ଲକ୍ଷ୍ନୌ: ଆଗାମୀ ଉତ୍ତରପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସର ଆଖି ମହିଳା ଭୋଟ୍ ବ୍ୟାଙ୍କ ଉପରେ ରହିଛି। ମହିଳା ଭୋଟ୍ ପାଇବା ପାଇଁ କଂଗ୍ରେସ ଅନେକ ବଡ ଘୋଷଣା କରୁଛି। କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ବିଧାନସଭା ନିର୍ବାଚନରେ ମହିଳାମାନଙ୍କ ପାଇଁ ୪୦ ପ୍ରତିଶତ ଟିକେଟ୍ ଏବଂ ଛାତ୍ରୀମାନକୁ ସ୍ମାର୍ଟଫୋନ୍ ଓ ସ୍କୁଟି ଦେବା ପାଇଁ ପ୍ରତୁଶ୍ରୁତି ଦିଆଯାଇଛି। ଏଥି ସହିତ ପ୍ରିୟଙ୍କା ଗାନ୍ଧୀ ମହିଳାମାନଙ୍କ ପାଇଁ ଏକ ପୃଥକ ଘୋଷଣା ପତ୍ର ଜାରି କରିଛନ୍ତି। ଆଜି ସକାଳେ ଘୋଷଣା ପତ୍ର ପ୍ରକାଶ କରି ପ୍ରିୟଙ୍କା ୟୁପି ମହିଳାମାନଙ୍କ ପାଇଁ ଅନେକ ପ୍ରତିଶୃତି ଦେଇଛନ୍ତି।
ଆଜି ସକାଳେ ପ୍ରିୟଙ୍କା ଗାନ୍ଧୀ ଟ୍ୱିଟ୍ କରି କହିଛନ୍ତି ଯେ, ମୋର ପ୍ରିୟ ଭଉଣୀମାନେ, ଆପଣମାନଙ୍କର ପ୍ରତ୍ୟେକ ଦିନ ସଂଘର୍ଷରେ ପରିପୂର୍ଣ୍ଣ। ଏହାକୁ ବୁଝି କଂଗ୍ରେସ ଦଳ ଆପଣଙ୍କ ପାଇଁ ଏକ ଅଲଗା ମହିଳା ଘୋଷଣା ପତ୍ର ପ୍ରସ୍ତୁତ କରିଛି।
ଜାଣନ୍ତୁ ଘୋଷଣା ପତ୍ରରେ କ’ଣ ଘୋଷଣା କରାଯାଇଛି?:
ପ୍ରିୟଙ୍କା ଗାନ୍ଧୀ କହିଛନ୍ତି ଯେ, ଯଦି ୟୁପିରେ କଂଗ୍ରେସ ସରକାର ଗଠନ ହୁଏ ତେବେ ପ୍ରତିବର୍ଷ ତିନୋଟି ଏଲପିଜି ସିଲିଣ୍ଡର ମାଗଣାରେ ଦିଆଯିବ। ଏହା ବ୍ୟତୀତ ରାଜ୍ୟର ସରକାରୀ ବସ୍ ରେ ମହିଳାଙ୍କୁ ମାଗଣା ଯାତ୍ରା, ଆଶା ଏବଂ ଅଙ୍ଗନୱାଡି କର୍ମଚାରୀଙ୍କ ପାଇଁ ପ୍ରତ୍ୟେକ ମାସରେ ୧୦ ହଜାର ଟଙ୍କା ସମ୍ମାନଜନକ ଦେୟ ମିଳିବ।
ଘୋଷଣା ପତ୍ର ଅନୁଯାୟୀ, ନୂତନ ସରକାରୀ ନିଯୁକ୍ତିରେ ୪୦ ପ୍ରତିଶତ ମହିଳାଙ୍କୁ ସଂରକ୍ଷଣ ବ୍ୟବସ୍ଥା , ବୃଦ୍ଧା ବିଧବାଙ୍କୁ ପ୍ରତି ମାସରେ ୧୦୦୦ ଟଙ୍କା ପେନ୍ସନ୍ ଏବଂ ବିଧାନସଭା ନିର୍ବାଚନରେ ୪୦ ପ୍ରତିଶତ ଟିକେଟ୍ ମହିଳାଙ୍କୁ ଘୋଷଣା କରାଯାଇଛି। ଏହା ସହିତ କଂଗ୍ରେସ ଛାତ୍ରୀମାନଙ୍କୁ ସ୍ମାର୍ଟ ଫୋନ୍ ଏବଂ ସ୍କୁଟି ମଧ୍ୟ ଦେବାକୁ ପ୍ରତିଶୃତି ଦେଇଛି।