ନୂଆଦିଲ୍ଲୀ: ୟୁପିଏ ୨ ସମୟରେ ଦେଶର ଗୃହମନ୍ତ୍ରୀ ଥିବା ବରିଷ୍ଠ କଂଗ୍ରେସ ନେତା ସୁଶୀଲ କୁମାର ସିନ୍ଦେ ରାଜନୀତିରୁ ଅବସର ଘୋଷଣା କରିଛନ୍ତି। ଏଥିସହ ସେ ଏହା ମଧ୍ୟ ଘୋଷଣା କରିଛନ୍ତି ଯେ, ବର୍ତ୍ତମାନ ତାଙ୍କ ଝିଅ ପ୍ରଣୀତ ସିନ୍ଦେ ତାଙ୍କ ବିଧାନସଭା ଆସନ ସୋଲାପୁରରୁ ଆସନ୍ତା ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ। ବିଜୟଦଶମୀ ଦିନ ଏଭଳି ଘୋଷଣା କରିଥିବା ସୁଶୀଲ କୁମାର ସିନ୍ଦେ ପ୍ରଥମ ନେତା ନୁହଁନ୍ତି, ସେହି ଦିନ ଅନ୍ୟ ଜଣେ କଂଗ୍ରେସ ନେତା ନୀଲେଶ ରାଣେ ସକ୍ରିୟ ରାଜନୀତିରୁ ଅବସର ନେବାକୁ ନିଷ୍ପତ୍ତି ନେଇଛନ୍ତି।
ସୁଶୀଲ କୁମାର ସମ୍ୱାଜୀ ସିନ୍ଦେ ୪ସେପ୍ଟେମ୍ବର ୧୯୪୧ ରେ ମହାରାଷ୍ଟ୍ରରେ ଜନ୍ମଗ୍ରହଣ କରିଥିଲେ। କଂଗ୍ରେସ ଦଳର ନେତା ଭାବରେ ସିନ୍ଦେ ଅନେକ ପଦବୀରେ ରହିଆସିଛନ୍ତି। ସେ ୨୦୦୩ ରେ ପ୍ରଥମ ଥର ପାଇଁ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହୋଇଥିଲେ ଏବଂ ୪ ନଭେମ୍ବର ୨୦୦୪ ପର୍ଯ୍ୟନ୍ତ ରାଜ୍ୟର କ୍ଷମତା ତାଙ୍କ ହାତରେ ଥିଲା। ଏହା ପରେ ସେ ଆନ୍ଧ୍ରପ୍ରଦେଶର ରାଜ୍ୟପାଳ ହୋଇଥିଲେ ଏବଂ ୨୦୦୬ ପର୍ଯ୍ୟନ୍ତ ଏହି ପଦବୀରେ ରହିଥିଲେ।
୨୦୦୬ ରୁ ୨୦୧୨ ପର୍ଯ୍ୟନ୍ତ ସୁଶୀଲ କୁମାର ସିନ୍ଦେ ଭାରତର ଶକ୍ତି ମନ୍ତ୍ରୀ ଭାବରେ କାର୍ଯ୍ୟ କରିଥିଲେ, ପରେ ଯେତେବେଳେ ପ୍ରଣବ ମୁଖାର୍ଜୀ ଦେଶର ରାଷ୍ଟ୍ରପତି ହୋଇଥିଲେ, ସେତେବେଳେ ସେ ୨୦୧୨ ରେ ଭାରତର ଗୃହମନ୍ତ୍ରୀ ଭାବରେ ନିଯୁକ୍ତ ହୋଇଥିଲେ। ସେ ୨୦୧୪ ପର୍ଯ୍ୟନ୍ତ ଦେଶର ଗୃହମନ୍ତ୍ରୀ ରହିଥିଲେ। ସକ୍ରିୟ ରାଜନୀତିରେ ତାଙ୍କର କ୍ୟାରିୟର ୧୯୭୧ ମସିହାରେ ଆରମ୍ଭ ହୋଇଥିଲା ଯେତେବେଳେ ସେ କଂଗ୍ରେସ ଦଳର ପ୍ରାଥମିକ ସଦସ୍ୟତା ଗ୍ରହଣ କରିଥିଲେ।
ସେ ୧୯୭୪ ରୁ ୧୯୯୨ ପର୍ଯ୍ୟନ୍ତ ମହାରାଷ୍ଟ୍ର ବିଧାନସଭାର ଏକ ଅଂଶ ଥିଲେ। ୧୯୯୨ ରୁ ମାର୍ଚ୍ଚ ୧୯୯୮ ପର୍ଯ୍ୟନ୍ତ ସେ ମହାରାଷ୍ଟ୍ରରୁ ରାଜ୍ୟସଭାକୁ ନିର୍ବାଚିତ ହୋଇଥିଲେ ଏବଂ ୧୯୯୯ ରେ ସେ ଉତ୍ତରପ୍ରଦେଶର ଆମେଥୀରେ କଂଗ୍ରେସ ସଭାପତି ସୋନିଆ ଗାନ୍ଧୀଙ୍କ ପ୍ରଚାର ପରିଚାଳକ ଭାବରେ କାର୍ଯ୍ୟ କରିଥିଲେ।
ସିନ୍ଦେଙ୍କ ଅବସର ଘୋଷଣା ସହିତ ୪୨ ବର୍ଷୀୟ ପ୍ରଣୀତ ସିନ୍ଦେ ତାଙ୍କ ପିତାଙ୍କ ପାରମ୍ପାରିକ ଆସନରୁ ଦାୟିତ୍ଵ ଗ୍ରହଣ କରିବେ। ସେ ସୋଲାପୁରର ତିନିଥର ବିଧାୟକ ଏବଂ କଂଗ୍ରେସ କାର୍ଯ୍ୟ କମିଟିର ଜଣେ ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ। ପ୍ରଣୀତ ସିନ୍ଦେ ଆତ୍ମବିଶ୍ୱାସ ବ୍ୟକ୍ତ କରିଛନ୍ତି ଯେ, ଏଥର ଯାହା ହେଉନା କାହିଁକି ସୋଲାପୁରର ସାଂସଦ କଂଗ୍ରେସରୁ ଆସିବେ। ସୋଲାପୁର ଲୋକସଭା ଆସନରେ ଏବେ ବିଜେପିର ଡକ୍ଟର ଜୟସିଦ୍ଧେଶ୍ୱର ଶିବଚାର୍ଯ୍ୟ ସାଂସଦ ଅଛନ୍ତି।
