ନୂଆଦିଲ୍ଲୀ: ହିମାଚଳ ପ୍ରଦେଶରେ ସୁଖବିନ୍ଦର ସିଂ ସୁଖୁ ରାଜ୍ୟର ୧୫ ତମ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ସୁଖବିନ୍ଦର ସିଂ ସୁଖୁଙ୍କ ବ୍ୟତୀତ ମୁକେଶ ଅଗ୍ନିହୋତ୍ରୀ ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ଶପଥ ଗ୍ରହଣ ସମାରୋହ ଆଜି ଅପରାହ୍ନ ୧:୩୦ ସମୟରେ ଶିମଲାର ରିଜ୍ ଗ୍ରାଉଣ୍ଡରେ ହୋଇଥିଲା।
ଏହି ଶପଥ ଗ୍ରହଣ ସମାରୋହରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ, ପୂର୍ବତନ ଦଳର ସଭାପତି ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ, ନବ ନିର୍ବାଚିତ ବିଧାୟକ, ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବଘେଲ, ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭୁପିନ୍ଦର ହୁଡା ଏବଂ ହିମାଚଳ ପ୍ରଦେଶ କଂଗ୍ରେସ ଦାୟିତ୍ୱରେ ଥିବା ରାଜୀବ ଶୁକ୍ଲା ଉପସ୍ଥିତ ଥିଲେ। ଏହାପୂର୍ବରୁ କଂଗ୍ରେସ ହାଇକମାଣ୍ଡ ସୁଖବିନ୍ଦର ସିଂ ସୁଖୁଙ୍କ ନାମ ଅନୁମୋଦନ କରିବା ପରେ ଶନିବାର ସନ୍ଧ୍ୟାରେ ଶିମଲା ଠାରେ କଂଗ୍ରେସ ବିଧାୟକ ଦଳର ଏକ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ମଧ୍ୟ ସୁଖବିନ୍ଦର ସିଂ ସୁଖୁ ସର୍ବସମ୍ମତି କ୍ରମେ ବିଧାୟକ ଦଳର ନେତା ଭାବରେ ନିର୍ବାଚିତ ହୋଇଥିଲେ।
ଉଲ୍ଲେଖ ଯୋଗ୍ୟ ଯେ, ୫୮ ବର୍ଷିୟ ସୁଖବିନ୍ଦର ସିଂ ସୁଖୁ NSUI ରୁ ରାଜନୈତିକ କ୍ୟାରିଅର୍ ଆରମ୍ଭ କରି ହିମାଚଳ ପ୍ରଦେଶରେ ମଧ୍ୟ ପ୍ରାୟ ୬ ବର୍ଷ ଧରି କଂଗ୍ରେସର ରାଜ୍ୟ ସଭାପତି ଥିଲେ। ଚଳିତ ନିର୍ବାଚନରେ ସୁଖବିନ୍ଦର ସିଂ ସୁଖୁ କଂଗ୍ରେସ ନିର୍ବାଚନ ପ୍ରଚାର କମିଟିର ସଭାପତି ଥିଲେ ଏବଂ ହମିରପୁର ଜିଲ୍ଲାର ନାଦୋନ୍ ବିଧାନସଭା ଆସନରୁ ବିଧାୟକ ଭାବରେ ନିର୍ବାଚିତ ହୋଇଥିଲେ। ଚତୁର୍ଥ ଥର ପାଇଁ ସୁଖବିନ୍ଦର ସିଂ ସୁଖୁ ବିଧାୟକ ହୋଇଛନ୍ତି। ହିମାଚଳ ପ୍ରଦେଶର ହମିରପୁର ଜିଲ୍ଲାର ନାଦୋନ୍ ତହସିଲର ସେରା ଗାଁର ସୁଖବିନ୍ଦର ସିଂ ସୁଖୁ ୨୬ ମାର୍ଚ୍ଚ ୧୯୬୪ରେ ଜନ୍ମଗ୍ରହଣ କରିଥିଲେ।
ସୁଖବିନ୍ଦର ସିଂ ସୁଖୁଙ୍କ ପିତା ରସିଲ ସିଂ ହିମାଚଳ ସଡକ ପରିବହନ ନିଗମ ଶିମଲାରେ ଡ୍ରାଇଭର ଥିଲେ। ସୁଖବିନ୍ଦର ସିଂଙ୍କ ମା ସଂସାର ଦେବୀ ଜଣେ ଗୃହିଣୀ। ସୁଖବିନ୍ଦର ସିଂ ସୁଖୁ ଶିମଲାରେ ତାଙ୍କର ପ୍ରାରମ୍ଭିକ ଅଧ୍ୟୟନରୁ LLB ପର୍ଯ୍ୟନ୍ତ ଅଧ୍ୟୟନ କରିଛନ୍ତି। ସୁଖବିନ୍ଦର ସିଂ ସୁଖୁ ତାଙ୍କର ଚାରି ଭାଇଭଉଣୀଙ୍କ ମଧ୍ୟରେ ଦ୍ୱିତୀୟ ସନ୍ତାନ ଅଟନ୍ତି। ତାଙ୍କ ବଡ଼ ଭାଇ ରାଜୀବ ସେନାରୁ ଅବସର ନେଇଛନ୍ତି। ତାଙ୍କର ଦୁଇ ସାନ ଭଉଣୀ ବିବାହିତ। ସୁଖବିନ୍ଦର ସିଂ ସୁଖୁ ୧୧ ଜୁନ୍ ୧୯୯୮ ରେ କମଲେଶ ଠାକୁରଙ୍କୁ ବିବାହ କରିଥିଲେ। ତାଙ୍କର ଦୁଇ ଝିଅ ଦିଲ୍ଲୀ ବିଶ୍ୱବିଦ୍ୟାଳୟରେ ପଢୁଛନ୍ତି।