Categories
ଜାତୀୟ ଖବର ବିଶେଷ ଖବର

ପଞ୍ଜୀକୃତ ଅଣ ସଂଗଠିତ କ୍ଷେତ୍ରର ଶ୍ରମିକଙ୍କୁ ବୃଦ୍ଧ ବୟସରେ ପେନ୍‍ସନ୍‍ ନିଶ୍ଚିତ କରିବ ପିଏମ୍‍-ଏସ୍‍ଓ୍ୱାଇଏମ୍‍

ନୂଆଦିଲ୍ଲୀ: ଆମ ଦେଶର ବିଭିନ୍ନ ଅଣ ସଂଗଠିତ କ୍ଷେତ୍ରରେ କାର୍ଯ୍ୟ କରୁଥିବା ଶ୍ରମିକମାନଙ୍କ ଅବଦାନ ଦେଶର ସମୁଦାୟ ଉତ୍ପାଦନରେ ୫୦ପ୍ରତିଶତଠୁ ଅଧିକ। ହେଲେ ସ୍ୱାଧୀନତା ର ୭୮ ବର୍ଷ ପରେ ମଧ୍ୟ ସେମାନଙ୍କ ସାମାଜିକ ସୁରକ୍ଷା ଲାଗି କୌଣସି ପଦକ୍ଷେପ ନିଆଖଯାଇ ନଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ପ୍ରଥମଥର ପାଇଁ ସେମାନଙ୍କ ଅବସର ବୟସକୁ ସହଜ କରିବା ପାଇଁ ସ୍ୱତନ୍ତ୍ର ପେନ୍‍ସନ୍‍ ଯୋଜନା ଆରମ୍ଭ କରିଛନ୍ତି। ପିଏମ୍‍-ଏସ୍‍ଓ୍ୱାଇଏମ୍‍ ଯୋଜନା ନାମରେ ପରିଚିତ ଏହି ନୂଆ ଯୋଜନା ୬୦ ବର୍ଷ ପରେ ଶ୍ରମିକଙ୍କୁ ମାସିକ ଅତିକମରେ ତିନି ହଜାର ଟଙ୍କା ନିଶ୍ଚିତ କରିବା ଲାଗି ଲକ୍ଷ୍ୟ ରଖିଛି।

ସରକାରଙ୍କ ଦ୍ୱାରା ଚାଲିଥିବା ଅଣ ସଂଗଠିତ କ୍ଷେତ୍ରର ଶ୍ରମିକ ଚିହ୍ନଟ ଅଭିଯାନରେ  ଏବେ ସୁଦ୍ଧା ୩୦ କୋଟି ୫୧ ଲକ୍ଷ ଶ୍ରମିକ ପଞ୍ଜିକୃତ ହୋଇଛନ୍ତିବ। ଏମାନେ ମୁଖ୍ୟତଃ  ଘରୋଇ  ସହାୟକ, ରାସ୍ତା କଡ଼ର ବ୍ୟବସାୟୀ, ମଧ୍ୟାହ୍ନ ଭୋଜନ କର୍ମଚାରୀ, ମୁଣ୍ଡରେ ଭାର ଉଠାଉଥିବା ଶ୍ରମିକ, ଇଟା ଭାଟି ଶ୍ରମିକ, ମୋଚି, ଲୁହା କାରିଗର, ଧୋବା, ରିକ୍ସା ଚାଳକ, ଭୂମିହୀନ ଶ୍ରମିକ, କୃଷି ଶ୍ରମିକ, ନିର୍ମାଣ ଶ୍ରମିକ, ବିଡ଼ି ଶ୍ରମିକ, ହସ୍ତତନ୍ତ ଶ୍ରମିକ, ଚମଡ଼ା ଶ୍ରମିକ, ଅଡିଓ-ଭିଜୁଆଲ୍ ଶ୍ରମିକ ବର୍ଗର।  ଇ-ଶ୍ରମ ପୋର୍ଟାଲ୍ ରେ ଏମାନେ ସ୍ୱତଃ ପଞ୍ଜିକୃତ ହୋଇଛନ୍ତି। ୩୧ ଡିସେମ୍ବର ୨୦୨୪ ସୁଦ୍ଧା ୩୦କୋଟି ୫୧ କୋଟିରୁ ଅଧିକ ଅଣସଂଗଠିତ ଶ୍ରମିକ ପଞ୍ଜିକୃତ ହୋଇଥିବା ଶ୍ରମ ଓ ନିୟୋଜନ ମନ୍ତ୍ରଣାଳୟ ପକ୍ଷରୁ କୁହାଯାଇଛି।

ସୂଚନା ଅନୁଯାୟୀ, ୨୦୧୯ ମସିହାର ମଧ୍ୟବର୍ତ୍ତୀକାଳୀନ ବଜେଟରେ ପ୍ରଧାନମନ୍ତ୍ରୀ-ଏସୱାଇଏମ୍ ପ୍ରଚଳନ ବାବଦରେ ଘୋଷଣା କରାଯାଇଥିଲା। ଏହାକୁ ଶ୍ରମ ଏବଂ ନିଯୁକ୍ତି ମନ୍ତ୍ରଣାଳୟ ଦ୍ୱାରା ଭାରତୀୟ ଜୀବନ ବୀମା ନିଗମ (ଏଲଆଇସି) ଏବଂ ସାଧାରଣ ସେବା କେନ୍ଦ୍ର ଇ-ଗଭର୍ଣ୍ଣାନ୍ସ ସର୍ଭିସେସ୍ ଇଣ୍ଡିଆ ଲିମିଟେଡ୍ (ସିଏସସି ଏସପିଭି) ସହଯୋଗରେ କାର୍ଯ୍ୟାନ୍ୱୟନ କରାଯାଉଛି।

ଏହା ଏକ ଅବଦାନ ଭିତ୍ତିକ ଯୋଜନା। ଅର୍ଥାତ୍‍ ପଞ୍ଜିକୃତ ଶ୍ରମିକ ଯେତିକି ଅର୍ଥ ବର୍ଷକୁ ଜମା ରଖନ୍ତି ସେହି ପରିମାଣରେ ଅର୍ଥ ତାଙ୍କ ନାଁରେ ଜମା କରନ୍ତି ଭାରତ ସରକାର। ବୟସ ଅନୁସାରେ ଏହିୀ ଅବଦାନ ରାଶି ସ୍ଥିର କରାଯାଇଥାଏ। ୬୦ ବର୍ଷ ବୟସ ଯାଏ ସମ୍ପୃକ୍ତ ଶ୍ରମିକଙ୍କୁ ଏହି ଅବଦାନ ଦେବାକୁ ହୋଇଥାଏ। ଏହାପରେ ତାଙ୍କୁ ମାସିକ ସର୍ବନିମ୍ନ ୩ ହଜାର ଟଙ୍କା  ପେନ୍‍ସନ୍‍ ଦେବା ଲାଗି ବ୍ୟବସ୍ଥା କରହିଛନ୍ତି ଭାରତ ସରକାର। ପୁଣି ଯଦି ପଞ୍ଜିକୃତ ହିତାଧିକାରୀଙ୍କ ମୃତ୍ୟୁ ହୁଏ, ତେବେ ତାଙ୍କ ପତି କିମ୍ବା ପତ୍ନୀଙ୍କୁ ପରିବାର ପେନ୍ସନ ଭାବରେ ମିଳୁଥିବା ବା ମିଳିବାକୁ ଥିବା ପେନ୍ସନ ପରିମାଣର ୫୦ ପ୍ରତିଶତ ମିଳିଥାଏ। ପରିବାର ପେନ୍ସନ କେବଳ ପତି କିମ୍ବା ପତ୍ନୀଙ୍କ ପାଇଁ ପ୍ରଯୁଜ୍ୟ ହୋଇଥାଆନ୍ତି। ଏହି ଯୋଜନାରେ ଅନ୍ତର୍ଭୁକ୍ତ ହିତାଧିକାରୀଙ୍କୁ ମଧ୍ୟ ସର୍ତ୍ତ ଅନୁସାରେ ପାଣ୍ଠିରୁ ପ୍ରସ୍ଥାନ କରିପାରିବେ। ଯଦି ଜଣେ ଶ୍ରମିକ ୧୦ ବର୍ଷ ପୂର୍ବରୁ ଯୋଜନାରୁ ପ୍ରସ୍ଥାନ କରନ୍ତି, ତେବେ ଅବଦାନ ରାଶି ସଞ୍ଚୟ ବ୍ୟାଙ୍କ ସୁଧ ହାର ସହିତ ଫେରସ୍ତ କରାଯିବାର ବ୍ୟବସ୍ଥା ରହିଛି। ସେହିପରି ୧୦ ବର୍ଷ ପରେ କିନ୍ତୁ ୬୦ ବର୍ଷ ପୂର୍ବରୁ ପ୍ରସ୍ଥାନକରୁଥିବା ହିତାଧିକାରୀଙ୍କୁ ତାଙ୍କ ଅବଦାନର ଅଂଶ ସହିତ ପାଣ୍ଠି ଦ୍ୱାରା ଅର୍ଜିତ ସୁଧ କିମ୍ବା ସଞ୍ଚୟ ବ୍ୟାଙ୍କ ସୁଧ ହାରରେ ସୁଧ ପ୍ରଦାନ ବ୍ୟବସ୍ଥା ରହିଛି। ୬୦ ବର୍ଷ ପୂର୍ବରୁ ମୃତ୍ୟୁ କିମ୍ବା ଦୁର୍ଘଟଣା ଯୋଗୁଁ ସ୍ଥାୟୀ ଅକ୍ଷମତା ହେଲା ପତି କିମ୍ବା ପତ୍ନୀ ଯୋଜନା ଜାରି ରଖିପାରିବେ କିମ୍ବା ପାଣ୍ଠି ଦ୍ୱାରା ପ୍ରକୃତରେ ଅର୍ଜିତ ସୁଧ ସହିତ କିମ୍ବା ସଞ୍ଚୟ ବ୍ୟାଙ୍କ ସୁଧ ହାରରେ ଯାହା ଅଧିକ ହୁଏ ତାହା ଉଠାଇପାରିବେ। ୬୦ ବର୍ଷ ପରେ ମୃତ୍ୟୁ ହେଲେ ହିତାଧିକାରୀଙ୍କ ପତି କିମ୍ବା ପତ୍ନୀଙ୍କ ପରିବାର ପେନସନ ଭାବରେ ୫୦ ପ୍ରତିଶତ ପେନସନ  ମିଳିବ।  ଗ୍ରାହକ ଏବଂ ତାଙ୍କ ପତି କିମ୍ବା ପତ୍ନୀଙ୍କ ମୃତ୍ୟୁ ପରେ, ସମ୍ପୂର୍ଣ୍ଣ କର୍ପସ ପାଣ୍ଠିକୁ ଫେରସ୍ତ କରାଯିବା ବ୍ୟବସ୍ଥା ରହିଛି। ପୁଣି ଯଦି ଜଣେ ଗ୍ରାହକ ନିରନ୍ତର ଅବଦାନ ଦେଇନାହାଁନ୍ତି, ତେବେ ତାଙ୍କୁ ସରକାରଙ୍କ ଦ୍ୱାରା ସ୍ଥିର କରାଯାଇଥିବା ସମ୍ପୂର୍ଣ୍ଣ ବକେୟା ଦେୟ, ଜରିମାନା ଶୁଳ୍କ ସହିତ, ଯଦି କିଛି ଥାଏ, ପରିଶୋଧ କରି ତାଙ୍କର ଅବଦାନକୁ ନିୟମିତ କରିବାକୁ ଅନୁମତି ଦିଆଯିବାର ବ୍ୟବସ୍ଥା ରହିଛି।

୧୮ ରୁ ୪୦ ବର୍ଷ ବୟସର ଯୋକୌଣସି ଅଣ ଆୟକର ଦାତା ଅଣ ସଂଗଠିତ ଶ୍ରମିକ ଯୋଜନାର ଲାଭ ଉଠାଇ ପାରିବେ। ଏଥିଲାଗି ତାଙ୍କର  ଆୟ ସୀମା ମାସିକ ଆୟ ୧୫,୦୦୦ ଟଙ୍କା ବା ତା’ଠାରୁ କମ୍ ହେବା ଉଚିତ। କର୍ମଚାରୀ ଭବିଷ୍ୟନିଧି ପାଣ୍ଠି କର୍ମଚାରୀ ରାଜ୍ୟ ବୀମା ନିଗମ କିମ୍ବା ଜାତୀୟ ପେନସନ ଯୋଜନା   ଅଧୀନରେ ଅନ୍ତର୍ଭୁକ୍ତ  ହୋଇଥିବା ହିତାଧିକାରୀ ଏହି ଯୋଜନାରେ ଅନ୍ତର୍ଭୁକ୍ତ ହୋଇପାରିବେ ନାହିଁ। ପୁଣି  ହିତାଧିକାରୀ  ଅନ୍ୟ କୌଣସି ସରକାରୀ ପେନସନ ଯୋଜନାରୁ ଲାଭ ଗ୍ରହଣ କରିବା ଉଚିତ ନୁହେଁ।

ଏହି ଯୋଜନାରେ ପଞ୍ଜିକୃତ ହେବା ଲାଗି ହିତାଧିକାରୀଙ୍କ ଆଧାର କାର୍ଡ, ବ୍ୟାଙ୍କ ଆକାଉଣ୍ଟ ବିବରଣୀ ଓ ମୋବାଇଲ ନମ୍ବର ଆବଶ୍ୟକ। https://labour.gov.in/list-professions-occupations-covered କିମ୍ବା https://maandhan.in  ପୋର୍ଟାଲ୍‍ ମାଧ୍ୟମରେ କୌଣସି ଶ୍ରମିକ ଏହି ଯୋଜନାରେ ଅନ୍ତର୍ଭୁକ୍ତ ହୋଇପାରିବେ।

ପୁଣି ରାଜ୍ୟ ଏବଂ କେନ୍ଦ୍ର ସରକାରଙ୍କ ସମସ୍ତ ଶ୍ରମ କାର୍ଯ୍ୟାଳୟ, ଏଲଆଇସିର ସମସ୍ତ ଶାଖା କାର୍ଯ୍ୟାଳୟ, ଇଏସ୍‍ଆଇସିର କାର୍ଯ୍ୟାଳୟଗୁଡ଼ିକରେ ଏହି ଯୋଜନା ବାବଦରେ ସୂଚନା ଦେବା ପାଇଁ ସୁବିଧା କେନ୍ଦ୍ର ଖୋଲାଯାଇଛି।  ଗ୍ରାହକ ସେବା ନମ୍ବର ୧୮୦୦ ୨୬୭୬ ୮୮୮ ରେ ଅଭିଯୋଗ ପଞ୍ଜିକରଣ କରିବାର ସୁବିଧା ରହିଛି।

ଯୋଜନାର ଲାଭ ଅଣସଂଗଠିତ କ୍ଷେତ୍ରର ଶ୍ରମିକଙ୍କ ପାଖରେ ପହଞ୍ଚିବା ସୁନିଶ୍ଚିତ କରିବା ପାଇଁ  ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ସରକାରଙ୍କ ପ୍ରତିନିଧିଙ୍କ ସହିତ ସାମୟିକ ସମୀକ୍ଷା ବୈଠକ କରାଯାଉଛି। ରାଜ୍ୟ ସାଧାରଣ ସେବା କେନ୍ଦ୍ର ମୁଖ୍ୟଙ୍କ ସହିତ ନିୟମିତ ବୈଠକ ସହ  ସ୍ୱେଚ୍ଛାକୃତ ପ୍ରସ୍ଥାନ, ପୁନରୁଦ୍ଧାର ମଡ୍ୟୁଲ୍, ଦାବି ସ୍ଥିତି ଏବଂ ଆକାଉଣ୍ଟ ଷ୍ଟେଟମେଣ୍ଟ ଭଳି ନୂତନ ବୈଶିଷ୍ଟ୍ୟଗୁଡ଼ିକର ଶୁଭାରମ୍ଭ କରାଯାଇଛି। ଏହାସହ  ନିଷ୍କ୍ରିୟ ଆକାଉଣ୍ଟଗୁଡ଼ିକର ପୁନରୁଦ୍ଧାର ସମୟ ସୀମାକୁ ୧ ବର୍ଷରୁ ୩ ବର୍ଷକୁ ବଢ଼ାଯାଇଛି, ଏହା ପରୋକ୍ଷା ଭାବେ ଏ କ୍ଷେତ୍ରର ଶ୍ରମିକଙ୍କୁ ସହଯୋଗୀ ହେବ।

Categories
ବିଶେଷ ଖବର ରାଜ୍ୟ ଖବର

ସ୍ୱାଧୀନତା ସଂଗ୍ରାମୀଙ୍କୁ ମୁଖ୍ୟମନ୍ତ୍ରୀଙ୍କ ସମ୍ମାନ: ବଢିଲା ପେନ୍‌ସନ୍, ଜେଲ୍ ଯାଇଥିବା ସଂଗ୍ରାମୀମାନେ ପାଇବେ କେତେ?

ଭୁବନେଶ୍ୱର: ସ୍ୱାଧୀନତା ସଂଗ୍ରାମୀ ମାନେ ଆମର ଅମୂଲ୍ୟ ରତ୍ନ। ସେମାନେ ଯେଉଁ ତ୍ୟାଗ କରିଛନ୍ତି ତା’ର ମୂଲ୍ୟ କେହି ଦେଇ ପାରିବେ ନାହିଁ। ଆମେ କେବଳ ତାଙ୍କୁ ସମ୍ମାନ ଦେଇ ପାରିବା ଏବଂ ସେମାନଙ୍କ ସ୍ମୃତିକୁ ଉଜ୍ଜୀବିତ କରି ରଖିବା ବୋଲି ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଆଜି ଭୁବନେଶ୍ୱର ସ୍ୱାଧୀନତା ସଂଗ୍ରାମୀ ସଦନ ପଡିଆ ଠାରେ ଉତ୍କଳ କେଶରୀ ଡଃ ହରେକୃଷ୍ଣ ମହତାବଙ୍କ ଶ୍ରାଦ୍ଧ ଉତ୍ସବ ଉପଲକ୍ଷେ ଆୟୋଜିତ ସ୍ୱାଧୀନତା ସଂଗ୍ରାମୀ ମହୋତ୍ସବ କାର୍ଯ୍ୟକ୍ରମରେ ମୁଖ୍ୟ ଅତିଥି ରୂପେ ଯୋଗଦେଇ କହିଛନ୍ତି।

ଏହି ଅବସରରେ ମୁଖ୍ୟମନ୍ତ୍ରୀ ସ୍ୱାଧୀନତା ସଂଗ୍ରାମୀଙ୍କ ସମ୍ମାନାର୍ଥେ ରାଜ୍ୟର ସ୍ୱାଧୀନତା ସଂଗ୍ରାମୀମାନଙ୍କ ପେନସନକୁ ବୃଦ୍ଧି କରିଛନ୍ତି। ମୁଖ୍ୟମନ୍ତ୍ରୀଙ୍କ ଘୋଷଣା ଅନୁଯାୟୀ ରାଜ୍ୟର ଜେଲ୍ ଯାଇଥିବା (ବନ୍ଦୀ) ସ୍ୱାଧୀନତା ସଂଗ୍ରାମୀ ମାନଙ୍କ ପେନସନକୁ ୧୦ ହଜାର ଟଙ୍କାରୁ ୨୦ ହଜାର ଟଙ୍କାକୁ ବୃଦ୍ଧି କରାଯାଇଛି। ଏହା ସହିତ  ଅଣବନ୍ଦୀ ସ୍ୱାଧୀନତା ସଂଗ୍ରାମୀମାନେ ପୂର୍ବରୁ ୯ ହଜାର ଟଙ୍କା ପାଉଥିବା ବେଳେ ଏବେ ମାସକୁ ୧୫ ହଜାର ଟଙ୍କା ପାଇବେ। କେନ୍ଦ୍ର ସରକାରଙ୍କ ପେନ୍‌ସନ୍ ପାଉଥିବା ସଂଗ୍ରାମୀମାନଙ୍କୁ (କେନ୍ଦ୍ର ସରକାରଙ୍କ ସ୍ୱତନ୍ତ୍ରତା ସୈନିକ ସମ୍ମାନ) ରାଜ୍ୟ ସରକାର ମାସକୁ ଅତିରିକ୍ତ ୮ ହଜାର ଟଙ୍କା ପ୍ରତୀକ ଭତ୍ତା ପ୍ରଦାନ କରୁଥିଲେ। ଏହି ଭତ୍ତାକୁ  ୧୦ ହଜାର ଟଙ୍କାକୁ ବୃଦ୍ଧି କରାଯାଇଛି।

ସେହିପରି ଜରୁରୀ କାଳୀନ ପରିସ୍ଥିତିକୁ ଗଣତନ୍ତ୍ରର ଏକ କଳା ଦାଗ ବୋଲି ବର୍ଣ୍ଣନା କରି ମୁଖ୍ୟମନ୍ତ୍ରୀ କହିଲେ ଯେ ଏହି ସମୟରେ ଜରୁରୀ କାଳୀନ ପରିସ୍ଥିତିକୁ ବିରୋଧ କରି ମିସା ଆଇନରେ ଗିରଫ ହୋଇଥିବା ସମସ୍ତ ସଂଗ୍ରାମୀ ମାନଙ୍କୁ ମାସକୁ ୨୦ ହଜାର ଟଙ୍କା ପେନସନ ପ୍ରଦାନ କରାଯିବ।

ମୁଖ୍ୟମନ୍ତ୍ରୀ କହିଥିଲେ ଓଡିଶାର ବରେଣ୍ୟ ସ୍ୱାଧୀନତା ସଂଗ୍ରାମୀ ଉତ୍କଳ କେଶରୀ ଡଃ ହରେକୃଷ୍ଣ ମହତାବଙ୍କ ଶ୍ରାଦ୍ଧ ଦିବସକୁ ସ୍ୱାଧୀନତା ସଂଗ୍ରାମୀ ସମିତି ପକ୍ଷରୁ ସ୍ୱାଧୀନତା ସଂଗ୍ରାମୀ ମହୋତ୍ସବ ଭାବେ ପାଳନ କରାଯାଉଛି। ଡଃ ମହତାବଙ୍କ କୃତି ଓ ସ୍ମୃତିକୁ ଉଜ୍ଜିବୀତ କରି ରଖିବା ଏବଂ ତାଙ୍କ ଅବଦାନର ସମ୍ମାନାର୍ଥେ ଚଳିତ ବର୍ଷ ଡଃ ମହତାବଙ୍କ ୧୨୫ତମ ଜନ୍ମ ବାର୍ଷିକୀକୁ ରାଜ୍ୟ ତଥା ରାଷ୍ଟ୍ରସ୍ତରରେ ଏକ ବର୍ଷବ୍ୟାପୀ ପାଳନ କରାଯାଉଛି। ଡଃ ମହତାବଙ୍କ ସ୍ମୃତିକୁ ଉଜ୍ଜିବୀତ କରି ରଖିବା ପାଇଁ ତାଙ୍କ ଜୀବନୀ ଉପରେ ବାୟୋପିକ୍ ନିର୍ମାଣ କରାଯିବ। ତାଙ୍କ ରଚିତ ପୁସ୍ତକ ଓ ଆଲେଖ୍ୟ ଗୁଡିକର ବିଭିନ୍ନ ଭାଷାରେ ପୁନଃ ପ୍ରକାଶନ, ତାଙ୍କ ଜନ୍ମସ୍ଥାନ ଅଗରପଡାରେ ମେମୋରିଆଲ ପ୍ରତିଷ୍ଠା, ତାଙ୍କ ଜୀବନୀ ଉପରେ ଗବେଷଣା ଆଦି ଅନେକ କାର୍ଯ୍ୟକ୍ରମ ରାଜ୍ୟ ସରକାରଙ୍କ ପକ୍ଷରୁ ସ୍ୱତନ୍ତ୍ର ଭାବେ   କରାଯିବ।

ମୁଖ୍ୟମନ୍ତ୍ରୀ ପୁଣି କହିଥିଲେ ଭାରତର ସ୍ୱାଧୀନତା ସଂଗ୍ରାମ ସ୍ୱତନ୍ତ୍ର ଓ ଅନନ୍ୟ। ଗାନ୍ଧିଜୀଙ୍କ ନେତୃତ୍ୱରେ ଚାଲିଥିବା ସ୍ୱାଧୀନତା ସଂଗ୍ରାମର ମୁଖ୍ୟଧାରା ବିଷୟରେ ଆମେ ସମସ୍ତେ ଜାଣିଛେ। କିନ୍ତୁ, ଏହା ସହିତ ଭାରତ ବର୍ଷରେ ଅହୁରି ଅନେକ ମହାନ ବ୍ୟକ୍ତି ନିଜ ନିଜ ବିଚାରଧାରାରେ ଆନ୍ଦୋଳନ କରୁଥିଲେ। ଆମେ ସେମାନଙ୍କ କଥା ଜାଣିନାହୁଁ । ଇତିହାସରେ ସେମାନେ ସଠିକ୍ ଭାବେ ସ୍ଥାନୀତ ହୋଇ ନାହାନ୍ତି। ଏହି ବୀର ସଂଗ୍ରାମୀମାନେ ନିଜ ପାଇଁ କିମ୍ବା ଇତିହାସ ପୃଷ୍ଠାରେ ସ୍ଥାନ ପାଇବା ପାଇଁ ପ୍ରାଣବଳୀ କିମ୍ବା ତ୍ୟାଗ ଦେଇନଥିଲେ। ତାଙ୍କ ପାଇଁ ଦେଶ ଓ ଦେଶର ସ୍ୱାଧୀନତା ସବୁକିଛି ଥିଲା । ଆଜି ସମୟ ଆସିଛି ଜନସାଧାରଣ ତାଙ୍କ ବିଷୟରେ ଜାଣିବା ପାଇଁ। କାରଣ ଏକ ସମାଜ ପାଇଁ ତା’ର ଇତିହାସ ହେଉଛି ସବୁଠାରୁ ବଡ ଶିକ୍ଷା। ଯଦି ଆମେ ଆମର ଇତିହାସକୁ ସ୍ମରଣ ନକରିବା ତେବେ ଆମର ବର୍ତ୍ତମାନ ମୂଲ୍ୟହୀନ ଓ ଭବିଷ୍ୟତ ଅନ୍ଧକାରମୟ ହେବ।

ମୁଖ୍ୟମନ୍ତ୍ରୀ ଆହୁରି କହିଥିଲେ ଯେ ଇତିହାସର ଏହି ଭୁଲକୁ ସୁଧାରିବା ପାଇଁ ୨୦୧୪ ମସିହା ପରେ ଯଶସ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଜୀଙ୍କ ଦ୍ୱାରା ଉଦ୍ୟମ ଆରମ୍ଭ ହୋଇଛି । ଏପରି ନାମହୀନ, ପରିଚୟହୀନ ମହାପୁରୁଷ ଏବଂ ବରପୁତ୍ରୀ ମାନଙ୍କୁ ଯଥୋଚିତ ସମ୍ମାନ ଦେବା ସହ ସେମାନଙ୍କୁ ଲୋକଲୋଚନକୁ ଆଣିବାକୁ ପ୍ରୟାସ କରାଯାଉଛି। ଯାହାଫଳରେ ଆମେ ସାରା ଭାରତବର୍ଷରେ ଅନେକ ସ୍ୱାଧୀନତା ସଂଗ୍ରାମୀଙ୍କ ତ୍ୟାଗ ଓ ବଳିଦାନ ବିଷୟରେ ଜାଣିପାରୁଛୁ।

ନିକଟରେ ପ୍ରଧାନମନ୍ତ୍ରୀ ଭଗବାନ ବିର୍ସା ମୁଣ୍ଡାଙ୍କ ଜୟନ୍ତୀକୁ ଜନଜାତୀୟ ଗୌରବ ଦିବସ ରୂପେ ନାମିତ କରିଛନ୍ତି। ଆମ ରାଜ୍ୟରେ ବରଗଡ ଜିଲ୍ଲାର ମହାନ ସ୍ୱାଧୀନତା ସଂଗ୍ରାମୀ ଶହିଦ୍ ମାଧୋ ସିଂହଙ୍କ ତ୍ୟାଗ ଓ ବଳିଦାନର ସମ୍ମାନାର୍ଥେ ଶହିଦ ମାଧୋ ସିଂହ ହାତଖର୍ଚ୍ଚ ଯୋଜନା ଆମେ ଆରମ୍ଭ କରିବାକୁ ଯାଉଛୁ। ସ୍ୱାଧୀନତା ସଂଗ୍ରାମରେ ଯୋଗଦାନ କରିଥିବା ସମସ୍ତ ବରପୁତ୍ର ମାନଙ୍କୁ ସମ୍ମାନ ଦେବାରେ ଆମ ସରକାର କେବେହେଲେ ଅବହେଳା କରିବେ ନାହିଁ ବୋଲି ମୁଖ୍ୟମନ୍ତ୍ରୀ  କହିଥିଲେ।

ଏହି ମହୋତ୍ସବରେ ଦେଶର 10ଟି ରାଜ୍ୟରୁ ସ୍ୱାଧୀନତା ସଂଗ୍ରାମୀ ମାନଙ୍କ ଦାୟଦ ମାନେ ଯୋଗ ଦେଇଥିଲେ। ସେମାନଙ୍କୁ ମୁଖ୍ୟମନ୍ତ୍ରୀ ସମ୍ବର୍ଦ୍ଧିତ କରିଥିଲେ।

ଏହି ମହୋତ୍ସବ ଅବସରରେ ସ୍ୱାଧୀନତା ସଂଗ୍ରାମୀ ସଦନ ପରିସରରେ ସୂଚନା ଓ ଲୋକସଂପର୍କ ବିଭାଗ ପକ୍ଷରୁ ଆୟୋଜିତ ଏକ ଫଟୋଚିତ୍ର ପ୍ରଦର୍ଶନୀକୁ ମୁଖ୍ୟମନ୍ତ୍ରୀ ଉଦଘାଟନ କରିବା ସହ ବୁଲି ଦେଖିଥିଲେ।

କାର୍ଯ୍ୟକ୍ରମରେ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ତଥା ମହୋତ୍ସବ ଅଭ୍ୟର୍ଥନା କମିଟିର ଅଧ୍ୟକ୍ଷ ପୃଥ୍ୱୀରାଜ ହରିଚନ୍ଦନ ସ୍ୱାଗତ ଭାଷଣ ଦେଇଥିଲେ। ଆନ୍ଧ୍ରପ୍ରଦେଶ ଓ ଛତିଶଗଡର ପୂର୍ବତନ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ, ବିଶିଷ୍ଟ ସ୍ୱାଧନତା ସଂଗ୍ରାମୀ ତଥା ମହୋତ୍ସବର ସଭାପତି ବିମ୍ବାଧର ମୁଦୁଲି, ସାଂସଦ ଭର୍ତ୍ତୃହରି ମହତାବ, ବିରୋଧୀ ଦଳ ଉପ-ନେତା ପ୍ରସନ୍ନ ଆଚାର୍ଯ୍ୟ, ବିଧାୟକ ବାବୁ ସିଂହ, ବିଧାୟକ ସାରଦା ପ୍ରଧାନ, ପୂର୍ବତନ ମନ୍ତ୍ରୀ ନିରଞ୍ଜନ ପଟ୍ଟନାୟକ, ପୂର୍ବତନ ମନ୍ତ୍ରୀ ସୁରେଶ କୁମାର ରାଉତରାୟ ପ୍ରମୁଖ ସେମାନଙ୍କର ଅଭିଭାଷଣ ରଖିଥିଲେ।

Categories
ଆଜିର ଖବର ରାଜ୍ୟ ଖବର

୯୫ ବର୍ଷ ବୟସ୍କା ମହିଳାଙ୍କୁ ସହାୟ ହେଲା ଡାକ ବିଭାଗ: ଏଣିକି ଘରେ ବସି ପାଇବେ ପେନ୍ସନ୍

ଭୁବନେଶ୍ଵର: ଓଡ଼ିଶାର ଗଜପତି ଜିଲ୍ଲା ପାରଳାଖେମୁଣ୍ଡି ଅନ୍ତର୍ଗତ ଏକ ପରିବାରର ୯୫ ବର୍ଷ ବୟସ୍କା ମହିଳାଙ୍କୁ ସାଇକେଲ ରିକ୍ସାରେ ନିଆଯାଇ ବୃଦ୍ଧାବୃଦ୍ଧ ପେନ୍‌ସନ୍‌ ସଂଗ୍ରହ କରିଥିଲେ। ଏହି ମହିଳା ଜଣକ ଗତ ତିନିମାସ ଧରି ତାଙ୍କ ପେନ୍ସନ୍ ପାଇନଥିଲେ। ଗାଡି ଭଡା କରିବାକୁ ଟଙ୍କା ନ ଥିବାରୁ ଲାବଙ୍ଗା ଗୟାଙ୍କ ପରିବାର ସଦସ୍ୟ ତାଙ୍କୁ ଟ୍ରଲିରେ ବ୍ୟାଙ୍କକୁ ନେଇ ଯାଇଥିଲେ।

ବ୍ୟାଙ୍କ ତାଙ୍କୁ ମ୍ୟୁନିସିପାଲିଟି କାର୍ଯ୍ୟାଳୟ ଯିବା ପାଇଁ ପରାମର୍ଶ ଦେଇଥିଲା। ଏହିଭଳି ତିନି ଚାରିଥର ଦୌଡିବା ଦ୍ୱାରା ତାଙ୍କୁ ତାଙ୍କର ପେନସନ ବ୍ୟାଙ୍କ ରୁ ମିଳିଥିଲା। ପାରଳାଖେମୁଣ୍ଡି ଡାକ ବିଭାଗର କର୍ମଚାରୀମାନେ ଏହି ଖବର ଶୁଣିବାପରେ ଗତକାଲି ତାଙ୍କ ଘରେ ପହଞ୍ଚି ଶୂନ୍ୟ ବାଲାନ୍ସ ଯୁକ୍ତ ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କ ଆକାଉଣ୍ଟ ଖୋଲିଥିଲେ।

ବର୍ତ୍ତମାନ ଲାବଙ୍ଗା ଗୟା ପ୍ରତି ମାସରେ ବ୍ୟାଙ୍କ ଦୌଡିବା ପରିବର୍ତ୍ତେ ନିଜ ଘରେ ରହି ପେନ୍ସନ୍ ପାଇବାକୁ ସକ୍ଷମ ହେବେ। ପାଖରେ ରହୁଥିବା ତାଙ୍କ ଝିଅ ଡାକ ବିଭାଗର ଏହି ସେବା ସୁବିଧା ପ୍ରଦାନ ପାଇଁ ଡାକ ବିଭାଗକୁ ଧନ୍ୟବାଦ ଜଣାଇଛନ୍ତି।

Categories
ଆଜିର ଖବର ଜାତୀୟ ଖବର

ଏହି କେନ୍ଦ୍ରୀୟ କର୍ମଚାରୀମାନଙ୍କୁ ହୋଲିରେ ବଡ ଉପହାର, ପେନ୍ସନ୍ ଉପରେ ମୋଦୀ ସରକାରଙ୍କ ବଡ ନିଷ୍ପତ୍ତି

ନୂଆଦିଲ୍ଲୀ: ରଙ୍ଗର ପର୍ବ ହୋଲି ଆଉ କିଛି ଦିନ ବାକି ଅଛି। କିନ୍ତୁ ନେହାପୂର୍ବରୁ ଲକ୍ଷ ଲକ୍ଷ କେନ୍ଦ୍ରୀୟ କର୍ମଚାରୀଙ୍କ ପାଇଁ ହୋଲି ଉତ୍ସବ ଆରମ୍ଭ ହୋଇସାରିଛି। ବାସ୍ତବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ପୁରୁଣା ପେନ୍ସନ୍ ଯୋଜନା ସମ୍ପର୍କରେ ଏକ ନୂତନ ଅପଡେଟ ଜାରି କରିଛନ୍ତି। ଏହା ପରେ ବର୍ତ୍ତମାନ କେନ୍ଦ୍ରୀୟ କର୍ମଚାରୀଙ୍କ ଏକ ବିଭାଗ ନୂତନ ପେନ୍ସନ୍ ସ୍କିମ୍ (ନ୍ୟାସନାଲ ପେନ୍ସନ୍ ସିଷ୍ଟମ୍) ବଦଳରେ ପୁରୁଣା ପେନ୍ସନ୍ ସ୍କିମ୍ ବାଛିବା ପାଇଁ ବିକଳ୍ପ ମିଳିଛି।

ତାରିଖ ଅନୁଯାୟୀ ଚୟନ କରିବାର ବିକଳ୍ପ:

ପୁରୁଣା ପେନ୍ସନ୍ ଯୋଜନା ସମ୍ପର୍କରେ କର୍ମଚାରୀ ମନ୍ତ୍ରଣାଳୟ ଏକ ନୂତନ ନିର୍ଦ୍ଦେଶ ଜାରି କରିଛି। ସେହି ଅନୁଯାୟୀ, ବର୍ତ୍ତମାନ କିଛି କେନ୍ଦ୍ରୀୟ କର୍ମଚାରୀ ପୁରୁଣା ପେନ୍ସନ୍ ଯୋଜନା ଚୟନ କରିପାରିବେ। ଏହି ନିର୍ଦ୍ଦେଶ ଅନୁଯାୟୀ, ସମସ୍ତ କେନ୍ଦ୍ରୀୟ କର୍ମଚାରୀ ଯେଉଁମାନେ ପୁରୁଣା ପେନ୍ସନ୍ ଯୋଜନାର ଲାଭ ଉଠାଇବାକୁ ଯୋଗ୍ୟ, ସେମାନଙ୍କୁ ନୂତନ ବିକଳ୍ପ ବାଛିବା ପାଇଁ ଅଗଷ୍ଟ ୩୧ ତାରିଖ ୨୦୨୩ ପର୍ଯ୍ୟନ୍ତ ସମୟ ଦିଆଯାଇଛି।

ସମୟସୀମା ପରେ ସୁଯୋଗ ପାଇବେ ନାହିଁ:

ଯଦି ଯୋଗ୍ୟ କର୍ମଚାରୀମାନେ ସମୟସୀମା ସମାପ୍ତ ହେବା ପୂର୍ବରୁ ପୁରୁଣା ପେନ୍ସନ୍ ଯୋଜନା ଚୟନ ନକରନ୍ତି, ତେବେ ସେମାନେ ସ୍ୱୟଂଚାଳିତ ଭାବରେ ନୂତନ ପେନ୍ସନ୍ ଯୋଜନା ଅଧୀନରେ ରହିବେ। ଏହାର ଅର୍ଥ ହେଉଛି ଯେ, ଅଗଷ୍ଟ ୩୧ ତାରିଖ ୨୦୨୩ ପର୍ଯ୍ୟନ୍ତ, ଯୋଗ୍ୟ କେନ୍ଦ୍ରୀୟ କର୍ମଚାରୀ ପେନ୍ସନ୍ ସ୍କିମ୍ ଯେକୌଣସି ବିକଳ୍ପ ବାଛିଲେ, ଏହା ଚୂଡାନ୍ତ ବିବେଚନା କରାଯିବ। ମନ୍ତ୍ରଣାଳୟ ଏହା ମଧ୍ୟ ସ୍ପଷ୍ଟ କରିଛି ଯେ, ସମୟସୀମା ପରେ ଅଗଷ୍ଟ ୩୧ ତାରିଖ ୨୦୨୩ ପରେ ପେନ୍ସନ୍ ଯୋଜନାର ବିକଳ୍ପ ବଦଳାଇବା ପାଇଁ କୌଣସି ସୁବିଧା ରହିବ ନାହିଁ।

ଏହିପରି କର୍ମଚାରୀମାନେ ଲାଭ ପାଇବେ:

ସରକାରୀ ନିର୍ଦ୍ଦେଶ ଅନୁଯାୟୀ, ଏହି ସୁବିଧାଗୁଡ଼ିକର ଲାଭ ସେହି କେନ୍ଦ୍ରୀୟ କର୍ମଚାରୀମାନଙ୍କୁ ଦିଆଯିବ ଯେଉଁମାନେ ନୂତନ ପେନ୍ସନ୍ ସ୍କିମ୍ ନ୍ୟାସନାଲ ପେନ୍ସନ୍ ସିଷ୍ଟମ କିମ୍ବା ସେମାନଙ୍କ ପଦବୀ ନିଯୁକ୍ତି ସମ୍ପର୍କରେ ବିଜ୍ଞପ୍ତି ପୂର୍ବରୁ ନିଯୁକ୍ତ ହୋଇଥିଲେ। ଜାତୀୟ ପେନ୍ସନ୍ ସିଷ୍ଟମର ବିଜ୍ଞପ୍ତି ଡିସେମ୍ବର ୨୨ ତାରିଖ ୨୦୦୩ ରେ ସରକାର ପ୍ରଦାନ କରିଥିଲେ। ଏହାର ଅର୍ଥ ହେଉଛି ଯେ, ସମସ୍ତ କେନ୍ଦ୍ରୀୟ କର୍ମଚାରୀ ଯେଉଁମାନେ ପୁନଃସ୍ଥାପିତ ହୋଇଥିଲେ କିମ୍ବା ସେମାନଙ୍କର ପୁନଃସ୍ଥାପନ ବିଜ୍ଞପ୍ତି ଡିସେମ୍ବର ୨୨ ତାରିଖ ୨୦୦୩ ପୂର୍ବରୁ ଜାରି କରାଯାଇଥିଲା, ସେମାନେ ପୁରୁଣା ପେନ୍ସନ୍ ଯୋଜନା ଚୟନ କରିପାରିବେ।

Categories
ଆଜିର ଖବର ଜୀବନ ଶୈଳୀ ବ୍ୟବସାୟ

କେବଳ ଗୋଟିଏ ପ୍ରିମିୟମ ଦେୟ ଉପରେ ପାଇବେ ୧୨ ହଜାର ଟଙ୍କା ପର୍ଯ୍ୟନ୍ତ ପେନ୍ସନ୍, ଜାଣନ୍ତୁ ସମସ୍ତ ବିବରଣୀ

ନୂଆଦିଲ୍ଲୀ: ଆଜିର ସମୟରେ ପ୍ରତ୍ୟେକ ବ୍ୟକ୍ତି ନିଜର ଭବିଷ୍ୟତକୁ ସୁରକ୍ଷିତ କରିବାକୁ ଚେଷ୍ଟା କରୁଛନ୍ତି। ଦେଶର ବୃହତ୍ତମ ବୀମା କମ୍ପାନୀ ଲାଇଫ୍ ଇନସୁରାନ୍ସ କର୍ପୋରେସନ୍ ଅଫ୍ ଇଣ୍ଡିଆ ନିବେଶକମାନଙ୍କ ପାଇଁ ବିଭିନ୍ନ ପ୍ରକାରର ଯୋଜନା ପ୍ରସ୍ତୁତ କରିବାରେ ଲାଗିଛି। ଯଦି ଆପଣ ୪୦ ବର୍ଷ ବୟସରୁ ଏକଲକ୍ଷ ଟଙ୍କା ଜମା କରି ପେନସନର ଲାଭ ଉଠାଇବାକୁ ଚାହୁଁଛନ୍ତି, ତେବେ ଆପଣ LIC ର ଯୋଜନା ସରଳ ପେନ୍ସନ୍ ଯୋଜନାରେ ବିନିଯୋଗ କରିପାରିବେ।

ସରଳ ପେନ୍ସନ୍ ଯୋଜନା କ’ଣ?:

LIC ର ସରଳ ପେନ୍ସନ୍ ଯୋଜନା ହେଉଛି ଏକ ତୁରନ୍ତ ବାର୍ଷିକ ଯୋଜନା ଯେଉଁଥିରେ ନିବେଶକ କେବଳ ପ୍ରିମିୟମ ଦେବା ପରେ ପେନ୍‌ସନ୍‌ର ସୁବିଧା ପାଇବେ। ଆପଣ ଏହି ନୀତିକୁ ଏକକ କିମ୍ବା ମିଳିତ ଆକାଉଣ୍ଟରେ ଖୋଲିପାରିବେ। ପଲିସିଧାରୀଙ୍କ ମୃତ୍ୟୁ ପରେ ପ୍ରିମିୟମ ରାଶି ନୋମିନୀଙ୍କୁ ଫେରସ୍ତ କରାଯାଏ। ଏହି ଯୋଜନାର ବିଶେଷ ବୈଶିଷ୍ଟ୍ୟ ହେଉଛି ଆପଣ ୪୦ ବର୍ଷ ବୟସରୁ ପେନସନର ଲାଭ ପାଇପାରିବେ।

ସରଳ ପେନ୍ସନ୍ ଯୋଜନାର ବିଶେଷ ବୈଶିଷ୍ଟ୍ୟ:

ସରଳ ପେନ୍ସନ୍ ଯୋଜନାର ନିବେଶକମାନେ ୪୦ ରୁ ୮୦ ବର୍ଷ ବୟସ ପର୍ଯ୍ୟନ୍ତ ଏହି ପେନ୍ସନ୍ ଯୋଜନାରେ ବିନିଯୋଗ କରିପାରିବେ। ଏହା ସହିତ, ଯଦି ଆପଣ ପଲିସି କିଣିବା ପରେ ପଲିସି ସମର୍ପଣ କରିବାକୁ ଚାହାଁନ୍ତି, ତେବେ ଏପରି ପରିସ୍ଥିତିରେ ଆପଣ ଏହାକୁ ୬ ମାସ ପରେ ମଧ୍ୟ ସମର୍ପଣ କରିପାରିବେ। ଏହି ସ୍କିମ୍ କିଣିବାର ୬ ମାସ ପରେ, ଆପଣ ଏହି ପଲିସି ବିରୁଦ୍ଧରେ ଋଣର ସୁବିଧା ମଧ୍ୟ ପାଇପାରିବେ।

ଏହି ପେନ୍ସନ୍ ଯୋଜନାରେ ନିବେଶକ ପ୍ରତି ମାସରେ ଅତି କମରେ ୧ ଟଙ୍କାର ପେନ୍ସନ୍ ସୁବିଧା ପାଇଥା’ନ୍ତି। ଆପଣ ୧ ମାସ, ୩ ମାସ, ୬ ମାସ କିମ୍ବା ବର୍ଷସାରା ଆବଶ୍ୟକତା ଅନୁଯାୟୀ ପେନ୍ସନ୍ ପରିମାଣ ନେଇପାରିବେ। ଏଥିରେ କୌଣସି ସର୍ବାଧିକ ବିନିଯୋଗ ସୀମା ନାହିଁ। ଆମେ ଆପଣଙ୍କୁ କହିବୁ ଯେ ଯଦି ଆପଣ ୪୨ ବର୍ଷ ବୟସରେ ଏହି ଯୋଜନାରେ ୩୦ ଲକ୍ଷ ଟଙ୍କା ବିନିଯୋଗ କରନ୍ତି, ତେବେ ଆପଣ ମାସିକ ୧୨,୩୮୮ ଟଙ୍କା ପେନ୍ସନ୍ ସୁବିଧା ପାଇବେ।

ସରଳ ପେନ୍ସନ୍ ସ୍କିମରେ ଗ୍ରାହକଙ୍କୁ LIC ଦୁଇ ପ୍ରକାରର ବିକଳ୍ପ ଦେଇପାରେ। ପ୍ରଥମ ବିକଳ୍ପ ଅନୁଯାୟୀ, ପ୍ରିମିୟମ ଦେବା ପରେ ସେ ବୀମାଭୁକ୍ତ ବ୍ୟକ୍ତିଙ୍କ ମୃତ୍ୟୁ ପର୍ଯ୍ୟନ୍ତ ପେନସନର ସୁବିଧା ପାଆନ୍ତି। ତା’ପରେ, ପ୍ରିମିୟମ ରାଶି ନୋମିନଙ୍କ ନିକଟକୁ ଫେରସ୍ତ କରାଯାଏ। ଦ୍ୱିତୀୟ ବିକଳ୍ପରେ, ଆପଣ ନିଜ ଜୀବନସାଥୀଙ୍କ ସହିତ ଏହି ବୀମା କିଣି ପାରିବେ। ଏଥିରେ, ଉଭୟ ଆକାଉଣ୍ଟଧାରୀଙ୍କ ବଞ୍ଚିବା ପର୍ଯ୍ୟନ୍ତ, ସେମାନେ ପେନ୍‌ସନ୍‌ର ସୁବିଧା ପାଆନ୍ତି। ତା’ପରେ, ପ୍ରିମିୟମର ମୂଳ ପରିମାଣ ନୋମିନକୁ ଫେରସ୍ତ କରାଯାଏ।

Categories
ଜାତୀୟ ଖବର ବିଶେଷ ଖବର ରାଜ୍ୟ ଖବର

ଦିନକୁ ଦୁଇ ଟଙ୍କାରୁ କମ୍ ବିନିଯୋଗରେ ପାଇପାରିବେ ୩୬ ହଜାର ଟଙ୍କା ପେନ୍ସନ୍: ଜାଣନ୍ତୁ ଏହି ଯୋଜନା ସହିତ ଜଡିତ ବିବରଣୀ

ନୂଆଦିଲ୍ଲୀ: ଆଜିକାଲି ଅବସରକୁ ନେଇ ସମସ୍ତେ ଚିନ୍ତିତ ଅଛନ୍ତି। ଲୋକମାନେ ଚାକିରି ଆରମ୍ଭରୁ ଅବସର ଯୋଜନା ବିଷୟରେ ଚିନ୍ତା କରିବା ଆରମ୍ଭ କରନ୍ତି। ଯାହା ଫଳରେ ସେମାନଙ୍କୁ ବୃଦ୍ଧାବସ୍ଥାରେ କାହା ଉପରେ ନିର୍ଭର କରିବାକୁ ପଡିବ ନାହିଁ। ଏହାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନଧନ ପେନ୍ସନ୍ ଯୋଜନା ଅଧୀନରେ କେନ୍ଦ୍ର ସରକାର ପେନ୍ସନ୍ ସୁବିଧା ଯୋଗାଉଛି। ଏହି ଯୋଜନାରେ ଦିନକୁ ୨ ଟଙ୍କାରୁ କମ୍ ବିନିଯୋଗ ଦ୍ଵାରା ୬୦ ବର୍ଷ ବୟସ ପରେ ବାର୍ଷିକ ୩୬,୦୦୦ ଟଙ୍କା ପେନ୍ସନ୍ ଉପଲବ୍ଧ ହେବ।

ଏହି ଯୋଜନାର ଲାଭ କେଉଁମାନେ ନେଇପାରିବ:

୧୮ ରୁ ୪୦ ବର୍ଷ ବୟସ ମଧ୍ୟରେ ଥିବା ଜଣେ ବ୍ୟକ୍ତି ଏହି ଯୋଜନାରେ ସାମିଲ ହୋଇପାରିବେ। ଏହି ଯୋଜନାରେ ଯୋଗ ଦେଉଥିବା ବ୍ୟକ୍ତିଙ୍କ ମାସିକ ଆୟ ୧୫୦୦୦ ରୁ କମ୍ ହେବା ଉଚିତ ଏବଂ ସେମାନେ ଇପିଏଫଓ, ଏନପିଏସ ଅଧୀନରେ ଆସୁନଥିବେ। ଏହା ସହିତ ଆବେଦନକାରୀଙ୍କ ପାଖରେ ଏକ ସେଭିଂ ବ୍ୟାଙ୍କ ଆକାଉଣ୍ଟ ରହିବା ଉଚିତ୍ଏ। ହି ଯୋଜନା ପାଇଁ ଆଧାର କାର୍ଡ, ବ୍ୟାଙ୍କ ପାସବୁକ୍ ଡକ୍ୟୁମେଣ୍ଟ୍ ଆବଶ୍ୟକ।

ବୟସ ଅନୁସାରେ ଭିନ୍ନ ଭିନ୍ନ ପ୍ରିମିୟମ୍:

ଏହି ଯୋଜନାରେ ବୟସ ଅନୁଯାୟୀ ପ୍ରିମିୟମ ଦେବାକୁ ପଡିବ। ଯଦି 18 ବର୍ଷ ବୟସରେ କେହି ଏହି ଯୋଜନାରେ ଯୋଗ ଦିଅନ୍ତି, ତେବେ ତାଙ୍କୁ ପ୍ରତି ମାସରେ ୫୫ ଟଙ୍କା ଜମା କରିବାକୁ ପଡିବ। ଅର୍ଥାତ୍ ଦୈନିକ ୨ ଟଙ୍କାରୁ କମ୍ ପରିମାଣର ବିନିଯୋଗ କରିବାକୁ ପଡିବ। ସେହିଭଳି ୨୫ ବର୍ଷ ବୟସର ବ୍ୟକ୍ତିଙ୍କ ପାଇଁ ଏହି ରାଶି ହେଉଛି ୮୦ ଟଙ୍କା। ଯେଉଁମାନଙ୍କୁ ୪୦ ବର୍ଷ ବୟସ, ସେମାନଙ୍କୁ ୨୦୦ ଟଙ୍କା ଦେବାକୁ ପଡିବ। ଏହି ରାଶି ୬୦ ବର୍ଷ ବୟସ ପର୍ଯ୍ୟନ୍ତ ଜମା କରିବାକୁ ପଡିବ।

କେମିତି କରିବେ ଆବେଦନ:

– ସର୍ବପ୍ରଥମେ ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନଧନ ଯୋଜନା ୱେବସାଇଟ maandhan.in/shramyogi କୁ ଯାଆନ୍ତୁ।

– ଏହା ପରେ ମୂଳପୃଷ୍ଠାରେ ଥିବା ‘ବର୍ତ୍ତମାନ ଆବେଦନ କରିବାକୁ କ୍ଲିକ୍ କରନ୍ତୁ’ ଲିଙ୍କରେ କ୍ଲିକ୍ କରନ୍ତୁ।

– ଏହା ପରେ ଆପଣ ଦୁଇଟି ଅପ୍ସନ୍ ଦେଖିବେ ଯେଉଁଥିରୁ ସେଲ୍ଫ୍ ନାମଲେଖା ଉପରେ କ୍ଲିକ୍ କରନ୍ତୁ।

– ଏହା ପରେ ଆପଣଙ୍କର ମୋବାଇଲ୍ ନମ୍ବର ପ୍ରବେଶ କରନ୍ତୁ ଏବଂ ପ୍ରୋସିଡ ଉପରେ କ୍ଲିକ୍ କରନ୍ତୁ।

– ଏହା ପରେ ଆବେଦନକାରୀଙ୍କ ନାମ, ଇମେଲ୍ ଆଇଡି ଇତ୍ୟାଦି ପୁରଣ କରନ୍ତୁ ଏବଂ କ୍ୟାପଚା କୋଡ୍ ପ୍ରବେଶ କରନ୍ତୁ। ତାପରେ ଆସିଥିବା ଓଟିପି ପ୍ରବେଶ କରନ୍ତୁ।

– ଏହା ପରେ, ଆବଶ୍ୟକ ଡକ୍ୟୁମେଣ୍ଟ୍ ଅପଲୋଡ୍ କରନ୍ତୁ ଏବଂ ଫର୍ମ ଦାଖଲ କରିବା ପରେ, ଏଥିରୁ ଏକ ପ୍ରିଣ୍ଟ୍ ବାହାର କରନ୍ତୁ ଏବଂ ଏହାକୁ ଆପଣଙ୍କ ପାଖରେ ରଖନ୍ତୁ।