ଖୋର୍ଦ୍ଧା: ପର୍ଯ୍ୟଟନ ୠତୁ ଚାଲିଛି। ମରାଳ ମାଳିନୀ ନିଳାମ୍ବୁ ଚିଲିକାରେ ପକ୍ଷୀ ବିହାର, ନୌବିହାର, ମା କାଳିଜାଇଙ୍କ ଦର୍ଶନ ପାଇଁ ଦୈନନ୍ଦିନ ପର୍ଯ୍ୟଟକଙ୍କ ସୁଅ ଛୁଟିବାରେ ଲାଗିଛି।ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ବାଲୁଗାଁ ତଥା ବଡ଼କୁଳ ପାନ୍ଥନିବସ ଅନ୍ତର୍ଗତ ବିଭିନ୍ନ ମୋଟର ବୋଟ ଆସୋସିଏସନ ପକ୍ଷରୁ ପ୍ରୟାସ ଜାରି ରହିଛି। ଏପରିକି ପର୍ଯ୍ୟଟକଙ୍କ ଆତିଥେୟ, ସୁରକ୍ଷା, ନୌବିହାର ଓ ଗାଇଡ଼ ଉପରେ ଆସୋସିଏସନ ଓ ନୌଚାଳକ ପକ୍ଷରୁ ବିଶେଷ ଧ୍ୟାନ ଦିଆଯାଉଛି।
ମାତ୍ର ପର୍ଯ୍ୟଟନ ସ୍ଥଳୀରେ ଅନେକ ସମୟରେ ପର୍ଯ୍ୟଟକ,ମସ୍ୟଜୀବୀ,ନୌଚାଳକ ତଥା ସ୍ଥାନୀୟ ଲୋକମାନେ ନାନାଦି ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି। ଏ ନେଇ କାଳିଜାଇ ମୋଟର ବୋଟ ଆସୋସିଏସନ ପକ୍ଷରୁ ଆଇନ, ଅବକାରୀ ଓ ପୂର୍ତ୍ତ ବିଭାଗ ମନ୍ତ୍ରୀ, ବାଣିଜ୍ୟ ଓ ପରିବହନ ସଚିବ ଏବଂ ଜିଲ୍ଲା ପ୍ରଶାସନକୁ ୧୨ ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଛି। ଯାହାକି ଚିଲିକା କୁଳ ଜେଟି ଓ ମା କାଳିଜାଇ ମନ୍ଦିର ନିକଟରେ ଯାତ୍ରୀ ପ୍ରତିକ୍ଷାଳୟ, ଶୌଚାଳୟ, ପାନୀୟଜଳ, ଆଲୋକୀକରଣ, ୱାଟର ଆମ୍ବୁଲାନ୍ସ, ଜେଟି ଠାରେ ପୁଲିସ ସହାୟତା କେନ୍ଦ୍ର, ପାର୍କ, ପାର୍କିଂ ସ୍ଥଳୀ, ଚିଲିକା କୁଳ, ଚଢେଇଗୁହା, କାଳିଜାଇ ମନ୍ଦିର ନିକଟରେ ଫ୍ଲୋଟିଙ୍ଗ ଜେଟି ନିର୍ମାଣ, ବୋଟ ଗୁଡିକୁ ଫାଇବାର କରିବାକୁ ସରକାରୀ ସହାୟତା ସାଙ୍ଗକୁ ପ୍ରଶିକ୍ଷଣ ଏବଂ ଚିଲିକା କୂଳକୁ ସଂଯୋଗ କରୁଥିବା ରାସ୍ତାଘାଟର ଉରଣତିକରଣ ଉପରେ ଗୁରୁତ୍ୱ ଦେବାକୁ ଆସୋସିଏସନ ପକ୍ଷରୁ ଅନୁରୋଧ କରାଯାଇଛି।