ଭୁବନେଶ୍ୱର: ସୁସ୍ଥ ଖାଦ୍ୟ ସମସ୍ତଙ୍କ ପାଇଁ ଜରୁରୀ। କିନ୍ତୁ ଦେଶର ତିନି ଚତୁର୍ଥାଂଶ ଲୋକ ଏହାର ବ୍ୟବସ୍ଥା କରିପାରୁନାହାନ୍ତି। ମିଳିତ ଜାତିସଂଘର ଖାଦ୍ୟ ଓ କୃଷି ସଂଗଠନ (ଏଫ୍ଏଓ)ର ନିକଟରେ ପ୍ରକାଶିତ ରିପୋର୍ଟରୁ ଏହି ସୂଚନା ମିଳିଛି।
ରିପୋର୍ଟ ଅନୁଯାୟୀ, ୨୦୨୦ରେ ଭାରତରେ ୭୬% ଲୋକ ସ୍ୱାସ୍ଥ୍ୟକର ଖାଦ୍ୟର ବ୍ୟବସ୍ଥା କରିବାରେ ଅସମର୍ଥ। ୨୦୨୧ରେ ସାମାନ୍ୟ ଉନ୍ନତି ସହିତ ୭୪% ଅର୍ଥାତ୍ ୧୦୦ କୋଟିରୁ ଅଧିକ ଲୋକଙ୍କୁ ସ୍ୱାସ୍ଥ୍ୟକର ଖାଦ୍ୟ ମିଳୁନାହିଁ।
ଷ୍ଟେଟ୍ ଅଫ୍ ଫୁଡ୍ ସିକ୍ୟୁରିଟି ଆଣ୍ଡ୍ ନ୍ୟୁଟ୍ରିସନ୍ (ଏସ୍ଓଏଫ୍ଆଇ) ୨୦୨୩ ଶୀର୍ଷକ ଏହି ରିପୋର୍ଟରେ କୁହାଯାଇଛି ଯେ ସେହି ସମୟ ମଧ୍ୟରେ ଖାଦ୍ୟ ସାମଗ୍ରୀର ମୂଲ୍ୟ ଯେତିକି ବେଗରେ ବୃଦ୍ଧି ପାଇଛି, ସେହିଭଳି ଆୟ ବୃଦ୍ଧି ହୋଇପାରି ନାହିଁ।
ପଡ଼ୋଶୀ ଦେଶ ତୁଳନାରେ ଭାରତରେ ପୁଷ୍ଟିକର ଖାଦ୍ୟ ଶସ୍ତା
୨୦୨୧ରେ ଭାରତରେ ବ୍ୟକ୍ତି ପିଛା ସୁସ୍ଥ ଖାଦ୍ୟର ଦୈନିକ ଖର୍ଚ୍ଚ ପ୍ରାୟ ୨୫୦ ଟଙ୍କା ଥିଲା। ବାଂଲାଦେଶରେ ଏହାର ମୂଲ୍ୟ ୨୬୭ ଟଙ୍କା ଥିବାବେଳେ ପାକିସ୍ତାନରେ ଏହାର ମୂଲ୍ୟ ୩୨୫ ଟଙ୍କା ରହିଛି। ଭୁଟାନରେ ସ୍ୱାସ୍ଥ୍ୟକର ଖାଦ୍ୟର ମୂଲ୍ୟ ୪୪୧ ଟଙ୍କା, ନେପାଳରେ ସୁସ୍ଥ ଖାଦ୍ୟର ମୂଲ୍ୟ ୩୮୩ ଟଙ୍କା, ଶ୍ରୀଲଙ୍କାରେ ୩୫୦ ଟଙ୍କା ରହିଛି। ପଡ଼ୋଶୀ ପାକିସ୍ତାନରେ ୮୨% ଲୋକ ସ୍ୱାସ୍ଥ୍ୟକର ଖାଦ୍ୟ କିଣିବାକୁ ଅସମର୍ଥ ଥିବାବେଳେ ବାଂଲାଦେଶରେ ୬୬% ଲୋକ ସ୍ୱାସ୍ଥ୍ୟକର ଖାଦ୍ୟ କିଣିବାକୁ ଅସମର୍ଥ।
୫ ବର୍ଷରୁ କମ୍ ବୟସର ୨୦ ନିୟୁତରୁ ଅଧିକ ଶିଶୁଙ୍କ ଓଜନ କମ୍
୨୦୨୨ମସିହାରେ ଭାରତରେ ଶିଶୁମାନଙ୍କର ଅପଚୟ ହାର (ଉଚ୍ଚତା ତୁଳନାରେ କମ୍ ଓଜନ) ସର୍ବାଧିକ ଥିଲା। ଏଠାରେ ପାଞ୍ଚ ବର୍ଷରୁ କମ୍ ବୟସର ୨.୧ କୋଟି (୧୮.୭%) ଶିଶୁ ଏହି ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ହେଉଥିଲେ। ଭୁଟାନରେ ଏଭଳି କୌଣସି ମାମଲା ଦେଖିବାକୁ ମିଳିନଥିଲା। ଆଫଗାନିସ୍ତାନରେ ଏହି ହାର ୩ ଲକ୍ଷ, ବାଂଲାଦେଶରେ ୧୪ ଲକ୍ଷ, ଇରାନରେ ୩ ଲକ୍ଷ, ନେପାଳରେ ୨୦ ଲକ୍ଷ, ଶ୍ରୀଲଙ୍କାରେ ୩ ଲକ୍ଷ ଓ ପାକିସ୍ତାନରେ ୨୧ ଲକ୍ଷ ରହିଛି।
୦-୫ ମାସର ଶିଶୁଙ୍କ ମଧ୍ୟରେ ସ୍ତନ୍ୟପାନ କ୍ଷେତ୍ରରେ ଭାରତ ୬୩.୭%କୁ ଉନ୍ନତ ହୋଇଛି, ଯାହାକି ବିଶ୍ୱର ହାରାହାରି ୪୭.୭% ତୁଳନାରେ ଅଧିକ। ତେବେ ଦକ୍ଷିଣ ଏସିଆରେ ଭାରତରେ କମ୍ ଓଜନ ମାମଲା (୨୭.୪%) ସର୍ବାଧିକ ରହିଛି। ଏହା ପଛକୁ ବାଂଲାଦେଶ ଓ ନେପାଳ ରହିଛି। ଦେଶରେ ୧୫ରୁ ୪୯ ବର୍ଷ ବୟସର ୫୩% ମହିଳା ରକ୍ତହୀନତାରେ ପୀଡ଼ିତ ଥିଲେ, ଯାହାକି ଦକ୍ଷିଣ ଏସିଆରେ ସର୍ବାଧିକ ଥିଲା।
୭୩୫ ନିୟୁତ ଲୋକ ଭୋକ ଉପାସରେ ଅଛନ୍ତି, ସେମାନଙ୍କ ମଧ୍ୟରୁ ୪୦କୋଟି ଲୋକ ଏସିଆର
୨୦୨୨ରେ ବିଶ୍ୱରେ ୭୩.୫ କୋଟି ଲୋକ ଭୋକ କିମ୍ବା ଅପପୁଷ୍ଟିର ଶିକାର ହୋଇଛନ୍ତି। ଏମାନଙ୍କ ମଧ୍ୟରୁ ୪୦କୋଟିରୁ ଅଧିକ ଲୋକ ଏସିଆରୁ ଅଛନ୍ତି। ଏମାନଙ୍କ ମଧ୍ୟରୁ ୩୧୦ ନିୟୁତରୁ ଅଧିକ ଲୋକ ଦକ୍ଷିଣ ଏସିଆରେ ବସବାସ କରନ୍ତି। ଆଫ୍ରିକାରେ ୨୮୨ ନିୟୁତ, ଲାଟିନ୍ ଆମେରିକା ଓ କ୍ୟାରିବିଆନରେ ୪୩ ନିୟୁତ ଏବଂ ଓସେନିଆରେ ୩ ନିୟୁତ ଲୋକ ଅପପୁଷ୍ଟିର ଶିକାର ହୋଇଛନ୍ତି। ଉତ୍ତର ଆମେରିକା ଓ ୟୁରୋପରେ ସର୍ବନିମ୍ନ ୧୪ ନିୟୁତ ପୁଷ୍ଟିହୀନ ସମସ୍ୟା ରହିଛି।
