ରାଞ୍ଚି: ଝାଡଖଣ୍ଡ ବିଧାନସଭାରେ ନମାଜ ପାଇଁ ଏକ ପୃଥକ କୋଠରୀ ଆବଣ୍ଟନକୁ ଆଜି ଶତାଧିକ ବିଜେପି କର୍ମୀ ବିରୋଧ କରିଛନ୍ତି। ବିଜେପି କର୍ମୀମାନେ ବିଧାନସଭାକୁ ଘେରାଉ କରିବାକୁ ପ୍ରୟାସ କରୁଥିବା ବେଳେ ଝାଡଖଣ୍ଡ ମୁକ୍ତି ମୋର୍ଚ୍ଚାର ଜଣେ କର୍ମୀ ମଧ୍ୟ ସେଠାରେ ପହଞ୍ଚି ହେମନ୍ତ ସରକାରଙ୍କ ସପକ୍ଷରେ ସ୍ଲୋଗାନ ଦେଇଥିଲେ। ଏହା ସହ ସେ ବିଜେପି କର୍ମୀଙ୍କୁ କଳା ପତାକା ମଧ୍ୟ ଦେଖାଥିଲେ। ଏହି ସମୟରେ ବିଜେପି କର୍ମୀମାନେ ଉତ୍ତ୍ୟକ୍ତ ହୋଇ ତାଙ୍କୁ ପିଟିବା ଆରମ୍ଭ କରିଦେଇଥିଲେ।
ଝାଡଖଣ୍ଡ ମୁକ୍ତି ମୋର୍ଚ୍ଚାର କର୍ମୀ ଗଣମାଧ୍ୟମକୁ କହିଛନ୍ତି ଯେ, ଧନବାଦରୁ ସେହି ଯୁବକଜଣଙ୍କ ଆସିଥିଲେ। ବେକାରୀ, ମୁଦ୍ରାସ୍ଫୀତି ଭଳି ପ୍ରସଙ୍ଗକୁ ଛାଡି ଅନାବଶ୍ୟକ ପ୍ରସଙ୍ଗକୁ ନେଇ ବିଜେପି କର୍ମୀମାନେ ଆନ୍ଦୋଳନ କରୁଥିଲେ। ଏହି ଆକ୍ରମଣ ସମ୍ପର୍କରେ ସେ ହେମନ୍ତ ସରକାରଙ୍କ ନିକଟରେ ଅଭିଯୋଗ କରିବେ। ଏହି ଘଟଣାରେ ସେଠାରେ ଉପସ୍ଥିତ ଥିବା ଏଡିଏମ୍ ଦୀପକ କୁମାର ଦୁବେ ସ୍ପଷ୍ଟ ଭାବେ କହିଛନ୍ତି ଯେ, ଯେଉଁମାନେ ଆଜି ଆଇନକୁ ନିଜ ହାତରେ ନେଇଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଏହାର ଗୋଟିଏ ଦିନ ପୂର୍ବରୁ, ବୁଧବାର ଦିନ ମଧ୍ୟ ଏଠାରେ ବହୁତ ହଙ୍ଗାମା ହୋଇଥିଲା। ଝାଡଖଣ୍ଡ ବିଧାନସଭା ଭିତରେ ପ୍ରାର୍ଥନା କରିବା ପାଇଁ ଏକ ସ୍ୱତନ୍ତ୍ର କୋଠରୀ ଆବଣ୍ଟନ ପଦକ୍ଷେପକୁ ବିରୋଧ କରୁଥିବା ବିଜେପି କର୍ମୀମାନଙ୍କ ଉପରକୁ ପୋଲିସ ଲାଠି ଚାର୍ଜ କରିଥିଲା। ରାଜ୍ୟ ୟୁନିଟ୍ ମୁଖ୍ୟ ଦୀପକ ପ୍ରକାଶଙ୍କ ସମେତ ଅନେକ ବିଜେପି କର୍ମୀ ଆହତ ହୋଇଥିବା ଜଣାପଡିଛି।
