Tag: ବିଜେପି

ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପାଇଁ ସମାଜବାଦୀ ପାର୍ଟି ଆଜି ମନିଫେଷ୍ଟୋ ଘୋଷଣା କରିଛି। ସମସ୍ତ ଫସଲ ପାଇଁ ଏମଏସପି ଯୋଗାଇ ଦିଆଯିବ ଏବଂ ୧୫ ଦିନ ମଧ୍ୟରେ ଆଖୁ ଚାଷୀଙ୍କୁ ଦେୟ ନିଶ୍ଚିତ କରାଯିବ ବୋଲି ସମାଜବାଦୀ ପାର୍ଟି ମନିଫେଷ୍ଟୋରେ କହିଛି। ମାଗଣା ବିଦ୍ୟୁତ୍ ଏବଂ ସମସ୍ତ ଚାଷୀଙ୍କୁ ଜଳସେଚନ ପାଇଁ ସୁଧମୁକ୍ତ ଋଣ ପାଇଁ ବ୍ୟବସ୍ଥା କରାଯିବ। ମଙ୍ଗଳବାର ଦିନ ଏକ ସାମ୍ବାଦିକ ସମ୍ମିଳନୀରେ ପାର୍ଟି ମୁଖ୍ୟ ଅଖିଳେଶ ଯାଦବ ଏହି ସୂଚନା ଦେଇଛନ୍ତି। କୃଷକ, ମହିଳା, ଛାତ୍ର ଏବଂ ସାଧାରଣ ଲୋକଙ୍କ ପାଇଁ ମନିଫୋଷ୍ଟରେ ଜନପ୍ରିୟ ପ୍ରତିଶୃତି ଦିଆଯାଇଛି।

ସୂଚନାଯୋଗ୍ୟ ଯେ ବିଜେପି ଆଜି ସକାଳେ ନିଜର ସଂକଳ୍ପ ପତ୍ର ଜାରି କରିଥିଲେ। ଯେଉଁଥିରେ ମହିଳାମାନଙ୍କୁ ପ୍ରତିବର୍ଷ ତିନୋଟି ମାଗଣା ସିଲିଣ୍ଡର, ଛାତ୍ରୀଙ୍କୁ ସ୍କୁଟି, ଚାଷୀଙ୍କୁ ମାଗଣାରେ ବିଦ୍ୟୁତ୍ ପ୍ରଦାନ ଭଳି ଅନେକ ଗୁରୁତ୍ୱପୂର୍ଣ୍ଣ ପ୍ରତିଶୃତି ଦିଆଯାଇଛି।

ସମାଜବାଦୀ ପାର୍ଟି ମନିଫେଷ୍ଟୋର ବୈଶିଷ୍ଟ୍ୟ:

– ସମସ୍ତ ଫସଲକୁ MSP ଅଧୀନରେ ଅଣାଯିବା।
– ୨୦୨୫ ସୁଦ୍ଧା ସମସ୍ତ କୃଷକ ଋଣମୁକ୍ତ ହେବେ।
– ସମସ୍ତ ଚାଷୀଙ୍କୁ ଜଳସେଚନ ପାଇଁ ମାଗଣା ବିଦ୍ୟୁତ୍।
– କୃଷକ ଆନ୍ଦୋଳନରେ ସହିଦ ହୋଇଥିବା କୃଷକମାନଙ୍କୁ ୨୫ ଲକ୍ଷ ଟଙ୍କା ଦେବେ।
– ସମସ୍ତ ଗରିବ ଲୋକଙ୍କୁ ପ୍ରତିମାସରେ ଦୁଇଟି ସିଲିଣ୍ଡର ମାଗଣାରେ ଦିଆଯିବ।
– ସରକାରୀ ଚାକିରିରେ ମହିଳାମାନଙ୍କୁ ୩୩% ସଂରକ୍ଷଣ ଦିଆଯିବ।
– ଝିଅମାନଙ୍କ ଶିକ୍ଷା KG ରୁ PG ପର୍ଯ୍ୟନ୍ତ ମାଗଣା ହେବ।
– ସମାଜବାଦୀ ପେନ୍ସନ୍ ପୁନଃ ଆରମ୍ଭ ହେବ।
– ମହିଳାଙ୍କ ସୁରକ୍ଷା ପାଇଁ ୧୦୯୦ କୁ ପୁଣିଥରେ ଚାଲୁ କରାଯିବ।
– ମହିଳାମାନେ ଇମେଲ ଏବଂ ହହ୍ଵାଟସ୍ ଆପରେ FIR ପଞ୍ଜିକରଣ କରିବାକୁ ସମର୍ଥ ହେବେ।
– ନଗଦବିହୀନ ସ୍ୱାସ୍ଥ୍ୟ ବ୍ୟବସ୍ଥା ଆଣିବ।
– ଗରିବ ଲୋକଙ୍କୁ ବାର୍ଷିକ ୧୮ ହଜାର ଟଙ୍କା ପେନସନ୍ ଦିଆଯିବ।
– ପ୍ରତ୍ୟେକ ସମାଜରେ ‘ସମାଜବାଦୀ ଥାଳି’ ଆରମ୍ଭ ହେବ, ଏହା ଅଧୀନରେ ୧୦ ଟଙ୍କାରେ ଏକ ଥାଳି ଖାଦ୍ୟ ଦିଆଯିବ।
– ଅଟୋ ରିକ୍ସା ଡ୍ରାଇଭରମାନଙ୍କୁ ପ୍ରତିମାସରେ ଦୁଇ ଲିଟର ମାଗଣା ପେଟ୍ରୋଲ।

ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ବିଜେପି ‘ଲୋକ କଲ୍ୟାଣ ସଂକଲ୍ପ ପତ୍ର’ (ନିର୍ବାଚନ ଘୋଷଣା ପତ୍ର) ଜାରି କରିଛି। ଏହି ସମୟରେ ଗୃହମନ୍ତ୍ରୀ ଅମିତ ଶାହା, ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ଧର୍ମେନ୍ଦ୍ର ପ୍ରଧାନ, ଅନୁରାଗ ଠାକୁର ଏବଂ ଉଭୟ ଉପ ମୁଖ୍ୟମନ୍ତ୍ରୀ ମଧ୍ୟ ଉପସ୍ଥିତ ଥିଲେ। ଘୋଷଣା ପତ୍ର ସହିତ ‘କରକେ ଦିଖାୟା ହେ i’ ନାମକ ଏକ ନୂତନ ନିର୍ବାଚନ ଗୀତ ମଧ୍ୟ ବିଜେପି ଲଞ୍ଚ କରିଛି।

ବିଜେପିର ଘୋଷଣା ପତ୍ରରେ କ’ଣ ରହିଛି ପ୍ରତିଶୃତି?:

– ଆଗାମୀ ବର୍ଷରେ ସମସ୍ତ ଚାଷୀଙ୍କୁ ଜଳସେଚନ ପାଇଁ ମାଗଣା ବିଦ୍ୟୁତ ମିଳିବ।
– ୧୪ ଦିନ ମଧ୍ୟରେ ଆଖୁ ଚାଷୀଙ୍କୁ କ୍ଷତିପୂରଣ ଦିଆଯିବ, ବିଳମ୍ବ ହେଲେ ସୁଧ ଦିଆଯିବ।
– ଉଜ୍ଜ୍ଵଲା ଯୋଜନା ଅନୁଯାୟୀ ହୋଲି ଏବଂ ଦିୱାଲୀରେ ୧-୧ ମାଗଣା ସିଲିଣ୍ଡର ଦିଆଯିବ।
– ୬୦ ବର୍ଷରୁ ଅଧିକ ମହିଳାଙ୍କ ପାଇଁ ମାଗଣା ଯାତ୍ରା।
– ପ୍ରତ୍ୟେକ ପରିବାରକୁ ଅତି କମରେ ଜଣଙ୍କୁ ରୋଜଗାର ମିଳିବ।
– ପ୍ରତ୍ୟେକ ବିଧବା ଏବଂ ମିରାଶ୍ରିତ ମହିଳାଙ୍କୁ ମାସକୁ ୧୫୦୦ ଟଙ୍କା ପେନ୍ସନ୍ ମିଳିବ।
– ପ୍ରତ୍ୟେକ ପରିବାରକୁ ଅତି କମରେ ଗୋଟିଏ ନିଯୁକ୍ତି ପ୍ରଦାନ କରାଯିବ।
– ୬ ଟି ମେଗା ଫୁଡ୍ ପାର୍କ ସ୍ଥାପନ କରାଯିବ।
– ଆମ୍ବୁଲାନ୍ସ ଏବଂ MBBS ର ସିଟ୍ ଦୁଇଗୁଣ କରିବ।
– ଲଭ ଜିହାଦ ବନ୍ଦ କରିବା ପାଇଁ ୧୦ ବର୍ଷ ଜେଲ ଏବଂ ୧ ଲକ୍ଷ ଜୋରିମାନା।
– ମା’ ଅନ୍ନପୂର୍ଣ୍ଣା କ୍ୟାଣ୍ଟିନ ତିଆରି କରି ଗରିବ ଲୋକଙ୍କୁ ଶସ୍ତା ଖାଦ୍ୟ ଦେବ।
– କଲେଜ ଯାଉଥିବା ମେଧାବୀ ଛାତ୍ରୀମାନଙ୍କୁ ଆତ୍ମନିର୍ଭରଶୀଳ କରିବା ପାଇଁ ରାଣୀ ଲକ୍ଷ୍ମୀ ବାଇ ଯୋଜନା ଅଧୀନରେ ମାଗଣା ସ୍କୁଟି ଉପଲବ୍ଧ ହେବ।
– ୫ ହଜାର କୋଟି ଟଙ୍କା ବ୍ୟୟରେ ସର୍ଦ୍ଦାର ପଟେଲ ଆଗ୍ରି-ଭିତ୍ତିଭୂମି ମିଶନ।
– ମୁଖ୍ୟମନ୍ତ୍ରୀ କୃଷି ସିଞ୍ଚାଇ ଯୋଜନା ୨୫ ହଜାର କୋଟି ଟଙ୍କା ସହିତ ଆରମ୍ଭ ହେବ।
– ୧ ହଜାର କୋଟିର ଭାମାଶାହା ଭାଓ ସ୍ଥିରତା ପାଣ୍ଠି ସୃଷ୍ଟି କରି ଚାଷୀଙ୍କୁ ଆଳୁ, ଟମାଟୋ ଏବଂ ପିଆଜ ପରି ସମସ୍ତ ଫସଲର ସର୍ବନିମ୍ନ ମୂଲ୍ୟ ନିଶ୍ଚିତ କରାଯିବ।
– ଚିନି ମିଲର ନବୀକରଣ ଏବଂ ଆଧୁନିକୀକରଣ ଗତ୍ର ମିଲ୍ ନବୀକରଣ ମିଶନ୍ ଅଧୀନରେ ୫ ହଜାର କୋଟି ଟଙ୍କା ବ୍ୟୟରେ କରାଯିବ।
– ପ୍ରଧାନମନ୍ତ୍ରୀ କୁସୁମ ଯୋଜନା ଅଧୀନରେ ଚାଷୀଙ୍କୁ ସୌର ପମ୍ପ ଦିଆଯିବ।
– କୃଷକଙ୍କ ଆୟ ବଢାଇବା ପାଇଁ ସୌର ଶକ୍ତିରୁ ଉତ୍ପାଦିତ ଅତିରିକ୍ତ ଶକ୍ତି ବିକ୍ରୟ ପାଇଁ ଉପଯୁକ୍ତ ବ୍ୟବସ୍ଥା କରାଯିବ।
– ୪ ହଜାର ନୂତନ ଫସଲ ବିଶିଷ୍ଟ FPO ସ୍ଥାପନ କରି ପ୍ରତ୍ୟେକ FPO କୁ ୧୮ ଲକ୍ଷ ଟଙ୍କା ପର୍ଯ୍ୟନ୍ତ ଆର୍ଥିକ ସହାୟତା ପ୍ରଦାନ କରାଯିବ।
– ମିଶନ୍ ପ୍ରାକୃତିକ ଚାଷ ଅଧୀନରେ, ଆସନ୍ତା ୫ ବର୍ଷରେ ପ୍ରତ୍ୟେକ ଗ୍ରାମରେ ପ୍ରାକୃତିକ ଚାଷକୁ ପ୍ରୋତ୍ସାହିତ କରାଯିବ।
– ନିଶାଦରାଜ ବୋଟ ସବସିଡି ଯୋଜନା ଆରମ୍ଭ ହେବ, ଯେଉଁଥିରେ ୪୦% ସବସିଡିରେ ମତ୍ସ୍ୟଜୀବୀଙ୍କ ପାଇଁ ୧ ଲକ୍ଷ ପର୍ଯ୍ୟନ୍ତ ଡଙ୍ଗା ଉପଲବ୍ଧ ହେବ।
– ମାଛ ବିହନ ଉତ୍ପାଦନ ୟୁନିଟ୍ ସ୍ଥାପନ ପାଇଁ ୨୫% ପର୍ଯ୍ୟନ୍ତ ସବସିଡି ପ୍ରଦାନ କରାଯିବ ଏବଂ ୬ ଟି ଅଲ୍ଟ୍ରା ମଡେଲ୍ ମାଛ ବଜାର ପ୍ରତିଷ୍ଠା କରାଯିବ।

ମନିଫେଷ୍ଟୋ ପ୍ରକାଶ କରିବା ପରେ ସିଏମ୍ ଯୋଗୀ ଆଦିତ୍ୟନାଥ କହିଛନ୍ତି, ‘ଆସନ୍ତା ୫ ବର୍ଷ ମଧ୍ୟରେ ଲୋକଙ୍କ ଜୀବନରେ ପରିବର୍ତ୍ତନ ଆଣିବା ପାଇଁ ବିଜେପି ଏକ ସଂକଲ୍ପ ପତ୍ର ଜାରି କରୁଛି। ଏପରିକି ୫ ବର୍ଷ ପୂର୍ବେ ବିଜେପି ଏହି ସଭା ହଲରେ ସଂକଲ୍ପ ପତ୍ରକୁ ରଖିଥିଲା। ପିଏମ ମୋଦୀଙ୍କ ନେତୃତ୍ୱରେ ଯାହା କୁହାଯାଇଛି ତାହା କରାଯାଇଛି। ଯାହା କହିବୁ ତାହା କରି ଦେଖାଇବୁ।

ମୁଖ୍ୟମନ୍ତ୍ରୀ ଯୋଗୀ ଆହୁରି କହିଛନ୍ତି ଯେ, ଆଜି ୟୁପିରେ ଆଇନର ରାଜ ଚାଲିଛି, ପ୍ରତ୍ୟେକ ଝିଅ ସୁରକ୍ଷିତ ଅଛନ୍ତି। ୨୦୧୭ ବର୍ଷ ପୂର୍ବରୁ ୭୦୦ ଦଙ୍ଗା ହୋଇଥିଲା। ପର୍ବ ଏବଂ ପର୍ବପର୍ବାଣୀ ଉଲ୍ଲାସର ସହିତ ପାଳନ କରାଯାଏ। ଆଜି ଝିଅମାନେ ବିଦ୍ୟାଳୟକୁ ଯାଉଛନ୍ତି। ୮୬ ଲକ୍ଷ ଚାଷୀଙ୍କ ୩୬ ହଜାର କୋଟି ଋଣ ଛାଡ କରାଯାଇଥିଲା। ଜଳସେଚନ କ୍ଷମତା ୨୨ ଲକ୍ଷ ହେକ୍ଟରକୁ ବୃଦ୍ଧି ପାଇଲା। ୫ ଲକ୍ଷ ଯୁବକ ଚାକିରି ପାଇଲେ। ୧.୫୯ ଲକ୍ଷ କୋଟି ଟଙ୍କା ଆଖୁ ଚାଷୀଙ୍କୁ ଦିଆଯାଇଥିଲା। ୬୦ ଲକ୍ଷ ଉଦ୍ୟୋଗୀଙ୍କୁ ଋଣ ପ୍ରଦାନ କରାଯାଇଛି। ୟୁପିର ବେକାରୀ ହାର ୧୮ ରୁ ମାତ୍ର ୩ ପ୍ରତିଶତରେ ପହଞ୍ଚିଛି।

ଲକ୍ଷ୍ନୌ: ୟୁପି ନିର୍ବାଚନରେ ​​ଟିକେଟ ନ ପାଇ ଅସନ୍ତୋଷ ପ୍ରକାଶ ପାଇଥିବା ସମାଜବାଦୀ ପାର୍ଟି ନେତା ଶିବଶଙ୍କର ସିଂ ସୋମବାର ଦିନ ବିଜେପିରେ ଯୋଗ ଦେଇଛନ୍ତି। ଉପମୁଖ୍ୟମନ୍ତ୍ରୀ ଡ. ଦୀନେଶ ଶର୍ମା ଉପସ୍ଥିତିରେ ସେ ସଦସ୍ୟତା ଗ୍ରହଣ କରିଛନ୍ତି। ବିଜେପି ଏହି ଆସନରୁ ରାଜେଶ୍ୱର ସିଂଙ୍କୁ ପ୍ରାର୍ଥୀ କରିଛି। ଏଭଳି ପରିସ୍ଥିତିରେ ଶିବଶଙ୍କର ସିଂ ବିଜେପିରେ ଯୋଗଦେବା ସହିତ ରାଜେଶ୍ୱର ସିଂଙ୍କ ରାସ୍ତା ସଫା ହୋଇଛି।

ଉପମୁଖ୍ୟମନ୍ତ୍ରୀ ଡ. ଦୀନେଶ ଶର୍ମା ଟୁଇଟ୍ କରି କହିଛନ୍ତି ଯେ, ବିଜେପିର ଜନକଲ୍ୟାଣକାରୀ ନୀତିରେ ପ୍ରଭାବିତ ହୋଇ ରାମଲାଲ ଅକେଲା, ପୂର୍ବତନ ବିଧାୟକ (ଏସପି) ଶିବଶଙ୍କର ସିଂ, ପୂର୍ବତନ ପ୍ରାର୍ଥୀ (ଏସପି) ଅଶୋକ ଚୌଧୁରୀ, ବିଭିନ୍ନ ମଣ୍ଡଳ ସଂଯୋଜକ ଅଶୋକ ଚୌଧୁରୀ ସମେତ ଅନେକ ବରିଷ୍ଠ ନେତା ବିଜେପିରେ ସାମିଲ ହୋଇଛନ୍ତି। ଏଥିରେ ବହୁ ବରିଷ୍ଠ ମାନ୍ୟଗଣ୍ୟ ବ୍ୟକ୍ତିଙ୍କୁ ବିଜେପିର ସଦସ୍ୟତା ମିଳିଛି।

ଏହାପୂର୍ବରୁ ବିଜେପିରୁ ବହିଷ୍କୃତ ହୋଇଥିବା ପୂର୍ବତନ ରାଜ୍ୟ ମନ୍ତ୍ରୀ ଶିବଶଙ୍କର ସିଂ ପଟେଲ ସମାଜବାଦୀ ପାର୍ଟିରେ ଯୋଗ ଦେଇଥିଲେ। ବାସ୍ତବରେ, ଜିଲ୍ଲା ପଞ୍ଚାୟତ ସଦସ୍ୟ ବିଜେପିରୁ ଟିକେଟ୍ ନ ପାଇବା ପରେ ଶିବଶଙ୍କର ସିଂ ପଟେଲ ତାଙ୍କ ପତ୍ନୀଙ୍କୁ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରାଇଥିଲେ, ଯାହା ପରେ ଦଳ ବିରୋଧୀ କାର୍ଯ୍ୟ କରିବା ପାଇଁ ଶିବଶଙ୍କର ସିଂ ପଟେଲଙ୍କୁ ଦଳରୁ ବହିଷ୍କାର କରାଯାଇଥିଲା। ଏହା ପରେ ସେ ସମାଜବାଦୀ ପାର୍ଟିରେ ଯୋଗ ଦେଇଥିଲେ।

ଏଠାରେ ଉଲ୍ଲେଖଯୋଗ୍ୟ ଯେ, ଶିବଶଙ୍କର ସିଂ ୨୦୧୭ ମସିହାରେ ସରୋଜିନୀ ନଗରରୁ ବିଏସପି ଟିକେଟରେ ପ୍ରତିଦ୍ୱନ୍ଦ୍ୱିତା କରିଥିଲେ। କିନ୍ତୁ ପରେ ସେ ବିଏସପି ଛାଡି ଏସପି ସଦସ୍ୟତା ଗ୍ରହଣ କରିଥିଲେ। ୨୦୨୨ ନିର୍ବାଚନରେ ​​ସେ ସରୋଜିନୀ ନଗରରୁ ଏସପି ଟିକେଟ୍ ପାଇଁ ଦାବି କରିଥିଲେ। କିନ୍ତୁ ସରୋଜିନୀ ନଗରରୁ ଅଭିଷେକ ମିଶ୍ରଙ୍କୁ ଦଳ ଟିକେଟ୍ ଦେଇଥିଲା। ଏଥିରେ ଅସନ୍ତୋଷ ହୋଇ ଶିବଶଙ୍କର ସିଂ ବିଜେପିରେ ଯୋଗ ଦେଇଛନ୍ତି। ଏଭଳି ପରିସ୍ଥିତିରେ ସରୋଜିନୀ ନଗରରୁ ରାଜେଶ୍ୱର ସିଂଙ୍କ ରାସ୍ତା ସହଜ ହୋଇଛି ବୋଲି ବିଶ୍ୱାସ କରାଯାଏ।

ନୂଆଦିଲ୍ଲୀ: ଏକ ରାଜନୈତିକ ଦଳ ଗଠନ କରିଥିବା କୃଷକ ନେତା ଗୁରୁନାମ ସିଂ ଚଢୁନି କହିଛନ୍ତି ଯେ ଉତ୍ତରପ୍ରଦେଶ, ଉତ୍ତରାଖଣ୍ଡ ଏବଂ ପଞ୍ଜାବ ନିର୍ବାଚନରେ ​​ତାଙ୍କ ସଂଗଠନ ବିଜେପି ବିରୋଧରେ ପ୍ରଚାର କରିବ। ଭାରତୀୟ କିଷାନ ୟୁନିଅନର ହରିୟାଣା ୟୁନିଟର ମୁଖ୍ୟ ଥିବା ଚଢୁନି ଗତ ବର୍ଷ ସଂଯୁକ୍ତ ସଂଘର୍ଷ ପାର୍ଟି ନାମରେ ନିଜର ଦଳ ଗଠନ କରିଛନ୍ତି। ତାଙ୍କ ଦଳ କୃଷକ ନେତା ବଲବୀର ସିଂ ରାଜେୱାଲଙ୍କ ସଂଯୁକ୍ତ ସମାଜ ମୋର୍ଚ୍ଚା ସହଯୋଗରେ ପଞ୍ଜାବରେ ନିର୍ବାଚନ ଲଢୁଛନ୍ତି। ନରେନ୍ଦ୍ର ମୋଦୀ ସରକାରଙ୍କ କୃଷି ଆଇନ ବିରୋଧରେ ଏହି ଆନ୍ଦୋଳନରେ ଚଢୁନି ଏବଂ ରାଜେୱାଲ ଜଡିତ ଥିଲେ।

ହରିୟାଣାର କୁରୁକ୍ଷେତ୍ରରେ ସଂଗଠିତ କୃଷକମାନଙ୍କର ଏକ ରାଜ୍ୟ ସ୍ତରୀୟ ବୈଠକରେ ବିଜେପି ବିରୋଧରେ ପ୍ରଚାର କରିବାକୁ ଚଢୁନି ଦଳ ନିଷ୍ପତ୍ତି ନେଇଛନ୍ତି। ଚଢୁନି ସଭାପତିତ୍ୱ କରିଥିଲେ। ସେ କହିଛନ୍ତି ଯେ, ଏହି ସବୁ ରାଜ୍ୟରେ ବିଜେପି ପ୍ରାର୍ଥୀଙ୍କୁ ବିରୋଧ କରିବାକୁ ନିଷ୍ପତ୍ତି ସମସ୍ତଙ୍କ ସହମତିରେ ନିଆଯାଇଛି।

ଚଢୁନି ତାଙ୍କ ସମର୍ଥକଙ୍କୁ ପଞ୍ଜାବର ନିର୍ବାଚନମଣ୍ଡଳୀକୁ ଯିବାକୁ ଅନୁରୋଧ କରିଛନ୍ତି। ଯେଉଁଠାରେ ସଂଯୁକ୍ତ ସଂଘର୍ଷ ପାର୍ଟି ୧୦ ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି। ପଞ୍ଜାବକୁ ଯାଇ ଫେବୃଆରୀ ୨୦ ତାରିଖରେ ହେବାକୁ ଥିବା ନିର୍ବାଚନରେ ​​ସେମାନଙ୍କ ୧୦ ଜଣ ପ୍ରାର୍ଥୀଙ୍କ ପାଇଁ ପ୍ରଚାର କରିବାକୁ ସେ ହରିୟାଣାର ସମର୍ଥକଙ୍କୁ ନିବେଦନ କରିଛନ୍ତି। ସେ କହିଛନ୍ତି ଯେ, ପଞ୍ଜାବ ନିର୍ବାଚନ ପରେ ସେ ଉତ୍ତରପ୍ରଦେଶ ଏବଂ ଉତ୍ତରାଖଣ୍ଡରେ ବିଜେପି ପ୍ରାର୍ଥୀଙ୍କ ବିରୋଧରେ ପ୍ରଚାର କରିବେ।

ଚଢୁନି ଏକ ଭିଡିଓ ବାର୍ତ୍ତାରେ କହିଛନ୍ତି ଯେ, ଏକ ବର୍ଷରୁ ଅଧିକ ସମୟ ଧରି ଆମକୁ ଅପମାନିତ କରୁଥିବା ବ୍ୟକ୍ତିଙ୍କ ବିରୋଧରେ ଆମକୁ ବିରୋଧ କରିବାର ସୁଯୋଗ ମିଳିଛି। ଏକ ବର୍ଷରୁ ଅଧିକ ସମୟ ଧରି ଚାଷୀଙ୍କୁ ଅପମାନିତ କରୁଥିବା ବିଜେପି ବିରୋଧରେ ଭୋଟ୍ ଦେବାକୁ ସେ ଉତ୍ତରପ୍ରଦେଶର ଚାଷୀଙ୍କୁ ନିବେଦନ କରିଛନ୍ତି। ୟୁପିରେ ବିଜେପିର ପରାଜୟ ନିଶ୍ଚିତ କରିବାକୁ କୃଷକମାନଙ୍କୁ ଅନୁରୋଧ କରି ସେ ଲକ୍ଷ୍ମୀପୁର ଖେରୀର ଚାଷୀଙ୍କ ବିରୋଧରେ ଏଫଆଇଆର ପଞ୍ଜିକୃତ ହୋଇଥିବା ଚେତାବନୀ ଦେଇଛନ୍ତି। ଯଦି ୟୁପିରେ ବିଜେପି କ୍ଷମତାକୁ ଫେରିବ, ତେବେ ଅଧିକ ଚାଷୀଙ୍କୁ କାର୍ଯ୍ୟାନୁଷ୍ଠାନର ସାମ୍ନା କରିବାକୁ ପଡିବ।

ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପାଇଁ ଲକ୍ଷ୍ନୌର ସରୋଜିନୀ ନଗର ଆସନରୁ ୟୁପି ମନ୍ତ୍ରୀ ସ୍ବାତୀ ସିଂଙ୍କ ଟିକେଟ କଟାଯାଇଛି। ପୁନର୍ବାର ବିଜେପି ଦ୍ଵାରା ଟିକେଟ ନ ଦିଆଯିବା ପରେ ସ୍ବାତୀ ସିଂ କହିଛନ୍ତି ଯେ, ମୁଁ ବିଜେପିର ଏକ ଅଂଶ ଏବଂ ମୁଁ ଆଜୀବନ ରହିବି। କୌଣସି କାର୍ଯ୍ୟକର୍ତ୍ତାଙ୍କ ଉପରେ ଦଳର ନେତୃତ୍ୱ ନେଇଥିବା ନିଷ୍ପତ୍ତିକୁ ନେଇ ପ୍ରଶ୍ନ କରିବା ଉଚିତ୍ ନୁହେଁ। ଏହା ନିଶ୍ଚିତ ଭାବେ ଦଳର ଭଲ ପାଇଁ ହୋଇଥିବ।

ସ୍ଵାତୀ ସିଂ କହିଛନ୍ତି ଯେ, ମୁଁ ୧୭ ବର୍ଷ ବୟସରୁ ଦଳ ସହ ଜଡିତ ଥିଲି। ୫ ବର୍ଷର ଦାୟିତ୍ୱ ଦେଇଥିବା କେନ୍ଦ୍ରୀୟ ଏବଂ ରାଜ୍ୟ ନେତୃତ୍ୱକୁ ଧନ୍ୟବାଦ। ଭବିଷ୍ୟତରେ ଯାହା ବି ଦାୟିତ୍ଵ ଦିଆଯିବ ତାହା ପୂରଣ କରିବି। ମୁଁ ଆହୁରି ଅଧା ଜନସଂଖ୍ୟାକୁ ପ୍ରତିନିଧିତ୍ୱ କରିବି। ସେ କହିଛନ୍ତି ଯେ, ଯେତେବେଳେ ସେ ଆସିଲେ, ସେ ମହିଳା ମୋର୍ଚ୍ଚାରେ ଥିଲେ। ଏହା ଜରୁରୀ ନୁହେଁ ଯେ, ସେ ସବୁଦିନ ପାଇଁ ସେହି ସ୍ଥାନରେ ସବୁବେଳେ ରହିବେ। ମୁଁ କେବେ ସ୍ଵପ୍ନରେ ସୁଦ୍ଧା ଭାବିନଥିଲି ଯେ, ମୁଁ ଜଣେ ବିଧାୟକ ଏବଂ ମନ୍ତ୍ରୀ ହେବି। ମୋର ପ୍ରାଣ ବିଜେପି, ପ୍ରତ୍ୟେକ ଲୋମରେ ବିଜେପି, ମୁଁ ଏଠାରେ ମରିବି।

ମନ୍ତ୍ରୀ ସ୍ଵାତୀ ସିଂ କହିଛନ୍ତି ଯେ, ଯିଏ ପ୍ରାର୍ଥୀ ହେବ ମୁଁ ତାଙ୍କ ପାଇଁ କାମ କରିବି। ଆମ ଭିତରେ, ବ୍ୟକ୍ତିବିଶେଷ ନିଷ୍ପତ୍ତି ନିଅନ୍ତି ନାହିଁ, ସମଗ୍ର ଦଳ ଏକତ୍ର ନିଷ୍ପତ୍ତି ନିଅନ୍ତି। ମୁଁ ସବୁଆଡେ ବିଜେପିକୁ ସମର୍ଥନ କରିବି, ରାଜେଶ୍ୱର ସିଂ ମଧ୍ୟ ବିଜେପିର ଅଟନ୍ତି।

ସ୍ଵାତୀ ସିଂ କହିଛନ୍ତି ଯେ, ବିଜେପିରେ ଯାହା ଘଟେ, ମୁଁ ଏହାକୁ ସମର୍ଥନ କରିବି। ମୁଁ ଦୁଃଖିତ ନୁହେଁ, ଦଳର ନିଷ୍ପତ୍ତିକୁ ମୁଁ ସମର୍ଥନ କରୁଛି। ଏହା ହେଉଛି ଦୁନିଆର ସବୁଠୁ ବଡ ପାର୍ଟୀ।

ନୂଆଦିଲ୍ଲୀ: ମଣିପୁର ବିଧାନସଭା ନିର୍ବାଚନ ପୂର୍ବରୁ ବିଜେପି ଏକ ବଡ଼ ଝଟକା ଲାଗିଛି। ଗତଥର ନିର୍ବାଚନରେ ​​ଜିତିଥିବା ବିଧାୟକ ପି ଶରତଚନ୍ଦ୍ର ଆଜି କଂଗ୍ରେସରେ ଯୋଗ ଦେଇଛନ୍ତି। ବିଜେପି ତାଙ୍କୁ ଟିକେଟ ଦେଇନାହିଁ, ଏହା ପରେ ସେ ଏହି ନିଷ୍ପତ୍ତି ନେଇଛନ୍ତି। ତାଙ୍କ ସହ ବରିଷ୍ଠ ବିଜେପି ନେତା ଏନ ବିରେନ ଏବଂ ଏନ ଜୟକୁମାର ମଧ୍ୟ ଯୋଗ କଂଗ୍ରେସରେ ଦେଇଛନ୍ତି। ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିବାବେଳେ ବିଜେପି ଦାବି କରିଛି ଯେ, ଦଳରେ ସବୁକିଛି ଠିକ ଅଛି, କିନ୍ତୁ ପରିସ୍ଥିତି ଅଲଗା ଦେଖାଯାଉଛି।

ମୋଇରଙ୍ଗ ଆସନରୁ ପ୍ରତିନିଧିତ୍ୱ କରୁଥିବା ଶରତଚନ୍ଦ୍ର ବିଜେପିକୁ ପୁରୁଣା ଲୋକଙ୍କ ଅପେକ୍ଷା ନୂଆ ଲୋକଙ୍କୁ ପସନ୍ଦ କରୁଥିବା ଅଭିଯୋଗ କରିଛନ୍ତି। ସେ ସ୍ପଷ୍ଟ ଭାବରେ ଏମ ପୃଥ୍ବୀରାଜଙ୍କ ବିଷୟରେ କହୁଛନ୍ତି, ଯିଏ ଗତ ବର୍ଷ କଂଗ୍ରେସରୁ ବିଜେପିକୁ ଯାଇଥିଲେ ଏବଂ ମୋଇରାଙ୍ଗରୁ ବିଜେପି ତାଙ୍କୁ ଟିକେଟ ଦେଇଛି। ଗତ ନିର୍ବାଚନରେ ​​ପୃଥ୍ବୀରାଜ ୪୦୦ ରୁ କମ୍ ଭୋଟରେ ଶରତଚନ୍ଦ୍ରଙ୍କ ଠାରୁ ହାରିଯାଇଥିଲେ। ପୂର୍ବତନ ମନ୍ତ୍ରୀ ବିରେନ ଏବଂ ଜୟକୁମାର ମଧ୍ୟ ଟିକେଟ ନ ପାଇବା ପରେ ବିଜେପି ଛାଡିଛନ୍ତି। ମଣିପୁରରେ ୬୦ ଟି ବିଧାନସଭା ଆସନ ପାଇଁ ନିର୍ବାଚନ ଫେବୃଆରୀ ୨୭ ଏବଂ ମାର୍ଚ୍ଚ ୩ ତାରିଖରେ ଦୁଇଟି ପର୍ଯ୍ୟାୟରେ ଅନୁଷ୍ଠିତ ହେବ। ମାର୍ଚ୍ଚ ୧୦ ତାରିଖରେ ଫଳାଫଳ ଆସିବ।

କଂଗ୍ରେସ ନିର୍ବାଚନ ଦାୟିତ୍ୱରେ ଥିବା ଭକ୍ତ ଚରଣ ଦାସ ଏହି ତିନିଜଣଙ୍କୁ ସ୍ୱାଗତ କରିବା ସହ ଆଗାମୀ ନିର୍ବାଚନରେ ​​୬୦ ଟି ଆସନ ମଧ୍ୟରୁ ୪୦ ଟି ଆସନରେ ଜିତିବେ ବୋଲି କହିଛନ୍ତି। ସେହିଭଳି ଅନ୍ୟ ଦୁଇ ବିଜେପି ନେତା ଥଙ୍ଗଜାମ ଅରୁଣ କୁମାର ଏବଂ ଟି ବୃନ୍ଦା ଆଜି ଜେଡି (ୟୁ) ରେ ଯୋଗ ଦେଇଛନ୍ତି। ମଣିପୁରରେ ଶାସକ ବିଜେପିକୁ ମୁକାବିଲା କରିବା ପାଇଁ କଂଗ୍ରେସ ଅନ୍ୟ ପାଞ୍ଚଟି ରାଜନୈତିକ ଦଳ ସହ ଏକ ମେଣ୍ଟ ଗଠନ କରିଛି। ଏହି ମେଣ୍ଟର ନାମ ଏବଂ ସାଧାରଣ ସର୍ବନିମ୍ନ କାର୍ଯ୍ୟକ୍ରମ ଖୁବ୍ ଶୀଘ୍ର ଘୋଷଣା କରାଯିବ ବୋଲି ଜଣାପଡିଛି।

ଲକ୍ଷ୍ନୌ: କରହଲ ଆସନରୁ ଅଖିଳେଶ ଯାଦବଙ୍କ ବିରୋଧରେ କେନ୍ଦ୍ର ମନ୍ତ୍ରୀ ଏସପି ସିଂ ବଘେଲ ପ୍ରତିଦ୍ୱନ୍ଦ୍ୱିତା କରିବେ। ବଘେଲ ଆଜି ମେନପୁରୀ କଲେକ୍ଟରେଟରେ ପହଞ୍ଚିବା ପରେ ତାଙ୍କ ନାମାଙ୍କନପତ୍ର ଦାଖଲ କରିଛନ୍ତି। କେନ୍ଦ୍ର ଆଇନ ତଥା ରାଜ୍ୟ ମନ୍ତ୍ରୀ ଏସପି ସିଂ ବଘେଲ ଆଗ୍ରାର ଜଣେ ସାଂସଦ। ସମାଜବାଦୀ ପାର୍ଟି ସହିତ ଏସପି ସିଂ ବଘେଲ ରାଜନୀତି ଆରମ୍ଭ କରିଥିଲେ ଏବଂ ପରେ ୨୦୦୯ରେ ବିଏସପି ଯାଇଥିଲେ ଏବଂ ସେ ୨୦୧୪ ପର୍ଯ୍ୟନ୍ତ ରହିଥିଲେ। ୨୦୧୪ ରେ ସେ ବିଜେପିରେ ଯୋଗ ଦେଇଥିଲେ।

ଆଜି ଅଖିଳେଶ ଯାଦବ ମଧ୍ୟ କରହଲରେ ନାମାଙ୍କନପତ୍ର ଦାଖଲ କରିଛନ୍ତି। ଅଖିଳେଶ ଯାଦବ କହିଛନ୍ତି ଯେ, ଏହି ‘ନାମାଙ୍କନ’ ଏକ ‘ମିଶନ’। କାରଣ ଏହି ନିର୍ବାଚନ ରାଜ୍ୟ ତଥା ଦେଶର ପରବର୍ତ୍ତୀ ସମୟରେ ଇତିହାସ ଲେଖିବ। କରହଲ ବିଧାନସଭା ନିର୍ବାଚନମଣ୍ଡଳୀ ହେଉଛି ମେନପୁରୀ ସଂସଦୀୟ ନିର୍ବାଚନମଣ୍ଡଳୀର ଏକ ଅଂଶ ଯାହା ସମାଜବାଦୀ ପାର୍ଟି ପ୍ରତିଷ୍ଠାତା ମୁଲାୟମ ସିଂ ଯାଦବଙ୍କ ଦ୍ୱାରା ପ୍ରତିନିଧିତ୍ଵ ହୋଇଛି।

ଲକ୍ଷ୍ନୌ: ଉତ୍ତରପ୍ରଦେଶରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ରାଜ୍ୟର ସମସ୍ତ ପ୍ରମୁଖ ରାଜନୈତିକ ମେଣ୍ଟ ଗଠନ କରିବାରେ ଜଡିତ ଅଛନ୍ତି। ରାଜ୍ୟର କିଛି ବଡ ଚେହେରା ମଧ୍ୟ ଗୋଟିଏ ଦଳରୁ ଅନ୍ୟ ଦଳରେ ଯୋଗଦେଉଥିବାର ଦେଖାଯାଉଛି। ଏହି ସମୟରେ କଂଗ୍ରେସକୁ ସମର୍ଥନ କରୁଥିବା ଆଲା ହଜରତ ବରେଲି ସରିଫର ମୌଲାନା ତୌକିର ରଜା ଖାନଙ୍କ ବୋହୂ ନିଦା ଖାନ ବିଜେପିରେ ଯୋଗ ଦେଇଛନ୍ତି।

ବିଜେପିରେ ଯୋଗ ଦେଇଥିବା ନିଦା ଖାନ କହିଛନ୍ତି ଯେ, ‘ମୁସଲମାନ ମହିଳାମାନେ ତିନି ତଲାକ ଏବଂ ଆଇନ ଶୃଙ୍ଖଳା ଉପରେ ବିଜେପିକୁ ଭୋଟ୍ ଦେବେ’। ବର୍ତ୍ତମାନ, ନିଦା ଖାନ ମୌଲାନା ତୌକିର ରଜା ଖାନଙ୍କ ପୁତୁରା ଶିରାନ ରଜା ଖାନଙ୍କ ପତ୍ନୀ, ଯିଏ ତିନି ତଲାକ ଦେବା ପରେ ଶିରାନଙ୍କ ଘରୁ ବାହାର କରିଦିଆଯାଇଛି। ନିଦା କହିଛନ୍ତି ଯେ, ବିଜେପି ତିନି ତଲାକ ଆଇନ ପ୍ରଣୟନ କରିବା ପରେ ବର୍ତ୍ତମାନ ତିନି ତଲାକର କମ୍ ମାମଲା ଆସୁଛି।

ସେ କହିଛନ୍ତି ଯେ, ଯେତେବେଳେ ମୋ ସ୍ୱାମୀ ମୋତେ ତିନି ତଲାକ୍ ଦେଇଥିଲେ ସେତେବେଳେ ତୌକିର ରଜା ମୋତେ ସମର୍ଥନ କରିନଥିଲେ। ନିଦାଙ୍କ ଅନୁଯାୟୀ, କେବଳ ବିଜେପି ହିଁ ମହିଳାଙ୍କ ସମର୍ଥନ କରିବା କଥା କହୁଛି। ବିଜେପି ପ୍ରକୃତରେ ମହିଳା ଏବଂ ମୁସଲମାନ ମହିଳାଙ୍କ ପାଇଁ କାମ କରିଛି’। ତେଣୁ ବର୍ତ୍ତମାନ ମୁସଲମାନ ମହିଳାମାନେ ତିନି ତଲାକ ଏବଂ ଆଇନ ଶୃଙ୍ଖଳା ଉପରେ ବିଜେପିକୁ ଭୋଟ୍ ଦେବେ।

ସେପଟେ, ବିଜେପିରେ କିଛି ବଡ ଚେହେରା ଯୋଗଦେବା ପ୍ରକ୍ରିୟା ଦେଖାଯାଉଛି। ମାୟାବତୀଙ୍କ ଓଏସଡି ଗଙ୍ଗାରାମ ଆମ୍ବେଦକର ମଧ୍ୟ ତାଙ୍କ ସହକର୍ମୀଙ୍କ ସହ ବିଜେପିରେ ଯୋଗ ଦେଇଛନ୍ତି। ଅନ୍ୟପକ୍ଷରେ ଉତ୍ତରପ୍ରଦେଶର ପୂର୍ବତନ ମନ୍ତ୍ରୀ ତଥା ଚାରିଥର ବିଧାୟକ, ଏସପି ନେତା ଶିବଚରନ୍ ପ୍ରଜାପତି ଏବଂ ଏସପି, ବିଏସପି ଏବଂ କଂଗ୍ରେସର ଅନ୍ୟାନ୍ୟ ନେତା ଲକ୍ଷ୍ନୌରେ ବିଜେପିରେ ଯୋଗ ଦେଇଛନ୍ତି।

ମୁମ୍ବାଇ: ମହାରାଷ୍ଟ୍ରରେ ଶିବସେନା ଏବଂ ବିଜେପି ପୁଣି ଥରେ ମୁହାଁମୁହିଁ ହୋଇଛନ୍ତି। ଉଭୟ ପାର୍ଶ୍ୱରୁ ତୀବ୍ର ବାକଯୁଦ୍ଧ ଲାଗିରହିଛି। ଆଜି ବିଜେପି ନେତା ଦେବେନ୍ଦ୍ର ଫଡନଭିସ୍ ମହାରାଷ୍ଟ୍ର ମୁଖ୍ୟମନ୍ତ୍ରୀ ତଥା ଶିବସେନା ସଭାପତି ଉଦ୍ଧବ ଠାକରେଙ୍କୁ ଟାର୍ଗେଟ କରିଛନ୍ତି। ଫଡନଭିସ୍ କହିଛନ୍ତି, “ମୁଁ ସେମାନଙ୍କୁ ମନେ ପକାଇବାକୁ ଚାହୁଁଛି ଯେ, ମୁମ୍ବାଇରେ ବିଜେପି କାଉନସିଲର ଥିବାବେଳେ ସେମାନଙ୍କ ଦଳ (ଶିବସେନା) ଜନ୍ମ ହୋଇନଥିଲା। ସେମାନେ ଆମ ସହିତ ଥିବା ପର୍ଯ୍ୟନ୍ତ ୧ କିମ୍ବା ୨ ନମ୍ବର ପାର୍ଟି ହୋଇଥିଲେ। କିନ୍ତୁ ବର୍ତ୍ତମାନ ଶିବସେନା ୪ ନମ୍ବରରେ ରହିଛି”

ଉଲ୍ଲେଖ ଯୋଗ୍ୟ ଯେ, ପାର୍ଟି ପ୍ରତିଷ୍ଠାତା ତଥା ଉଦ୍ଧବ ଠାକରେଙ୍କ ପିତା ବାଲ ଠାକରେଙ୍କ ୯୬ ତମ ଜନ୍ମ ବାର୍ଷିକୀରେ ଶିବ ସୈନିକଙ୍କୁ ଡିଜିଟାଲ୍ ସମ୍ବୋଧନ କରି ଉଦ୍ଧବ ଠାକରେ କହିଥିଲେ ଯେ, ଶିବସେନା ଶକ୍ତି ମାଧ୍ୟମରେ ହିନ୍ଦୁତ୍ୱ ଏଜେଣ୍ଡାକୁ ଆଗେଇ ନେବା ପାଇଁ ବିଜେପି ସହିତ ହାତ ମିଳାଇଥିଲା। କାରଣ ଏହା ହିନ୍ଦୁତ୍ୱ ପାଇଁ କ୍ଷମତା ଚାହୁଁଥିଲା। ଶିବସେନା ହିନ୍ଦୁତ୍ୱକୁ କ୍ଷମତା ପାଇଁ କଦାପି ବ୍ୟବହାର କରିନଥିଲେ। ଶିବସେନା ହିନ୍ଦୁତ୍ୱ ନୁହେଁ, ବିଜେପିକୁ ଛାଡିଛି। ମୋର ବିଶ୍ୱାସ ଯେ, ବିଜେପିର ସୁବିଧାବାଦୀ ହିନ୍ଦୁତ୍ୱ କେବଳ କ୍ଷମତା ପାଇଁ। ଶିବସେନା ବିଜେପି ସହିତ ରହି ୨୫ ବର୍ଷ ନଷ୍ଟ କରିଛି ବୋଲି ଉଦ୍ଧବ କହିଥିଲେ।

ତେବେ ଉଦ୍ଧବଙ୍କ ଏହି ବିବୃତ୍ତିକୁ ନେଇ ଦେବେନ୍ଦ୍ର ଫଡନାଭିସ୍ ମଧ୍ୟ ପ୍ରତି ଆକ୍ରମଣ କରିଥିଲେ।

ମୁମ୍ବାଇ: ରବିବାର ଦିନ ମହାରାଷ୍ଟ୍ରର ମୁଖ୍ୟମନ୍ତ୍ରୀ ତଥା ଶିବସେନା ମୁଖ୍ୟ ଉଦ୍ଧବ ଠାକରେ ବିଜେପିକୁ ଟାର୍ଗେଟ କରିଛନ୍ତି। ରାଜନୈତିକ ଲାଭ ପାଇଁ ବିଜେପି ହିନ୍ଦୁତ୍ୱ ବ୍ୟବହାର କରୁଥିବା ସେ ଅଭିଯୋଗ କରିଛନ୍ତି। ତାଙ୍କ ଦଳ ରାଜ୍ୟ ବାହାରେ ବିସ୍ତାର କରିବାକୁ ଚେଷ୍ଟା କରିବ ଏବଂ ଜାତୀୟ ଭୂମିକା ହାସଲ କରିବାକୁ ଲକ୍ଷ୍ୟ ରଖିଛି। ଭାରତୀୟ ଜନତା ପାର୍ଟିର ନ୍ୟାସନାଲ ଡେମୋକ୍ରାଟିକ୍ ଆଲାଏନ୍ସ (ଏନଡିଏ) ଅକାଳୀ ଦଳ ଏବଂ ଶିବସେନା ଭଳି ପୁରୁଣା ସହଯୋଗୀମାନେ ଏଥିରୁ ବାହାରି ଆସିଛନ୍ତି।

ପାର୍ଟି ପ୍ରତିଷ୍ଠାତା ତଥା ତାଙ୍କ ପିତା ବାଲ ଠାକରେଙ୍କ ୯୬ ତମ ଜନ୍ମ ବାର୍ଷିକୀରେ ଶିବ ସୈନିକଙ୍କୁ ଡିଜିଟାଲ୍ ସମ୍ବୋଧନ କରି ଉଦ୍ଧବ ଠାକରେ କହିଛନ୍ତି ଯେ, ଶିବସେନା ଶକ୍ତି ମାଧ୍ୟମରେ ହିନ୍ଦୁତ୍ୱ ଏଜେଣ୍ଡାକୁ ଆଗେଇ ନେବା ପାଇଁ ବିଜେପି ସହିତ ହାତ ମିଳାଇଥିଲା। କାରଣ ଏହା ହିନ୍ଦୁତ୍ୱ ପାଇଁ କ୍ଷମତା ଚାହୁଁଥିଲା। ଶିବସେନା ହିନ୍ଦୁତ୍ୱକୁ କ୍ଷମତା ପାଇଁ କଦାପି ବ୍ୟବହାର କରିନଥିଲେ। ଶିବସେନା ହିନ୍ଦୁତ୍ୱ ନୁହେଁ, ବିଜେପିକୁ ଛାଡିଛନ୍ତି। ମୋର ବିଶ୍ୱାସ ଯେ, ବିଜେପିର ସୁବିଧାବାଦୀ ହିନ୍ଦୁତ୍ୱ କେବଳ କ୍ଷମତା ପାଇଁ। ଶିବସେନା ବିଜେପି ସହ ମିଳିତ ଭାବରେ ୨୫ ବର୍ଷ ବିତିଯାଇଛି। ୨୦୧୯ ମହାରାଷ୍ଟ୍ର ନିର୍ବାଚନ ପରେ ବିଜେପି ଏବଂ ଏନସିପି ଏବଂ କଂଗ୍ରେସ ସହିତ ମହା ବିକାଶ ଆଗାଡି ସରକାର ଗଠନ କରିଛି। ”

କଂଗ୍ରେସ ଏବଂ ଏନସିପି ସହ ହାତ ମିଳାଇବାର କାରଣ ଦର୍ଶାଇ ଉଦ୍ଧବ ଠାକରେ କହିଛନ୍ତି ଯେ, ଏହାର ଜାତୀୟ ଅଭିଳାଷ ପୂରଣ ପାଇଁ ଆମେ ବିଜେପିକୁ ହୃଦୟରୁ ସମର୍ଥନ କରିଥିଲୁ। ଆମ ମଧ୍ୟରେ ବୁଝାମଣା ଥିଲା ଯେ, ସେମାନେ ଜାତୀୟ ସ୍ତରକୁ ଯିବେ ଏବଂ ଆମେ ମହାରାଷ୍ଟ୍ରରେ ଆଗରେ ରହିବୁ। କିନ୍ତୁ ଆମକୁ ପ୍ରତାରଣା କରାଯାଇଥିଲା ଏବଂ ଆମ ନିଜ ଘରେ ବିଲୋପ କରିବାକୁ ଚେଷ୍ଟା କରାଯାଇଥିଲା। ତେଣୁ ଆମେ ପ୍ରତିଶୋଧ ନେଲୁ। ଠାକରେ ଅଭିଯୋଗ କରିଛନ୍ତି ଯେ, ବିଜେପି ତାର ସହଯୋଗୀଙ୍କୁ ଏହାର ସୁବିଧା ଅନୁଯାୟୀ ବ୍ୟବହାର କରୁଛି ଏବଂ ପରେ ସେମାନଙ୍କୁ ଅଲଗା କରିଦେଇଛି। ସେ କହିଛନ୍ତି, “ବିଜେପିର ଅର୍ଥ ହିନ୍ଦୁତ୍ୱ ନୁହେଁ। ମୁଁ ମୋର ବିବୃତ୍ତିରେ ଛିଡା ହୋଇଛି ଯେ, ଶିବସେନା ବିଜେପି ସହିତ ରହି ୨୫ ବର୍ଷ ନଷ୍ଟ କରିଛି।

ଲକ୍ଷ୍ନୌ: ଯଦି ଦେଶକୁ ବଞ୍ଚାଇବାକୁ ପଡିବ, ତେବେ ସଂଖ୍ୟାଗରିଷ୍ଠତା ସହ ବିଜେପିକୁ ପୁଣି ଥରେ କ୍ଷମତାକୁ ଆଣିବାକୁ ପଡିବ। ରବିବାର ଦିନ ଭାରତୀୟ ଜନତା ପାର୍ଟିରେ ଯୋଗ ଦେଇଥିବା ଅପର୍ଣ୍ଣା ଯାଦବ ଏହି କଥା କହିଛନ୍ତି। ରାଜଧାନୀ ଲକ୍ଷ୍ନୌର ଭାରତୀୟ ଜନତା ପାର୍ଟି କାର୍ଯ୍ୟାଳୟରେ ମହିଳା ମୋର୍ଚ୍ଚା ଦ୍ୱାରା ଏକ ସ୍ୱାଗତ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ରାଏବରେଲି ସଦରରୁ ପ୍ରତିଦ୍ୱନ୍ଦ୍ୱିତା କରୁଥିବା ଅଦିତି ସିଂ, ପ୍ରିୟଙ୍କା ମୌର୍ଯ୍ୟ ଏବଂ ମୁଲାୟମ ସିଂ ଯାଦବଙ୍କ ବୋହୂ ଅପର୍ଣ୍ଣାଙ୍କୁ ସ୍ୱାଗତ କରାଯାଇଥିଲା। ନିକଟରେ ଭାରତୀୟ ଜନତା ପାର୍ଟିରେ ଯୋଗ ଦେଇଥିବା ଅପର୍ଣ୍ଣା ଯାଦବ କହିଛନ୍ତି ଯେ, ରାଷ୍ଟ୍ରବାଦ ହେତୁ ମୁଁ ଭାରତୀୟ ଜନତା ପାର୍ଟିକୁ ବାଛିଛି। ଭାରତୀୟ ଜନତା ପାର୍ଟି ଦେଶର ବିକାଶ ପଥରେ ଦେଶକୁ ତ୍ୱରାନ୍ୱିତ କରିବା ସହିତ ଦେଶରେ ସଂସ୍କୃତିକୁ ରକ୍ଷା କରିବାର କାର୍ଯ୍ୟ କରିଛି।

ସେ କହିଛନ୍ତି ଯେ, ଏକ ନୂତନ ଭାରତ ନିର୍ମାଣର ଏହି ସଂକଳ୍ପରେ ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କର ଏହି ସଂକଳ୍ପରେ ରଙ୍ଗ ଭରିବା ପାଇଁ କାର୍ଯ୍ୟ କରିବି। ସେ କହିଛନ୍ତି ଯେ, ଚିନ୍ତାଧାରା ଆଗକୁ ବଢେ ଏବଂ ସେଥିପାଇଁ ଆଜି ଭାରତୀୟ ଜନତା ପାର୍ଟିର ଚିନ୍ତାଧାରା ହେତୁ ମୁଁ ଏହି ଦଳର ଏକ ଅଂଶ ଅଟେ।

ରାଏବରେଲି ସଦରରୁ ପ୍ରତିଦ୍ୱନ୍ଦ୍ୱିତା କରିଥିବା ଆଦିତି ସିଂ ଏହି ଅବସରରେ କହିଛନ୍ତି ଯେ, ବିଜେପି ତାଙ୍କ କାର୍ଯ୍ୟକାଳ ମଧ୍ୟରେ ମହିଳା-କେନ୍ଦ୍ରିକ ଯୋଜନା କାର୍ଯ୍ୟକାରୀ କରି ମହିଳାଙ୍କ ଜୀବନରେ ନୂଆ ରଙ୍ଗ ଦେଇଛି। ମହିଳା କେନ୍ଦ୍ରିକ ଯୋଜନାର ଲାଭ ପାଇ ମହିଳାମାନେ ସଶକ୍ତ ହୋଇଛନ୍ତି। ଯୋଗୀ ସରକାର ଉଜ୍ଜ୍ଵଳା ଯୋଜନା, ବେଟି ବଚାଓ ବେଟି ପଢାଓ, କନ୍ୟା ସୁମଙ୍ଗଳ ଯୋଜନା, ମୁଖ୍ୟମନ୍ତ୍ରୀଙ୍କ ସାମୁହିକ ବିବାହ ଯୋଜନା, ନିରାଶ୍ରିତ ମହିଳା ପେନ୍ସନ୍ ଯୋଜନା, ସ୍ଵୟଂ ସହାୟକ ଗୋଷ୍ଠୀ, ଜାତୀୟ ଜୀବିକା ମିଶନ ମାଧ୍ୟମରେ ଅନେକ କଲ୍ୟାଣମୂଳକ ଯୋଜନା ମାଧ୍ୟମରେ ମହିଳାମାନଙ୍କୁ ସିଧାସଳଖ ଉପକୃତ କରିବାକୁ କାର୍ଯ୍ୟ କରିଛନ୍ତି।

ସେ କହିଛନ୍ତି ଯେ, ପୂର୍ବ ସରକାର ଯାହା ମହିଳାମାନଙ୍କ ପାଇଁ ଏହି ଯୋଜନା କାର୍ଯ୍ୟକାରୀ କରିବା ତ ଦୂର କଥା, ସେମାନଙ୍କ ହିତ ବିଷୟରେ ଚିନ୍ତା କରିନାହାଁନ୍ତି। ଏହା ବ୍ୟତୀତ ବିଜେପି ମହିଳାଙ୍କ ଅଧିକାର ବିଷୟରେ ଚିନ୍ତା କରୁଥିବାବେଳେ ସେମାନଙ୍କୁ ସମାଜର ମୁଖ୍ୟ ସ୍ରୋତରେ ଯୋଡିବା ପାଇଁ ମଧ୍ୟ କାର୍ଯ୍ୟ କରିଥିଲା।

ଏହି କାର୍ଯ୍ୟକ୍ରମରେ ଯୋଗ ଦେଇଥିବା ପ୍ରିୟଙ୍କା ମୌର୍ଯ୍ୟ କହିଛନ୍ତି ଯେ, ସମାଜ ତଥା ଦେଶର ସ୍ୱାର୍ଥ ପାଇଁ ମୁଁ ଭାରତୀୟ ଜନତା ପାର୍ଟିକୁ ବାଛିଛି। ମୁଁ ସବକା ସାଥ ସବକା ବିକାଶ ମନ୍ତ୍ରରେ କାର୍ଯ୍ୟ କରିବାକୁ ସଂକଳ୍ପ ସହିତ କାର୍ଯ୍ୟ କରିବି। ସେ କହିଛନ୍ତି ଯେ ଏହି ପାର୍ଟୀ କୌଣସି ଜଣଙ୍କର ନୁହେଁ କିମ୍ବା ଦଳ ସବୁ ଶ୍ରେଣୀର ଲୋକଙ୍କୁ ନେଇ ଏକ ପାର୍ଟୀ ଅଟେ। ଏହି ପାର୍ଟୀରେ ମହିଳାମାନଙ୍କର ସମ୍ମାନ ସର୍ବାଧିକ, ଯେଉଁଥିପାଇଁ ମୁଁ ଏହି ପାର୍ଟିକୁ ବାଛିଛି।

ଲକ୍ଷ୍ନୌ: ଉତ୍ତରପ୍ରଦେଶର ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ଏବଂ ସମାଜବାଦୀ ପାର୍ଟି ଏକ ବଡ଼ ଧରଣର ଅସୁବିଧାର ସମ୍ମୁଖୀନ ହୋଇଛନ୍ତି। କଂଗ୍ରେସର ପୋଷ୍ଟର ଝିଅ ପ୍ରିୟଙ୍କା ମୌର୍ଯ୍ୟ ବିଜେପିରେ ଯୋଗ ଦେଇଛନ୍ତି। ଏଥି ସହିତ ପୂର୍ବତନ ଏସପି ବିଧାୟକ ତଥା ମୁଲାୟମ ସିଂ ଯାଦବଙ୍କ ଘନିଷ୍ଠ ସମ୍ପର୍କୀୟ ପ୍ରମୋଦ ଗୁପ୍ତା ମଧ୍ୟ ବିଜେପିରେ ଯୋଗ ଦେଇଛନ୍ତି।

ଗତକାଲି ଏସପି ପ୍ରତିଷ୍ଠାତା ମୁଲାୟମ ସିଂ ଯାଦବଙ୍କ ବୋହୂ ଅପର୍ଣ୍ଣ ଯାଦବ ବିଜେପିରେ ଯୋଗ ଦେଇଥିଲେ।

ବିଜେପିରେ ଯୋଗଦେବା ପରେ ପୂର୍ବତନ ଏସପି ବିଧାୟକ ପ୍ରମୋଦ ଗୁପ୍ତା ଅଭିଯୋଗ କରିଛନ୍ତି ଯେ, ଅଖିଳେଶ ଯାଦବ ମୁଲାୟମ ସିଂ ଯାଦବଙ୍କୁ ବନ୍ଧକ ରଖିଛନ୍ତି ଏବଂ ଦଳରେ ତାଙ୍କର ସ୍ଥିତି ଅତ୍ୟନ୍ତ ଖରାପ। ସମାଜବାଦୀ ପାର୍ଟିରେ ଅପରାଧୀ ଏବଂ ଜୁଆ ଖେଳାଳିଙ୍କୁ ଅନ୍ତର୍ଭୁକ୍ତ କରାଯାଇଛି।

ଏଥିସହିତ ବିଜେପିରେ ଯୋଗଦେବା ପରେ ପ୍ରିୟଙ୍କା ମୌର୍ଯ୍ୟ କହିଛନ୍ତି ଯେ, କଂଗ୍ରେସ ସ୍ଲୋଗାନ ଦେଇଛି, ମୁଁ ଜଣେ ଝିଅ, ମୁଁ ଲଢିପାରେ, କିନ୍ତୁ ଲଢିବାକୁ ସୁଯୋଗ ଦେଇ ନାହିଁ। କଥାବାର୍ତ୍ତାରେ କାମ ଚଳିବ ନାହିଁ, ମହିଳାମାନଙ୍କୁ ଅଧିକାର ଦେବାକୁ ପଡିବ।

ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଅଖିଳେଶ ଯାଦବଙ୍କୁ ବଡ ଝଟକା ଲାଗିଛି। ଅଖିଳେଶଙ୍କ ଭାଇବୋହୁ ଅପର୍ଣ୍ଣା ଯାଦବ ଆଜି ବିଜେପିରେ ଯୋଗ ଦେଇଛନ୍ତି। ଉପ-ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କ ଉପସ୍ଥିତିରେ ଅପର୍ଣ୍ଣା ଯାଦବ ବିଜେପିରେ ଯୋଗ ଦେଇଛନ୍ତି। ଏହି ଅବସରରେ ସେ ସମାଜବାଦୀ ପାର୍ଟି ଉପରେ ମଧ୍ୟ ଘୋର ଆକ୍ରମଣ କରିଛନ୍ତି।

ଗୁଣ୍ଡାଗର୍ଦ୍ଦି ବିଷୟରେ ଉଲ୍ଲେଖ କରି ଅପର୍ଣ୍ଣା ସିଂ ଏସପିକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, “ଏସପିର ଶାସନ କାଳରେ ଅରାଜକତାକୁ ଏତେ ଗୁରୁତ୍ୱ ଦିଆଯାଉଛି ଯେ ଭଉଣୀ ଓ ଝିମାନେ ସୁରକ୍ଷିତ ନୁହଁନ୍ତି। ଘରର କବାଟ ସନ୍ଧ୍ୟାରେ ବନ୍ଦ ହୋଇଯାଉଥିଲା। ଦେଶ ମୋ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ, ସେଥିପାଇଁ ମୁଁ ସର୍ବଦା ପ୍ରଧାନମନ୍ତ୍ରୀଙ୍କ ଦ୍ଵାରା ପ୍ରଭାବିତ ହୋଇଛି। ଏହି ସମୟରେ କେଶବ ପ୍ରସାଦ ମୌର୍ଯ୍ୟ କହିଛନ୍ତି ଯେ, “ଅଖିଳେଶ ଜୀ ରାଜ୍ୟ ମୁଖ୍ୟମନ୍ତ୍ରୀ ଭାବରେ ବିଫଳ ହେବା ସହିତ ପରିବାରରେ ମଧ୍ୟ ବିଫଳ ହୋଇଛନ୍ତି। ସେଥିପାଇଁ ସେ ବିଧାନସଭା ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିବାକୁ ମଧ୍ୟ ଏଡ଼ାଉଛନ୍ତି।”

ଉଲ୍ଲେଖ ଯୋଗ୍ୟ ଯେ, ଅପର୍ଣ୍ଣା ଯାଦବ ଲକ୍ଷ୍ନୌ କ୍ୟାଣ୍ଟ ଆସନରୁ ପ୍ରତିଦ୍ୱନ୍ଦ୍ୱିତା କରିବାକୁ ଚାହୁଁଥିଲେ, କିନ୍ତୁ ସମାଜବାଦୀ ପାର୍ଟିରେ ଥିବା ବେଳେ ଏହା ସମ୍ଭବ ହୋଇପାରୁନଥିଲା। ଅଖିଳେଶ ଯାଦବ କହିଥିଲେ ଯେ, ସେ କୌଣସି ପରିବାର ସଦସ୍ୟଙ୍କୁ ଟିକେଟ୍ ଦେବେ ନାହିଁ। ଏହା ଉପରେ ଅପର୍ଣ୍ଣା ଏବଂ ଅଖିଳେଶ ଯାଦବଙ୍କ ମଧ୍ୟରେ ମତଭେଦ ଆରମ୍ଭ ହୋଇଥିଲା। ପରେ ଖବର ପ୍ରକାଶ ପାଇଲା ଯେ ଅପର୍ଣ୍ଣା ବିଜେପି ନେତାଙ୍କ ସହ ଯୋଗାଯୋଗରେ ଅଛନ୍ତି ଏବଂ ଖୁବ୍ ଶୀଘ୍ର ଦଳ ଛାଡି ବିଜେପିରେ ଯୋଗ ଦେଇପାରନ୍ତି। ଯାହା ବର୍ତ୍ତମାନ ସତ୍ୟ ବୋଲି ପ୍ରମାଣିତ ହୋଇଛି।