ଚିଲିକା: ଭୁଜାଲି ଚୋଟରେ ରାଜସ୍ୱ କର୍ମଚାରୀ ଗୁରୁତର ହୋଇଛନ୍ତି। ଗୁରୁତର କର୍ମଚାରୀ ହେଲେ ମନୋଜ ହରିଚନ୍ଦନ (୪୬ ବର୍ଷ)। ଚିଲିକା ତହସିଲ କାର୍ଯାଳୟ ଅନ୍ତର୍ଗତ ସୋରଣ ରାଜସ୍ୱ ନିରୀକ୍ଷକ କାର୍ଯ୍ୟାଳୟରେ ଚତୁର୍ଥ ଶ୍ରେଣୀ କର୍ମଚାରୀ ପିଅନ ଭାବେ ସେ କାମ କରୁଛନ୍ତି।
ସୂଚନା ଅନୁଯାୟୀ, ଜାଗା ବାଡ଼ି ମାପ ଚିହ୍ନଟକୁ ନେଇ ତହସିଲ କାର୍ଯ୍ୟାଳୟ ପକ୍ଷରୁ ମନୋଜ ହରିଚନ୍ଦନ ନୋଟିସ ପ୍ରଦାନ କରିଥିଲେ। ଏହାକୁ ନେଇ ଅଭିଯୁକ୍ତଜଣଙ୍କ ଉତ୍ତ୍ୟକ୍ତ ହୋଇପଡିଥିଲେ। ଯେତେବେଳେ ମନୋଜ ଅଫିସ ଗେଟ ଖୋଲିଥିଲେ, ସେତେବେଳେ ଟୁଟୁ ମହାରଣା ନାମକ ବ୍ୟକ୍ତି ତାଙ୍କୁ ଭୁଜାଲିରେ ଆକ୍ରମଣ କରିଥିଲେ। ଭୁଜାଲି ଚୋଟ ଯୋଗୁଁ ବେକ, ହାତ, ଛାତି, ଗୋଡ଼, ପେଟରେ ତାଙ୍କର ଗଭୀର କ୍ଷତ ଲାଗିଥିଲା। ଏହା ଯୋଗୁଁ ତାଙ୍କର ପ୍ରବଳ ରକ୍ତ ସ୍ରାବ ହୋଇଥିଲା।
ଏହାପରେ ସେ ଅତି ଗୁରୁତର ହେବାରୁ ତାଙ୍କୁ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିଲା।
ଖବର ପାଇ ଟାଙ୍ଗୀ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରି ଅଭିଯୁକ୍ତକୁ ନିଜ ହେପାଜତକୁ ନେଇଛି। ଟାଙ୍ଗୀ ଥାନା ଆଇଆଇସି ସୁଶାନ୍ତ କୁମାର ବେହେରା ଏନେଇ ସୂଚନା ଦେଇଛନ୍ତି।