ଭୁବନେଶ୍ୱର: ଯାଜପୁର ଜିଲ୍ଲାର କୋରାଇ ବିଧାନସଭା ନିର୍ବାଚନ ମଣ୍ଡଳୀ ସବୁବେଳେ ଚର୍ଚ୍ଚାରେ ରହିଥାଏ। କୋରାଇ ବିଧାନସଭା ନିର୍ବାଚନ ମଣ୍ଡଳୀ ଅଣ କଂଗ୍ରେସ ପ୍ରାର୍ଥୀଙ୍କୁ ବିଜୟୀ କରାଇଥାଏ। ସେଠାରୁ ୧୯୮୫ ରେ କଂଗ୍ରେସ ପ୍ରାର୍ଥୀ ଓ ୨୦୦୪ ରେ ବିଜେପି ପ୍ରାର୍ଥୀ ଥରେ ଲେଖାଏଁ ବିଜୟୀ ହୋଇଛନ୍ତି।
ସେହିପରି ୨୦୦୯ ପରଠାରୁ ୨୦୧୯ ପର୍ଯ୍ୟନ୍ତ ବିଜେଡିର ପ୍ରାର୍ଥୀମାନେ ବିଜୟୀ ହୋଇ ଆସୁଛନ୍ତି। ୧୯୭୪ ମସିହାରେ କୋରାଇ ବିଧାନସଭା ନିର୍ବାଚନ ମଣ୍ଡଳୀ ଗଠିତ ହେବା ପରଠାରୁ ୨୦୦୦ ପର୍ଯ୍ୟନ୍ତ ୬ ଥର ଅଶୋକ ଦାସ ଅଣ କଂଗ୍ରେସ ପ୍ରାର୍ଥୀ ଭାବରେ ବିଜୟୀ ହୋଇଛନ୍ତି।
କୋରାଇ ବିଧାନସଭା ନିର୍ବାଚନ ମଣ୍ଡଳୀରେ ବିଜେଡି କୌଣସି ପ୍ରାର୍ଥୀଙ୍କୁ ଦ୍ୱିତୀୟ ଥର ପାଇଁ ନିର୍ବାଚନ ଲଢ଼ିବାର ସୁଯୋଗ ଦେଇନାହିଁ। ୨୦୦୯ରେ ପ୍ରୀତିରଞ୍ଜନ ଘଡ଼ାଇ ଏଠାରୁ ବିଜେଡି ପ୍ରାର୍ଥୀଭାବେ ବିଜୟୀ ହୋଇଥିବାବେଳେ ୨୦୧୪ରେ ଆକାଶ ଦାସ ନାୟକ ଓ ୨୦୧୯ରେ ଅଶୋକ ବଳ ବିଜୟୀ ହୋଇଛନ୍ତି। ଆଗାମୀ ନିର୍ବାଚନରେ ବିଧାୟକ ଅଶୋକ ବଳଙ୍କ ଉପରୁ ବିଜେଡିର ବିଶ୍ୱାସ ତୁଟି ଗଲା ପରି ଲାଗୁଛି।
କାରଣ ତାଙ୍କୁ କୌଣସି ଦଳୀୟ କାର୍ଯ୍ୟକ୍ରମରେ ପ୍ରାୟତଃ ଦେଖିବାକୁ ମିଳୁନାହିଁ। କୋରାଇ ସମସ୍ୟା ସମ୍ପର୍କରେ ବିଧାୟକ ଶ୍ରୀ ବଳ କରିବା ପରିବର୍ତ୍ତେ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ସମାଧାନର ବାଟ ଖୋଜୁଛନ୍ତି। ଏପରିକି କୋରାଇର ବିକାଶ କିପରି ହୋଇପାରିବ ତା’ର ରୂପରେଖ ମଧ୍ୟ ସେ ପ୍ରସ୍ତୁତ କରୁଛନ୍ତି।
ଏହି ନିର୍ବାଚନ ମଣ୍ଡଳୀଟି ତାଙ୍କ ବାପାଙ୍କ କର୍ମଭୂମି ହୋଇଥିବାରୁ ଆଗାମୀ ନିର୍ବାଚନରେ ସେ ଏଠାରୁ ନିର୍ବାଚନ ଲଢ଼ିପାରନ୍ତି ବୋଲି ରାଜନୀତିକ ମହଲରେ ଆଲୋଚନା ହେଉଛି। କେବଳ ପ୍ରଣବ ପ୍ରକାଶ ଦାସ ନୁହନ୍ତି ୨୦୧୪ର ବିଧାୟକ ଆକାଶ ଦାସ ନାୟକ ମଧ୍ୟ ଆଗାମୀ ନିର୍ବାଚନରେ ପ୍ରାର୍ଥୀ ହେବାକୁ ଆଶା ରଖି ନିଜର ଲବି ଚଳାଇଥିବା ଆଲୋଚନା ହେଉଛି।
୨୦୦୪ ରେ ରାଜ୍ୟରେ ମେଣ୍ଟ ସରକାର ଥିବା ସମୟରେ ବିଜେପିର ପ୍ରାର୍ଥୀ ସଞ୍ଚିତା ମହାନ୍ତି କୋରାଇରୁ ଅଶୋକ ଦାସଙ୍କୁ ହରାଇ ହଇଚଇ ସୃଷ୍ଟି କରିଥିଲେ। କିନ୍ତୁ ଏହି ଖୁସି ବେଶୀ ଦିନ ରହି ନ ଥିଲା। ଏହାପରଠାରୁ ହୋଇଥିବା ୨୦୦୯ ଓ ୨୦୧୪ ନିର୍ବାଚନରେ ଶ୍ରୀମତୀ ମହାନ୍ତି ୩ୟ ସ୍ଥାନରେ ରହିଥିଲେ।
ଏହି ସମୟ ମଧ୍ୟରେ ବିଜେପି ନିଜର କୌଣସି ନେତାଙ୍କୁ ପ୍ରାର୍ଥୀ ହେବାକୁ ପ୍ରସ୍ତୁତ କରିପାରି ନ ଥିଲା। ତେଣୁ ୨୦୧୯ ରେ ବିଜେପି ପକ୍ଷରୁ ୨୦୧୪ ରେ ଦ୍ୱିତୀୟ ସ୍ଥାନରେ ଥିବା କଂଗ୍ରେସ ପ୍ରାର୍ଥୀ ବିଶ୍ୱଜିତ ନାୟକଙ୍କୁ ଦଳକୁ ଆଣି ପ୍ରାର୍ଥୀ କରିଥିଲା। ସେ ମଧ୍ୟ ବିଜେଡି ପ୍ରାର୍ଥୀ ଅଶୋକ ବଳଙ୍କଠାରୁ ୩୦ହଜାରରୁ ଉର୍ଦ୍ଧ୍ୱ ଭୋଟରେ ପରାସ୍ତ ହୋଇଥିଲେ।
ଆଗାମୀ ନିର୍ବାଚନ ପାଇଁ ଗତଥରର ପ୍ରାର୍ଥୀ ବିଶ୍ୱଜିତ ନାୟକଙ୍କର କୌଣସ ପ୍ରସ୍ତୁତି ନାହିଁ ବୋଲି ସାଧାରଣରେ ଚର୍ଚ୍ଚା ହେଉଛି। ଅପରପକ୍ଷରେ ବିଜେପିର କ୍ୟାଡ଼ର ପୂର୍ବତନ ଯୁବମୋର୍ଚ୍ଚାର ଜିଲ୍ଲା ଉପସଭାପତି ଥିବା ଆଲେକଜାଣ୍ଡାର ଦାସ ପ୍ରସ୍ତୁତି ଚଳାଇବା ସହିତ ଦଳୀୟ କାର୍ଯ୍ୟକ୍ରମ ଦୀର୍ଘ ଦିନ ହେଲା ଚଳାଇ ଆସୁଛନ୍ତି। ସେ ଦଳର ତଥା ପ୍ରଧାନମନ୍ତ୍ରୀ ମୋଦିଙ୍କର ବାର୍ତ୍ତାକୁ ସମଗ୍ର ଅଞ୍ଚଳରେ ପହଞ୍ଚାଇବାକୁ ବିଭିନ୍ନ କାର୍ଯ୍ୟକ୍ରମ କରୁଥିବା ଦେଖିବାକୁ ମିଳୁଛି।
ଯାଜପୁର ଜିଲ୍ଲାରେ ଯାଦବମାନଙ୍କର ୩୦ ପ୍ରତିଶତ ମତଦାତା ଅଛନ୍ତି। ଗତ ନିର୍ବାଚନରେ ବିଜେଡି ବରୀ ନିର୍ବାଚନ ମଣ୍ଡଳୀରେ ଯାଦବ ନେତ୍ରୀ ସୁନନ୍ଦା ଦାସଙ୍କୁ ପ୍ରାର୍ଥୀ କରିବାରୁ ଦଳ ଲୋକସଭା ଓ ଅନ୍ୟ ବିଧାନସଭା ନିର୍ବାଚନ ମଣ୍ଡଳୀରେ ଯାଦବମାନଙ୍କର ସମର୍ଥନ ପାଇବାରେ ସଫଳ ହୋଇଥିଲା।
ଆଲେକଜାଣ୍ଡାର ଯାଦବ ମହାସଂଘର ରାଜ୍ୟ ସାଧାରଣ ସମ୍ପାଦକ ହୋଇଥିବାରୁ ଜିଲ୍ଲାର ଯାଦବମାନଙ୍କ ଉପରେ ତାଙ୍କର ପ୍ରଭାବ ରହିଛି। ସେ ବିଜେପିରୁ ପ୍ରାର୍ଥୀ ହେଲେ ଯାଦବମାନେ ଜିଲ୍ଲାରେ ବିଜେପିକୁ ସମର୍ଥନ କରିବେ ବୋଲି ଚର୍ଚ୍ଚା ହେଉଛି।
ଏହି ନିର୍ବାଚନ ମଣ୍ଡଳୀରୁ କେବଳ ଥରେ ମାତ୍ର ୧୯୮୫ ମସିହାରେ ଇନ୍ଦିରା ଗାନ୍ଧୀଙ୍କ ହତ୍ୟା ପରବର୍ତ୍ତୀ ଲହରରେ କଂଗ୍ରେସ ପ୍ରାର୍ଥୀ ରାମଚନ୍ଦ୍ର ଖୁଣ୍ଟିଆ ବିଜୟୀ ହୋଇଥିଲେ। ୨୦୦୦ ନିର୍ବାଚନ ପର୍ଯ୍ୟନ୍ତ ଏଠାରେ ବିଜେପିର ଚିହ୍ନବର୍ଣ୍ଣ ନ ଥିଲା। ରାଜ୍ୟରେ ବିଜେଡି-ବିଜେପି ମେଣ୍ଟ ହେବା ପରଠାରୁ ମଧ୍ୟ କଂଗ୍ରେସ ଦ୍ୱତୀୟ ସ୍ଥାନରେ ରହୁଥିଲା।
କିନ୍ତୁ ଗତ ନିର୍ବାଚନରେ କଂଗ୍ରେସ ପ୍ରାର୍ଥୀ ୩ୟ ସ୍ଥାନକୁ ଖସି ଯାଇଛନ୍ତି। ବ୍ୟାସନଗରର ନେତ୍ରୀ ବନ୍ଦିତା ପରିଡ଼ା ଗତ ଥର ପ୍ରାର୍ଥୀ ହୋଇଥିଲା ବେଳେ ସେ ଏଥର ଦଳ ପରିବର୍ତ୍ତନ କରୁଥିବା ଚର୍ଚ୍ଚା ଜୋର୍ ଧରିଛି। ଏପରି ସ୍ଥଳେ କଂଗ୍ରେସ କାହାକୁ ପ୍ରାର୍ଥୀ କରିବ ତାହା ଦଳୀୟ ନେତୃତ୍ୱଙ୍କ ପାଇଁ ଚିନ୍ତାର ବିଷୟ ହୋଇଛି।