରଠାରୁ ଏହି ଜାତୀୟ ସମ୍ମିଳନୀ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ମଧ୍ୟରେ ଜ୍ଞାନ ଆଦାନପ୍ରଦାନ ଏବଂ କ୍ରସ୍-ଲର୍ଣ୍ଣିଂକୁ ପ୍ରୋତ୍ସାହିତ କରିବା ପାଇଁ ଏକ ବାର୍ଷିକ ପ୍ରୟାସରେ ପରିଣତ ହୋଇଛି। ବର୍ଷ ବର୍ଷ ଧରି, ଏହା ସଫଳତାର ସହ ଅଗ୍ରଣୀ ପଦକ୍ଷେପ ସଂପର୍କିତ ସୂଚନା ପ୍ରସାରଣ କରିଛି ଯାହା ଭାରତର ସ୍ୱାସ୍ଥ୍ୟ ସେବା ବ୍ୟବସ୍ଥାକୁ ସୁଦୃଢ଼ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି। ଏହା ପୂର୍ବରୁ ୨୦୨୨ ମେ’ ମାସରେ ଗୁଜରାଟର କେଭାଡିଆଠାରେ ଚିନ୍ତନ ଶିବିର ସହ ଏହି ଶିଖର ସମ୍ମିଳନୀ ଅନୁଷ୍ଠିତ ହୋଇଥିଲା।

ଜାତୀୟ ସ୍ୱାସ୍ଥ୍ୟସେବା ଇନୋଭେସନ ପୋର୍ଟାଲ (ଏନଏଚଆଇଏନପି) ମାଧ୍ୟମରେ ସେମାନଙ୍କର ସର୍ବୋତ୍ତମ ଅଭ୍ୟାସ ଏବଂ ଉଦ୍ଭାବନ ଦାଖଲ କରିବାକୁ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳକୁ ନିର୍ଦ୍ଦେଶ ପ୍ରଦାନ ସହ ୨୦୨୩ ଡିସେମ୍ବରରେ ଚଳିତ ବର୍ଷର ଶିଖର ସମ୍ମିଳନୀ ପାଇଁ ପ୍ରକ୍ରିୟା ଆରମ୍ଭ ହୋଇଥିଲା। ଟ୍ରାୟାଲ ଏବଂ ଡୁପ୍ଲିକେଟ ଏଣ୍ଟ୍ରିକୁ ମିଶାଇ ସମୁଦାୟ ୧୬୫ଟି ଏଣ୍ଟ୍ରି ଦାଖଲ କରାଯାଇଥିଲା। ଜେଏସ୍ (ପଲିସି)ର ଅଧ୍ୟକ୍ଷତ୍ୱରେ କାର୍ଯ୍ୟକ୍ରମ ବିଭାଜନକୁ ନେଇ ଏକ କଠୋର ସମୀକ୍ଷା ପ୍ରକ୍ରିୟା ଏବଂ ଚୂଡ଼ାନ୍ତ ଆକଳନ ପରେ ଶିଖର ସମ୍ମିଳନୀ ପାଇଁ ମୌଖିକ ଉପସ୍ଥାପନା ଏବଂ ପୋଷ୍ଟର ଚୟନ ଚୂଡ଼ାନ୍ତ ହୋଇଥିଲା।

୨୦୨୪ ନଭେମ୍ବରରେ ୧୯ଟି ରାଜ୍ୟରେ ଅନୁଷ୍ଠିତ ହୋଇଥିବା ୧୬ତମ ସାଧାରଣ ସମୀକ୍ଷା ମିଶନ (ସିଆରଏମ)ର ରିପୋର୍ଟ ଜାରି କରିବା ଚଳିତ ବର୍ଷର ଶିଖର ସମ୍ମିଳନୀର ଏକ ପ୍ରମୁଖ ଆକର୍ଷଣ ହେବ। ୧୬ତମ ସିଆରଏମ ନିମ୍ନଲିଖିତ ଭାବରେ କରାଯାଇଥିଲା:

ନଭେମ୍ବର ୧୮, ୨୦୨୪ : ନୂଆଦିଲ୍ଲୀରେ ଜାତୀୟ ସ୍ତରୀୟ ବ୍ରିଫିଂ।

ନଭେମ୍ବର ୧୯–୨୩, ୨୦୨୪ : ୧୭ଟି ରାଜ୍ୟରେ କ୍ଷେତ୍ର ପରିଦର୍ଶନ: ଅରୁଣାଚଳ ପ୍ରଦେଶ, ଆସାମ, ବିହାର, ଛତିଶଗଡ଼, ଗୁଜରାଟ, ହରିୟାଣା, ହିମାଚଳ ପ୍ରଦେଶ, ଜମ୍ମୁ ଓ କଶ୍ମୀର, କର୍ଣ୍ଣାଟକ, ତ୍ରିପୁରା, ମିଜୋରାମ, ଓଡ଼ିଶା, ରାଜସ୍ଥାନ, ମଧ୍ୟପ୍ରଦେଶ, ଉତ୍ତରାଖଣ୍ଡ, ଉତ୍ତରପ୍ରଦେଶ ଏବଂ ପଶ୍ଚିମବଙ୍ଗ।

ନଭେମ୍ବର ୨୬–୩୦, ୨୦୨୪ : ୨ଟି ରାଜ୍ୟରେ କ୍ଷେତ୍ର ପରିଦର୍ଶନ: ଝାଡ଼ଖଣ୍ଡ ଏବଂ ମହାରାଷ୍ଟ୍ର।

୧୬ତମ ସିଆରଏମରେ ମନ୍ତ୍ରଣାଳୟର ସରକାରୀ ଅଧିକାରୀ, ଅନ୍ୟ ମନ୍ତ୍ରଣାଳୟର ପ୍ରତିନିଧି, ଜନସ୍ୱାସ୍ଥ୍ୟ ବିଶେଷଜ୍ଞ, ନାଗରିକ ସମାଜ ସଦସ୍ୟ, ଉନ୍ନୟନ ସହଯୋଗୀ ଏବଂ ମନ୍ତ୍ରଣାଳୟ ପରାମର୍ଶଦାତାଙ୍କୁ ମିଶାଇ ୧୯ଟି ଟିମ୍ ରହିଥିଲା। ଏହି ମିଶନର ଫଳାଫଳ ସହ କାର୍ଯ୍ୟକାରୀଯୋଗ୍ୟ ଦୃଷ୍ଟିକୋଣକୁ ଶିଖର ସମ୍ମିଳନୀରେ ସେୟାର କରାଯିବ।

ସର୍ବୋତ୍ତମ ଅଭ୍ୟାସ ଏବଂ ଉଦ୍ଭାବନ ଉପରେ ଜାତୀୟ ଶିଖର ସମ୍ମିଳନୀ ଭାରତର ସ୍ୱାସ୍ଥ୍ୟସେବା ଇକୋସିଷ୍ଟମରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହୋଇ ରହିଛି, ଯାହା ଜନସ୍ୱାସ୍ଥ୍ୟ କ୍ଷେତ୍ରରେ ସହଯୋଗ, ଉଦ୍ଭାବନ ଏବଂ ଉତ୍କର୍ଷତାକୁ ପ୍ରୋତ୍ସାହିତ କରୁଛି। ନବମ ସଂସ୍କରଣ ଏକ ଐତିହାସିକ କାର୍ଯ୍ୟକ୍ରମ ହେବ, ଯାହା ସ୍ୱାସ୍ଥ୍ୟ ସେବା ବ୍ୟବସ୍ଥାକୁ ସୁଦୃଢ଼ କରିବ ଏବଂ ସମସ୍ତଙ୍କ ପାଇଁ ସ୍ୱାସ୍ଥ୍ୟ ଫଳାଫଳରେ ଉନ୍ନତି ଆଣିବା ପାଇଁ ଦେଶର ପ୍ରତିବଦ୍ଧତାକୁ ସୁଦୃଢ଼ କରିବ।

ଭୁବନେଶ୍ଵର: ଆଜି ମୁଖ୍ୟମନ୍ତ୍ରୀ ବିଧାନସଭାରେ ରାଜ୍ୟର ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିଛନ୍ତି। ଚଳିତ ବଜେଟରେ ମୁଖ୍ୟମନ୍ତ୍ରୀ ଶ୍ରୀଜଗନ୍ନାଥ ଦର୍ଶନ ଯୋଜନା ଘୋଷଣା କରିଛନ୍ତି। ଏହି ଯୋଜନା ଅଧୀନରେ ପ୍ରତ୍ୟେକ ଜିଲ୍ଲା ସଦରମହକୁମାରୁ ସ୍ୱତନ୍ତ୍ର ବସ ଯୋଗେ ଗରିବ ଭକ୍ତମାନେ ମାଗଣାରେ ପୁରୀ ଆସି ଶ୍ରୀ ଜଗନ୍ନାଥ ମହାପ୍ରଭୁଙ୍କୁ ଦର୍ଶନ କରିବା ସହ ମହାପ୍ରସାଦ ସେବନ କରିପାରିବେ। ଏଥିପାଇଁ ବଜେଟରେ ୩୦ କୋଟି ଟଙ୍କାର ବ୍ୟୟବରାଦ ପ୍ରସ୍ତାବ ହୋଇଛି।

ଭୁବନେଶ୍ୱର: ଚଳିତ ବର୍ଷ ଜୁନ ମାସ ୨୭ ତାରିଖରେ ପୁରୀରେ ବିଶ୍ଵପ୍ରସିଦ୍ଧ ରଥଯାତ୍ରା ଅନୁଷ୍ଠିତ ହେବାକୁ ଯାଉଛି। ଏହି ରଥଯାତ୍ରାକୁ ଶୃଙ୍ଖଳିତ ଏବଂ ବ୍ୟବସ୍ଥିତ ଭାବେ ଆୟୋଜନ କରିବା ନିମନ୍ତେ ଆଜି ଭୁବନେଶ୍ୱରସ୍ଥିତ ଡିଜିପିଙ୍କ କ୍ୟାମ୍ପ କାର୍ଯ୍ୟାଳୟଠାରେ ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଯୋଗେଶ ବାହାଦୁର ଖୁରାନିଆଙ୍କ ଅଧ୍ୟକ୍ଷତାରେ ପ୍ରଥମ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଆସନ୍ତା ରଥଯାତ୍ରାରେ ସମ୍ଭାବ୍ୟ ଭିଡ଼ ନିୟନ୍ତ୍ରଣ ଏବଂ ଗତ ବର୍ଷ ସମ୍ମୁଖୀନ ହୋଇଥିବା ବିଭିନ୍ନ ସମସ୍ୟାକୁ ଦୃଷ୍ଟିରେ ରଖି ଏବେ ଠାରୁ ବ୍ୟାପକ ପ୍ରସ୍ତୁତି ପ୍ରକ୍ରିୟା ଆରମ୍ଭ କରିବା  ନିମନ୍ତେ  ଡିଜିପି ଶ୍ରୀ ଖୁରାନିଆ ବରିଷ୍ଠ ପୋଲିସ ଅଧିକାରୀ ମାନଙ୍କୁ  ନିର୍ଦ୍ଦେଶ ଦେଇଥିଲେ। ଶ୍ରୀ ଜଗନ୍ନାଥ ମନ୍ଦିର ପରମ୍ପରା ଅନୁଯାୟୀ ଶ୍ରୀଜୀଉଙ୍କ ରୀତିନୀତି ବିଭିନ୍ନ ତାରିଖରେ ପାଳନ କରାଯିବ। ଏହି ଉପଲକ୍ଷେ ଦେଶ ବିଦେଶରୁ ଲକ୍ଷାଧିକ ଭକ୍ତ ପୁରୀରେ ସମାଗମ ହେବେ। ଏହାସହ ବହୁ ଗୁରୁତ୍ୱପୂର୍ଣ୍ଣ ବ୍ୟକ୍ତିବିଶେଷ ମହାପ୍ରଭୁ ଶ୍ରୀ ଜଗନ୍ନାଥଙ୍କ ରଥଯାତ୍ରା ଦେଖିବାକୁ ଆଗମନର ସମ୍ଭାବନା ରହିଛି।

ଏହାପରେ ବିଭିନ୍ନ ପ୍ରସଙ୍ଗ ସମ୍ପର୍କରେ  ବୈଠକରେ ବିସ୍ତୃତ ଭାବେ ଆଲୋଚନା ହୋଇଥିଲା।  ଉତ୍ତରା ଛକ ଠାରୁ ପୁରୀ ପର୍ଯ୍ୟନ୍ତ ସିସିଟିଭିର ଲଗାଇବା, ଟ୍ରାଫିକ ସମସ୍ୟାର ସୁପରିଚାଳନା, ଦଳା ଚକଟା ଭଳି ପରିସ୍ଥିତିକୁ ଏଡାଇବା ନିମନ୍ତେ ସଜାଗ ତଥା ସ୍ୱତନ୍ତ୍ର ବ୍ୟବସ୍ଥା, ଗାଡି ପାର୍କିଂ, ଅତି ବିଶିଷ୍ଟ ବ୍ୟକ୍ତି ବିଶେଷଙ୍କ ପାଇଁ ସ୍ୱତନ୍ତ୍ର ହେଲିପ୍ୟାଡ଼, ପୋଲିସ ଫୋର୍ସଙ୍କ ରହଣି ନିମନ୍ତେ ସ୍ୱତନ୍ତ୍ର ସୁବିଧା, ଶୃଙ୍ଖଳିତ ରଥଟଣା, ବ୍ୟାରିକେଡ଼ ବ୍ୟବସ୍ଥା, ଜିଲ୍ଲା ପ୍ରଶାସନ ସହ ମିଶି ବିଭିନ୍ନ ଅସୁବିଧାର ଆଶୁ ସମାଧାନ ଏବଂ ଭକ୍ତଙ୍କ ଶୃଙ୍ଖଳିତ ଦର୍ଶନ ନିମନ୍ତେ ସ୍ୱତନ୍ତ୍ର ସୁବିଧା ଇତ୍ୟାଦି ସମ୍ପର୍କରେ ଡିଜିପି ବିସ୍ତୃତ  ଭାବେ ଆଲୋଚନା କରିଥିଲେ।

ଏହି ବୈଠକରେ ଡିଜିପି (କ୍ରାଇମବ୍ରାଞ୍ଚ) ବିନୟତୋଷ ମିଶ୍ର, ନିର୍ଦ୍ଦେଶକ (ଏସସିଆରବି) ଡ଼ଃ ସନ୍ତୋଷ ଵାଲା, ଏଡିଜିପି (ଆଧୁନିକୀକରଣ) ସୌମେନ୍ଦ୍ର ପ୍ରିୟଦର୍ଶୀ, ଏଡିଜିପି (ଆଇନ ଓ ଶୃଙ୍ଖଳା) ସଞ୍ଜୟ କୁମାର, ଏଡିଜିପି (ମୁଖ୍ୟାଳୟ) ଶ୍ରୀ ଦୟାଲ ଗଙ୍ଗୱାର, ଏଡିଜିପି (ଏସଏପି) ରାଜେଶ କୁମାର, ଆଇଜିପି (ଟ୍ରେନିଂ) ଅନୁପ କୁମାର ସାହୁ, ଡିଆଇଜିପି (ଅପରେସନ) ଅଖିଳେଶ୍ବର ସିଂ, ଡିଆଇଜିପି (କେନ୍ଦ୍ରାଞ୍ଚଳ) ଚରଣ ସିଂ ମିନା, ଡିଆଇଜିପି (ଏସଆଇଡବ୍ଲୁ) ଡଃ କନୱର ବିଶାଲ ସିଂ, ଡିସିପି (ଭୁବନେଶ୍ବର) ପିନାକ ମିଶ୍ର, ଏଆଇଜିପି (ମୁଖ୍ୟାଳୟ) ଯୁଗଳ କିଶୋର କୁମାର ବନୋଥ, ଏଆଇଜିପି (ମୁଖ୍ୟାଳୟ) ବିବେକାନନ୍ଦ ଶର୍ମା ଏବଂ ପୁରୀ ଏସପି ଭିନିତ ଅଗ୍ରୱାଲ ପ୍ରମୁଖ ଉପସ୍ଥିତ ଥିଲେ।

ପୁରୀ: ପୁରୀ ଶ୍ରୀମନ୍ଦିର ରତ୍ନଭଣ୍ଡାର ମରାମତି କାର୍ଯ୍ୟ ଜାରି ରହିଥିବା ବେଳେ ଏହା କିପରି ଜାରି ରହିଅଛି ସେ ନେଇ ଶ୍ରୀମନ୍ଦିର କାର୍ଯ୍ୟାଳୟରେ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା।ତେବେ ପୂର୍ବ ନିର୍ଦ୍ଧାରିତ ଅବଧି ସମୟ ମଧ୍ୟରେ ରତ୍ନଭଣ୍ଡାର ମରାମତି କାର୍ଯ୍ୟ ଶେଷ ହୋଇପାରିବ ନାହିଁ ବୋଲି ବୈଠକରେ ମତ ପ୍ରକାଶ ପାଇଥିଲା। ବିଶେଷତଃ ଶ୍ରୀମନ୍ଦିରରେ ବହୁଳ ନୀତି ଯୋଗୁଁ ମରାମତି କାର୍ଯ୍ୟ ପାଇଁ ଦୈନନ୍ଦିନ ଆବଶ୍ୟକୀୟ ସମୟ ମିଳିପାରୁ ନଥିବା ଏଏସଆଇ ପକ୍ଷରୁ କୁହାଯାଇଥିଲା।

ତେବେ ସମୀକ୍ଷା ବୈଠକରେ ମରାମତି ପାଇଁ ଏଏସଆଇ କୁ ଅଧିକ ସମୟ ଦେବା ଉପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଗୁରୁତ୍ୱ ଦିଆଯାଇଥିଲା।ଯେହେତୁ ଭଣ୍ଡାର ଘରର ଦୀର୍ଘସ୍ଥାୟୀ ମରାମତି ଉପରେ ଗୁରୁତ୍ଵ ଦିଆଯାଉଥିବା ହେତୁ ଅଧିକ ସମୟର ଆବଶ୍ୟକତା ଦୃଷ୍ଟିରେ ରଖି ଆବଶ୍ୟକ ସମୟ ଏଏସଆଇ କୁ ଦେବାପାଇଁ ନିଷ୍ପତି ହୋଇଥିବା ପୁରୀ ଜିଲ୍ଲାପାଳ ତଥା ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ମତ ରଖିଥିଲେ।

ଅନ୍ୟପକ୍ଷରେ ଭିତର ରତ୍ନ ଭଣ୍ଡାରର ଅଧିକାଂଶ ଭାଗର ମରାମତି କାର୍ଯ୍ୟ ଶେଷ ହୋଇଥିବା ବେଳେ ବାହାର ଭଣ୍ଡାର ମରାମତି ପାଇଁ ଲୁହା ଭାରା ବନ୍ଧା ସରିଅଛି।ସେହିପରି ଭିତର ରତ୍ନଭଣ୍ଡାର ଚଟାଣ ମରାମତି , ପଥର ସ୍ଥାପନ ଓ ଗ୍ରାଉଟିଙ୍ଗ ତଥା ସିଲିଂ ଯଏଣ୍ଟ କାର୍ଯ୍ୟ ସରିଥିବା ନେଇ ଏଏସଆଇ ସୁପରିଡେଣ୍ଟ ଡ଼ିବି ଗଡ଼ନାୟକ ସୂଚନା ଦେଇଥିଲେ।

ପୁରୀ: ପୁରୀର ସାଗର ତରଙ୍ଗ ହୋଟେଲରେ ଓଡ଼ିଶା ସରକାର, ୟୁନିସେଫ୍ ଏବଂ ଆକ୍ସନଏଡ୍ ଆସୋସିଏସନ୍ ଦ୍ୱାରା ମିଳିତ ଭାବରେ ଆୟୋଜିତ ଦୁଇ ଦିନିଆ ରାଜ୍ୟସ୍ତରୀୟ ସଖୀ ସହେଲି ସମ୍ମିଳନୀ ଉଦ୍ଘାଟିତ ହୋଇଯାଇଅଛି। ଏହି କାର୍ଯ୍ୟକ୍ରମରେ ରାଜ୍ୟରୁ ୫୦ ଜଣ କିଶୋରୀ ଝିଅଙ୍କୁ ଏକତ୍ରିତ କରାଯାଇଥିବା ବେଳେ ସେମାନଙ୍କୁ ସେମାନଙ୍କର ପ୍ରେରଣାଦାୟକ ଜୀବନ କାହାଣୀ, ଚ୍ୟାଲେଞ୍ଜ ଏବଂ ଆକାଂକ୍ଷା ବାଣ୍ଟିବା ପାଇଁ ଏକ ପ୍ଲାଟଫର୍ମ ପ୍ରଦାନ କରାଯାଇଥିଲା।ସମ୍ମିଳନୀ

ଉଦଘାଟନୀ ଅଧିବେଶନରେ ଓଡ଼ିଶା ସରକାରଙ୍କ ମହିଳା ଏବଂ ଶିଶୁ ବିକାଶ ବିଭାଗର ଅତିରିକ୍ତ ସଚିବ ଅନନ୍ତ ନାରାୟଣ ସିଂହ ଲାଗୁରୀ ଯୋଗ ଦେଇଥିଲେ। ସେ କାର୍ଯ୍ୟକ୍ରମର ଉଲ୍ଲେଖନୀୟ ଅଗ୍ରଗତିକୁ ପ୍ରଶଂସା କରିବା ସହ କିଶୋରୀ ଝିଅମାନଙ୍କ ଦ୍ୱାରା ପ୍ରଦର୍ଶିତ ସକାରାତ୍ମକ ପ୍ରତିକ୍ରିୟା ଏବଂ ନେତୃତ୍ୱ ଗ୍ରହଣ କରିବାର ଦକ୍ଷତା ଅଦ୍ଵିକ।

କାର୍ଯ୍ୟକ୍ରମର ଉଦ୍ଦେଶ୍ୟ ହାସଲ କରିପାରିଛି ଏହା ଉପରେ ଆଲୋକପାତ କରିବା ସହ ଏହି ସଫଳତା କାହାଣୀଗୁଡ଼ିକ ରାଜ୍ୟ ରଣନୈତିକ କାର୍ଯ୍ୟ ଯୋଜନା ସହିତ ଓଡ଼ିଶା ଏକ ବାଲ୍ୟବିବାହ ମୁକ୍ତ ରାଜ୍ୟ ହେବା ଦିଗରେ ଗୁରୁତ୍ୱପୂର୍ଣ୍ଣ ଅବଦାନ ରଖିବ। ଓଡିଶାର ୟୁନିସେଫ୍ ମୁଖ୍ୟ କ୍ଷେତ୍ର ଅଧିକାରୀ ଶ୍ରୀ ୱିଲିୟମ୍ ହାନଲନ୍ ଜୁନିଅର, କିଶୋରୀ ଝିଅମାନଙ୍କ କଲ୍ୟାଣ ପାଇଁ ରାଜ୍ୟ ସରକାର, ୟୁନିସେଫ୍ ଏବଂ ଆକ୍ସନଏଡ୍ ମଧ୍ୟରେ ସହଯୋଗ ପ୍ରୟାସକୁ ପ୍ରଶଂସା କରିଥିଲେ। ସେ ରାଜ୍ୟର ଅଙ୍ଗନୱାଡି କେନ୍ଦ୍ରଗୁଡ଼ିକରେ ପ୍ରତି ଶନିବାର ଆୟୋଜିତ ହେଉଥିବା ଅଦ୍ଵିକ କାର୍ଯ୍ୟକ୍ରମର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ, ଯାହା ନେତୃତ୍ୱ ଦକ୍ଷତା ବୃଦ୍ଧି କରିବା ଏବଂ ବାଲ୍ୟବିବାହକୁ ପ୍ରତ୍ୟାଖ୍ୟାନ କରିବା ପାଇଁ ଯୁବତୀମାନଙ୍କୁ ସଶକ୍ତ କରିବା ପାଇଁ ସହାୟକ ହୋଇଥାଏ।

ୟୁନିସେଫ୍ ର ଶିଶୁ ସୁରକ୍ଷା ବିଶେଷଜ୍ଞ ମାନ୍ନା ବିଶ୍ୱାସ, ସମ୍ପ୍ରଦାୟ ନେତା ଭାବରେ କିଶୋରୀଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରିଥିଲେ ଏବଂ ଅଦ୍ଵିକ କାର୍ଯ୍ୟକ୍ରମ ଏହି କିଶୋରୀ ପ୍ରତିଭା ମାନଙ୍କୁ ସଶକ୍ତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବା ସହ , କାର୍ଯ୍ୟକ୍ରମର ସଫଳତା ସୁନିଶ୍ଚିତ କରିବାରେ ତୃଣମୂଳ ସ୍ତରରେ କର୍ତ୍ତବ୍ୟନିଷ୍ଠାଙ୍କ ଗୁରୁତ୍ୱପୂର୍ଣ୍ଣ ସମର୍ଥନ ଉପରେ ଆଲୋକପାତ କରିଥିଲେ।

ଏହି କାର୍ଯ୍ୟକ୍ରମ ଓଡ଼ିଶାର କିଶୋରୀ ମାନଙ୍କୁ ସଶକ୍ତ ଓ ସେମାନଙ୍କ ସ୍ୱପ୍ନକୁ ସାକାର କରିବା ଏବଂ ସେମାନଙ୍କ ସମ୍ପ୍ରଦାୟ ପାଇଁ ଅର୍ଥପୂର୍ଣ୍ଣ ଯୋଗଦାନ ଦେବା ପାଇଁ ଉପକରଣ, ଜ୍ଞାନ ଏବଂ ଆତ୍ମବିଶ୍ୱାସ ବୃଦ୍ଧି କରିବା ଉପରେ ଗୁରୁତ୍ୱ ଦିଏ। କାର୍ଯ୍ୟକ୍ରମର ନିରନ୍ତର ସଫଳତା ସମସ୍ତ ଝିଅଙ୍କ ପାଇଁ ଏକ ସୁରକ୍ଷିତ, ସମାନ ବାତାବରଣ ସୃଷ୍ଟି କରିବା ସହ ୨୦୩୦ ସୁଦ୍ଧା ଓଡ଼ିଶାକୁ ବାଲ୍ୟବିବାହ ମୁକ୍ତ କରିବାରେ ସହାୟକ ହେବ।

ଭୁବନେଶ୍ଵର: ନୟାଗଡ଼ ଜିଲ୍ଲା ଦଶପଲ୍ଲା ବନାଞ୍ଚଳରୁ ପ୍ରଥମ ପର୍ଯ୍ୟାୟ ରଥକାଠ ପୁରୀକୁ ପଠାଯାଇଛି। ପରମ୍ପରା ଅନୁଯାୟୀ ରଥକାଠ ବୋଝେଇ ଟ୍ରକ ଗୁଡ଼ିକୁ ପ୍ରଥମେ ଦଶପଲ୍ଲାର ମହାବୀର ମନ୍ଦିର ଏବଂ ପରବର୍ତ୍ତୀ ସମୟରେ ନୟାଗଡ଼ ଜଗନ୍ନାଥ ମନ୍ଦିରଠାରେ ପୂଜାର୍ଚ୍ଚନା କାର୍ଯ୍ୟ ସମ୍ପନ୍ନ କରାଯିବା ପରେ ପୁରୀ ଶ୍ରୀରଥଖଳାକୁ ପଠାଯାଇଛି। ପ୍ରଥମ ପ୍ରର୍ଯ୍ୟାୟରେ ୩ଟି ଟ୍ରକ ଯୋଗେ ୧୦୧ ଖଣ୍ଡ ଅଶନ,ଧଉରା କାଠ ପଠାଯାଇଛି। ସେଥିମଧ୍ୟରୁ ୪୮ଖଣ୍ଡ ଅସନ ଏବଂ ୫୩ଖଣ୍ଡ ଧଉରା ପ୍ରଥମ ପର୍ଯ୍ୟାୟରେ ପୁରୀ ରଥଖଳାକୁ ପଠାଯାଇଛି।

ସୂଚନା ଯୋଗ୍ୟ ଯେ,ଚଳିତ ବର୍ଷ ହେବାକୁ ଥିବା ରଥଯାତ୍ରା ନିମନ୍ତେ ସମୁଦାୟ ୮୬୫ଖଣ୍ଡ ଅସନ,ଧଉରା,ସିମିଳି ଏବଂ ଫାଶିକାଠ ଆବଶ୍ୟକତା ଥିଲା ବେଳେ ଗତବର୍ଷ ୫୧ଖଣ୍ଡ କାଠ ବଳକା ରହିଛି। ଅବଶିଷ୍ଟ ୮୧୪ଖଣ୍ଡ କାଠ ନୟାଗଡ଼ ଜଙ୍ଗଲ ଡ଼ିଭିଜନ ପକ୍ଷରୁ ବ୍ୟବସ୍ଥା କରାଯାଇଛି। ସେଥିମଧ୍ୟରୁ ୩୯୬ଖଣ୍ଡ କାଠ କଟକ ଖପୁରିଆରେ ଥିବା କରତ କଳକୁ ପଠାଯିବ। ବାକି ୪୧୮ଖଣ୍ଡ କାଠ ପୁରୀର ଶ୍ରୀରଥଖଳାକୁ ପଠାଯିବ। ଶ୍ରୀପଞ୍ଚମୀ ପୂର୍ବରୁ ସମସ୍ତ କାଠ ଶ୍ରୀରଥଖଳାରେ ପହଞ୍ଚିବା ସହିତ ଅକ୍ଷୟତୃତୀୟାରେ ରଥକାଠ ଅନୁକୂଳ ହେବ।

ପୁରୀ: ପୁରୀ ଶ୍ରୀମନ୍ଦିର ଭିତରେ ବାରମ୍ବାର ଭିଡ଼ିଓ ଭାଇରାଲ ଘଟଣାକୁ ପୋଲିସ ପକ୍ଷରୁ ଗୁରୁତର ସହ ନିଆଯାଇଅଛି। ଏହି ସମ୍ବେଦନଶୀଳ ଘଟଣାକୁ ସାଧାରଣ ଲୋକଙ୍କ ମଧ୍ୟରେ ସଚେତନତା ନେଇ ଏଣିକି ଚାରି ଦ୍ୱାରରେ ସଚେତନତା ବାର୍ତ୍ତା ଥିବା ସାଇନ ବୋର୍ଡ ଲଗାଯିବ। ଶ୍ରୀମନ୍ଦିର ଭିତର ଭିଡିଓ ସୋସିଆଲ ମିଡ଼ିଆରେ ଭାଇରାଲ ଘଟଣା ନେଇ ଏଭଳି ପତିକ୍ରିୟା ରଖିଛନ୍ତି ପୁରୀ ଏସ୍ପି ଭିନିତ ଅଗ୍ରୱାଲ। ଶ୍ରୀମନ୍ଦିର ମଧ୍ୟରେ ଚିତ୍ର ତଥା ଭିଡିଓ ଉତ୍ତୋଳନ ସମ୍ପୂର୍ଣ୍ଣ ନିଷେଧ ରହିଅଛି।

ତେବେ ଏହି ଘଟଣାକୁ ଅବମାନନା କରୁଥିବା ବ୍ୟକ୍ତିଙ୍କ ବିରୁଦ୍ଧରେ ଆଇନ ଅନୁଯାଇ କାର୍ଯ୍ୟାନୁଷ୍ଠାନ ନିଆଯିବ। ତେବେ ଗତ ଜାନୁଆରୀ ୫ ତାରିଖରେ ଶ୍ରୀମନ୍ଦିର ଉପରେ ଡ୍ରୋନ ଉଡିବା ଘଟଣା ଓ ଗତ ଦୁଇ ଦିନ ତଳେ ବାଙ୍କେ ବିହାରୀ ଅନନ୍ତ ନାମକ ଜଣେ ବ୍ୟକ୍ତି ଗର୍ଭଗୃହ ଭିଡ଼ିଓ ନିଜ ସୋସିଆଲ ମିଡ଼ିଆ ରେ ଭାଇରାଲ କରିବା ଘଟଣାକୁ ନେଇ ପୋଲିସ ତଦନ୍ତ କରୁଅଛି।ଖୁବ ଶୀଘ୍ର ଦୋଷୀ ଙ୍କ ବୁରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ଏସ୍ପି ସୂଚନା ପ୍ରଦାନ କରିଛନ୍ତି।

ପୁରୀ: ପୁରୀ ଶ୍ରୀମନ୍ଦିରରେ ଚଳିତ ମାସ ୨୦ତାରିଖ ଠାରୁ ନାଟମଣ୍ଡପରେ ସ୍ୱତନ୍ତ୍ର ଧାଡି ଦର୍ଶନ ବ୍ୟବସ୍ଥା ଆରମ୍ଭ କରାଯିବ। ଇଂରାଜୀ ନୂଆବର୍ଷ ଓ ମକର ସଂକ୍ରାନ୍ତି ଭିଡ଼କୁ ନଜରରେ ରଖି ନାଟମଣ୍ଡପରେ ନୂତନ ଧାଡି ଦର୍ଶନ ବ୍ୟବସ୍ଥାକୁ ସ୍ଥଗିତ ରଖାଯାଇଥିଲା। ସେହିପରି ରତ୍ନ ଭଣ୍ଡାର ମରାମତି କାର୍ଯ୍ୟ ମଧ୍ୟ ନିର୍ଦ୍ଧାରିତ ସମୟ ମଧ୍ୟରେ ଶେଷ କରାଯିବ।

ମରାମତି କାର୍ଯ୍ୟ ଶେଷ ପରେ ରତ୍ନ ଅଳଙ୍କାର ଗଣତି ମଣତି କାର୍ଯ୍ୟ ଆରମ୍ଭ କରାଯିବ।ପରିକ୍ରମା ପ୍ରକଳ୍ପରେ କରାଯିବାକୁ ଥିବା ବାଖ୍ୟାନ କେନ୍ଦ୍ର ସମେତ ଅନ୍ୟାନ୍ୟ କାର୍ଯ୍ୟ ନେଇ ଡିପିଆର ପ୍ରସ୍ତୁତ ହେଉଅଛି। ଡିପିଆର ପ୍ରସ୍ତୁତ ପରେ ସ୍ୱତନ୍ତ୍ର ସଂସ୍କୃତି ଉପଦେଶ କମିଟିର ପରାମର୍ଶ ନିଆଯାଇ ସମସ୍ତ କାର୍ଯ୍ୟ କରାଯିବ ବୋଲି ଆଇନ ମନ୍ତ୍ରୀ ପୃଥୀରାଜ ହରିଚନ୍ଦନ ମତ ରଖିଛନ୍ତି।

ଅନ୍ୟ ପକ୍ଷରେ ପୁରୀ ବଡ଼ଦାଣ୍ଡ ଉଠା ଦୋକାନୀ ମାନଙ୍କର ସମସ୍ୟା ସଂଧାନ ନେଇ ରାଜ୍ୟ ସରକାର ଖୁବଶୀଘ୍ର ପଦକ୍ଷେପ ନେବାକୁ ଯାଉଛନ୍ତି। ଦୀଲ୍ଲି ହାଟ ପରି ପୁରୀରେ ଉଠାଦୋକାନୀ ମାନଙ୍କ ପାଇଁ ବଜାର ନିର୍ମାଣ କରାଯିବ। ଏ ନେଇ ପୂର୍ତ୍ତ ବିଭାଗ, ଜିଲ୍ଲା ପ୍ରଶାସନ ଓ ଶ୍ରୀମନ୍ଦିର ପ୍ରଶାସନ ପକ୍ଷରୁ ଆଲୋଚନା ଆରମ୍ଭ ହୋଇଅଛି।

ତେବେ ଏହି ବଜାର କେଉଁ ସ୍ଥାନରେ କରାଯିବ ତାହା ସ୍ପଷ୍ଟ ହୋଇ ନଥିବା ବେଳେ ଉଠାଦୋକାନୀ ମାନଙ୍କୁ ସାମାନ୍ୟ ଧର୍ଯ୍ୟ ରଖିବାକୁ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ନିବେଦନ କରିଛନ୍ତି।

ପୁରୀ: ମହାପ୍ରଭୁଙ୍କ ଉଦ୍ଦେଶ୍ୟରେ ଏକ ରୂପା ଶଙ୍ଖ ଦାନ କରିଛନ୍ତି ଜଣେ ଭକ୍ତ। ପ୍ରାୟ ୧ କେଜି ୬୧୯ ଗ୍ରାମର ଓଜନର ରୂପାରେ ନିର୍ମିତ ଅଢେଇ ଲକ୍ଷ ଟଙ୍କାର ଶଙ୍ଖକୁ ସମ୍ବଲପୁରରୁ ଆଣିଛନ୍ତି ଭକ୍ତ। ଭକ୍ତ ନଳିନୀ ପ୍ରଭା ଦାସଙ୍କ ପରିବାର ଆଜି ପୁରୀ ଆସିଥିବା ବେଳେ ଶ୍ରୀମନ୍ଦିର ପ୍ରଶାସନକୁ ଶଙ୍ଖ ଦାନ କରିଛନ୍ତି। ଶ୍ରୀମନ୍ଦିର ଦଇତାପତି ସେବାୟତଙ୍କ ପରାମର୍ଶ ଅନୁସାରେ ଶ୍ରୀମନ୍ଦିର ନୀତି ପ୍ରଶାସକଙ୍କୁ ସେ ଏହି ଶଙ୍ଖଟି ହସ୍ତାନ୍ତର କରିଥିଲେ। ନଳିନୀଙ୍କର ମହାପ୍ରଭୁଙ୍କୁ ରୂପାରେ ନିର୍ମିତ ଶଙ୍ଖ ଦେବାର ମାନସିକ ରଖିଥିବା ହେତୁ କଟକରେ କୁଶଳୀ କାରିଗରଙ୍କ ଦ୍ଵାରା ଅତି ନିଖୁଣ କାରୁକାର୍ଯ୍ୟରେ ଏହି ଶଙ୍ଖ ସେ ପ୍ରସ୍ତୁତ କରିଥିଲେ।

ତେବେ ଆଜି ସପରିବାର ଆସି ସେହି ଶଙ୍ଖ ଦାନ କରିଥିବା ବେଳେ ମହାପ୍ରଭୁଙ୍କ ସୁବର୍ଣ୍ଣ ବେଶରେ ଏହି ଶଙ୍ଖକୁ ଧାରଣ କରିବା ନେଇ ମନସ୍କାମନା କରିଛନ୍ତି।ଶଙ୍ଖ ଦାନ ପରେ ସେ ବେଶ ଖୁସି ଥିବା ବେଳେ ମହାପ୍ରଭୁ କେବଳ ଗୋଟିଏ ଥର ସେହି ଶଙ୍ଖକୁ ଧାରଣ କରିଦେଲେ ତାଙ୍କର ଆତ୍ମା ତୃପ୍ତି ହେଇଯିବ ବୋଲି ମତ ରଖିଛନ୍ତି।

ପୁରୀ: ଶ୍ରୀମନ୍ଦିରରେ ବିଶୃଙ୍ଖଳା ତଥା ଅନ୍ୟ ଏକ ସେବକଙ୍କୁ ମାରପିଟ୍ ପାଇଁ ଶ୍ରୀମନ୍ଦିର ଆଇନ୍ ୨୧-କ ଧାରା ଅନୁସାରେ ମୁଖ ପଖାଳ ସେବକ ବିଶ୍ବନାଥ ଖୁଣ୍ଟିଆଙ୍କୁ ୩ ମାସ ପାଇଁ ସେବାରୁ ନିଲମ୍ବିତ କରାଯାଇଛି। ଗତ କିଛି ଦିନ ତଳେ ଶ୍ରୀମନ୍ଦିର ଭିତରେ ମାରପିଟ ହୋଇ ଦୁଇ ସେବକ ଥାନା ଦ୍ୱାରସ୍ଥ ହୋଇଥିଲେ।

ତେବେ ନିଲମ୍ବନ ପୂର୍ବରୁ ଶ୍ରୀ ଖୁଣ୍ଟିଆଙ୍କୁ ଶ୍ରୀମନ୍ଦିର ପ୍ରଶାସନ ପକ୍ଷରୁ କୈଫିୟତ ତଲବ ହୋଇଥିଲା। ନିଲମ୍ବନ ସମୟରେ ଶ୍ରୀ ଖୁଣ୍ଟିଆ ଶ୍ରୀମନ୍ଦିର ମଧ୍ୟରେ ତାଙ୍କ ସମସ୍ତ ସେବାରୁ ନିବୃତ୍ତ ରହିବାକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଆଦେଶ ପ୍ରଦାନ କରିଛନ୍ତି।

ଏହି ପରିପ୍ରେକ୍ଷୀରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢୀ ଆଉଥରେ ସ୍ପଷ୍ଟ କରିଛନ୍ତି ଯେ, ଶ୍ରୀମନ୍ଦିର ମଧ୍ୟରେ ବିଶୃଙ୍ଖଳାକୁ କଦାପି ବରଦାସ୍ତ କରାଯିବ ନାହିଁ। ଏ ସଂକ୍ରାନ୍ତରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଅଛି।