Categories
ଆଜିର ଖବର ରାଜ୍ୟ ଖବର

ଆସିଲା ଶୀତ ଋତୁ: ରଙ୍ଗ ବେରଙ୍ଗର ବିଦେଶୀ ପକ୍ଷୀଙ୍କ କଳରବରେ ଫାଟି ପଡୁଛି ଚିଲିକା

ସୀତାରାମ ଅଗ୍ରୱାଲ

ଚିଲିକା: ଧୀରେ ଧୀରେ ରାଜ୍ୟରେ ଶୀତ ଋତୁ ପ୍ରବେଶ କରିବା ଆରମ୍ଭ କରିଛି। ମରାଳ ମାଳିନୀ ନୀଲାମ୍ଵୁ ଚିଲିକା ଏବେ ରଙ୍ଗ ବେରଙ୍ଗର ବିଦେଶୀ ପକ୍ଷୀଙ୍କ କଳରବରେ ଫାଟି ପଡୁଛି। ପକ୍ଷୀମାନଙ୍କ ସୌନ୍ଦର୍ଯ୍ୟକୁ ଉପଭୋଗ କରିବା ପାଇଁ ଚିଲିକାରେ ପର୍ଯ୍ୟଟକଙ୍କ ଭିଡ ଜମିଲ‍ାଣି। ବିଶେଷ କରି ଖୋର୍ଦ୍ଧା ଜିଲ୍ଲା ଟାଙ୍ଗି ନିକଟସ୍ଥ ମଙ୍ଗଳାଯୋଡି ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛି।

ଆଜି ସୁଦ୍ଧା ଚିଲିକାରେ ୨୧ ହଜାରରୁ ଅଧିକ ବିଦେଶୀ ପକ୍ଷୀ ଆସିଥିବାବେଳେ ସେଥିମଧ୍ୟରୁ ଟାଙ୍ଗୀ ରେଞ୍ଜ ଅଞ୍ଚଳରେ ୧୧ ହଜାରରୁ ଅଧିକ ପକ୍ଷୀ ଆସିଥିବାର ଜଣାପଡିଛି। ଏସିଆ ମହାଦେଶର ସର୍ବ ବ୍ରୁହତ ଲୁଣ ହ୍ରଦ ଚିଲିକାରେ ଶୀତ ଦିନେ ଜମୁଛି ଦେଶୀ ବିଦେଶୀ ପକ୍ଷୀଙ୍କ ସମ୍ଭାର। ହଜାର ହଜାର କିଲୋମିଟର ଆକାଶ ପଥ ଅତିକ୍ରମ କରି କାଜାକିସ୍ତାନ, ସାଇବେରିଆ, ଆଫଗାନିସ୍ଥାନ, ବୁଲଗେରିଆ, ରୁଷ, ତୁର୍କି, ସାଇବେରିଆ ଆଦି ଅଞ୍ଚଳରୁ ଚିଲିକାକୁ ଉଡି ଆସିଥାନ୍ତି ବିଦେଶୀ ପକ୍ଷୀ।

ଚିଲିକାର ମଙ୍ଗଳାଯୋଡିରେ ପକ୍ଷୀ ମାନଙ୍କ ପାଇଁ ପ୍ରଚୁର ଖାଦ୍ୟ ଓ ବାସସ୍ଥାନର ସୁବିଧା ଥିବାରୁ ପକ୍ଷୀ ମାନେ ଏଠାରେ ଜମାଉଛନ୍ତି ଭିଡ। ଦେଶୀ ବିଦେଶୀ ପକ୍ଷୀଙ୍କ କିଚିରି ମିଚିରି କୋଳାହଳରେ ଫାଟି ପଡୁଛି ମଙ୍ଗଳାଯୋଡି।

ଚିଲିକାର ଟାଙ୍ଗୀ ରେଞ୍ଜର ବିଭିନ୍ନ ଅଞ୍ଚଳରେ ଲାପିଙ୍ଗ ଟର୍ନ, ଗଡଉଇଟ୍, ସାଣ୍ଡ ପାଇପର, ଗଡୱାଲ, ସ୍ପଟ୍ ୱିଲ ଡକ୍, ନର୍ଦନ ପିନଟେଲ, ରୁଡି ସେଲଡକ୍ ଓ ଆଇ ବିସ୍ ଆଦି ପାଖାପାଖି ୫୦ ପ୍ରଜାତିର ବିଦେଶୀ ପକ୍ଷୀ ଚିଲିକାକୁ ଆସିଥିବାର ଜଣା ପଡିଛି। ୧୬ ନଂ ଜାତୀୟ ରାଜପଥରେ ଭୁବନେଶ୍ୱରରୁ ୬୦ କିଲୋମିଟର ରାସ୍ତା ଅତିକ୍ରମ କରିବା ପରେ ଟାଙ୍ଗୀ ଆସିଥାଏ। ଟାଙ୍ଗୀ ଠାରୁ ୫ କିଲୋମିଟର ହେଉଛି ମଙ୍ଗଳା ଯୋଡିର ଦୂରତା। ମଙ୍ଗଳା ଯୋଡି ଜେଟିରେ ପହଞ୍ଚିବା ପରେ କାତ ମରା ଡଙ୍ଗାରେ ବସି ଚିଲିକାର ନୀଳ ଜଳ ରାଶିରେ ପକ୍ଷୀ ମାନଙ୍କ ଜଳ କ୍ରୀଡା ଦ୍ରୁଶ୍ୟ ଅତ୍ୟନ୍ତ ମନୋରମ। ପକ୍ଷୀମାନଙ୍କ ଚଳ ପ୍ରଚଳରେ ବାଧା ସ୍ରୁଷ୍ଟି ନହେଵା ପାଇଁ ଏଠାରେ ମୋଟର ଚାଳିତ ଡଙ୍ଗାକୁ କରାଯାଇଛି ବାରଣ।

ବିଦେଶୀ ଓ ଦେଶୀ ପକ୍ଷୀ ମାନଙ୍କ ସୁରକ୍ଷା ପାଇଁ ବନ୍ୟ ପ୍ରାଣୀ ବିଭାଗ ବିଭିନ୍ନ ସ୍ଥାନରେ ୧୧ ଟି ଅସ୍ଥାୟୀ ପକ୍ଷୀ ସୁରକ୍ଷା ଶିବିର ପ୍ରତିଷ୍ଠା କରିଛି। ଏହା ସହ ଚିଲିକାରେ ୨୪ ଘଣ୍ଟିଆ ପାଟ୍ରୋଲିଂ ବ୍ୟବସ୍ଥା କରିଛି ବନ ବିଭାଗ। ଆଗକୁ ଥଣ୍ଡା ବଢିବାର ସମ୍ଭାବନା ଥିବାରୁ ବିଦେଶୀ ପକ୍ଷୀଙ୍କ ସଂଖ୍ୟା ବଢିବାର ଆଶା କରାଯାଉଛି। ତେଣୁ ଏଠାରେ ପକ୍ଷୀ ମାନଙ୍କ ସୁରକ୍ଷା ପ୍ରତି ବିଶେଷ ଦ୍ରୁଷ୍ଟି ଦେବା ଜରୁରୀ ହୋଇପଡିଛି।