Tag: ବିକଶିତ ଭାରତ

ନୂଆଦିଲ୍ଲୀ/ଭୁବନେଶ୍ୱର: ଏକବିଂଶ ଶତାବ୍ଦୀରେ ଭାରତ ଜ୍ଞାନ ଭିତ୍ତିକ ଅର୍ଥନୀତିର ନେତୃତ୍ୱ ନେବ। ଯେତେବେଳେ ‘ବିକଶିତ ଭାରତ’ର ସ୍ୱପ୍ନ ସାକାର ହେବ, ଏହା କୌଣସି ଗୋଟିଏ ଜାତି କିମ୍ବା ଧର୍ମ ଆଧାରରେ ନୁହେଁ ବରଂ ପ୍ରତ୍ୟେକ ଭାରତୀୟଙ୍କ ପ୍ରଚେଷ୍ଟା ଦ୍ୱାରା ସମ୍ଭବ ହେବ ବୋଲି ବୁଧବାର ଜାତୀୟ ସଂଖ୍ୟାଲଘୁ ଶିକ୍ଷାନୁଷ୍ଠାନ ଆୟୋଗ (ଏନସିଏମ୍ଇଆଇ) ର ୨୦ତମ ପ୍ରତିଷ୍ଠା ଦିବସ ଓ ସଂଖ୍ୟାଲଘୁ ଅଧିକାର ଦିବସ ସମାରୋହରେ ଯୋଗଦେବା ଅବସରରେ କହିଛନ୍ତି  କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।

ସେ କହିଛନ୍ତି ଯେ, ଆମ ଦେଶର ସମ୍ବିଧାନର ଗୌରବମୟ ୭୫ ବର୍ଷ ପୂର୍ତ୍ତି ହୋଇଛି। ସମ୍ବିଧାନ ହିଁ ଦେଶର ସଂଖ୍ୟାଲଘୁମାନଙ୍କୁ ସମ୍ମାନର ସହ ଜୀବନ ଯାପନ କରିବାର ଅଧିକାର ଦେଇଛି। ଶିକ୍ଷା ମାଧ୍ୟମରେ ସଂଖ୍ୟାଲଘୁମାନଙ୍କ ଜୀବନରେ ଉନ୍ନତି ଆଣିବା ପାଇଁ ଜାତୀୟ ସଂଖ୍ୟାଲଘୁ ଶିକ୍ଷାନୁଷ୍ଠାନ ଆୟୋଗ ଗଠନ କରାଯାଇଥିଲା। ଗତ ସାଢ଼େ ୧୦ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ବିନା କୌଣସି ଭେଦଭାବରେ ‘ସବକା ସାଥ-ସବକା ବିକାଶ’ର ମନ୍ତ୍ରୀରେ ପ୍ରତ୍ୟେକ ବଞ୍ଚିତଙ୍କୁ ଆବାସ, ବ୍ୟାଙ୍କ ଆକାଉଣ୍ଟ, ଗ୍ୟାସ ସିଲିଣ୍ଡର, ମାଗଣା ରାସନ ଭଳି ମୌଳିକ ସୁବିଧା ପ୍ରଦାନ କରୁଛନ୍ତି। ଆମ ପାଇଁ କୌଣସି ଜାତି କିମ୍ବା ଧର୍ମ ନାହିଁ ବରଂ ୪ଟି ବର୍ଗ ଗୁରୁତ୍ୱପୂର୍ଣ୍ଣ। ଏହିମାନେ ହେଉଛନ୍ତି ଗରିବ, କୃଷକ, ମହିଳା ଓ ଯୁବକ । ସେମାନଙ୍କର ସମୁଚିତ ବିକାଶ ହିଁ ଆମର ଲକ୍ଷ୍ୟ।

ଜାତୀୟ ଶିକ୍ଷା ନୀତିକୁ ସଠିକ ଭାବେ କାର୍ଯ୍ୟକାରୀ କରିବା ସମୟର ଆବଶ୍ୟକତା । ଜାତୀୟ ଶିକ୍ଷା ନୀତିର ଦ୍ରୁତ କ୍ରିୟାନ୍ୱୟନ, ଏହି ନୀତି ଅଧୀନରେ ଏନସିଆରଏଫ୍ ଭଳି ଆଧୁନିକ ବିଷୟବସ୍ତୁକୁ ଲାଗୁ କରିବା ପାଇଁ ସଂଖ୍ୟାଲଘୁ ଅନୁଷ୍ଠାନଗୁଡିକୁ ଅଧିକ ସହଯୋଗ କରିବାକୁ ହେବ ।  ଯେତେବେଳେ ଆମେ ପ୍ରତିଭା ବା ଦକ୍ଷତାକୁ ଏକାଡେମିକ୍ କ୍ରେଡିଟରେ ପରିଣତ କରିବୁ, ସେତେବେଳେ ସମସ୍ତଙ୍କ ବିକାଶର ମାର୍ଗ ଫିଟିବ । ଜାତୀୟ ସଂଖ୍ୟାଲଘୁ ଶିକ୍ଷାନୁଷ୍ଠାନ ଆୟୋଗଙ୍କୁ ସେମାନଙ୍କ ପ୍ରୟାସ ପାଇଁ ଧନ୍ୟବାଦ ଜଣାଇବା ସହ ଶ୍ରୀ ପ୍ରଧାନ ପ୍ରଧାନମନ୍ତ୍ରୀ ମୋଦୀଙ୍କ ସରକାର ସେମାନଙ୍କ ସାଙ୍ଗରେ ଅଛନ୍ତି ବୋଲି ସେ କହିଛନ୍ତି ।

ନୂଆଦିଲ୍ଲୀ: ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମୁଖ୍ୟ ସଚିବଙ୍କ ଚତୁର୍ଥ ଜାତୀୟ ସମ୍ମିଳନୀକୁ ସମ୍ବୋଧିତ କରିଥିଲେ। ଏହି ତିନି ଦିନିଆ ସମ୍ମିଳନୀ ୨୦୨୪ ଡିସେମ୍ବର ୧୩ ରୁ ୧୫ ତାରିଖ ପର୍ଯ୍ୟନ୍ତ ଅନୁଷ୍ଠିତ ହୋଇଥିଲା।

ପ୍ରଧାନମନ୍ତ୍ରୀ କହିଥିଲେ, ଏହି ସମ୍ମିଳନୀର ବଡ଼ ଫାଇଦା ଏହାଯେ ଟିମ୍ ଇଣ୍ଡିଆ ଖୋଲା ମନରେ ଏକ ବିକଶିତ ଭାରତ ପାଇଁ ଏକାଠି ଆଲୋଚନା ଓ କାମ କରିବାକୁ ଆଗେଇ ଆସିଥିଲେ।

ପ୍ରଧାନମନ୍ତ୍ରୀ ଏହା ମଧ୍ୟ ଉଲ୍ଲେଖ କରିଥିଲେ, ଜନ ସମର୍ଥନ ସକ୍ରିୟ ଉତ୍ତମ ପ୍ରଶାସନ (ପି୨ଜି୨) ଆମ କାମର ମୂଳଭିତ୍ତି, ଯଦ୍ୱାରା ବିକଶିତ ଭାରତ ଦୃଷ୍ଟିକୋଣ ହାସଲ ହୋଇପାରିବ।

ସମ୍ମିଳନୀରେ ‘ଉଦ୍ୟମିତାକୁ ଗୁରୁତ୍ୱ,ନିଯୁକ୍ତି ଏବଂ କୌଶଳ-ଜନସାଂଖ୍ୟିକ ଲାଭାଂଶର ଲାଭ ଉଠାଇବା’ ଉପରେ ବିସ୍ତୃତ ଆଲୋଚନା ହୋଇଥିଲା।

ବିଶେଷ କରି ଟାୟର ୨/୩ ସହର ଗୁଡ଼ିକରେ ଷ୍ଟାର୍ଟଅପ୍‌ର ବୃଦ୍ଧିକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ। ଏହି ନବପ୍ରବର୍ତ୍ତନକୁ ପ୍ରୋତ୍ସାହିତ କରିବା ସହ ଷ୍ଟାର୍ଟଅପ୍ ପ୍ରତିଷ୍ଠା ସକାଶେ ଉପଯୁକ୍ତ ପରିବେଶ ସୃଷ୍ଟି ପାଇଁ ରାଜ୍ୟଗୁଡ଼ିକୁ ପ୍ରଧାନମନ୍ତ୍ରୀ କହିଥିଲେ। ଛୋଟ ସହରରେ ଉଦ୍ୟୋଗ ପାଇଁ ସ୍ଥାନ ଚିହ୍ନଟ କରିବା ସହ ସେଗୁଡ଼ିକୁ ବ୍ୟାଙ୍କିଙ୍ଗ ବ୍ୟବସ୍ଥା ସହ ସଂଯୋଗ କରି ପରିବହନ ସୁବିଧା ଉପଲବ୍ଧ କରାଇବାକୁ ସେ ଗୁରୁତ୍ୱ ଦେଇଥିଲେ।

ଅନେକ ସମୟରେ ନାଗରିକଙ୍କୁ ଉତ୍ପୀଡ଼ନ କରୁଥିବା ବ୍ୟବସ୍ଥାର ଅନୁପାଳନକୁ ସରଳ କରିବାକୁ ପ୍ରଧାନମନ୍ତ୍ରୀ କହିଥିଲେ। ସେ ଅନୁରୋଧ କରିଥିଲେ, ରାଜ୍ୟ ଗୁଡ଼ିକ ପ୍ରଶାସନିକ ମଡେଲରେ ଏପରି ସୁଧାର ଆଣିବା ଉଚିତ, ଯେପରିକି ଜନ ଭାଗିଦାରୀରେ ଅଂଶ ଗ୍ରହଣ ସକାଶେ ଲୋକମାନେ ପ୍ରୋତ୍ସାହିତ ହେବେ। ପ୍ରଧାନମନ୍ତ୍ରୀ ଏହା ମଧ୍ୟ କହିଥିଲେ, ସଂସ୍କାର, ପ୍ରଦର୍ଶନ, ରୂପାନ୍ତରଣ ଏବଂ ସରକାରଙ୍କ ବିଭିନ୍ନ ଯୋଜନା ବାବଦରେ ଲୋକଙ୍କୁ ସୂଚନା ଦେବା ଆଦିକୁ ଗୁରୁତ୍ୱ ଦେବା ଜରୁରୀ।

ଚକ୍ରୀୟ ଅର୍ଥବ୍ୟବସ୍ଥା ବାବଦରେ ସୂଚନା ଦେଇ ପ୍ରଧାନମନ୍ତ୍ରୀ ଗୋବର୍ଦ୍ଧନ କାର୍ଯ୍ୟକ୍ରମ ଏବେ ବୃହତ ଶକ୍ତି ସମ୍ବଳ ହୋଇଥିବା କହିଥିଲେ। ସେ ଉଲ୍ଲେଖ କରିଥିଲେ, ଏହି ପଦକ୍ଷେପ ବର୍ଜ୍ୟକୁ ସମ୍ପତ୍ତିରେ ପରିଣତ କରିଥିବା ବେଳେ ବୟସ୍କ ଗୋରୁଗାଈଙ୍କୁ ବୋଝ ପରିବର୍ତ୍ତେ ସମ୍ପଦରେ ରୂପାନ୍ତର କରିଛି।

ଇ-ବର୍ଜ୍ୟର ପୁନଃପ୍ରକ୍ରିୟାକରଣ କ୍ଷେତ୍ରରେ ବ୍ୟବହାର୍ଯ୍ୟତା ଗ୍ୟାପ୍ ଫଣ୍ଡିଙ୍ଗର ଅବଧାରଣା ଅନ୍ୱେଷଣ ପାଇଁ ରାଜ୍ୟଗୁଡ଼ିକୁ ପ୍ରଧାନମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏହା ଏଥିପାଇଁ ଗୁରୁତ୍ୱପୂର୍ଣ୍ଣ ଯେ,  ସମାଜରେ ଡାଟା ଏବଂ ପ୍ରଯୁକ୍ତିର ବ୍ୟବହାର ବୃଦ୍ଧି ଯୋଗୁ ଇ-ବର୍ଜ୍ୟ ମଧ୍ୟ ବଢ଼ିବ । ଇ-ବର୍ଜ୍ୟକୁ ଉପଯୋଗୀ ସମ୍ବଳରେ ରୂପାନ୍ତର କରିପାରିଲେ ଏଭଳି ଦ୍ରବ୍ୟର ଆମଦାନୀ ଉପରେ ମଧ୍ୟ ଆମର ନିର୍ଭରଶୀଳତା ହ୍ରାସ ପାଇବ।

ସ୍ୱାସ୍ଥ୍ୟ କ୍ଷେତ୍ରରେ ପ୍ରଧାନମନ୍ତ୍ରୀ ଦର୍ଶାଇଥିଲେ, ଭାରତରେ ଫିଟ୍ ଇଣ୍ଡିଆ ଅଭିଯାନରେ ମୋଟାପ୍ପାକୁ ଏକ ଆହ୍ୱାନ ଭାବେ ବିବେଚନା କରାଯାଉ। ସେ କହିଥିଲେ କେବଳ ଏକ ଫିଟ୍ ଏବଂ ହେଲଦି ଇଣ୍ଡିଆ ବିକଶିତ ଭାରତ ହୋଇପାରିବ। ୨୦୨୫ ଶେଷ ସୁଦ୍ଧ ଭାରତ ଯକ୍ଷ୍ମାମୁକ୍ତ ହୋଇପାରିବ ବୋଲି ସେ କହିଥିଲେ। ଏହି ଲକ୍ଷ୍ୟ ହାସଲ ଦିଗରେ ଆଶା ଓ ଅଙ୍ଗନବାଡ଼ି କର୍ମୀମାନେ ଗୁରୁତ୍ୱପୂର୍ଣ୍ଣ ଭୂମିକା ନେଇପାରିବେ ବୋଲି ସେ କହିଥିଲେ।

ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ, ପୁରୁଣା ପାଣ୍ଡୁଲିପି ଭାରତର ସମ୍ପତ୍ତି ଏବଂ ଟେକ୍ନୋଲୋଜି ସହାୟତାରେ ଏହାର ଡିଜିଟାଲୀକରଣ କରାଯିବା ଉଚିତ। ରାଜ୍ୟ ଗୁଡ଼ିକ ଏ ଦିଗରେପ ଦକ୍ଷେପ ନେବା ଆବଶ୍ୟକ। ପିଏମ ଗତିଶକ୍ତିକୁ ପ୍ରଶଂସା ଅବସରରେ ଏହା ଉତ୍ତମ ପ୍ରଶାସନର ଆଧାର ହୋଇଛି ବୋଲି ସେ କହିଥିଲେ। ନିୟମିତ ଏହାର ସମୀକ୍ଷା ହେବା ଉଚିତ ଏବଂ ପର୍ଯ୍ୟାବରଣୀୟ ପ୍ରଭାବର ସଙ୍କେତକ ହେବା ଆବଶ୍ୟକ, ପ୍ରାକୃତିକ ବିପର୍ଯ୍ୟୟ ପ୍ରବଣ ସ୍ଥାନ ଏହାର ଅନ୍ତର୍ଭୁକ୍ତ ହେବା ଉଚିତ ବୋଲି ମଧ୍ୟ ସେ କହିଥିଲେ।

ଆକାଂକ୍ଷୀ ଜିଲ୍ଲା ଏବଂ ବ୍ଲକ କାର୍ଯ୍ୟକ୍ରମ ସମ୍ପର୍କରେ ସେ କହିଥିଲେ, ଏସବୁ ବ୍ଳକ ଓ ଜିଲ୍ଲା ଗୁଡ଼ିକରେ ସୁଦକ୍ଷ ଅଫସର ମୁତୟନ ହେଲେ ତଳସ୍ତରରେ ବ୍ୟାପକ ପରିବର୍ତ୍ତନ ଆଣିପାରିବେ। ଏହା ମଧ୍ୟ ସାମାଜିକ-ଅର୍ଥନୈତିକ ଲାଭ ଦିଗକୁ ଅଗ୍ରସର କରାଇବ।

ସହର ଗୁଡ଼ିକର ବିକାଶ ସଂକ୍ରାନ୍ତରେ ପ୍ରଧାନମନ୍ତ୍ରୀ ଦୃଢ଼ ଭାବେ ମାନବ ସମ୍ବଳର ବିକାଶ ଉପରେ ଜୋର୍ ଦେଇଥିଲେ, ଆର୍ଥିକ ଅଭିବୃଦ୍ଧିର କେନ୍ଦ୍ର ଭାବେ ସହର ଗୁଡ଼ିକର ବିକାଶ କରିବ। ବିଶେଷ କରି ସହରାଞ୍ଚଳର ପ୍ରଶାସନ, ଜଳ ଓ ପରିବେଶ ପରିଚାଳନା ଦିଗରେ ସ୍ୱତନ୍ତ୍ର ଭାବେ ଇନଷ୍ଟିଚ୍ୟୁଟଗୁଡ଼ିକର ବିକାଶ ପାଇଁ ସେ ଗୁରୁତ୍ୱ ଦେଇଥିଲେ। ସହରାଞ୍ଚଳ ଗତିଶୀଳତା ବୃଦ୍ଧି ପାଉଥିବାରୁ ଯଥେଷ୍ଟ ସହରାଞ୍ଚଳ ଆବାସୀକରଣ ସୃଷ୍ଟିକୁ ସେ ଗୁରୁତ୍ୱ ଦେଇଥିଲେ। ଏହା ନିର୍ମାଣ କ୍ଷେତ୍ର ଏବଂ ନୂତନ ଔଦ୍ୟୋଗିକ ହବ୍‌ରେ ଉତ୍ପାଦକତା ବୃଦ୍ଧି ଦିଗରେ ସହାୟକ ହୋଇପାରିବ ବୋଲି ସେ କହିଥିଲେ।

ସର୍ଦ୍ଦାର ବଲ୍ଲଭ ଭାଇ ପଟେଲଙ୍କୁ ସମସ୍ତ ପ୍ରଶାସନିକ ଅଧିକାରୀମାନଙ୍କ ପ୍ରେରଣାର ପ୍ରତୀକ ଭାବେ ବର୍ଣ୍ଣନା କରି ତାଙ୍କୁ ପ୍ରଧାନମନ୍ତ୍ରୀ ସାଲ୍ୟୁଟ କରିଥିଲେ। ଆଜି ତାଙ୍କର ଶ୍ରାଦ୍ଧ ବାର୍ଷିକୀ ଏବଂ ଜଳିତ ବର୍ଷ ତାଙ୍କର ୧୫୦ତମ ଜନ୍ମ ବାର୍ଷିକୀ ବୋଲି ଦର୍ଶାଇ ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ, ପରବର୍ତ୍ତୀ ଦୁଇ ବର୍ଷ ଏଥିପାଇଁ ଉତ୍ସବ ମନାଯିବା ଉଚିତ ଏବଂ ତାଙ୍କର ସ୍ୱପ୍ନର ଭାରତ ହାସଲ କରିବା ଦିଗରେ ଆମେ କାମ କରିବା ଆବଶ୍ୟକ।

ବିକଶିତ ଭାରତ ଗଠନ ଲକ୍ଷ୍ୟ ପୂରଣ ଦିଗରେ ସମସ୍ତ ଲୋକଙ୍କୁ ସକ୍ରିୟ ଭାଗୀଦାର କରିବା ପାଇଁ ସ୍ୱାଧୀନତା ସଂଗ୍ରାମ ଆନ୍ଦୋଳନକୁ ଉଦାହରଣ ଭାବେ ନେବାକୁ ସେ କହିଥିଲେ। ସ୍ୱାଧୀନତା ସଂଗ୍ରାମରେ ଯେଉଁପରି ସମସ୍ତ କ୍ଷେତ୍ରର ପୁରୁଷ, ମହିଳା ଏବଂ ପିଲାମାନେ ଭାଗ ନେଇଥିଲେ, ସେହିପରି ୨୦୪୭ ସୁଦ୍ଧା ବିକଶିତ ଭାରତ ଗଠନ ପାଇଁ ଭିନ୍ନ ଭିନ୍ନ ପରିସ୍ଥିତି, ବିଚାରଗତ ବିଭେଦତା ସତ୍ତ୍ୱେ ସମସ୍ତ ଭାରତୀୟ କାମ କରିବା ଉଚିତ। ସେ ସମୟର ବୃହତ ଜନଆନ୍ଦୋଳନ ଭାବେ ପରିଚିତ ଦାଣ୍ଡିମାର୍ଚ୍ଚର ୨୫ ବର୍ଷ ପରେ ଭାରତ ସ୍ୱାଧୀନ ହୋଇଥିଲା  ବୋଲି ଉଲ୍ଳେଖ କରି ପ୍ରଧାନମନ୍ତ୍ରୀ କହିଥିଲେ, ସେହିପରି ଆମେ ଯଦି ୨୦୪୭ ମସିହା ସୁଦ୍ଧା ବିକଶିତ ଭାରତ ଗଠନ ପାଇଁ ପଣ କରିବା ତେବେ ନିଶ୍ଚିତ ଏହା ହାସଲ କରିପାରିବା।

ସମ୍ମିଳନୀରେ ହୋଇଥିବା ଆଲୋଚନା

ଉଦ୍ୟମିତାକୁ ପ୍ରୋତ୍ସାହନ, ଦକ୍ଷତା ବିକାଶକୁ ବଢ଼ାଇବା, ଭାରତକୁ ମଧ୍ୟମ ଆୟ ବର୍ଗରୁ ଉଚ୍ଚ ଆୟ ବର୍ଗ ଦେଶରେ ରୂପାନ୍ତରିତ କରିବା ପାଇଁ ଉଭୟ ଗ୍ରାମାଞ୍ଚଳ ଓ ସହରାଞ୍ଚଳ ଲୋକଙ୍କ ପାଇଁ ସ୍ଥିର ନିଯୁକ୍ତି ସୁଯୋଗ ସୃଷ୍ଟି କରିବା ଆଦି ପ୍ରସଙ୍ଗ ଉପରେ ସମ୍ମିଳନୀର ବିଭିନ୍ନ ଅଧିବେଶନରେ ଆଲୋଚନା ହୋଇଥିଲା। ଏହିସବୁ ପଦକ୍ଷେପ ମହିଳା କୈନ୍ଦ୍ରିକ ବିକାଶକୁ ମୂଳଭିତ୍ତି କରି ଅର୍ଥନୀତିର ଡ୍ରାଇଭିଂ ହ୍ୱିଲ ଭାବେ ସାବ୍ୟସ୍ତ ହୋଇପାରିବ।

ଭାରତରେ ବିଶେଷ କରି ଛୋଟ ସହରଗୁଡ଼ିକରେ ସେବା କ୍ଷେତ୍ରରେ ଥିବା ସମ୍ଭାବନାକୁ ବ୍ୟବହାର ଦିଗରେ ବହୁମୁଖୀ ଆଭିମୁଖ୍ୟ ସମ୍ପର୍କରେ ସମ୍ମିଳନୀରେ ଆଲୋଚନା ହୋଇଥିଲା। ଏହା ମଧ୍ୟରେ ନୀତିଗତ ହସ୍ତକ୍ଷେପ, ଢାଞ୍ଚାଗତ ବିକାଶ, ଦକ୍ଷତା ବୃଦ୍ଧି ଏବଂ ବ୍ୟାବସାୟିକ ଅନୁକୂଳ ପରିବେଶ ସୃଷ୍ଟି ଆଦି ଅନ୍ତର୍ଭୁକ୍ତ। ଅଣସାଙ୍ଗଠନିକ କ୍ଷେତ୍ରର କୌଶଳୀ ଓ ଔପଚାରୀକରଣ ପ୍ରସଙ୍ଗ ମଧ୍ୟ ଆଲୋଚନାରେ ସ୍ଥାନ ପାଇଥିଲା। ସେହିପରି ଗ୍ରାମାଞ୍ଚଳ ଅଣ-କୃଷି କ୍ଷେତ୍ର ସମ୍ପର୍କରେ ମଧ୍ୟ ଆଲୋଚନା ହୋଇଥିଲା, ଯେପରିକି ସ୍ୱତନ୍ତ୍ର କୌଶଳ ବିକାଶ କୋର୍ସ ଦ୍ୱାରା ଗ୍ରାମାଞ୍ଚଳ ଉଦ୍ୟୋଗକୁ ପୋତ୍ସାହନ। ଏହା ମଧ୍ୟ ଅନୁଭବ ହୋଇଥିଲା ଯେ, ସ୍ୱତନ୍ତ୍ର ପଦକ୍ଷେପ ଦ୍ୱାରା ଅଣ-କୃଷି କ୍ଷେତ୍ରରେ ମହିଳା ଓ ଅବହେଳିତ ଗୋଷ୍ଠୀଙ୍କ ନିଯୁକ୍ତିକୁ ପ୍ରୋତ୍ସାହିତ କରାଯିବା ଆବଶ୍ୟକ।

ପ୍ରଗତି ପ୍ଲାଟଫର୍ମ ପ୍ରସଙ୍ଗରେ ମଧ୍ୟ ସମ୍ମିଳନୀରେ ଆଲୋଚନା ହୋଇଥିଲା। ଯାହାର କି ଅନ୍ତିମ ଲକ୍ଷ୍ୟ ନିୟମିତ କଠୋର ସମୀକ୍ଷା ମାଧ୍ୟମରେ ବୁନିଆଦୀ ଢାଞ୍ଚା ପରିଯୋଜନାକୁ ଶେଷ କରିବା ଏବଂ ସୁବ୍ୟବସ୍ଥିତ ଭାବେ ପରିବର୍ତ୍ତନ ଆଣିବା।

ଫ୍ରଣ୍ଟିୟର ଟେକ୍ନୋଲୋଜି ବାବଦରେ ମଧ୍ୟ ସମ୍ମିଳନୀରେ ଏକ ସ୍ୱତନ୍ତ୍ର ଅଧିବେଶନ ହୋଇଥିଲା, ଯାହାକି ବିଭିନ୍ନ କ୍ଷେତ୍ରର ଅଭିସରଣ ଏବଂ ବୈଶ୍ୱିକ ଆହ୍ୱାନର ସମାଧାନ ଦିଗରେ ସହାୟକ ହୋଇଥାଏ। ଏହା ମଧ୍ୟ ଭାରତକୁ ଏହି କ୍ଷେତ୍ରରେ ନେତୃତ୍ୱର ସୁଯୋଗ ଦେଇପାରିବ ଏବଂ ସମାବେଶୀ ଓ ସ୍ଥିର ବିକାଶ ଦେଇପାରିବ। କର୍ମଯୋଗୀ ଉପରେ ମଧ୍ୟ ଏକ ସ୍ୱତନ୍ତ୍ର ଅଧିବେଶନ ହୋଇଥିଲା। ଏହା ଲକ୍ଷ୍ୟ କରାଯାଇଥିଲା କି, ଏହା ରାଜ୍ୟ ଗୁଡ଼ିକୁ ଦକ୍ଷତା ଗଠନ ଇକୋ-ସିଷ୍ଟମକୁ ସୁଦୃଢ଼ କରିବା ପାଇଁ ଶିକ୍ଷାର ଗଣତାନ୍ତ୍ରୀକରଣ ଓ ନାଗରିକ କୈନ୍ଦ୍ରିକ କାର୍ଯ୍ୟକ୍ରମ ଦିଗରେ ସହାୟତା କରିପାରିବ।

ସମ୍ମିଳନୀରେ ସମସ୍ତ ରାଜ୍ୟ ଓ କେପନ୍ଦ୍ରଶାସିତ ଅଞ୍ଚଳର ମୁଖ୍ୟ ସଚିବ, ବରିଷ୍ଠ ଅଧିକାରୀଗଣ, ଡୋମେନ ଏକ୍ସପର୍ଟ ଏବଂ କେନ୍ଦ୍ର ସରକାରଙ୍କ ବରିଷ୍ଠ ଅଧିକାରୀଗଣ ଉପସ୍ଥିତ ଥିଲେ।

ନୂଆଦିଲ୍ଲୀ: ୭୫ତମ ସମ୍ବିଧାନ ଦିବସ ପାଳନ ଅବସରରେ ସୋମବାର ନୂଆଦିଲ୍ଲୀରେ ମାଇଁ ଭାରତ ସ୍ୱେଚ୍ଛାସେବୀମାନଙ୍କ ଦ୍ୱାରା ଆୟୋଜିତ ୬ କିଲୋମିଟର ଲମ୍ବା ପଦଯାତ୍ରାରେ କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡ଼ା ତଥା ଶ୍ରମ ଓ ନିଯୁକ୍ତି  ମନ୍ତ୍ରୀ ଡ. ମନସୁଖ ମାଣ୍ଡଭିୟ ଯୋଗ ଦେଇଥିଲେ। ମେଜର ଧ୍ୟାନଚାନ୍ଦ ଷ୍ଟାଡିୟମରେ ଆରମ୍ଭ ହୋଇଥିବା ‘ହମାରା ସମ୍ବିଧାନ ହମାରା ସ୍ୱାଭିମାନ‘ ଶୀର୍ଷକ ଏହି ପଦଯାତ୍ରା କର୍ତ୍ତବ୍ୟ ପଥ ଓ ଇଣ୍ଡିଆ ଗେଟ୍ ଦେଇ ଯାଇଥିଲା। ଏହି ପଦଯାତ୍ରାରେ ୧୦,୦୦୦ ରୁ ଅଧିକ ମାଇଁ ଭାରତ ଯୁବ ସ୍ୱେଚ୍ଛାସେବୀଙ୍କ ସମେତ ବିଶିଷ୍ଟ ଯୁବ ନେତା, କେନ୍ଦ୍ରମନ୍ତ୍ରୀ ଏବଂ ସାଂସଦ ମାନେ ଅଂଶଗ୍ରହଣ କରିଥିଲେ।

କାର୍ଯ୍ୟକ୍ରମ ‘ଏକ ପେଡ୍ ମା କେ ନାମ’ ଅଭିଯାନରେ ଆରମ୍ଭ ହୋଇଥିଲା, ଯେଉଁଥିରେ ଡ. ମନସୁଖ ମାଣ୍ଡଭିୟ ତାଙ୍କ ସଂସଦୀୟ ସହଯୋଗୀଙ୍କ ସହ ମିଶି ଏକ ବୃକ୍ଷରୋପଣ କରିଥିଲେ। କେନ୍ଦ୍ର ମନ୍ତ୍ରୀ ପୀୟୂଷ ଗୋୟଲ, ଧର୍ମେନ୍ଦ୍ର ପ୍ରଧାନ, ଗଜେନ୍ଦ୍ର ସିଂ ଶେଖାୱତ, କିରଣ ରିଜିଜୁ, ଅର୍ଜୁନ ରାମ ମେଘୱାଲ, ରକ୍ଷା ନିଖିଲ ଖଡ଼ସେ ପଦଯାତ୍ରାରେ ସାମିଲ୍ ହେବା ସହିତ ସହ ଅନ୍ୟ ସାଂସଦମାନେ ମଧ୍ୟ ଅଂଶଗ୍ରହଣ କରିଥିଲେ। ଯୋଗେଶ୍ୱର ଦତ୍ତ, ମୀରାବାଇ ଚାନୁ, ରବି ଦହିଆ, ଯୋଗେଶ କାଥୁନିଆଙ୍କ ଭଳି ବିଶିଷ୍ଟ ଯୁବ ଆଇକନ୍ ଏବଂ ଅଲିମ୍ପିକ୍ସ ପଦକ ବିଜେତା ମଧ୍ୟ ପଦଯାତ୍ରାରେ ଅଂଶଗ୍ରହଣ କରିଥିଲେ।

ପଦଯାତ୍ରା ସମୟରେ ଗଣମାଧ୍ୟମକୁ ସମ୍ବୋଧିତ କରି ଡ. ମାଣ୍ଡଭିୟ ୧୦,୦୦୦ ରୁ ଅଧିକ ‘ମାଇଁ ଭାରତ‘ ଯୁବ ସ୍ବେଚ୍ଛାସେବୀଙ୍କ ଅଂଶଗ୍ରହଣରେ ଆନନ୍ଦ ପ୍ରକାଶ କରିଥିଲେ। ସେ ଏହା ମଧ୍ୟ ଆଲୋକପାତକରିଥିଲେ ଯେ ଦେଶର ଯୁବକମାନେ କେବଳ ସମ୍ବିଧାନର ପ୍ରସ୍ତାବନା ପଢ଼ିନାହାନ୍ତି ବରଂ ଏହା ପ୍ରତି ସେମାନଙ୍କର ପ୍ରତିବଦ୍ଧତାକୁ ମଧ୍ୟ ଦୋହରାଇଛନ୍ତି। ନୂଆ ଭାରତର ଯୁବପିଢ଼ି ‘ବିକଶିତ ଭାରତ‘ ନିର୍ମାଣ ଦିଗରେ ଅଗ୍ରଗତି କରୁଛନ୍ତି ବୋଲି ସେ ଗୁରୁତ୍ୱାରୋପ କରିଥିଲେ।

ପ୍ରାରମ୍ଭରେ ଏକ ବିସ୍ତୃତ ପ୍ରଦର୍ଶନୀ ଭାରତୀୟ ସମ୍ବିଧାନର ଯାତ୍ରାକୁ ପ୍ରଦର୍ଶିତ କରିବା ସହ ପ୍ରମୁଖ ବ୍ୟକ୍ତିବିଶେଷଙ୍କ ଅବଦାନ ଉପରେ ଆଲୋକପାତ କରିଥିଲା। ଯୁବକମାନେ ଡ. ବିଆର୍ ଆମ୍ବେଦକର ଓ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଭଳି ନେତାଙ୍କୁ ଚିତ୍ରିତ କରି ଇତିହାସକୁ ଜୀବନ୍ତ କରିଥିଲେ। ଏହି ପଦଯାତ୍ରାରେ ବିଭିନ୍ନ ସ୍ଥାନରେ ଜୀବନ୍ତ ସାଂସ୍କୃତିକ ପ୍ରଦର୍ଶନୀ ଅନୁଷ୍ଠିତ ହୋଇଥିଲା ପ୍ରତିଯୋଗୀମାନେ ପାରମ୍ପରିକ ଗୁଜରାଟୀ ନୃତ୍ୟ, ରାଜସ୍ଥାନୀ ଲୋକନୃତ୍ୟ ଏବଂ ପଞ୍ଜାବୀ ଭାଙ୍ଗଡ଼ା ସମେତ ଆକର୍ଷଣୀୟ ସାଂସ୍କୃତିକ ପରିବେଷଣର ମଜା ନେଇଥିଲେ।

ଯୁବବର୍ଗଙ୍କ ମଧ୍ୟରେ ସାମ୍ବିଧାନିକ ମୂଲ୍ୟବୋଧକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ଆୟୋଜିତ ଏହି ପଦଯାତ୍ରାରେ ଇଣ୍ଡିଆ ଗେଟ୍ ଠାରେ ଏକ ସ୍ୱତନ୍ତ୍ର ସମାରୋହ ଅନୁଷ୍ଠିତ ହୋଇଥିଲା, ଯେଉଁଠାରେ ଯୁବକମାନେ ମିଳିତ ଭାବେ ପ୍ରସ୍ତାବନା ପାଠ କରିଥିଲେ। ଏହି କାର୍ଯ୍ୟକଳାପ ଭାରତର ସମ୍ବିଧାନର ଭିତ୍ତିଭୂମି ଭାବରେ ପ୍ରସ୍ତାବନାର ଭୂମିକା ଏବଂ ନ୍ୟାୟ, ସ୍ୱାଧୀନତା, ସମାନତା ଏବଂ ଭାଇଚାରାର ମୂଳ ମୂଲ୍ୟବୋଧ ଉପରେ ଆଲୋକପାତ କରିଥିଲା। କେନ୍ଦ୍ରମନ୍ତ୍ରୀ ଓ ସାଂସଦମାନେ ଉପସ୍ଥିତ ଥିବା ଏହି କାର୍ଯ୍ୟକ୍ରମରେ ଭାରତୀୟ ଗଣତନ୍ତ୍ରରେ ଏହି ନୀତିର ମହତ୍ତ୍ୱ ଉପରେ ଆଲୋକପାତ କରାଯାଇଥିଲା। ଜାତୀୟ ଏକତାର ପ୍ରତୀକ ଇଣ୍ଡିଆ ଗେଟ୍ ର ଅବସ୍ଥିତି ସମାରୋହର ପ୍ରଭାବକୁ ଆହୁରି ବଢ଼ାଇ ଦେଇଥିଲା।  ପ୍ରସ୍ତାବନା ପଢ଼ିବା ପରେ ଡ. ମାଣ୍ଡଭିୟ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ସହ ତାଙ୍କ ସଂସଦୀୟ ସହଯୋଗୀମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

ଏହି କାର୍ଯ୍ୟକ୍ରମର କେନ୍ଦ୍ରବିନ୍ଦୁ ଥିଲା ଯୁବ ସଂପୃକ୍ତି, ସମଗ୍ର କାର୍ଯ୍ୟକ୍ରମରେ ମାଇଁ ଭାରତ ପଞ୍ଜୀକରଣ ଅଭିଯାନ ଅନୁଷ୍ଠିତ ହୋଇଥିଲା। ପ୍ରତିଯୋଗୀମାନେ ପ୍ରସ୍ତାବନା ଥିମ୍ ବିଶିଷ୍ଟ ସେଲ୍ଫି ପଏଣ୍ଟ ସହିତ ଦିନଟିକୁ ସ୍ମରଣୀୟ କରିପାରିବେ। ଏହି ରାସ୍ତାରେ ମାଇଁ ଭାରତ ସ୍ୱେଚ୍ଛାସେବୀମାନେ ଅଂଶଗ୍ରହଣକାରୀଙ୍କ ପାଇଁ ରିଫ୍ରେସମେଣ୍ଟ ଷ୍ଟଲ ସ୍ଥାପନ କରି ଏବଂ ସ୍ୱଚ୍ଛ ଭାରତ ଅଭିଯାନରେ ସକ୍ରିୟ ଭାବରେ ଅଂଶଗ୍ରହଣ କରି ପଦଯାତ୍ରାର ମାର୍ଗରେ ସ୍ୱଚ୍ଛତା ସୁନିଶ୍ଚିତ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥିଲେ।

ଏହି ପଦଯାତ୍ରାରେ ଏନସିଆର ଅଞ୍ଚଳର ୧୨୫ରୁ ଅଧିକ କଲେଜ ଏବଂ ଏନୱାଇକେଏସ, ଏନଏସଏସ, ଏନସିସି ଏବଂ ଭାରତ ସ୍କାଉଟ୍ସ ଆଣ୍ଡ ଗାଇଡ ସମେତ ବିଭିନ୍ନ ସଂଗଠନର ଯୁବ ପ୍ରତିଯୋଗୀମାନଙ୍କୁ ସଫଳତାର ସହ ନିୟୋଜିତ କରାଯାଇଥିଲା। ଏହା ସମ୍ବିଧାନର ୭୫ତମ ବାର୍ଷିକୀ ପାଳନରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ଭାବେ କାର୍ଯ୍ୟ କରିଥିଲା। ଏହି କାର୍ଯ୍ୟକ୍ରମରେ ବିକଶିତ ଭାରତର ସାମ୍ବିଧାନିକ ମୂଲ୍ୟବୋଧ ସଂରକ୍ଷଣ ଓ ପ୍ରୋତ୍ସାହନ ଦିଗରେ ଯୁବବର୍ଗଙ୍କ ଭୂମିକା ଉପରେ ଗୁରୁତ୍ୱାରୋପ କରାଯାଇଥିଲା।

ନୂଆଦିଲ୍ଲୀ: ନୂଆଦିଲ୍ଲୀରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଆଜି କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଡ. ମନସୁଖ ମାଣ୍ଡଭୀୟ ଜାତୀୟ ଯୁବ ମହୋତ୍ସବ (ଏନୱାଇଏଫ) ୨୦୨୫ର ଏକ ରୂପାନ୍ତରିତ ପୁନଃକଳ୍ପନା ସମ୍ପର୍କରେ ଘୋଷଣା କରିଛନ୍ତି। ଭାରତର ଭବିଷ୍ୟତ ଗଠନରେ ଯୁବବର୍ଗଙ୍କ ଅଂଶଗ୍ରହଣ ବୃଦ୍ଧି ପାଇଁ ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣକୁ ସମର୍ଥନ କରି ଏହି ପୁନଃପରିକଳ୍ପିତ ମହୋତ୍ସବକୁ “ବିକଶିତ ଭାରତ ଯୁବ ନେତା ବିତର୍କ” ନାମ ଦିଆଯାଇଛି। ଏହି ପ୍ରଭାବଶାଳୀ ମଞ୍ଚ ଯୁବ ଭାରତୀୟମାନଙ୍କୁ ବିକଶିତ ଭାରତର ସ୍ୱପ୍ନକୁ ସାକାର କରିବା ଦିଗରେ ସେମାନଙ୍କର ବିଚାର ଏବଂ ଦୃଷ୍ଟିକୋଣକୁ ଯୋଗଦାନ କରିବାକୁ ସଶକ୍ତ କରିବ।

ବିକଶିତ ଭାରତ ଯୁବ ନେତା ବିତର୍କର ମୁଖ୍ୟ ଉଦ୍ଦେଶ୍ୟ ସମ୍ପର୍କରେ ଆଲୋକପାତ କରି କେନ୍ଦ୍ରମନ୍ତ୍ରୀ ଡ. ମନସୁଖ ମାଣ୍ଡଭୀୟ କହିଛନ୍ତି ଯେ ଏହି ଉତ୍ସବର ଉଦ୍ଦେଶ୍ୟ ଯୁବ ପ୍ରତିଭାଙ୍କୁ ଚିହ୍ନଟ କରିବା ଏବଂ ପ୍ରୋତ୍ସାହିତ କରିବା ତଥା ସେମାନଙ୍କୁ ବିକଶିତ ଭାରତ ପାଇଁ ସେମାନଙ୍କର ବିଚାର ବ୍ୟକ୍ତ କରିବା ନିମନ୍ତେ ଏକ ମଞ୍ଚ ପ୍ରଦାନ କରିବା। ପ୍ରଧାନମନ୍ତ୍ରୀଙ୍କ ସହ ସିଧାସଳଖ କଥାବାର୍ତ୍ତା କରିବା ଏବଂ ଭାରତର ଭବିଷ୍ୟତ ପାଇଁ ସେମାନଙ୍କ ବିଚାର ଉପସ୍ଥାପନ କରିବାର ସୁଯୋଗ ଯୁବପିଢ଼ିଙ୍କ ପାଇଁ ଏକ ପ୍ରମୁଖ ଆକର୍ଷଣ ହେବ, ଯାହା ଦ୍ୱାରା ରାଜନୀତି ଏବଂ ନାଗରିକ ଜୀବନରେ ଯୁବପିଢ଼ିଙ୍କ ସଂପୃକ୍ତି ବୃଦ୍ଧି ପାଇବ।”

କେନ୍ଦ୍ରମନ୍ତ୍ରୀ ଚଳିତ ବର୍ଷର ବିକଶିତ ଭାରତ ଯୁବ ନେତା ବିତର୍କର ମୂଳ ଉଦ୍ଦେଶ୍ୟ ଉପରେ ଆଲୋକପାତ କରି କହିଥିଲେ ଯେ, ଚଳିତ ବର୍ଷର ମହୋତ୍ସବ ଦୁଇଟି ପ୍ରମୁଖ ଲକ୍ଷ୍ୟକୁ ନେଇ ଅନେକ ବିଚାରବିମର୍ଶ ପରେ ଗଠିତ ହୋଇଛି। ପ୍ରଥମତଃ, ସ୍ୱାଧୀନତା ଦିବସ ଅବସରରେ ମାନ୍ୟବର ପ୍ରଧାନମନ୍ତ୍ରୀଙ୍କ ଅଭିଭାଷଣ ଅନୁସାରେ ରାଜନୀତିରେ ନୂଆ ଯୁବ ନେତାଙ୍କୁ ଆଣିବା, ଅଣରାଜନୈତିକ ପୃଷ୍ଠଭୂମି ଥିବା ୧ ଲକ୍ଷ ଯୁବକଙ୍କୁ ଏହି କ୍ଷେତ୍ରରେ ସାମିଲ କରିବା। ନେତୃତ୍ୱ ନେବାର ସମ୍ଭାବନା ଥିବା ଯୁବ ପ୍ରତିଭାମାନଙ୍କୁ ଚିହ୍ନଟ କରିବା ଏବଂ ସେମାନଙ୍କୁ ଏକ ବିକଶିତ ଭାରତ ପାଇଁ ବିଚାର ଓ ଦୃଷ୍ଟିକୋଣକୁ ସିଧାସଳଖ ମାନ୍ୟବର ପ୍ରଧାନମନ୍ତ୍ରୀଙ୍କ ନିକଟରେ ଉପସ୍ଥାପନ ପାଇଁ ଏକ ମଞ୍ଚ ପ୍ରଦାନ କରିବା ନିମନ୍ତେ ଜାତୀୟ ଯୁବ ମହୋତ୍ସବର ପରିକଳ୍ପନା କରାଯାଇଛି।

ଦ୍ବିତୀୟତଃ, ସ୍ୱଚ୍ଛ ଓ ଗଣତାନ୍ତ୍ରିକ, ଯୋଗ୍ୟତା ଭିତ୍ତିକ ଚୟନ ବ୍ୟବସ୍ଥା ମାଧ୍ୟମରେ ଏକ ବିକଶିତ ଭାରତ ଦିଗରେ ଯୁବବର୍ଗଙ୍କ ଅର୍ଥପୂର୍ଣ୍ଣ ଅବଦାନ ସୁନିଶ୍ଚିତ କରିବା । ଭାରତର ପ୍ରଗତି ଓ ବିକାଶକୁ ଆଗକୁ ବଢ଼ାଇବା ପାଇଁ ପରବର୍ତ୍ତୀ ପିଢ଼ିକୁ ସଶକ୍ତ କରିବା ନିମନ୍ତେ ସରକାରଙ୍କ ପ୍ରତିବଦ୍ଧତାକୁ ଏହି ପଦକ୍ଷେପ ଦର୍ଶାଉଛି।

ଏହି ଐତିହାସିକ ଆଲୋଚନାରେ ଅଂଶଗ୍ରହଣ କରିବା ପାଇଁ ସମସ୍ତ ଯୋଗ୍ୟ ଯୁବକଯୁବତୀଙ୍କୁ ଡ. ମାଣ୍ଡଭୀୟ ଆହ୍ୱାନ କରିବା ସହ ଏକ ବିକଶିତ ଭାରତ ଗଠନ ପାଇଁ ଯୁବ ଶକ୍ତିର ସାମର୍ଥ୍ୟକୁ ଉପଯୋଗ କରିବା ଲାଗି ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ।

ବିକଶିତ ଭାରତ ଚ୍ୟାଲେଞ୍ଜ: ଏକ ଚାରି ସ୍ତର ବିଶିଷ୍ଟ ପ୍ରତିଯୋଗିତା

ଜାତୀୟ ଯୁବ ମହୋତ୍ସବର ପୁନଃପରିକଳ୍ପନା କରୁଥିବା ‘ବିକଶିତ ଭାରତ ୟଙ୍ଗ ଲିଡର୍ସ ଡାଏଲଗ୍’ରେ ଭାରତର ଭବିଷ୍ୟତ ଗଢ଼ିବା ରେ ଯୁବଗୋଷ୍ଠୀଙ୍କୁ ପ୍ରେରଣା ଦେବା ପାଇଁ ଏକ ଚାରି ସ୍ତରୀୟ ପ୍ରତିଯୋଗିତା ‘ବିକଶିତ ଭାରତ ଚ୍ୟାଲେଞ୍ଜ ‘ ରହିଛି। ଚ୍ୟାଲେଞ୍ଜ ନିମ୍ନଲିଖିତ ଭାବରେ ଆଗକୁ ବଢିବ :

ପ୍ରଥମ ପର୍ଯ୍ୟାୟ: ବିକଶିତ ଭାରତ ପ୍ରଶ୍ନୋତ୍ତର

୧୫ ରୁ ୨୯ ବର୍ଷ ବୟସର ବ୍ୟକ୍ତି ୨୫ ନଭେମ୍ବର ୨୦୨୪ରୁ ଡିସେମ୍ବର ୫, ୨୦୨୪ ମଧ୍ୟରେ ମେରା ଯୁବ ଭାରତ (ମାଇଁ ଭାରତ) ପ୍ଲାଟଫର୍ମରେ ଆୟୋଜିତ ଡିଜିଟାଲ କୁଇଜ୍ ରେ ଅଂଶଗ୍ରହଣ କରିପାରିବେ, ଯାହା ଭାରତର ଐତିହାସିକ ଉପଲବ୍ଧି ବିଷୟରେ ଅଂଶଗ୍ରହଣକାରୀଙ୍କ ଜ୍ଞାନ ଏବଂ ସଚେତନତା ପରୀକ୍ଷା କରିବ।

ଦ୍ବିତୀୟ ପର୍ଯ୍ୟାୟ : ପ୍ରବନ୍ଧ/ବ୍ଲଗ ଲିଖନ

ପୂର୍ବ ପର୍ଯ୍ୟାୟର ବିଜେତାମାନେ ‘ ବିକଶିତ ଭାରତ ପାଇଁ ଟେକ୍ନୋଲୋଜି’, ‘ବିକଶିତ ଭାରତର ଯୁବଗୋଷ୍ଠୀଙ୍କୁ ସଶକ୍ତ କରିବା’ ଭଳି ପ୍ରାୟ ୧୦ଟି ଚିହ୍ନିତ ବିଷୟବସ୍ତୁ ଉପରେ ପ୍ରବନ୍ଧ ପରିବେଷଣ କରି ଜାତୀୟ ବିକାଶ ପାଇଁ ସେମାନଙ୍କର ଚିନ୍ତାଧାରା ପ୍ରଦର୍ଶନ କରିବେ। ଏହି ପ୍ରତିଯୋଗିତା ମାଇଁ ଭାରତ ପ୍ଲାଟଫର୍ମରେ ମଧ୍ୟ ଆୟୋଜନ କରାଯିବ ।

ତୃତୀୟ ପର୍ଯ୍ୟାୟ: ବିକଶିତ ଭାରତ ଭିଜନ ପିଚ୍ ଡେକ୍ – ରାଜ୍ୟସ୍ତରୀୟ ଉପସ୍ଥାପନା

ଦ୍ବିତୀୟ ପର୍ଯ୍ୟାୟରେ ଯୋଗ୍ୟତା ଅର୍ଜନ କରିଥିବା ପ୍ରତିଯୋଗୀମାନେ ରାଜ୍ୟସ୍ତରରେ ସେମାନଙ୍କ ମନୋନୀତ ବିଷୟବସ୍ତୁ ଉପରେ ସେମାନଙ୍କର ଧାରଣା ଉପସ୍ଥାପନ କରିବେ। ଏହି ଉପସ୍ଥାପନା ମାଧ୍ୟମରେ ପ୍ରତ୍ୟେକ ରାଜ୍ୟ ଓ ଜାତୀୟ ସ୍ତରରେ ପ୍ରତିଯୋଗୀ ଚୟନ କରିବା ପାଇଁ ପ୍ରତିଯୋଗିତା ଆୟୋଜନ କରି ଚିହ୍ନଟ ହୋଇଥିବା ବିଷୟବସ୍ତୁ ଉପରେ ବିଭିନ୍ନ ଦଳ ଗଠନ କରିବେ।

ଚତୁର୍ଥ ପର୍ଯ୍ୟାୟ : ଭାରତ ମଣ୍ଡପମ୍ ରେ ବିକଶିତ ଭାରତ ଜାତୀୟ ଚାମ୍ପିୟନଶିପ୍

ଜାନୁଆରୀ ୧୧ ରୁ ୧୨ ତାରିଖ ପର୍ଯ୍ୟନ୍ତ ହେବାକୁ ଥିବା ଜାତୀୟ ଯୁବ ମହୋତ୍ସବରେ ବିଭିନ୍ନ ବିଷୟବସ୍ତୁ ଭିତ୍ତିକ ରାଜ୍ୟସ୍ତରୀୟ ଦଳ ଅଂଶଗ୍ରହଣ କରିବେ ଏବଂ ବିଜେତା ଦଳମାନେ ଭାରତର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନିକଟରେ ବିକଶିତ ଭାରତ ପାଇଁ ସେମାନଙ୍କର ଦୃଷ୍ଟିକୋଣ ଏବଂ ବିଚାର ଉପସ୍ଥାପନ କରିବେ ।

ବିକଶିତ ଭାରତ ଯୁବ ନେତା ବିତର୍କ – ଜାତୀୟ ଯୁବ ମହୋତ୍ସବ ୨୦୨୫ରେ ତିନୋଟି ଭିନ୍ନ ଭିନ୍ନ କ୍ଷେତ୍ରରୁ ମନୋନୀତ ଯୁବକ ମାନଙ୍କର ଏକ ବିଶେଷ  ସମାବେଶ ଅନୁଷ୍ଠିତ ହେବ । ପ୍ରଥମ ଗୋଷ୍ଠୀରେ ନବଘୋଷିତ ବିକଶିତ ଭାରତ ଚ୍ୟାଲେଞ୍ଜର ପ୍ରତିଯୋଗୀ ରହିବେ। ଦ୍ବିତୀୟ ଗୋଷ୍ଠୀରେ ଜିଲ୍ଲା ଓ ରାଜ୍ୟସ୍ତରୀୟ ଯୁବ ମହୋତ୍ସବରୁ ସଫଳ ହୋଇଥିବା ପ୍ରତିଭାବାନ ଯୁବକଯୁବତୀମାନେ ଚିତ୍ରାଙ୍କନ, ବିଜ୍ଞାନ ପ୍ରଦର୍ଶନୀ, ସାଂସ୍କୃତିକ ପ୍ରଦର୍ଶନ, ଭାଷଣ ପ୍ରତିଯୋଗିତା ଆଦି ବିଭିନ୍ନ ବର୍ଗରେ ପ୍ରତିଦ୍ୱନ୍ଦ୍ୱିତା କରିବେ। ତୃତୀୟ ଗୋଷ୍ଠୀରେ ଉଦ୍ୟୋଗ, କ୍ରୀଡ଼ା, କୃଷି ଓ ବୈଷୟିକ ଜ୍ଞାନକୌଶଳ ସମେତ ବିଭିନ୍ନ କ୍ଷେତ୍ରର ଉଲ୍ଲେଖନୀୟ ପଥପ୍ରଦର୍ଶକ ଓ ସଫଳ ଯୁବକ ସାମିଲ ହେବେ।

୧୧-୧୨ ଜାନୁଆରୀ ୨୦୨୫ରେ ନୂଆଦିଲ୍ଲୀର ଭାରତ ମଣ୍ଡପମ୍ ଠାରେ ଆୟୋଜିତ ଏହି ଜାତୀୟ କାର୍ଯ୍ୟକ୍ରମ ପାଇଁ ସମୁଦାୟ ୩,୦୦୦ ଯୁବକଙ୍କୁ ଚୟନ କରାଯିବ।

ବିକଶିତ ଭାରତ ଯୁବ ନେତା ସଂଳାପ – ଜାତୀୟ ଯୁବ ମହୋତ୍ସବ ୨୦୨୫ ର ଅନ୍ୟ ପ୍ରମୁଖ ଆକର୍ଷଣ

ବିକଶିତ ଭାରତ ଯୁବ ନେତା ସଂଳାପରେ ବିକଶିତ ଭାରତ ଚ୍ୟାଲେଞ୍ଜ ସହିତ ଅନେକ ଉଲ୍ଲେଖନୀୟ ଆକର୍ଷଣ ରହିବ:

ବିକଶିତ ଭାରତ ପ୍ରଦର୍ଶନୀ: ଏଥିରେ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ଏବଂ କେନ୍ଦ୍ର ମନ୍ତ୍ରଣାଳୟର ଯୁବ-କେନ୍ଦ୍ରିତ ପଦକ୍ଷେପଗୁଡିକ ପ୍ରଦର୍ଶିତ ହେବ, ଯାହା ଯୁବ ଅଂଶଗ୍ରହଣକାରୀ ମାନଙ୍କୁ ଭାରତର ବିକାଶ ଦୃଷ୍ଟିକୋଣ ସହିତ ଜଡ଼ିତ ହେବା ପାଇଁ ଏକ ଭାବବିନିମୟ ପ୍ଲାଟଫର୍ମ ପ୍ରଦାନ କରିବ । ଏଥିରେ ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟୋଗ କ୍ଷେତ୍ରରେ ଯୁବ-କେନ୍ଦ୍ରିତ ପ୍ରକଳ୍ପଗୁଡ଼ିକ ଉପରେ ଆଲୋକପାତ କରୁଥିବା ରାଜ୍ୟ ପ୍ରଦର୍ଶନୀ ଏବଂ ମନ୍ତ୍ରଣାଳୟ ପ୍ରଦର୍ଶନୀ ସାମିଲ ହେବ, ଯେଉଁଠାରେ ମନ୍ତ୍ରଣାଳୟଗୁଡ଼ିକ ନେତୃତ୍ୱ, ସାମାଜିକ ପ୍ରଭାବ ଏବଂ ସୃଜନଶୀଳତା କ୍ଷେତ୍ରରେ ଯୁବବର୍ଗଙ୍କ ପାଇଁ ପ୍ରମୁଖ କାର୍ଯ୍ୟକ୍ରମ ଏବଂ ସୁଯୋଗ ପ୍ରଦର୍ଶିତ କରିବେ।

ପୂର୍ଣ୍ଣାଙ୍ଗ ଅଧିବେଶନ: ଏଥିରେ ବିଶିଷ୍ଟ ଜାତୀୟ ଓ ବିଶ୍ୱସ୍ତରୀୟ ଆଇକନ୍ ମାନେ ଯୁବବର୍ଗଙ୍କ ସହ ଭାବବିନିମୟ ସଂଳାପ ଏବଂ କର୍ମଶାଳାରେ ନିୟୋଜିତ ହେବେ, ଯାହା ସେମାନଙ୍କୁ ଚିନ୍ତାଧାରା ଆଦାନପ୍ରଦାନ କରିବା, ଜ୍ଞାନ ହାସଲ କରିବା ଏବଂ ପ୍ରେରଣାଦାୟୀ ବ୍ୟକ୍ତିତ୍ୱଙ୍କଠାରୁ ସିଧାସଳଖ ଶିଖିବାର ଏକ ଅନନ୍ୟ ସୁଯୋଗ ପ୍ରଦାନ କରିବ।

ଭାରତୀୟ ଐତିହ୍ୟର ଉତ୍ସବ: ଏହି ଉତ୍ସବରେ ଏକ ସାଂସ୍କୃତିକ ଉପାଦାନ ମଧ୍ୟ ସାମିଲ ହେବ, ଯେଉଁଥିରେ ଭାରତର ସମୃଦ୍ଧ ଐତିହ୍ୟକୁ ” ବିକାଶ ଭି, ବିରାସତ ଭି ” (ବିକାଶ ସହିତ ଐତିହ୍ୟ) ର ବ୍ୟାପକ ଦୃଷ୍ଟିକୋଣର ଅଂଶବିଶେଷ ଭାବରେ ପାଳନ କରାଯିବ । ଭାରତର ପରମ୍ପରାର ବିଶେଷତାକୁ ଆକର୍ଷିତ କରୁଥିବା ପ୍ରଦର୍ଶନ ମାଧ୍ୟମରେ ଏହି ସାଂସ୍କୃତିକ କାର୍ଯ୍ୟକ୍ରମ ଉତ୍ସବର ପ୍ରଗତି ଉପରେ ଗୁରୁତ୍ୱ ଦେବ। ଏହି କାର୍ଯ୍ୟକ୍ରମ ଭାରତୀୟ ରାଜ୍ୟଗୁଡ଼ିକରେ ପ୍ରସାରିତ ହେବ ଏବଂ ଦେଶବ୍ୟାପୀ ଅଂଶଗ୍ରହଣ ଏବଂ ଉତ୍ସବକୁ ପ୍ରୋତ୍ସାହିତ କରିବ।

ଏକ ବିକଶିତ ଭାରତ ପାଇଁ ଭାରତର ଯୁବବର୍ଗଙ୍କ ସଶକ୍ତିକରଣ

ବିକଶିତ ଭାରତ ଯୁବ ନେତା ବିତର୍କ ଏକ ଉତ୍ସବ ଠାରୁ ଅଧିକ – ଏହା ଦେଶର ବିକାଶ ଯାତ୍ରାରେ ସକ୍ରିୟ ଯୋଗଦାନକାରୀ ଭାବରେ ଭାରତର ଯୁବକମାନଙ୍କୁ ସଶକ୍ତ କରିବା ପାଇଁ ଏକ ଆନ୍ଦୋଳନ । ବିକଶିତ ଭାରତ ଚ୍ୟାଲେଞ୍ଜ ଭଳି ପଦକ୍ଷେପ ମାଧ୍ୟମରେ ଏହା ଯୁବମନକୁ ସେମାନଙ୍କର ଚିନ୍ତାଧାରା ପ୍ରଦର୍ଶନ କରିବା, ବିଚାରଶୀଳ ନେତୃତ୍ଵଙ୍କ ସହ ଜଡ଼ିତ ହେବା ଏବଂ ଏକ ବିକଶିତ ଭାରତର ସ୍ୱପ୍ନକୁ ସାକାର କରିବାରେ ସହଯୋଗ କରିବା ପାଇଁ ଏକ ପରିବର୍ତ୍ତନଶୀଳ ପ୍ଲାଟଫର୍ମ ପ୍ରଦାନ କରିଥାଏ।

ବିକଶିତ ଭାରତ ଯୁବ ନେତା ବିତର୍କ – ଜାତୀୟ ଯୁବ ମହୋତ୍ସବ ୨୦୨୫ ସମ୍ବନ୍ଧୀୟ ସମସ୍ତ ବିବରଣୀ ମାଇଁ ଭାରତ ପ୍ଲାଟଫର୍ମ (https://mybharat.gov.in/) ରେ ଉପଲବ୍ଧ ହେବ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାନୁଆରୀ ୬ ଏବଂ ୭, ୨୦୨୪ ରେ ଜୟପୁରସ୍ଥିତ ରାଜସ୍ଥାନ ଅନ୍ତର୍ଜାତୀୟ କେନ୍ଦ୍ରରେ ପୋଲିସ ମହାନିର୍ଦ୍ଦେଶକ / ଇନ୍ସପେକ୍ଟର ଜେନେରାଲମାନଙ୍କର ୫୮ତମ ସର୍ବଭାରତୀୟ ସମ୍ମିଳନୀରେ ଯୋଗ ଦେଇଥିଲେ ।

ନୂତନ ଫୌଜଦାରୀ ଆଇନ ପ୍ରଣୟନ ଉପରେ ଆଲୋଚନା କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ଆଇନଗୁଡ଼ିକର ପ୍ରଣୟନ ଅପରାଧିକ ନ୍ୟାୟ ବ୍ୟବସ୍ଥାରେ ଏକ ଆଦର୍ଶ ପରିବର୍ତ୍ତନ।  ସେ ଗୁରୁତ୍ୱାରୋପ କରିଥିଲେ ଯେ ନୂତନ ଅପରାଧିକ ଆଇନଗୁଡ଼ିକ ‘ସିଟିଜେନ୍ ଫାଷ୍ଟ, ଡିଗ୍ନିଟି ଫର୍ଷ୍ଟ ଆଣ୍ଡ ଜଷ୍ଟିସ୍ ଫର୍ଷ୍ଟ’ର ଭାବନା ରେ ପ୍ରସ୍ତୁତ କରାଯାଇଥିଲା ଏବଂ ‘ଡଣ୍ଡା’ ସହିତ କାର୍ଯ୍ୟ କରିବା ପରିବର୍ତ୍ତେ ପୋଲିସକୁ ବର୍ତ୍ତମାନ ‘ଡାଟା’ ସହିତ କାମ କରିବା ର ଆବଶ୍ୟକତା ରହିଛି। ନୂତନ ଭାବେ ପ୍ରଣୟନ ହୋଇଥିବା ଆଇନ ପଛରେ ଥିବା ଭାବନାତ୍ମକ ଭାବନାକୁ ସମାଜର ବିଭିନ୍ନ ବର୍ଗରେ ପହଞ୍ଚାଇବା ପାଇଁ କଳ୍ପନାତ୍ମକ ଭାବରେ ଚିନ୍ତା କରିବାକୁ ପ୍ରଧାନମନ୍ତ୍ରୀ ପୋଲିସ ମୁଖ୍ୟମାନଙ୍କୁ ଆହ୍ୱାନ ଦେଇଥିଲେ । ନୂଆ ଅପରାଧିକ ଆଇନ ଅଧୀନରେ ମହିଳା ଓ ବାଳିକାମାନଙ୍କୁ ପ୍ରଦାନ କରାଯାଉଥିବା ଅଧିକାର ଏବଂ ସୁରକ୍ଷା ବିଷୟରେ ସଚେତନ କରିବା ଉପରେ ପ୍ରଧାନମନ୍ତ୍ରୀ ବିଶେଷ ଗୁରୁତ୍ୱାରୋପ କରିଥିଲେ । ମହିଳାମାନେ ଯେପରି ନିର୍ଭୟରେ ‘କଭି ଭି ଓ କହିଁ ଭି’ (ଯେକୌଣସି ସମୟରେ ଯେକୌଣସି ସ୍ଥାନରେ) କାମ କରିପାରିବେ, ସେଥିପାଇଁ ମହିଳା ସୁରକ୍ଷା ଉପରେ ଧ୍ୟାନ ଦେବାକୁ ସେ ପୁଲିସକୁ ଅନୁରୋଧ କରିଛନ୍ତି।

ନାଗରିକମାନଙ୍କ ମଧ୍ୟରେ ପୋଲିସର ସକାରାତ୍ମକ ଭାବମୂର୍ତ୍ତିକୁ ସୁଦୃଢ଼ କରିବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ନାଗରିକଙ୍କ ହିତ ପାଇଁ ସକାରାତ୍ମକ ସୂଚନା ଏବଂ ବାର୍ତ୍ତା ପ୍ରସାରଣ ପାଇଁ ଥାନା ସ୍ତରରେ ସୋସିଆଲ ମିଡିଆର ବ୍ୟବହାର ପାଇଁ ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ । ପ୍ରାକୃତିକ ବିପର୍ଯ୍ୟୟ ଏବଂ ବିପର୍ଯ୍ୟୟ ମୁକାବିଲା ସମ୍ପର୍କରେ ଆଗୁଆ ସୂଚନା ପ୍ରସାରଣ ପାଇଁ ସୋସିଆଲ ମିଡିଆର ବ୍ୟବହାର କରିବାକୁ ସେ ପରାମର୍ଶ ଦେଇଛନ୍ତି। ନାଗରିକ-ପୁଲିସ ସମ୍ପର୍କକୁ ସୁଦୃଢ଼ କରିବା ପାଇଁ ବିଭିନ୍ନ କ୍ରୀଡ଼ା କାର୍ଯ୍ୟକ୍ରମ ଆୟୋଜନ କରିବାକୁ ସେ ପରାମର୍ଶ ଦେଇଥିଲେ। ଏହି ସୀମାବର୍ତ୍ତୀ ଗ୍ରାମଗୁଡ଼ିକ ଭାରତର ‘ପ୍ରଥମ ଗାଁ’ ହୋଇଥିବାରୁ ସ୍ଥାନୀୟ ଜନସାଧାରଣଙ୍କ ସହ ଉତ୍ତମ ‘ସଂଯୋଗ’ ସ୍ଥାପନ କରିବା ପାଇଁ ସୀମାନ୍ତ ଗ୍ରାମଗୁଡିକରେ ରହିବାକୁ ସେ ସରକାରୀ ଅଧିକାରୀମାନଙ୍କୁ ଅନୁରୋଧ କରିଛନ୍ତି।

ଭାରତର ପ୍ରଥମ ସୌର ମିଶନ ଆଦିତ୍ୟ-ଏଲ-୧ର ସଫଳତା ଏବଂ ଭାରତୀୟ ନୌସେନା ଦ୍ୱାରା ଆରବ ସାଗରରେ ଅପହରଣ ହୋଇଥିବା ଜାହାଜରୁ ୨୧ ଜଣ କ୍ରୁ ମେମ୍ବରଙ୍କୁ ତୁରନ୍ତ ଉଦ୍ଧାର କରିବା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଏଭଳି ସଫଳତା ଦର୍ଶାଉଛି ଯେ ଭାରତ ବିଶ୍ୱରେ ଏକ ପ୍ରମୁଖ ଶକ୍ତି ଭାବରେ ଉଭା ହେଉଛି । ସେ କହିଛନ୍ତି ଯେ ଆଦିତ୍ୟ-ଏଲ୍-୧ ର ସଫଳତା ଚନ୍ଦ୍ରଯାନ-୩ ମିଶନର ସଫଳତା ସହ ସମାନ। ସେ ମଧ୍ୟ ଭାରତୀୟ ନୌସେନାର ସଫଳ ଅପରେସନ ପାଇଁ ଗର୍ବ ପ୍ରକାଶ କରିଛନ୍ତି। ଦେଶର ଉନ୍ନତ ବୈଶ୍ୱିକ ପ୍ରୋଫାଇଲ୍ ଏବଂ ବଢୁଥିବା ଜାତୀୟ ଶକ୍ତି କୁ ଦୃଷ୍ଟିରେ ରଖି ଭାରତୀୟ ପୋଲିସ ୨୦୪୭ ସୁଦ୍ଧା ଏକ ବିକଶିତ ଭାରତର ସ୍ୱପ୍ନକୁ ସାକାର କରିବା ପାଇଁ ନିଜକୁ ଏକ ଆଧୁନିକ ଏବଂ ବିଶ୍ୱସ୍ତରୀୟ ପୋଲିସ ବାହିନୀରେ ପରିଣତ କରିବା ଉଚିତ ବୋଲି ସେ କହିଛନ୍ତି ।

ପ୍ରଧାନମନ୍ତ୍ରୀ ଉଲ୍ଲେଖନୀୟ ସେବା ପାଇଁ ପୋଲିସ ପଦକ ବିତରଣ କରିଥିଲେ ଏବଂ ଜୟପୁରରେ ତିନି ଦିନିଆ ଡିଜିଏସପି /ଆଇଜିଏସପି ସମ୍ମିଳନୀ ଉଦ୍‌ଯାପନ କରିଥିଲେ ।

ଏହି ସମ୍ମିଳନୀରେ କେନ୍ଦ୍ର ଗୃହମନ୍ତ୍ରୀ, ଜାତୀୟ ସୁରକ୍ଷା ପରାମର୍ଶଦାତା, ଗୃହ ରାଷ୍ଟ୍ରମନ୍ତ୍ରୀ, କେନ୍ଦ୍ର ଗୃହ ସଚିବ, ରାଜ୍ୟ/କେନ୍ଦ୍ରଶାସିତ ଅଞ୍ଚଳର ଡିଜିଏସପି/ଆଇଜିଏସପି ଏବଂ କେନ୍ଦ୍ରୀୟ ପୁଲିସ ସଂଗଠନ/କେନ୍ଦ୍ରୀୟ ସଶସ୍ତ୍ର ପୁଲିସ ବାହିନୀର ମୁଖ୍ୟମାନେ ଉପସ୍ଥିତ ଥିଲେ। ପୂର୍ବବର୍ଷ ଭଳି ଚଳିତ ବର୍ଷ ମଧ୍ୟ ଦେଶର ବିଭିନ୍ନ ସ୍ଥାନରୁ ବିଭିନ୍ନ ପାହ୍ୟାର ୫୦୦ରୁ ଅଧିକ ପୁଲିସ ଅଧିକାରୀ ଯୋଗ ଦେଇ ହାଇବ୍ରିଡ୍ ମୋଡରେ ଏହି ସମ୍ମିଳନୀ ଆୟୋଜନ କରିଥିଲେ। ଏହି ସମ୍ମିଳନୀରେ ଜାତୀୟ ନିରାପତ୍ତାର ଗୁରୁତ୍ବପୂର୍ଣ୍ଣ ଉପାଦାନ ଯଥା ନୂତନ ଭାବେ ପ୍ରଣୟନ କରାଯାଇଥିବା ପ୍ରମୁଖ ଅପରାଧିକ ଆଇନ, ଆତଙ୍କବାଦ ମୁକାବିଲା ରଣନୀତି, ବାମପନ୍ଥୀ ଉଗ୍ରବାଦ, ଉଦୀୟମାନ ସାଇବର ବିପଦ, ବିଶ୍ୱବ୍ୟାପୀ ଆତଙ୍କବାଦ ବିରୋଧୀ ପଦକ୍ଷେପ ଇତ୍ୟାଦି ଉପରେ ଆଲୋଚନା ହୋଇଥିଲା।

ନୂଆଦିଲ୍ଲୀ: ଭାରତ ସରକାରଙ୍କ ଦ୍ୱାରା ଆରମ୍ଭ ହୋଇଥିବା ବିଭିନ୍ନ କଲ୍ୟାଣକାରୀ ଯୋଜନା ଗୁଡ଼ିକର ଶତ ପ୍ରତିଶତ ଲାଭ ଲୋକମାନଙ୍କ ନିକଟରେ ପହଞ୍ଚାଇବା ଏବଂ ସେ ସମ୍ପର୍କରେ ସଚେତନତା ସୃଷ୍ଟି କରିବା ଲକ୍ଷ୍ୟ ନେଇ ସମଗ୍ର ଦେଶରେ ବିକଶିତ ଭାରତ ସଂକଳ୍ପ ଯାତ୍ରା ଜୋର ଧରିଛି। ୨୦୨୩ ନଭେମ୍ବର ୧୫ ତାରିଖରେ ଝାଡ଼ଖଣ୍ଡର ଖୁଣ୍ଟି ଠାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶର ବିଭିନ୍ନ ସ୍ଥାନରୁ ଏକକାଳୀନ ଏକାଧିକ ସୂଚନା, ଶିକ୍ଷା ଓ ଯୋଗାଯୋଗ (ଆଇଇସି) ଭ୍ୟାନ୍ ଯୋଗେ ଏହି ଯାତ୍ରାକୁ ପତାକା ଦେଖାଇ ଶୁଭାରମ୍ଭ କରିଥିଲେ। ୨୦୨୪ ଜାନୁଆରୀ ୨୫ ସୁଦ୍ଧା ସାରା ଦେଶରେ ୨.୬୦ ଲକ୍ଷରୁ ଅଧିକ ଗ୍ରାମ ପଞ୍ଚାୟତ ଏବଂ ୪୦୦୦ ରୁ ଅଧିକ ସହରାଞ୍ଚଳ ସ୍ଥାନୀୟ ସଂସ୍ଥାକୁ ଯାତ୍ରା ସହ ଯୋଡ଼ିବା ଲକ୍ଷ୍ୟ ରଖାଯାଇଛି।

ସମଗ୍ର ଭାରତରେ ସଚେତନତା ସୃଷ୍ଟି କରୁଛି ବିକଶିତ ଭାରତ ସଂକଳ୍ପ ଯାତ୍ରା 

ସରକାରଙ୍କ କଲ୍ୟାଣକାରୀ ଯୋଜନା ଗୁଡ଼ିକ ବିଷୟରେ ସଚେତନତା ସୃଷ୍ଟି କରି ଏହି ଯାତ୍ରା ଦେଶର ସୁଦୂର ଅଂଚଳର କୋଣଅନୁକୋଣରେ ପହଞ୍ଚିଛି। ଏହି ପଦକ୍ଷେପ ଏହା ସୁନିଶ୍ଚିତ କରେ, ଯେପରି ଏହି ସାମାଜିକ କଲ୍ୟାଣକାରୀ କାର୍ଯ୍ୟକ୍ରମ ଗୁଡିକ ଦେଶର ପ୍ରତ୍ୟେକ ବ୍ୟକ୍ତିଙ୍କ ପାଖରେ, ଏପରିକି ଅତି ଦୁର୍ଗମ ଅଂଚଳର ଲୋକ ମାନଙ୍କ ପାଖରେ ମଧ୍ୟ ପହଞ୍ଚି ପାରିବ।

ଏହି ଯାତ୍ରାରେ ପିଏମ୍ ଉଜ୍ଜ୍ୱଳା ଯୋଜନା ପଞ୍ଜୀକରଣ, ମାଇଁ ଭାରତ ସ୍ୱେଚ୍ଛାସେବୀ ପଞ୍ଜୀକରଣ, ଆୟୁଷ୍ମାନ କାର୍ଡ ବଣ୍ଟନ ଭଳି ସେବା ଯୋଗାଇ ଦିଆଯାଉଛି। ଏହା ଯାତ୍ରା ସମୟରେ ବହୁ ସଂଖ୍ୟକ ନାଗରିକ ବିଭିନ୍ନ ସରକାରୀ ଯୋଜନାରେ ପଞ୍ଜୀକୃତ ହେଉଛନ୍ତି। ଏହି ଯାତ୍ରାରେ ବ୍ୟକ୍ତିବିଶେଷଙ୍କୁ ସେମାନଙ୍କର ଅଧିକାର ପରିସରରେ ଆସୁଥିବା ସୁବିଧାକୁ ବ୍ୟବହାର କରିବାକୁ ପ୍ରୋତ୍ସାହିତ କରାଯାଉଛି।

ଯାତ୍ରା ସମୟରେ ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା (ପିଏମୟୁୱାଇ) ଅଧୀନରେ ୯.୪୭ ଲକ୍ଷରୁ ଅଧିକ ଲୋକଙ୍କୁ ସ୍ୱଚ୍ଛ ରୋଷେଇ ଇନ୍ଧନ ସଂଯୋଗ ଯୋଗାଇ ଦିଆଯାଇଛି, ଯାହା ଫଳରେ ସେମାନଙ୍କ ପରିବାରକୁ ଧୂଆଁ ଭର୍ତ୍ତି ରୋଷେଇ ଘରରୁ ମୁକ୍ତି ମିଳିବ। ୧.୬୪ କୋଟିରୁ ଅଧିକ ଆୟୁଷ୍ମାନ କାର୍ଡ ବଣ୍ଟନ ସୁନିଶ୍ଚିତ କରୁଛି ଯେ ନାଗରିକ ମାନଙ୍କୁ ପ୍ରତି ବର୍ଷ ପରିବାର ପିଛା ୫ ଲକ୍ଷ ଟଙ୍କାର ବ୍ୟାପକ ସ୍ୱାସ୍ଥ୍ୟ ବୀମା ମିଳିବ।

ଯାତ୍ରାର ଏକ ଅଂଶ ଭାବରେ ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା (ପିଏମଏସ୍‌ବିୱାଇ) ୧୮.୧୫ ଲକ୍ଷରୁ ଅଧିକ ନାଗରିକଙ୍କ ପାଇଁ ଦୁର୍ଘଟଣା ବୀମା ପ୍ରଦାନ କରିଛି । ଜୀବନ ବୀମା ପ୍ରଦାନ କରୁଥିବା ପ୍ରଧାନମନ୍ତ୍ରୀ ଜୀବନ ଜ୍ୟୋତି ବୀମା ଯୋଜନା (ପିଏମଜେଜେବିୱାଇ) ର ଲାଭ ୧୦.୮୬ ଲକ୍ଷରୁ ଅଧିକ ଲୋକ ପାଇଛନ୍ତି। ଏହି ଦୁଇଟି ଯୋଜନା ସମଗ୍ର ଭାରତରେ ଆର୍ଥିକ ଅନ୍ତର୍ଭୁକ୍ତୀକରଣକୁ ଆଗକୁ ବଢ଼ାଉଛି।

ଏହା ସହିତ, ସଙ୍କଳ୍ପ ଯାତ୍ରା ସମୟରେ ପ୍ରଧାନମନ୍ତ୍ରୀ ଷ୍ଟ୍ରିଟ୍ ଭେଣ୍ଡର ଆତ୍ମନିର୍ଭର ନିଧି (ପିଏମ୍ ସ୍ୱନିଧି) ଅଧୀନରେ ୬.୭୯ ଲକ୍ଷରୁ ଅଧିକ ବୁଲା ବିକାଳିଙ୍କୁ କାର୍ଯ୍ୟକାରୀ ପୁଞ୍ଜି ଋଣ ପ୍ରଦାନ କରାଯାଇଛି। ‘ମାଇଁ ଭାରତ’ କୁ ଗ୍ରହଣ କରି ୨୭.୩୧ ଲକ୍ଷରୁ ଅଧିକ ଯୁବକ ନାମ ପଞ୍ଜୀକରଣ କରିଛନ୍ତି, ଯାହା ବିକଶିତ ଭାରତ ସଂକଳ୍ପ ଯାତ୍ରା ପରିସରରେ ଏକ ନୂତନ ଉନ୍ମାଦନା ସୃଷ୍ଟି କରିଛି।

ଜମ୍ମୁ: ଜମ୍ମୁ-କାଶ୍ମୀରରେ ସ୍କୁଲ ଶିକ୍ଷା ସହ ଉଚ୍ଚ ଶିକ୍ଷା ଭିତ୍ତିଭୂମିକୁ ମଜବୁତ୍ କରାଯାଉଛି। ନୂଆ ନୂଆ ଶିକ୍ଷାନୁଷ୍ଠାନ ଖୋଲାଯିବା ସହ ପିଏମ ଶ୍ରୀ ସ୍କୁଲ ବିକଶିତ କରାଯାଉଛି। ୩୭୦ ଧାରା ଉଚ୍ଛେଦ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଏହି ଅଞ୍ଚଳରେ ବିକାଶର ଧାରା ତ୍ୱରାନ୍ୱିତ ହେଉଛି ବୋଲି ଦିନିକିଆ ଜମ୍ମୁ ଗସ୍ତରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେଇ କହିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।

ଗୁରୁବାର କେନ୍ଦ୍ରମନ୍ତ୍ରୀ ଶ୍ରୀ ମାତା ବୈଷ୍ଣ ଦେବୀ ବିଶ୍ୱବିଦ୍ୟାଳୟର ନବମ ସମାବର୍ତ୍ତନ ସମାରୋହରେ ଯୋଗଦେବା ସହ ଆଇଆଇଟି ଜମ୍ମୁରେ ‘ବିକଶିତ ଭାରତ’ ନେଇ ଥିବା କଳ୍ପନା ଏବଂ ବୁଦ୍ଧିମତା ଉପରେ ଛାତ୍ରଛାତ୍ରୀ ଓ ପ୍ରାଧ୍ୟାପକଙ୍କ ସହ ଆଲୋଚନା କରିଛନ୍ତି । ଶ୍ରୀ ପ୍ରଧାନ ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁଶାସନ, ସମାଜର ଅନ୍ତିମ ଶ୍ରେଣୀରେ ଥିବା ଲୋକ ମାନଙ୍କୁ ପ୍ରାଥମିକତା ଉପରେ ଆଲୋଚନା କରିଥିଲେ । ଏହା ସହ ସବକା ସାଥ୍- ସବକା ବିକାଶ, ସବକା ପ୍ରୟାସ-ସବକା ବିକାଶର ମଡେଲ ଉପରେ ଆଲୋକପାତ କରିବା ସହ ଜାତୀୟ ଶିକ୍ଷା ନୀତିରେ ମାତୃଭାଷାକୁ ପ୍ରାଧାନ୍ୟ ଦିଆଯିବା, ଭାରତୀୟତାରୁ ପ୍ରେରିତ ହେବା ଓ ଆତ୍ମବିଶ୍ୱାସ ବଢାଇବା ଉପରେ ମତ ରଖିଥିଲେ । ୨୦୧୪ ପରେ ବ୍ୟାପକ ସଂସ୍କାର କାରଣରୁ ପଲିସି ପାରାଲେସିସର ଯୁଗରୁ ଭାରତ ଏବେ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି ଭାବେ ପରିଣତ ହୋଇଛି ।  ପ୍ରଧାନମନ୍ତ୍ରୀଙ୍କ ଜନକଲ୍ୟାଣକାରୀ ମଡେଲ ସମସ୍ତଙ୍କ ପାଇଁ ଏକ ଅଧ୍ୟୟନର ବିଷୟ । ଜମ୍ମୁ କାଶ୍ମୀରରେ ଥିବା ଅପାର ସମ୍ଭାବନା ଏବଂ ସ୍ୱତନ୍ତ୍ରତା ଉପରେ ଦୀର୍ଘ ସମୟ ଧରି ଗବେଷଣା କରିବା ପାଇଁ ଆଇଆଇଟି ଜମ୍ମୁକୁ ପରାମର୍ଶ ଦେଇଥିଲେ । ଆଗାମୀ ୨୫ ବର୍ଷ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ସମସ୍ତଙ୍କ ସହଯୋଗ ବଳରେ ହିଁ ଆମେ ବିକଶିତ ଭାରତର ଲକ୍ଷ୍ୟକୁ ପୂରଣ କରିପାରିବା ।

ଶ୍ରୀ ପ୍ରଧାନ  ମାତା ବୈଷ୍ଣ ଦେବୀ ବିଶ୍ୱବିଦ୍ୟାଳୟର ନବମ ସମାବର୍ତ୍ତନ ସମାରୋହରେ ଯୋଗଦେଇ ଛାତ୍ରଛାତ୍ରୀଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିଥିଲେ । ଆଜି ଯେତେବେଳେ ବିଦ୍ୟାର୍ଥୀମାନେ ସମାଜ ଜୀବନରେ ଦାୟିତ୍ୱ ନେବେ, ସେମାନେ ଜାମ୍ମୁ କାଶ୍ମୀରର ଐତିହ୍ୟକୁ ସାଙ୍ଗରେ ନେଇ ଆଗକୁ ବଢିବେ ବୋଲି ସେ କହିଥିଲେ । ଏହି କାର୍ଯ୍ୟକ୍ରମରେ ଜମ୍ମୁର ଉପରାଜ୍ୟପାଳ ମନୋଜ ସିହ୍ନା ଉପସ୍ଥିତ ଥିଲେ । ଉଲ୍ଲେଖନୀୟ, ଏହି ଗସ୍ତକାଳରେ କେନ୍ଦ୍ରମନ୍ତ୍ରୀ ଜମ୍ମୁ ସ୍ଥିତ ବୈଷ୍ଣ ଦେବୀ ମନ୍ଦିରରେ ଦର୍ଶନ ସହ ପୂଜାର୍ଚ୍ଚନା କରିଥିଲେ ।

ନୂଆଦିଲ୍ଲୀ/ଭୁବନେଶ୍ୱର: ଆମେ ଏପରି ଏକ ଦୁନିଆରେ ରହୁଛୁ ଯେଉଁଠାରେ କେବଳ ଡିଗ୍ରୀ ରହିବା ଯଥେଷ୍ଟ ନୁହେଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଆମକୁ ଭାରତରେ ଜ୍ଞାନ ଓ ଦକ୍ଷତାର ଏକ ସୁପର ହାଇୱେ ନିର୍ମାଣ କରିବାକୁ ହେବ ବୋଲି କହିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।

ଆଜି ନୂଆଦିଲ୍ଲୀ ଠାରେ କେନ୍ଦ୍ରମନ୍ତ୍ରୀଙ୍କ ଉପସ୍ଥିତିରେ  ଆର୍ଥିକ ସେବା କ୍ଷେତ୍ରରେ ନିଯୁକ୍ତି ସୁଯୋଗ ଦେବା ପାଇଁ ସ୍ନାତକ ଯୁବପିଢିଙ୍କୁ ପ୍ରସ୍ତୁତ କରାଇବା ଦିଗରେ ଜାତୀୟ ଦକ୍ଷତା ବିକାଶ ନିଗମ (ଏନଏସଡିସି) ସହ ସର୍ବଭାରତୀୟ ବୈଷୟିକ ଶିକ୍ଷା ପରିଷଦ(ଏଆଇସିଟିଇ) ଏବଂ ବଜାଜ ଫାଇନାନ୍ସ କମ୍ପାନୀ ମଧ୍ୟରେ ଏକ ବୁଝାମଣା ପତ୍ର ସ୍ୱାକ୍ଷରିତ ହୋଇଛି। ଏହି ଅବସରରେ ଶ୍ରୀ ପ୍ରଧାନ ବ୍ୟାଙ୍କିଂ, ଫାଇନାନ୍ସ ଓ ବୀମା କ୍ଷେତ୍ରରେ ଏକ ସାର୍ଟିଫିକେଟ୍ କାର୍ଯ୍ୟକ୍ରମର ଶୁଭାରମ୍ଭ ମଧ୍ୟ କରିଛନ୍ତି।

ଶ୍ରୀ ପ୍ରଧାନ କହିଛନ୍ତି ଆଜିର ଏମଓୟୁ ଶିକ୍ଷାନୁଷ୍ଠାନ-ଶିଳ୍ପାନୁଷ୍ଠାନ ମଧ୍ୟରେ ସମ୍ପର୍କକୁ ସୁଦୃଢ଼ କରିବ । ଯୁବବର୍ଗଙ୍କୁ ସଶକ୍ତ କରିବ। ବିଶ୍ୱସ୍ତରୀୟ ଦକ୍ଷତା ଦେଇ ଭବିଷ୍ୟତ ପାଇଁ ଯୁବକ ଯୁବତୀଙ୍କୁ ପ୍ରସ୍ତୁତ କରାଇବା ସହ ଆର୍ଥିକ କ୍ଷେତ୍ରରେ ବ୍ୟାପକ ଦକ୍ଷତା ସୃଷ୍ଟି କରିବ। ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ବିକଶିତ ଭାରତ ପାଇଁ ଥିବା ଦୂରଦୃଷ୍ଟି ଉପରେ ଆଲୋକପାତ କରିଥିଲେ କେନ୍ଦ୍ରମନ୍ତ୍ରୀ।

ସେ କହିଛନ୍ତି ଲୋକଙ୍କର ଦକ୍ଷତା ବଢାଇବା ପାଇଁ ପ୍ରଧାନମନ୍ତ୍ରୀ କହିଛନ୍ତି। ଲୋକଙ୍କୁ ସ୍କିଲିଂ, ରି-ସ୍କିଲିଂ ଏବଂ ଅପ୍ ସ୍କିଲିଂ ସହ ଯୋଡିଲେ ହିଁ ଦେଶ ଆଗକୁ ବଢିବ। ଆଜି ଦେଶରେ ଡିପିଆଇ ବା ଡିଜିଟାଲ ପବ୍ଲିକ ଇନଟ୍ରେଷ୍ଟ କାରଣରୁ ଦେଶ ଆଗକୁ ବଢୁଛି। ଭାରତର ଆର୍ଥିକ କ୍ଷେତ୍ର ମଜଭୂତ୍ ହେଉଛି। ଏକ ବିକଶିତ ଭାରତ ପାଇଁ ଯୁବବର୍ଗଙ୍କ ସୃଜନଶୀଳ ଚିନ୍ତାଧାରା ସହ ବିକଶିତ ଭାରତ ଗଠନରେ ଦକ୍ଷତା ବିକାଶ ଓ ଆର୍ଥିକ କ୍ଷେତ୍ରର ଯୋଗଦାନକୁ ଏକାଠି କରିବା ପାଇଁ ହେବ।  ବିଶ୍ୱସ୍ତରୀୟ ଦକ୍ଷତା ସହ ଭବିଷ୍ୟତ ପାଇଁ ପ୍ରସ୍ତୁତ ଦେଶର ଯୁବବର୍ଗ ବିକଶିତ ଭାରତ ଗଠନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି ଶ୍ରୀ ପ୍ରଧାନ କହିଛନ୍ତି।