ପୁରୀ, ରଥଯାତ୍ରା ସଂପର୍କରେ ରାଜ୍ୟ ସରକାର ସୁପ୍ରିମକୋର୍ଟରେ ରିଭ୍ୟୁ ପିଟିସନ ଦାଖଲ କରନ୍ତୁ । ଏ ନେଇ ଆଜି ମୁଖ୍ୟମନ୍ତ୍ରୀଙ୍କୁ ଏକ ଲମ୍ବା ଚିଠି ଲେଖିଛନ୍ତି ଗଜପତି ଦିବ୍ୟସିଂହ ଦେବ। ସେ ଚିଠିରେ ଉଲ୍ଲେଖ କରିଛନ୍ତି ଯେ, ରାଜ୍ୟ ସରକାର କୋର୍ଟକୁ ଅବଗତ କରାନ୍ତୁ ଯେ, କୋଭିଡ କଟକଣା ମଧ୍ୟରେ ରଥଯାତ୍ରା କରାଯିବ। ବିନା ଭକ୍ତରେ ଏହି ରଥଯାତ୍ରା ମନ୍ଦିର ପ୍ରଶାସନ କରିବ। ଏହା କୁହାଗଲେ ହୁଏତ ସୁପ୍ରିମକୋର୍ଟ ରଥଯାତ୍ରା କରିବା ପାଇଁ ଅନୁମତି ଦେଇପାରନ୍ତି ବୋଲି ଗଜପତି ଚିଠିରେ ଉଲ୍ଲେଖ କରିଛନ୍ତି।
ଏହି ଚିଠିରେ ଗଜପତି ରଥଯାତ୍ରା ଇତିହାସ ସଂପର୍କରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଇଛନ୍ତି। ସେ କହିଛନ୍ତି ଯେ, ମନ୍ଦିର ସତ୍ବଲିପିରେ ରଥଯାତ୍ରା କରିବାକୁ ମନ୍ଦିର ପ୍ରଶାସନ ବାଧ୍ୟ। ସେଥିପାଇଁ ପ୍ରାଚୀନ ସମୟରେ ଯେତେ ବାଧା ବିଘ୍ନ ଆସିଥିଲେ ମଧ୍ୟ ରଥଯାତ୍ରା ବନ୍ଦ ହୋଇ ନାହିଁ। ଯେତେବେଳେ ତିନିଠାକୁର ମନ୍ଦିର ଭିତରେ ନ ଥିଲେ ସେତେବେଳେ ରଥଯାତ୍ରା ବନ୍ଦ ହୋଇଛି। ହେଲେ ବର୍ତ୍ତମାନ ପରିସ୍ଥିତିରେ ଠାକୁର ମନ୍ଦିରରେ ଥିବାରୁ ରଥଯାତ୍ରା କରିବା ନିହାତି ଆବଶ୍ୟକ। ସେଥିପାଇଁ ରାଜ୍ୟ ସରକାର ଆଇନଗତ ପଦକ୍ଷେପ ଗ୍ରହଣ କରନ୍ତୁ ବୋଲି ଗଜପତି ଏହି ଚିଠିରେ ଉଲ୍ଲେଖ କରିଛନ୍ତି।