କେନ୍ଦ୍ରାପଡା: ବୁଲା କୁକୁରକୁ ଜନୈକ ବ୍ୟକ୍ତି ପିଟିପିଟି ମାରିଦେଇଥିବା ଅଭିଯୋଗ ହୋଇଛି। ଏନେଇ ଅଭିଯୁକ୍ତକୁ ପୋଲିସ ଗିରଫ କରିଛି। କେନ୍ଦ୍ରାପଡା ଜିଲ୍ଲାରେ ଏଭଳି ଏକ ଘଟଣା ସାମ୍ନାକୁ ଆସିଛି।
ସୂଚନା ଅନୁଯାୟୀ, ପ୍ରହରାଜପୁର ଗ୍ରାମରେ ବାବୁଲା ସିଂହ (୫୦) ନାମକ ବ୍ୟକ୍ତିଙ୍କ ବିରୋଧରେ ବୁଲା କୁକୁରକୁ ମାରିଥିବା ଅଭିଯୋଗ ହୋଇଥିଲା। ପାଳିତ ଦୁଇଟି କୁକୁଡାକୁ ବୁଲା କୁକୁରଟି ମାରିଥିବାରୁ ବାବୁଲା କ୍ରୋଧାନ୍ଵିତ ହୋଇଯାଇଥିଲା। ସେ ଉକ୍ତ କୁକୁରଟି କୁ ପିଟିପିଟି ମାରିଦେଇଥିଲା।
ବାବୁଲା କୁକୁରଟିକୁ ମାରିଥିବାର ଏକ ଭିଡିଓ ଭାଇରାଲ ହେବା ପରେ ପୋଲିସ କାର୍ଯ୍ୟାନୁଷ୍ଠାନ ନେଇଥିଲା। ତାଙ୍କ ବିରୋଧରେ ଆଇପିସି ଧାରା ୪୨୯ ଅନୁଯାୟୀ ଅଭିଯୋଗ ହୋଇଛି। ବାବୁଲାଙ୍କୁ ଏହି ଘଟଣାରେ ପୋଲିସ ଗିରଫ କରି ଜେଲ ପଠାଇଦେଇଛି।