ନୂଆଦିଲ୍ଲୀ: ପୂର୍ବତନ ଟିମ୍ ଇଣ୍ଡିଆ ଓପନର୍ ତଥା ବିଜେପି ନେତା ଗୌତମ ଗମ୍ଭୀର କରୋନାଭାଇରସରେ ସଂକ୍ରମିତ ହୋଇଛନ୍ତି। ଆଜି ଟ୍ୱିଟ୍ କରି ସେ ଏହି ସୂଚନା ଦେଇଛନ୍ତି। ଏହାପରେ ଗମ୍ଭୀର ନିଜକୁ ଅଲଗା କରିଛନ୍ତି। ୪୦ ବର୍ଷିୟ ଗମ୍ଭୀରଙ୍କର କରୋନାର ସାମାନ୍ୟ ଲକ୍ଷଣ ଅଛି।
ଗୌତମ ଗମ୍ଭୀର ଲେଖିଛନ୍ତି ଯେ, ‘ସାମାନ୍ୟ ଲକ୍ଷଣ ପରେ କରୋନା ପରୀକ୍ଷା କରିଥିଲି। ଯେଉଁଥିରେ ରିପୋର୍ଟ ପଜିଟିଭ୍ ଆସିଛି। ଯେଉଁମାନେ ମୋ ସହିତ ସଂସ୍ପର୍ଶରେ ଆସିଛନ୍ତି, ସେମାନେ ପରୀକ୍ଷା କରିନିଅନ୍ତୁ ଏବଂ ସୁରକ୍ଷିତ ରୁହନ୍ତୁ।
ସୂଚନା ଯୋଗ୍ୟ ଯେ, ଗୌତମ ଗମ୍ଭୀର ପୂର୍ବ ଦିଲ୍ଲୀର ଲୋକସଭା ସାଂସଦ। ସେ ନୂତନ ଆଇପିଏଲ୍ ଦଳ ଲକ୍ଷ୍ନୌ ସୁପରଜିଆଣ୍ଟ୍ସର ମଧ୍ୟ ପରାମର୍ଶଦାତା ଅଟନ୍ତି। ଗୌତମ ଗମ୍ଭୀର ୨୦୧୮ରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ। ସେ ଭାରତ ପାଇଁ ୫୪ ଟି ଟେଷ୍ଟ, ୧୪୭ ଟି ଦିନିକିଆ ଏବଂ ୩୭ ଟି-ଟ୍ୱେଣ୍ଟି ଖେଳିଥିଲେ। ସେ ୨୦୦୭ ଏବଂ ୨୦୧୧ ବିଶ୍ୱକପ୍ ଜିତିଥିବା ଦଳର ଏକ ଅଂଶ ଥିଲେ।
ବିଜେପି ଟିକେଟରେ ନିର୍ବାଚନ ଲଢି ୨୦୧୯ ଲୋକସଭା ନିର୍ବାଚନରେ ଗମ୍ଭୀର ଜିତିଥିଲେ। ସେ ପୂର୍ବ ଦିଲ୍ଲୀର ସାଂସଦ। ସେ ଆଇପିଏଲରେ କୋଲକାତା ନାଇଟ୍ ରାଇଡର୍ସର ଅଧିନାୟକ ମଧ୍ୟ ରହିଥିଲେ। ତାଙ୍କ ଅଧିନାୟକତ୍ୱରେ, କେକେଆର୍ ୨୦୧୨ ଏବଂ ୨୦୧୪ ରେ ଚାମ୍ପିଅନ୍ ହୋଇଥିଲେ।