ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଜଗତ ପ୍ରକାଶ ନଡ୍ଡା ଭିଡିଓ କନଫରେନ୍ସିଂମାଧ୍ୟମରେ ରାଜ୍ୟ/କେନ୍ଦ୍ରଶାସିତ ଅଞ୍ଚଳର ମୁଖ୍ୟମନ୍ତ୍ରୀ/ଉପରାଜ୍ୟପାଳ ଏବଂ ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀଙ୍କ ସହ ଏକ ବୈଠକ କରି ୧୦୦ ଦିନିଆ ବ୍ୟାପକ ଯକ୍ଷ୍ମା ନିରାକରଣ ଅଭିଯାନକୁ ସହଯୋଗ କରିବାକୁ ଅନୁରୋଧ କରିଛନ୍ତି। ଏଥିରେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ପ୍ରତାପରାଓ ଯାଦବ ଭର୍ଚୁଆଲ୍ ମାଧ୍ୟମରେ ବୈଠକରେ ଯୋଗ ଦେଇଥିଲେ। ଏହି ବୈଠକରେ ମୁଖ୍ୟମନ୍ତ୍ରୀ/ଉପରାଜ୍ୟପାଳ ଏବଂ ସ୍ୱାସ୍ଥ୍ୟମନ୍ତ୍ରୀମାନଙ୍କୁ ଏହି ଅଭିଯାନ, ଏହି ଅଭିଯାନର ଉଦ୍ଦେଶ୍ୟ, ଗ୍ରହଣ କରାଯାଉଥିବା ପ୍ରମୁଖ ରଣନୈତିକ ପଦକ୍ଷେପ ଏବଂ ଅଭିଯାନର ସଫଳ ରୂପାୟନ ସୁନିଶ୍ଚିତ କରିବାରେ ରାଜ୍ୟ/କେନ୍ଦ୍ର ଶାସିତ ଅଞ୍ଚଳର ଭୂମିକା ସମ୍ପର୍କରେ ଅବଗତ କରାଯାଇଥିଲା।
ଏହି ବୈଠକରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ, ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ, ରାଜସ୍ଥାନ ମୁଖ୍ୟମନ୍ତ୍ରୀ ଭଜନଲାଲ ଶର୍ମା, ତ୍ରିପୁରା ମୁଖ୍ୟମନ୍ତ୍ରୀ ମାଣିକ ସାହା, ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମୀ, ଆନ୍ଧ୍ରପ୍ରଦେଶ ସ୍ୱାସ୍ଥ୍ୟମନ୍ତ୍ରୀ ସତ୍ୟ କୁମାର ଯାଦବ, ଅରୁଣାଚଳ ପ୍ରଦେଶ ସ୍ୱାସ୍ଥ୍ୟମନ୍ତ୍ରୀ ବିୟୁରାମ ୱାହଗେ, ଆସାମ ସ୍ୱାସ୍ଥ୍ୟମନ୍ତ୍ରୀ ଅଶୋକ ସିଂଘଲ, ହରିୟାଣା ସ୍ବାସ୍ଥ୍ୟମନ୍ତ୍ରୀ ଆରତୀ ରାଓ, ଜମ୍ମୁ ଓ କଶ୍ମୀର ସ୍ୱାସ୍ଥ୍ୟମନ୍ତ୍ରୀ ସକିନାଇଟୁ, ହିମାଚଳପ୍ରଦେଶ ସ୍ବାସ୍ଥ୍ୟମନ୍ତ୍ରୀ (କର୍ଣ୍ଣେଲ) ଧନୀ ରାମ ଶାଣ୍ଡିଲ, ଗୋଆ ସ୍ୱାସ୍ଥ୍ୟମନ୍ତ୍ରୀ ବିଶ୍ୱଜିତ ପି ରାଣେ, କର୍ଣ୍ଣାଟକ ସ୍ୱାସ୍ଥ୍ୟମନ୍ତ୍ରୀ ଦିନେଶ ଗୁଣ୍ଡୁ ରାଓ, ନାଗାଲାଣ୍ଡ ସ୍ୱାସ୍ଥ୍ୟମନ୍ତ୍ରୀ ପି ପାଇୱାଙ୍ଗ କୋନୟାକ୍, ଓଡ଼ିଶା ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ, ପଞ୍ଜାବ ସ୍ବାସ୍ଥ୍ୟମନ୍ତ୍ରୀ ବଲବୀର ସିଂହ, କେରଳ ସ୍ବାସ୍ଥ୍ୟମନ୍ତ୍ରୀ ବୀଣା ଜର୍ଜ, ତାମିଲନାଡୁ ସ୍ବାସ୍ଥ୍ୟମନ୍ତ୍ରୀ ମା. ସୁବ୍ରମଣ୍ୟମ, ଝାଡ଼ଖଣ୍ଡ ସ୍ବାସ୍ଥ୍ୟମନ୍ତ୍ରୀ ଇରଫାନ ଅନସାରୀ, ତେଲେଙ୍ଗାନା ସ୍ବାସ୍ଥ୍ୟମନ୍ତ୍ରୀ ଦାମୋଦର ରାଜସିଂହ, ମେଘାଳୟ ସ୍ବାସ୍ଥ୍ୟମନ୍ତ୍ରୀ ମାଜେଲ ଅମ୍ପାରିନ ଲିଙ୍ଗଡୋ ଏବଂ ଦିଲ୍ଲୀ ଶ୍ରମମନ୍ତ୍ରୀ ରମାକାନ୍ତ ଗୋସ୍ୱାମୀ ପ୍ରମୁଖ ଯୋଗଦେଇଥିଲେ ।
ଏହି ଅବସରରେ ଶ୍ରୀ ନଡ୍ଡା ରାଜ୍ୟ ଓ କେନ୍ଦ୍ର ଶାସିତ ଅଂଚଳମାନଙ୍କୁ ଅନୁରୋଧ କରିଥିଲେ ଯେ ସେମାନେ ରାଜ୍ୟସ୍ତରରେ ଏହି ଅଭିଯାନର ତଦାରଖ କରିବା ସହ ଜିଲ୍ଲାସ୍ତରରେ ରାଜନୈତିକ ଓ ପ୍ରଶାସନିକ ନେତୃତ୍ବ ଯେପରି ଏହାର ତଦାରଖ କରିବେ ତାହା ନିଶ୍ଚିତ କରିବେ ।
ସେ କହିଥିଲେ ଯେ ଜାତୀୟ ସ୍ତରରେ ଗ୍ରହଣ କରାଯାଉଥିବା ଆଭିମୁଖ୍ୟ ପରି ଏକ ସମଗ୍ର ସରକାରୀ ଆଭିମୁଖ୍ୟକୁ ନିଶ୍ଚିତ କରିବାକୁ ହେଲେ ଅନ୍ୟ ମନ୍ତ୍ରାଳୟ ଓ ବିଭାଗଗୁଡ଼ିକୁ ଅଭିଯାନ କାର୍ଯ୍ୟରେ ସାମିଲ କରାଯିବା ଉଚିତ । ସେ ମୁଖ୍ୟମନ୍ତ୍ରୀମାନଙ୍କୁ ଅନୁରୋଧ କରିଥିଲେ ଯେ, ସେମାନେ ନିର୍ବାଚିତ ପ୍ରତିନିଧି, ବିଶେଷକରି ବିଧାନସଭା ଓ ପରିଷଦର ସଦସ୍ୟ ଓ ପଞ୍ଚାୟତିରାଜ ସଂସ୍ଥାର ସଦସ୍ୟମାନଙ୍କୁ ଏଥିରେ ସାମିଲ କରନ୍ତୁ ଓ ଜନସମୁଦାୟକୁ ଏକତ୍ରିତ କରିବା କ୍ଷେତ୍ରରେ ସେମାନଙ୍କର ସକ୍ରିୟ ଅଂଶଗ୍ରହଣକୁ ପ୍ରେତ୍ସାହିତ କରନ୍ତୁ ।
ଶ୍ରୀ ନଡ୍ଡା ଉଲ୍ଲେଖ କରିଥିଲେ ଯେ ଭାରତରେ ଯକ୍ଷ୍ମାର ହ୍ରାସ ହାର ଦ୍ବିଗୁଣିତ ହୋଇ ୨୦୧୫ରେ ୮.୩ ପ୍ରତିଶତରୁ ଏବେ ୧୭.୭ ପ୍ରତିଶତକୁ ହ୍ରାସ ପାଇଛି, ଯାହାକି ବିଶ୍ବ ହାର ଠାରୁ ଆଗୁଆ ରହିଛି । ଗତ ୧୦ ବର୍ଷ ମଧ୍ୟରେ ଭାରତରେ ଯକ୍ଷ୍ମା ଜନିତ ମୃତ୍ୟୁ ସଂଖ୍ୟା ୨୧.୪% ହ୍ରାସ ପାଇଛି ବୋଲି ସେ ସୂଚନା ଦେଇଥିଲେ। ଶ୍ରୀ ନଡ୍ଡା ଯକ୍ଷ୍ମା ନିରାକରଣ ଦିଗରେ ହାସଲ କରିଥିବା ସଫଳତା ପାଇଁ ରାଜ୍ୟର ମନ୍ତ୍ରୀମାନଙ୍କୁ ଶ୍ରେୟ ଦେଇ ଏହି ଅଭିଯାନରେ ସହଯୋଗ କରିଥିବାରୁ ଧନ୍ୟବାଦ ଜଣାଇଥିଲେ।
ସକ୍ରିୟ ଯକ୍ଷ୍ମା ପରୀକ୍ଷା ପାଇଁ ପରୀକ୍ଷା, ଟ୍ରାକ ଓ ନିଦାନ, ରୋଗୀମାନଙ୍କ ଯାଞ୍ଚ, ସ୍କ୍ରିନିଂ ଓ ନିଦାନ ଉପରେ ସେ ଗୁରୁତ୍ବ ଦେବା ସହ ମୁଖ୍ୟମନ୍ତ୍ରୀ ଓ ମନ୍ତ୍ରୀମାନଙ୍କୁ ଅନୁରୋଧ କରିଥିଲେ ଯେ ସେମାନେ ସକ୍ରିୟଭାବେ ଅଭିଯାନର ତଦାରଖ କରନ୍ତୁ ଓ ନିଜ ନିଜ ରାଜ୍ୟର ଜିଲ୍ଲାଗୁଡ଼ିକୁ ଚିହ୍ନଟ କରନ୍ତୁ ।
ଯକ୍ଷ୍ମା ଅଭିଯାନରେ ରାଜ୍ୟ ମନ୍ତ୍ରୀମାନେ କିଭଳି ସହଯୋଗ କରିପାରିବେ ସେ ସମ୍ପର୍କରେ ଆଲୋକପାତ କରି ସେ ଅନୁରୋଧ କରିଥିଲେ ଯେ ସେମାନେ ନିଜ ସଭାଗୁଡ଼ିକରେ ଏହି ଅଭିଯାନର ପ୍ରଚାର କରନ୍ତୁ ଓ ଯକ୍ଷ୍ମା ରୋଗୀଙ୍କୁ ପୋଷ୍ୟ ଭାବେ ଗ୍ରହଣ କରିବା ପାଇଁ ନି-କ୍ଷୟମିତ୍ର ଭାବେ ଆଗେଇ ଆସନ୍ତୁ ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଉଲ୍ଲେଖ କରିଛନ୍ତି ଯେ ରାଜ୍ୟମାନଙ୍କ ପାଖରେ ପ୍ରାୟ ଦୁଇ ମାସର ଯକ୍ଷ୍ମା ଔଷଧ ମହଜୁଦ ରହିଛି ଏବଂ ରାଜ୍ୟଗୁଡ଼ିକରେ ଯକ୍ଷ୍ମା ଔଷଧର ଅତି କମରେ ୬ ମାସର ଆଗୁଆ ଷ୍ଟକ୍ ସୁନିଶ୍ଚିତ କରିବା ଦିଗରେ କେନ୍ଦ୍ର କାର୍ଯ୍ୟ କରୁଛି । ଯକ୍ଷ୍ମା ନିରାକରଣ ପାଇଁ ସମସ୍ତ ଅଂଶୀଦାରଙ୍କୁ ସେମାନଙ୍କ ପ୍ରତିବଦ୍ଧତାକୁ ଦୋହରାଇବାକୁ ଉତ୍ସାହିତ କରି ସେ ତାଙ୍କ ଅଭିଭାଷଣ ଶେଷ କରିଥିଲେ।
ଏହି କାର୍ଯ୍ୟକ୍ରମରେ ଦେଶର ୩୪୭ଟି ଅଗ୍ରାଧିକାର ଜିଲ୍ଲାରେ ଯକ୍ଷ୍ମା ସଂକ୍ରମଣ ଓ ମୃତ୍ୟୁହାର ହ୍ରାସ କରିବା ଉଦ୍ଦେଶ୍ୟରେ ୧୦୦ ଦିନିଆ ଅଭିଯାନର ଏକ ସଂକ୍ଷିପ୍ତ ବିବରଣୀ ଉପସ୍ଥାପନ କରାଯାଇଥିଲା। ଯକ୍ଷ୍ମା ରୋଗୀଙ୍କ ଚିହ୍ନଟକୁ ବଢ଼ାଇବା ପାଇଁ ଅତ୍ୟାଧୁନିକ ସ୍କ୍ରିନିଂ ଓ ଡାଇଗ୍ନୋଷ୍ଟିକ୍ କୌଶଳ ବ୍ୟବହାର କରି ରୋଗ ନିର୍ଣ୍ଣୟ ଓ ଚିକିତ୍ସା ଆରମ୍ଭରେ ବିଳମ୍ବ କୁ ହ୍ରାସ କରିବା ପାଇଁ ଗଭୀର କେସ୍ ଫାଇଣ୍ଡିଂ ଅଭିଯାନ କରାଯିବ ବୋଲି ସୂଚନା ଦିଆଯାଇଥିଲା। ଏହା ସହିତ ଯକ୍ଷ୍ମା ମୃତ୍ୟୁହାର ହ୍ରାସ କରିବା ପାଇଁ ଏହି କାର୍ଯ୍ୟକ୍ରମ ଉଚ୍ଚ ବିପଦଥିବା ରୋଗୀଙ୍କ ପାଇଁ ସ୍ୱତନ୍ତ୍ର ଯତ୍ନ ଯୋଗାଇବା ଏବଂ ନି-କ୍ଷୟ ପୋଷଣ ଯୋଜନା ମାଧ୍ୟମରେ ପୁଷ୍ଟିକର ସହାୟତା ବୃଦ୍ଧି କରିବା ପାଇଁ ଭିନ୍ନ ଯକ୍ଷ୍ମା ଚିକିତ୍ସା ଭଳି ନୂତନ ପଦକ୍ଷେପର ଉପଲବ୍ଧତାକୁ ବିସ୍ତାର କରିବ ।
ଏହି ଅଭିଯାନ ସମୟରେ କରାଯିବାକୁ ଥିବା ବିଭିନ୍ନ ଜନ ଏକତ୍ରିକରଣ କାର୍ଯ୍ୟ ଯେପରିକି ତଦାରଖ ପାଇଁ ୮୦,୦୦୦ରୁ ଅଧିକ ନି-କ୍ଷୟ ଶିବିର ଆୟୋଜନ ଆଦି ସଂପର୍କରେ ରାଜ୍ୟ ମନ୍ତ୍ରୀମାନଙ୍କୁ ଅବଗତ କରାଯାଇଥିଲା ।
ଜନଭାଗିଦାରୀ ଆଭିମୁଖ୍ୟ ଉପରେ କାର୍ଯ୍ୟ କରୁଥିବା ଏହି ଅଭିଯାନର ଉଦ୍ଦେଶ୍ୟ ହେଉଛି ନି-କ୍ଷୟ ଶପଥ ନେବା ପାଇଁ ସମୁଦାୟର ସଦସ୍ୟମାନଙ୍କୁ ଏକାଠି କରିବା, ଜନସମୁଦାୟ ନେତା, ବ୍ୟକ୍ତିବିଶେଷ, ସ୍ୱେଚ୍ଛାସେବୀ ଅନୁଷ୍ଠାନ ଏବଂ କର୍ପୋରେଟମାନଙ୍କୁ ନି-କ୍ଷୟ ମିତ୍ର ହେବାକୁ ପ୍ରୋତ୍ସାହିତ କରିବା । ଏହା ସହିତ ଯକ୍ଷ୍ମା ବିଜେତା (ଟିବି ଚାମ୍ପିୟନ) ଏବଂ ନି-କ୍ଷୟ ମିତ୍ରମାନଙ୍କୁ ସେମାନଙ୍କ ଅବଦାନ ପାଇଁ ସମ୍ମାନିତ କରାଯିବ ଯାହାକି ସାମୂହିକ କାର୍ଯ୍ୟକୁ ଆହୁରି ପ୍ରେରଣା ଦେବ । ଶେଷରେ ପଞ୍ଚାୟତିରାଜ ଅନୁଷ୍ଠାନର ସଦସ୍ୟଙ୍କ ଅଂଶଗ୍ରହଣ ଗୁରୁତ୍ବପୂର୍ଣ୍ଣ ହେବ ଏବଂ ଅତ୍ୟାବଶ୍ୟକ ଯକ୍ଷ୍ମା ସେବା ସୁନିଶ୍ଚିତ କରିବା ସହିତ ଯକ୍ଷ୍ମା ସମ୍ପର୍କରେ ଗୋଷ୍ଠୀ ସଚେତନତା ସୃଷ୍ଟି ପାଇଁ ନିୟମିତ ଗ୍ରାମସଭା ଅନୁଷ୍ଠିତ ହେବ।
ଯକ୍ଷ୍ମା ଅଭିଯାନରେ କେନ୍ଦ୍ର ସରକାରଙ୍କ ତ୍ବରିତ ପ୍ରୟାସକୁ ମୁଖ୍ୟମନ୍ତ୍ରୀମାନେ ପ୍ରଶଂସା କରିବା ସହ ଯକ୍ଷ୍ମା ନିରାକରଣ ଲକ୍ଷ୍ୟ ହାସଲ ଦିଗରେ ସହଯୋଗ କରିବାକୁ ପ୍ରତିଶ୍ରୁତି ଦେଇଥିଲେ। ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଯକ୍ଷ୍ମା ବିଷୟରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ରାଜ୍ୟର ‘ଜନଜାଗରୁକତା ଅଭିଯାନ’ ବିଷୟରେ ସୂଚନା ପ୍ରଦାନ କରିବା ସହ ଯକ୍ଷ୍ମା ରୋଗୀଙ୍କୁ ଖାଦ୍ୟ ବାସ୍କେଟ ଯୋଗାଇବାରେ ଏହାର ଅଗ୍ରଣୀ ଭୂମିକା ଉପରେ ଆଲୋକପାତ କରିଥିଲେ । ଗୁଜରାଟ ଏବଂ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯକ୍ଷ୍ମା ପରୀକ୍ଷା ଏବଂ ସ୍କ୍ରିନିଂ ସେବାକୁ ବୃଦ୍ଧି କରିବାରେ ସେମାନଙ୍କର ଅଗ୍ରଗତି ବିଷୟରେ ମଧ୍ୟ ଆଲୋଚନା କରିଥିଲେ । ଅତିଥିମାନେ ଯକ୍ଷ୍ମା ଅଭିଯାନ ସହ ନିଜର ଅନୁଭୂତି ବାଣ୍ଟିବା ସହ ବହୁମୂଲ୍ୟ ମତାମତ ଓ ପରାମର୍ଶ ଦେଇଥିଲେ।
ଏହି ଅବସରରେ କେନ୍ଦ୍ର ସ୍ୱାସ୍ଥ୍ୟ ସଚିବ ପୁଣ୍ୟ ସଲିଲା ଶ୍ରୀବାସ୍ତବ, କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଅତିରିକ୍ତ ଶାସନ ସଚିବ ଆରାଧନା ପଟ୍ଟନାୟକ, କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ବରିଷ୍ଠ ଅଧିକାରୀ ଏବଂ ରାଜ୍ୟଗୁଡ଼ିକର ମିଶନ ନିର୍ଦ୍ଦେଶକ (ଏନ୍ଏଚ୍ଏମ୍)ମାନେ ଉପସ୍ଥିତ ଥିଲେ।