ଭୁୁବନେଶ୍ୱର: ୧୯୭୧ ମସିହାରେ ଭାରତ ଓ ପାକିସ୍ତାନ ମଧ୍ୟରେ ଅନୁଷ୍ଠିତ ଯୁଦ୍ଧର ୫୦ ବର୍ଷ ପୂର୍ତି ଉପଲକ୍ଷେ ଯାତ୍ରା କରୁଥିବା ଭାରତର ବିଜୟ ଗୌରବ ପାଳନର ସ୍ମାରକୀ “ସ୍ୱର୍ଣ୍ଣିମ ବିଜୟ ମଶାଲ”କୁ ଆଜି ସକାଳେ ଭୁବନେଶ୍ୱର ଓଡିଶା କୃଷି ଓ ବୈଷୟିକ ବିଶ୍ୱ ବିଦ୍ୟାଳୟ ପରିସରରେ ସ୍ୱାଗତ କରାଯାଇଛି ।
ଆଜି ୧୨୦ ବାଟାଲିୟନସ୍ଥିତ ଆର୍ମି ଷ୍ଟେସନ ହେଡ୍କ୍ୱାର୍ଟର୍ସଠାରୁ ବିଜୟ ମଶାଲ ଯାତ୍ରା କରି ଓ.ୟୁ.ଓ.ଟିରେ ପହଁଚିବା ପରେ ଓଡିଶା ଏନ.ସି.ସି ନିର୍ଦ୍ଦେଶାଳୟର ଉପ ନିର୍ଦ୍ଦେଶକ କମୋଡର ସୋମେନ୍ ବାନାର୍ଜୀ ଏବଂ ବିଶ୍ୱବ୍ୟିାଳୟର କୁଳପତି ଡଃ. ପୱନ କୁମାର ଅଗ୍ରୱାଲଏହାକୁ ଗ୍ରହଣ କରିଥିଲେ । ଦେଶର ସୁରକ୍ଷା ଏବଂ ପଡୋଶୀ ବାଂଗଲା ଦେଶର ସ୍ୱାଧୀନତା ପାଇଁ ପ୍ରାଣବଳି ଦେଇଥିବା ବୀର ଯୋଦ୍ଧାଙ୍କ ଉଦ୍ଦେଶ୍ୟରେ ବିଶ୍ୱବ୍ୟିାଳୟର କୁଳପତିଙ୍କ ସମେତ ଅନ୍ୟ ଅତିଥିମାନେ ଏହି ସ୍ୱର୍ଣ୍ଣିମ ବିଜୟ ମଶାଲ ନିକଟରେ ପୁଷ୍ପଗୁଚ୍ଛ ଦେଇ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ।
ପରେ ପରେ ସ୍ୱର୍ଣ୍ଣିମ ବିଜୟ ବର୍ଷ ପାଳନ ଉପଲକ୍ଷେ ବିଶ୍ୱବିଦ୍ୟାଳୟର ଏମ୍.ଏସ୍.ସ୍ୱାମୀନାଥନ ହଲ୍ ଠାରେ ଆୟୋଜିତ ଏକ ସାଧାରଣ ସଭାରେ ଛାତ୍ରଛାତ୍ରୀମାନଙ୍କୁ ଉଦ୍ବୋଧନ ଦେଇ କୁଳପତି ଡଃ. ଅଗ୍ରୱାଲ କହିଲେ ଯେ, ସ୍ୱର୍ଣ୍ଣିମ ବିଜୟ ମଶାଲ ବିଶ୍ୱ ବିଦ୍ୟାଳୟକୁ ଆସିବା ଆମ ପାଇଁ ଅତ୍ୟନ୍ତ ଗୌରବର ବିଷୟ । ପ୍ରତିରକ୍ଷା ବିନା ଦେଶର ସୁରକ୍ଷା ଓ ଉନ୍ନତି ସମ୍ଭବ ନୁହେଁ । ଦେଶପାଇଁ ୧୯୭୧ ଯୁଦ୍ଧରେ ଯେଉଁ ବୀର ଯବାନମାନେ ପ୍ରାଣବଳି ଦେଇଛନ୍ତି, ସେମାନଙ୍କ ଆତ୍ମୋତ୍ସର୍ଗ ପ୍ରତି ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରିବା ସହ ବୀର ଯୋଦ୍ଧାଙ୍କ ବୀରତ୍ୱ ଓ ଯୁଦ୍ଧର ସଫଳତା ପାଇଁ ଆମେ ସେମାନଙ୍କୁ ସଶ୍ରଦ୍ଧ ସମ୍ମାନ ଜଣାଉଛୁ ବୋଲି କୁଳପତି ଡଃ ଅଗ୍ରୱାଲ ପ୍ରକାଶ କରିଥିଲେ ।
କମୋଡର ଏସ୍.ବାନାର୍ଜୀ ୧୯୭୧ ଯୁଦ୍ଧ ସଂପର୍କରେ ବିଶଦ୍ ଭାବେ ବର୍ଣ୍ଣନା କରି କହିଲେ ଯେ, ଆମ୍ଭେମାନେ କେବଳ ଉତ୍ସବ ପାଳନରେ ସୀମିତ ନରହି ଯେଉଁ ବୀର ଯବାନମାନେ ଦେଶପାଇଁ ପ୍ରାଣବଳି ଦେଇଛନ୍ତି ଏବଂ ଦେଶର ସୁରକ୍ଷାରେ ନିୟୋଜିତ ରହିଛନ୍ତି, ସେମାନଙ୍କୁ ପ୍ରତିଦିନ ମନେ ପକାଇବାର ଆବଶ୍ୟକତା ରହିଛି । ଅନ୍ୟମାନଙ୍କ ମଧ୍ୟରେ ଲେଫ୍ଟନାଣ୍ଟ କର୍ଣ୍ଣେଲ ଶିବକୁମାର ମିଶ୍ର( ବିଶ୍ୱ ବିଦ୍ୟାଳୟର ଆଲୁମିନି), ଓୟୁଏଟିର ରେଜିଷ୍ଟ୍ରାର ଶ୍ରୀମତୀ ଲୋପାମୁଦ୍ରା ମହାନ୍ତି , ଡିନ୍ ,ଷ୍ଟୁଡେଣ୍ଟସ୍ େଓଲ୍ୱଫେୟାର ଡଃ. ଏଲ୍.କେ.ବାବୁ ପ୍ରମୁଖ ଉପସ୍ଥିତ ଥିଲେ ।
ସ୍ୱର୍ଣ୍ଣିମ ବିଜୟ ବର୍ଷ ପାଳନ ଓ ବିଜୟ ମଶାଲକୁ ସ୍ୱାଗତ ପରିପ୍ରେକ୍ଷୀରେ ବିଶ୍ୱ ବିଦ୍ୟାଳୟ ଛାତ୍ରଛାତ୍ରୀମାନଙ୍କ ଦ୍ୱାରା ୧୯୭୧ ଯୁଦ୍ଧ ସଂପର୍କିତ ଦେଶାତ୍ମବୋଧକ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ତତ୍ ସହିତ ଅନୁଷ୍ଠିତ ଓଡିଆ ପ୍ରବନ୍ଧ ଓ ଇଂରାଜୀ ବକ୍ତୃତା ପ୍ରତିଯୋଗିତାର କୃତି ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା । ଏନ୍,ସି.ସି ସ୍ୱେଚ୍ଛାସେବୀ, ଏନ୍.ଏସ୍.ଏସ୍ ସ୍ୱେଚ୍ଛାସେବୀମାନଙ୍କ ସହଯୋଗରେ କୋଭିଡ୍ କଟକଣା ଅନୁପାଳନ ପୂର୍ବକ ଏହି ଉତ୍ସବ ପାଳନ କରାଯାଇଥିଲା । ପରେ ପରେ ବିଜୟ ମଶାଲକୁ ଭବ୍ୟ ସମ୍ମାନର ସହିତ ୧୨୦ ବାଟାଲିୟନକୁ ପ୍ରତ୍ୟାବର୍ତନ କରାଯାଇଥିଲା ।
ଅପରାହ୍ଣରେ ବିଜୟ ମଶାଲ ୧୯୭୧ ଯୁଦ୍ଧରେ ଅଂଶ ଗ୍ରହଣ କରିଥିବା ୫ ଜଣ ବୀର ଯୋଦ୍ଧା ଯଥା ଉଇଙ୍ଗ କମାଣ୍ଡର ଅଶୋକ କୁମାର ମହାନ୍ତି, ସ୍ୱର୍ଗତ ବ୍ରିଗେଡିୟର ନାରାୟଣ ନାୟକଙ୍କ ପତ୍ମୀ ଶ୍ରୀମତୀ ସୁନନ୍ଦା ନାୟକ, ସ୍ୱର୍ଗତ କର୍ଣ୍ଣେଲ ମହୀ ପ୍ରସାଦ ମହାନ୍ତିଙ୍କ ପତ୍ମୀ ଶ୍ରୀମତୀ ବିଜୟଲକ୍ଷ୍ମୀ ମହାନ୍ତି, ଲେଫଟନାଣ୍ଟ କର୍ଣ୍ଣେଲ ଶରତ କୁମାର ମହାପାତ୍ର ଏବଂ ବ୍ରିଗେଡିୟର ରାଜ ପଣ୍ଡାଙ୍କ ବାସଗୃହକୁ ଯାତ୍ରା କରିଥିଲା । ସମସ୍ତ ସ୍ଥାନରେ ବିଜୟ ମଶାଲକୁ ଭବ୍ୟ ସ୍ୱାଗତ କରାଯିବା ସହିତ ବୀର ଯୋଦ୍ଧାମାନେ ସେମାନଙ୍କର ୧୯୭୧ ଯୁଦ୍ଧରେ ଅଂଶଗ୍ରହଣ ସମୟର ଓ ଅନୁଭୂତି ସଂପର୍କରେ ବ୍ୟାଖ୍ୟା କରିଥିଲେ ।