ଭୁବନେଶ୍ବର: ଦିବଙ୍ଗତ ସାମ୍ବାଦିକ ଅରିନ୍ଦମ ଦାଶଙ୍କ ପରିବାରକୁ ରାଜ୍ୟ ସରକାର ସହାୟତା ରାଶି ଘୋଷଣା କରିଛନ୍ତି। ଅରିନ୍ଦମଙ୍କ ପରିବାରକୁ ରାଜ୍ୟ ସରକାର ୪ ଲକ୍ଷ ଟଙ୍କା ସହାୟତା ରାଶି ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୪ ଲକ୍ଷ ଟଙ୍କା ସହାୟତା ମଞ୍ଜୁର କରିଛନ୍ତି। ଓଡିଶା ୱାର୍କିଂ ଜର୍ଣ୍ଣାଲିଷ୍ଟ ୱେଲଫେୟାର ପାଣ୍ଠିରୁ ମୁଖ୍ୟମନ୍ତ୍ରୀ ଏହି ସହାୟତା ରାଶି ମଞ୍ଜୁର କରିଛନ୍ତି। ଏନେଇ ରାଜ୍ୟ ସରକାରଙ୍କ ଗଣମାଧ୍ୟମ ପରାର୍ଶଦାତା ମାନସ ମଙ୍ଗରାଜ ଟୁଇଟ କରି ସୂଚନା ଦେଇଛନ୍ତି।
ଉଲ୍ଲେଖ ଯୋଗ୍ୟ ଯେ, ଗତକାଲି ସକାଳୁ ମୁଣ୍ଡୁଳି ମହାନଦୀରେ ଫସି ରହିଥିବା ହାତୀକୁ ଉଦ୍ଧାର କରିବା ପାଇଁ ସେଠାରେ ଥିବା ଏନଡିଆରଏଫ ଟିମ ଏକ ବୋଟ ନେଇ ନଦୀ ଭିତରକୁ ଯାଇଥିଲେ। ସେହି ବୋଟରେ ଅରିନ୍ଦମ ଏବଂ ତାଙ୍କର କ୍ୟାମେରାମ୍ୟାନ ମଧ୍ୟ ଥିଲେ।
ହାତୀକୁ ଘଉଡାଇବା ବେଳେ ହଠାତ ବୋଟଟି ଓଲଟି ପଡିଥିଲା। କିଛି ବୁଝିବା ପୂର୍ବରୁ ବୋଟରେ ଥିବା ଏନଡିଆରଏଫ ଟିମ ଏବଂ ଦୁଇ ସାମ୍ବାଦିକ ପାଣିରେ ବୁଡିଗଲେ। ସେମାନଙ୍କୁ ଉଦ୍ଧାର କରିବା ପାଇଁ ସମସ୍ତେ ଚେଷ୍ଠା କରିଥିଲେ। ହେଲେ ସାମ୍ବାଦିକ ଅରିନ୍ଦମ ଦାସଙ୍କ ଅବସ୍ଥା ଗୁରୁତର ହୋଇପଡିଥିଲା। ତାଙ୍କୁ ତୁରନ୍ତ କଟକ ମେଡିକାଲରେ ଭର୍ତ୍ତି କରାଯାଇଥିଲା। ହେଲେ ପରବର୍ତ୍ତି ସମୟରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଅରିନ୍ଦମ ଧରିତ୍ରୀର କ୍ରାଇମ ରିପୋର୍ଟର ଭାବେ କାର୍ଯ୍ୟ ଆରମ୍ଭ କରି ଓଟିଭିର ଚିଫ ରିର୍ପୋଟର ଭାବେ କାର୍ଯ୍ୟ କରୁଥିଲେ। ସେ ବିଶେଷ କରି ଦୁଃସାହାସିକ ରିପୋର୍ଟି କରିବାକୁ ବେଶ୍ ପସନ୍ଦ କରୁଥିଲେ। ଦୁର୍ଗମ ଅଞ୍ଚଳ ହେଉ କିମ୍ବା ବିପଦପୂର୍ଣ୍ଣ ସ୍ଥାନ, ସେସବୁ ସ୍ଥାନକୁ ଯାଇ ରିପୋର୍ଟି କରିବାରେ ଦକ୍ଷ ଥିଲେ ଅରିନ୍ଦମ। ସେହିପରି ବାତ୍ୟା ଏବଂ ବନ୍ୟା ପାଣିରେ ପଶି ରିପୋର୍ଟି କରିବାରେ ଓସ୍ତାଦ ଥିଲେ ଅରିନ୍ଦମ। ତାଙ୍କର ବିୟୋଗରେ ଓଡିଶା ସାମ୍ବାଦିକ ଜଗତରେ ଶୋକର ଛାୟା ଖେଳିଯାଇଛି।