ପାଟନା, ଗୋଟିଏ ପରିବାରର 4 ଜଣଙ୍କୁ ଗଳାକାଟି ହତ୍ୟା କରାଯାଇଛି। ଏପରି ଏକ ଚାଞ୍ଚଲ୍ୟକର ଘଟଣା ବିହାରର ନାଳନ୍ଦା ଜିଲ୍ଲା ପାରବଲପୁର ଅଞ୍ଚଳରେ ଘଟିଛି। ଗୋଟିଏ ଘରୁ ପ୍ରବଳ ଦୁର୍ଗନ୍ଧ ବାହାରିବାରୁ ସେଠାକାର ପଡୋଶୀ ପୋଲିସକୁ ଫୋନ କରିଥିଲେ। ପୋଲିସ ଘଟଣାସ୍ଥଳରେ ପହଁଚିବା ପରେ ଭିତରପଟୁ କବାଟ ବନ୍ଦ ଥିବାର ଦେଖିବାକୁ ମିଳିଥିଲା। କବାଟ ବାଡାଇବାରେ କେହି ନ ଖୋଲିବାରୁ ପୋଲିସ ତାହାକୁ ଭାଙ୍ଗି ଭିତରେ ପଶିଥିଲା। ଭିତରେ ଚଟାଣ ଉପରେ ଚାରୋଟି ମୃତ ଶରୀର ପଡିଥିବାର ଦେଖିବାକୁ ପାଇଥିଲା। ସମସ୍ତଙ୍କର ଗଳାରେ କଟା ଚିହ୍ନ ରହିଥିଲା।
ଅନୁସନ୍ଧାନ ପରେ ସେମାନଙ୍କ ପରିଚୟ ମିଳିଥିଲା। ଜଣେ ହେଉଛନ୍ତି ନେହା କୁମାରୀ ଯାହାଙ୍କ ବୟସ 41 ବର୍ଷ, ଆଉ ଜଣେ ରବି କୁମାର ଯାହାଙ୍କ ବୟସ 46 ହେବ। ସେହିପରି ଆହାନ କୁମାର ଯାହାଙ୍କ ବୟସ 14 ଏବଂ ଜେନି କୁମାରୀ ବୟସ 17 ହେବ। ଏମାନେ ସମସ୍ତେ ସଂପର୍କୀୟରେ ସ୍ବାମୀ ସ୍ତ୍ରୀ ଏବଂ ଭଇ ଭଉଣୀ ବୋଲି ଜଣାପଡିଥିଲା। ନେହା କୁମାରୀ ପାରବଲପୁର ସରକାରୀ ବିଦ୍ୟାଳୟର ଶିକ୍ଷୟତ୍ରୀ । ଶବଗୁଡିକରୁ ପ୍ରବଳ ଦୁର୍ଗନ୍ଧ ବାହାରିବା ସହ ପଚିଯାଇଥିଲା। ପୋଲିସ ଶବଗୁଡିକ ଜବତ କରି ବ୍ୟବଚ୍ଛେଦ ପାଇଁ ପଠାଇଛନ୍ତି।
ରବି କୁମାରଙ୍କ ବାପା ରାଜେନ୍ଦ୍ର ପାଶୱାନ କହିଛନ୍ତି ଯେ, ସେ ତାଙ୍କ ପୁଅଙ୍କୁ ବହୁଦିନ ଧରି ମୋବାଇଲରେ ଯୋଗାଯୋଗ କରିଥିଲେ ମଧ୍ୟ ସମ୍ଭବ ହୋଇ ନ ଥିଲା। ତାଙ୍କର ମୋବାଇଲ ସୁଇଚ ଅଫ ରହିଥିଲା ବୋଲି ସେ ପୋଲିସଙ୍କୁ କହିଛନ୍ତି।
ନାଳନ୍ଦା ଏସପି ନୀଳେଶ କୁମାର କହିଛନ୍ତି ଏହି ହତ୍ୟାକାଣ୍ଡ ଉପରେ ତଦନ୍ତ ଚାଲିଛି। ଖୁବଶିଘ୍ର ହତ୍ୟାକାରୀଙ୍କୁ ଧରାଯିବ।