Tag: ମାଦକ ଦ୍ରବ୍ୟ

ନୂଆଦିଲ୍ଲୀ: ଭାରତୀୟ ତଟରକ୍ଷୀ ଓ ଏଟିଏସ୍ ଗୁଜରାଟ ମିଳିତଭାବେ ଏକ ପାକିସ୍ତାନୀ ନୌକା ଜବତ କରିଛନ୍ତି। ଭାରତୀୟ ଜଳରାଶି ମଧ୍ୟରେ ଯାଉଥିବା ଏହି ନୌକାରେ ଛଅ ଜଣ ନାବିକଙ୍କୁ ଗିରଫ ସହ ଦୁଇଶହ କୋଟି ଟଙ୍କାର ପ୍ରାୟ ୪୦ କେଜି ମାଦକ ଦ୍ରବ୍ୟ ଜବତ ହୋଇଛି। ସେପ୍ଟେମ୍ବର ୧୩, ୧୪ ୨୦୨୨ ମଧ୍ୟ ରାତ୍ରିରେ ଏଟିଏସ୍ ଗୁଜରାଟ ପକ୍ଷରୁ ଭାରତୀୟ ତଟରକ୍ଷୀ ବାହିନୀ ଏକ ଗୁପ୍ତ ବାର୍ତ୍ତା ପାଇ ଦୁଇଟି ସି-୪୮୦ ଓ ସି -୪୫୪ ଅନୁଧାବନକାରୀ ଶ୍ରେଣୀୟ ଜାହାଜ ଆନ୍ତର୍ଜାତିକ ସାମୁଦ୍ରିକ ସୀମାରେଖା ଅଞ୍ଚଳରେ ପଇଁତରା ପାଇଁ ମୁତୟନ କରିଥିଲା। ସାମୁଦ୍ରିକ ସୀମାର ପାଞ୍ଚ ସାମୁଦ୍ରିକ ମାଇଲ ଭାରତୀୟ ଜଳରାଶି ଅଞ୍ଚଳ ମଧ୍ୟରେ ଝାଖାଉ ନିକଟରେ ଏକ ପାକିସ୍ତାନୀ ନୌକା ସନ୍ଦେହଜନକ ଭାବେ ଚଳପ୍ରଚଳ ହେବା ପରିଲକ୍ଷିତ ହୋଇଥିଲା। ପାକିସ୍ତାନୀ ନୌକାକୁ ଅନୁଧାବନ କରିବାରୁ ସେ କିଛି ସାମଗ୍ରୀ ପାଣିରେ ଫୋପାଡି ଖସିଯିବାକୁ ଚେଷ୍ଟା କଲା। ଅଶାନ୍ତ ସମୁଦ୍ର ସତ୍ୱେ ଭାରତୀୟ ତଟରକ୍ଷୀ ଜାହାଜ ସେ ନୌକାକୁ ଅନୁଧାବନ କରି ତାକୁ ଜବତ କରିଥିଲା।

ନୌକାଟିକୁ ଝାଖାଉକୁ ମିଳିତ ଅନୁସନ୍ଧାନ ପାଇଁ ଅଣାଯାଇଛି। ଭାରତୀୟ ତଟରକ୍ଷୀ ଓ ଗୁଜରାଟ ଏଟିଏସ୍ ପକ୍ଷରୁ ଏକ ବର୍ଷ ମଧ୍ୟରେ ଏହା ପଞ୍ଚ କାର୍ଯ୍ୟାନୁଷ୍ଠାନ। ମଜବୁତ ତଟୀୟ ସୁରକ୍ଷା ବ୍ୟବସ୍ଥା ପାଇଁ ଏଭଳି ମିଳିତ କାର୍ଯ୍ୟାନୁଷ୍ଠାନ ଉତ୍ତମ ସମନ୍ୱୟକୁ ସୂଚାଇଥାଏ।

ମୋର୍ବି: ଗୁଜୁରାଟର ମୋର୍ବି ଜିଲ୍ଲାର ତିନି ଜଣଙ୍କଠାରୁ ଆତଙ୍କବାଦୀ ବିରୋଧୀ ସ୍କ୍ବାର୍ଡ (ଏଟିଏସ) ୧୨୦ କିଲୋଗ୍ରାମର ନିଶା ଦ୍ରବ୍ୟ ଜବତ କରିଛି। ଏଟିଏସ୍ ନିଶା କାରବାର କରୁଥିବା ତିନି ଜଣଙ୍କୁ ମଧ୍ୟ ଗିରଫ କରିଛି। ରବିବାର ରାତିରେ ଜବତ ହୋଇଥିବା ଏହି ଡ୍ରଗ୍ସର ଉଚିତ ମୂଲ୍ୟ ସେମାନେ ଏପର୍ଯ୍ୟନ୍ତ ଜାଣି ନାହାଁନ୍ତି। ଯଦିଓ ଏହାର ମୂଲ୍ୟ ଅନେକ କୋଟି ହେବ। ଏହି ନିଶା ଦ୍ରବ୍ୟ ଜବତ ହେବା ପରେ ମହାରାଷ୍ଟ୍ର ସରକାରର ମନ୍ତ୍ରୀ ନବାବ ମଲିକ ଗୁଜୁରାଟ ସରକାରକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ଗୁଜରାଟ ବର୍ତ୍ତମାନ ଉଡୁଥିବା ଗୁଜରାଟରେ ପରିଣତ ହୋଇଛି।

ଅଧିକାରୀଙ୍କ କହିବାନୁସାରେ, ନଭଲଖୀ ବନ୍ଦର ନିକଟ ଜିନଜୁଦା ଗ୍ରାମରୁ ପ୍ରାୟ ୧୨୦ କିଲୋଗ୍ରାମ ଡ୍ରଗ୍ସ ଜବତ କରିବା ପରେ ଏହି ତିନିଜଣଙ୍କୁ ଗିରଫ କରାଯାଇଥିଲା। ଏଟିଏସ୍ ଏବଂ ସ୍ଥାନୀୟ ପୋଲିସର ମିଳିତ ଚଢାଉରେ ଏତେ ପରିମାଣର ଡ୍ରଗ୍ସ ଜବତ କରାଯାଇଥିଲା। ନିଶା କାରବାରର ମୁକାବିଲା ପାଇଁ ପୋଲିସର ଉଦ୍ୟମକୁ ରାଜ୍ୟ ଗୃହମନ୍ତ୍ରୀ ହର୍ଷ ସଙ୍ଗଭି ପ୍ରଶଂସା କରିଛନ୍ତି।