ନୂଆଦିଲ୍ଲୀ: ଗୋଟିଏ ପଟେ ନିର୍ବାଚନ ରଣିନୀତିକାର ପ୍ରଶାନ୍ତ କିଶୋର ବିରୋଧୀ ଦଳଗୁଡିକୁ ଏକାଠି କରିବାରେ ଲାଗିପଡିଥିବା ବେଳେ ସେପଟେ ଶିବସେନା ସାଂସଦ ତଥା ପ୍ରବକ୍ତା ସଞ୍ଜୟ ରାଉତ ଏକ ବଡ ବୟାନ ଦେଇଛନ୍ତି। ନରେନ୍ଦ୍ର ମୋଦୀଙ୍କୁ ମୁକାବିଲା କରିବା ପାଇଁ ବିରୋଧୀ ଦଳ ପାଖରେ କୌଣସି ଚେହେରା ନାହିଁ ବୋଲି ସଞ୍ଜୟ ରାଉତ କହିଛନ୍ତି। ଯେପର୍ଯ୍ୟନ୍ତ ବିରୋଧୀ ଦଳ ପାଖକୁ କୌଣସି ବଡ ଚେହେରା ଆସିବ ନାହିଁ, ସେପର୍ଯ୍ୟନ୍ତ କୌଣସି ସୁଯୋଗ ନାହିଁ ବୋଲି ଶ୍ରୀ ରାଉତ କହିଛନ୍ତି।
ତେବେ ଶିବସେନା ସାଂସଦ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମୁକାବିଲା କରିବା ପାଇଁ ଏନସିପି ଅଧ୍ୟକ୍ଷ ଶରଦ ପାୱାର ଉଚିତ ପ୍ରାର୍ଥୀ ଅଟନ୍ତି। ୨୦୨୪ ଲୋକସଭା ନିର୍ବାଚନରେ କୌଣସି ବଡ ଚେହେରା ବିନା ନରେନ୍ଦ୍ର ମୋଦୀଙ୍କୁ ପରାସ୍ତ କରିବା କାଠିକର ପାଠ ହେବ। ତେଣୁ ଶରଦ ପାୱାର ଏହାର ସଠିକ ବିକଳ୍ପ ବୋଲି ଶ୍ରୀ ରାଉତ କହିଛନ୍ତି। ରାହୁଲ ଗାନ୍ଧୀ କଂଗ୍ରେସର ବଡ ନେତା ଅଟନ୍ତି, ହେଲେ ତାଙ୍କ ଠାରୁ ଆହୁରି ବଡ ନେତା ଅଛନ୍ତି ବୋଲି ସଞ୍ଜୟ କହିଛନ୍ତି।