Tag: ରେଢାଖୋଲ

ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ରେଢ଼ାଖୋଲ ସହରର କୁରୁମ ଟିକିରାରେ କେନ୍ଦ୍ରୀୟ ବିଦ୍ୟାଳୟ ହେବା ପାଇଁ ଜମି ଚିହ୍ନଟ ହୋଇଛି। କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିର୍ଦ୍ଦେଶରେ ଆଜି ସକାଳେ ଭୁବନେଶ୍ବର ଓ ସମ୍ବଲପୁରରୁ ଆସିଥିବା ଏକ ସ୍ବତନ୍ତ୍ର ୫ ଜଣିଆ କେନ୍ଦ୍ରିୟ ଟିମ୍ କ୍ଷେତ୍ର ପରିଦର୍ଶନ କରି କୁରୁମ ଟିକିରାରେ ଏକ ସ୍ଥାୟୀ ଜାଗା ଚିହ୍ନଟ କରିଛନ୍ତି।

ଏଥି ସହିତ ଅସ୍ଥାୟୀ କ୍ୟାମ୍ପସ ପାଇଁ ମଧ୍ୟ ଭୀମଭୋଇ କଲେଜର ଶ୍ରେଣୀ ଗୃହ ବୁଲି ଦେଖିଛନ୍ତି। କୁରୁମ ଟିକିରାରେ ୧୦ ଏକର ଜମିରେ ତିଆରି ହେବ କେନ୍ଦ୍ରୀୟ ବିଦ୍ୟାଳୟ। ଜାଗା ଚିହ୍ନଟ ସମୟରେ ରେଢ଼ାଖୋଲ ଉପଜିଲ୍ଲାପାଳ ରଶ୍ମି ରଞ୍ଜନ ମହନ୍ତ, ରେଢ଼ାଖୋଲ ତହସିଲଦାର ଙ୍କ ସମେତ ବିଜେପିର ଏକ ପ୍ରତିନିଧି ଦଳ ମଧ୍ୟ ଉପସ୍ଥିତ ଥିଲେ।

ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ରେଢ଼ାଖୋଲ ପ୍ରେସ କ୍ଲବ୍ ପକ୍ଷରୁ ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀଙ୍କ ବଦଳି ସ୍ଥଗିତ କରିବା ପାଇଁ ରେଢ଼ାଖୋଲ ଉପଜିଲ୍ଲାପାଳଙ୍କ ଜରିଆରେ ଜିଲ୍ଲାପାଳଙ୍କୁ ଦାବୀ ପତ୍ର ପ୍ରଦାନ କରାଯାଇଛି। ଦାବୀ ପତ୍ରରେ ଉଲ୍ଲେଖ କରାଯାଇଛି ଯେ, ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀ ଫକିର ମୋହନ ମାଝୀଙ୍କ ଇତି ମଧ୍ୟରେ ଅନ୍ୟତ୍ର ବଦଳି ହୋଇଯାଇଛି। ବର୍ତ୍ତମାନ ରେଢ଼ାଖୋଲ ଉପଖଣ୍ଡର ବିଭିନ୍ନ କାର୍ଯ୍ୟାଳୟରେ ଅଧିକାରୀଙ୍କ ପଦ ଦୀର୍ଘ ମାସ ହେବ ଖାଲି ପଡ଼ିଛି। ଯାହା ଫଳରେ ବିଭିନ୍ନ ସମସ୍ୟା ସୃଷ୍ଟି ହେଉଛି।

ଏଭଳି ପରିସ୍ଥିତିରେ ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀ ଙ୍କ ବଦଳି ହେବା ଯୋଗୁଁ ଗଣମାଧ୍ୟମ ଏବଂ ସରକାରୀ କାର୍ଯ୍ୟକ୍ରମରେ ସମସ୍ୟା ସୃଷ୍ଟି କରିବ। ତେଣୁ ନୁତନ ଭାବେ ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀଙ୍କ ନିଯୁକ୍ତି ନ ହେବା ପର୍ଯ୍ୟନ୍ତ ବର୍ତ୍ତମାନ ଅଧିକାରୀଙ୍କୁ ଅନ୍ୟତ୍ର ବଦଳି ସ୍ଥଗିତ କରିବାକୁ ଦାବୀ ପତ୍ର ପ୍ରଦାନ କରାଯାଇଛି।

ଏଥିରେ ରେଢ଼ାଖୋଲ ପ୍ରେସ କ୍ଲବ୍ ସଭାପତି ରମାକାନ୍ତ ମହାନନ୍ଦ, ସମ୍ପାଦକ ତପନ କୁମାର ବିଶ୍ବାଳ, କୋଷାଧ୍ୟକ୍ଷ ଯଶୋବନ୍ତ ନାରାୟଣ ସାହୁ, ବରିଷ୍ଟ ସାମ୍ବାଦିକ ପ୍ରସନ୍ନ ପ୍ରଧାନ, ଶଙ୍କର ପୃଷ୍ଟି, କନ୍ଦର୍ପ ବେହେରା, ଶରତ ପ୍ରଧାନ, ଅନିଲ ପୃଷ୍ଟି, ରୋହିତ ଭୋଇ, ମମତା ପାତ୍ର, ରଶ୍ମିତା ରାଉତ, ସରୋଜ ରାଉତ, ସୁଧିର ସୁନା, ଲିଙ୍ଗରାଜ ପ୍ରଧାନ, ବିଦ୍ୟାଧର ମାଝି, ମଦନ ବେହେରା ପ୍ରମୁଖ ସମେତ ଅନ୍ୟ ସଦସ୍ୟ ମାନେ ସାମିଲ ହୋଇଥିଲେ।

ରେଢାଖୋଲ (କଦର୍ପ ବେହେରା): ବନବିଭାଗର ଦାୟିତ୍ୱ ହୀନତା ଯୋଗୁଁ ବିଦ୍ୟୁତ୍ ତାର ସଂସ୍ପର୍ଶରେ ଆସି ଚାଲିଗଲା ୩ ହାତୀର ଜୀବନ। ସମ୍ବଲପୁର ଜିଲ୍ଲା ନାକଟିଦେଉଳ ରେଞ ଘୋଷରାମାଳ ଫରେଷ୍ଟ ସେକସନ୍ ଅଧିନସ୍ଥ ବୁରମାଳ ଗ୍ରାମରେ ଏଭଳି ଘଟଣା ଘଟିଛି। ଘଟଣା ସ୍ଥଳକୁ ପହଂଚିଛନ୍ତି ରେଢାଖୋଲ ଡିଏଫଓ ଙ୍କ ସମେତ ଏସିଏଫ୍ ଏବଂ ବନବିଭାଗର କର୍ମଚାରୀଗଣ।

ପ୍ରକାଶ ଯେ, ସମ୍ବଲପୁର ଜିଲ୍ଲା ନାକଟିଦେଉଳ ରେଞ ଅଧିନସ୍ଥ ଘୋଷରାମାଳ ଗ୍ରାମ ନିକଟସ୍ଥ ବୁରମାଳ ଠାରେ କେହି ଶୀକାରୀ ବାରହା ଶୀକାର ହେଉ ବା ହାତୀ ଶୀକାର ହେଉ ବାଇଡିଙ୍ଗ ତାର ବିଛାଇଥିଲେ । ସେଇ  ନିକଟରେ ଯାଇଥିବା ୧୧ କେଭି ବିଦ୍ୟୁତ୍ ତାରରୁ ତାର ସଂଯୋଗ କରି ବାଇଡିଙ୍କ ତାରରେ ସଂଯୋଗ କରିଥିଲେ। ହେଲେ ଆଜି ଭୋରରୁ ହାତୀ ପଲ ଧାନ ଖାଇବା ପାଇଁ ସେଇ ବୁରମାଳ ଠାରେ ଥିବା ଧାନ କିଆରୀକୁ ଯାଉଥିବା ସମୟରେ ବାଣୁଆମାନେ ବିଦ୍ୟୁତ୍ ସଂଯୋଗ ଦେଇଥିବା  ବାଇଡିଙ୍ଗ ତାର ସଂସ୍ପର୍ଶରେ ଆସି ୨ ଟି ମାଈ ହାତୀ ଏବଂ ଏକ ଛୋଟ ହାତୀ ଛୁଆର ଜୀବନ ଯାଇଥିବା ଖବର ମିଳିଥିଲା।

ଖବର ବିଦ୍ୟୁତ୍ ବେଗରେ ଚାରିଆଡେ ପ୍ରଚାର ହେବା ମାତ୍ରକେ  ଲୋକମାନେ ହାତୀ ମରିଥିବା ସ୍ଥାନକୁ ଦେଖିବାକୁ ଛୁଟିଥିଲେ। ହେଲେ ବନ ବିଭାଗ ବିଳମ୍ବରେ ଘଟଣା ସ୍ଥଳକୁ ଆସିଥିବା ଗ୍ରାମବାସୀ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି। ଘଟଣା ସ୍ଥଳକୁ ରେଢାଖୋଲ ଡିଏଫଓ ଅରବିନ୍ଦ ମହାନ୍ତି , ଏସିଏଫ  ରେଢାଖୋଲ, ନାକଟିଦେଉଳ ଏସିଏଫ୍ ଅଶ୍ୱିନୀ କୁମାର ବେହେରା ଏବଂ ବନ ବିଭାଗର କର୍ମଚାରୀମାନେ ପହଂଚିଥିଲେ। ହାତୀ ମରିଥିବା ସ୍ଥାନକୁ କର୍ଡନ କରି ରଖା ଯାଇଥିଲା। ବାହାର କୌଣସି ଲୋକଙ୍କୁ ହାତୀ ମୃତ୍ୟୁବରଣ କରିଥିବା ସ୍ଥାନକୁ ଛଡା ଯାଉ ନ ଥିଲା। ସେଠାରେ ବହୁ ସଂଖ୍ୟାରେ ଲୋକାରଣ୍ୟ ହୋଇଥିଲା। ବନବିଭାଗ ଏହାର ତଦନ୍ତ କରୁଥିବା ବେଳେ ଖବର ଲେଖାହେବା ପର୍ଯ୍ୟନ୍ତ କାହାରିକୁ ଗିରଫ କରି ନ ଥିଲା। ବାରମ୍ବାର ଏମିତି ନାକଟିଦେଉଳ ରେଞରେ ହାତୀ ବିଦ୍ୟୁତ୍ ସଂସ୍ପର୍ଶରେ ଆସି ମୃତ୍ୟୁବରଣ କରୁଛନ୍ତି।

ସୂଚନା ଥାଉକି ,ଗତ ଅଗଷ୍ଟ ୧୮ ତାରିଖରେ ନାକଟିଦେଉଳ ରେଞ ଅଧିନସ୍ଥ ଘୋଷରାମାଳ ସେକସନ୍ କାଉଁସିପାଳ ବିଟ ଚହଟାପଦା ଗ୍ରାମ ନିକଟସ୍ଥ ବାବା ମଠ ନିକଟରେ ଥିବା ଜଙ୍ଗଲରେ ୨୦ ବର୍ଷର ଏକ ମାଈ ହାତୀ ବିଦ୍ୟୁତ୍ ତାର ସଂସ୍ପର୍ଶରେ ଆସି ମୃତ୍ୟୁବରଣ କରିଥିଲା । ୨୦୦୬ ମସିହାରେ ଚରଡପଶି ନିକଟସ୍ଥ ଚହଟାପଦା ଠାରେ ୩ ଟି ହାତୀ ବିଦ୍ୟୁତ୍ ତାର ଲାଗି ମଧ୍ୟ ମୃତ୍ୟୁବରଣ କରିଥିଲେ । ବାରମ୍ବାର ଏପରି ଘଟଣା ଘଟି ହାତୀମାନଙ୍କର ଜୀବନ ଯାଉଥିଲେ ମଧ୍ୟ ବନବିଭାଗ କରୁଛି କଣ ତାହା ବଡ ପ୍ରଶ୍ନବାଚୀ ସୃଷ୍ଟି କରିଛି । ହାତୀ ମାନଙ୍କର ସୁରକ୍ଷା ପାଇଁ ସରକାର ଗଜ ସାଥୀ ରଖିଛନ୍ତି ହେଲେ ଗଜ ସାଥୀମାନେ ହାତୀ ଘଉଡାଇବାରେ ବିଫଳ ହେଉଛନ୍ତି । ସେ ପଟେ ପିସିସିଫ୍ ସୁଶାନ୍ତ ନନ୍ଦ କହିଛନ୍ତି ଯେ, ହାତୀ ମୃତ୍ୟୁର କାରଣ ବନବିଭାଗର ଦାୟିତ୍ୱହୀନତା । ଦୋଷୀ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଗଣମାଧ୍ୟମ ଆଗରେ ପ୍ରକାଶ କରିଛନ୍ତି ।

ରେଢାଖୋଲ (କନ୍ଦର୍ପ ବେହେରା): ବରିଷ୍ଠ ନାଗରିକ ତଥା ରେଢାଖୋଲ ଅଞ୍ଚଳର କବି ତଥା ନାଟ୍ୟ ନିର୍ଦ୍ଦେଶକ ଅବଧୂତ ବିଶ୍ବାଳଙ୍କ ଆଜି ପ୍ରାତଃ ସମୟରେ ବୁର୍ଲା ଠାରେ ପରଲୋକ ହୋଇ ଯାଇଛି। ମୃତ୍ୟୁ ବେଳକୁ ତାଙ୍କୁ ୮୪ ବର୍ଷ ବୟସ ହୋଇଥିଲା। ସେ ତାଙ୍କ ସାନପୁଅ ଅଧ୍ୟାପକ ଅଖିଳ ବିଶ୍ବାଳଙ୍କ ସମ୍ବଲପୁର ସ୍ଥିତ ବାସ ଭବନରେ ରହି ଚିକିତ୍ସିତ ହେଇଥିଲେ। ତାଙ୍କ ବଡ ପୁଅ ବଲାଙ୍ଗୀରରେ ଜିଲ୍ଲା ମଙ୍ଗଳ ଅଧିକାରୀ ଭାବେ ଅବସ୍ଥାପିତ।

ସ୍ବର୍ଗତ ବିଶ୍ବାଳ ମଧୁବନ ସାହିତ୍ୟ ସଂସଦର ପୁର୍ବତନ ସଭାପତି, ନାକଟିଦେଉଳ ମହାବିଦ୍ୟାଳୟ ପରିଚାଳନା କମିଟିର ପୁର୍ବତନ ସଭାପତି ଓ ସରାପାଲି ଉଚ୍ଚ ବିଦ୍ୟାଳୟର ପୁର୍ବତନ ମୁଖ୍ୟ ଲିପିକାର ଥିଲେ। ସେ ଜଣେ ସଂଗୀତ ନିର୍ଦ୍ଦେଶକ, ଭାଗବତ ପ୍ରେମୀ ଭାବରେ ପରିଚିତ ହେବା ସହିତ କୁଞ୍ଜବନ ଯଜ୍ଞର ପୁରୋଧ ଥିଲେ। ସେ ଗୀତାକୁ ଛନ୍ଦ ଭାବରେ ଲେଖି ପ୍ରକାଶିତ କରିଥିଲେ। ତାଙ୍କ ବିୟୋଗରେ ନାକଟିଦେଉଳ ମହାବିଦ୍ୟାଳୟ, ସରାପାଲି ଉଚ୍ଚ ବିଦ୍ୟାଳୟ, ଗ୍ରାମ ମଙ୍ଗଳ ଯୁବକ ସଂଘ ଓ ମହୁକୁଦ ଗ୍ରାମ କମିଟି ତରଫରୁ ଶୋକସଭା କରାଯାଇଥିଲା।

ସ୍ବର୍ଗତ ବିଶ୍ବାଳଙ୍କ ଦୁଇ ପୁଅ ବୋହୁ, ଦୁଇ ଝିଅ ଜ୍ବାଇଁ ଓ ଛଅ ଜଣ ନାତି ନାତୁଣି ଅଛନ୍ତି।  ଅବଧୂତ ବିଶ୍ବାଳଙ୍କ ବିୟୋଗରେ ସମଗ୍ର ସମ୍ବଲପୁର ଜିଲ୍ଲା ତଥା ରେଢାଖୋଲ ସବଡିଭିଜନ ଅଞ୍ଚଳରେ ଶୋକର ଛାୟା ଖେଳି ଯାଇଛି।

ରେଢ଼ାଖୋଲ (ସୀତାରାମ ଅଗ୍ରୱାଲ): ସମ୍ବଲପୁର ଜିଲ୍ଲା ରେଢାଖୋଲ ଉପଖଣ୍ଡ ନାକଟିଦେଉଳ ବନାଞ୍ଚଳ ଅନ୍ତର୍ଗତ ବାଟଗାଁ ଫରେଷ୍ଟ ସେକ୍ସନର ବିନ୍ଧପୁର -ଅଙ୍ଗାବିରା ରାସ୍ତାରୁ ବୁଧବାର ସକାଳୁ ଏକ ଭାଲୁର ମୃତଦେହ ଉଦ୍ଧାର କରିଛି ବନବିଭାଗ।

ବନ ବିଭାଗ ସୂତ୍ରରୁ ପ୍ରକାଶ ଯେ,ରାଞ୍ଚି -ବିଜୟୱାଡ଼ା ଜାତୀୟ ରାଜପଥ ନାକଟିଦେଉଳ ଅଙ୍ଗାବିରା ରାସ୍ତାର ବିନ୍ଧପୁର ପୋଲ ନିକଟ ଗେଣ୍ଠଣି ଠାରେ ଭାଲୁ ଟି ରାସ୍ତା ପାରି ହେଉଥିବା ବେଳେ ଦ୍ରୁତ ଗତିରେ ଆସୁଥିବା ଏକ ଅଜଣା ଗାଡି ଭାଲୁଟିକୁ ଧକ୍କା ଦେଇଥିଲା। ଆଜି ସକାଳୁ ଏହି ରାସ୍ତାରେ ଯାଉଥିବା କିଛି ଲୋକ ରକ୍ତାକ୍ତ ଅବସ୍ଥାରେ ଭାଲୁର ମୃତ ଦେହ ପଡ଼ିଥିବା ଦେଖିବାକୁ ପାଇ ବନ ବିଭାଗକୁ ଖବର ଦେଇଥିଲେ।

ଖବର ପାଇ ବାଟଗାଁ ଫରେଷ୍ଟର ଦିଲ୍ଲୀପ କୁମାର ବେହେରା ସଦଳ ବଳେ ଘଟଣା ସ୍ଥଳରେ ପହଞ୍ଚି ଭାଲୁର ମୃତ ଦେହ ଜବତ କରିଥିବା ଜଣାପଡିଛି। ତେବେ ବ୍ୟବଚ୍ଛେଦ ପରେ ଭାଲୁର ମୃତ ଦେହକୁ ପୋତି ଦିଆ ଯାଇଛି ବୋଲି ବନ ବିଭାଗ କହିଛି।

ରେଢ଼ାଖୋଲ (କନ୍ଦର୍ପ ବେହେରା): ଓଡିଶା ସରକାରଙ୍କ ଗ୍ରାମ୍ୟ ଉନ୍ନୟନ, ପଂଚାୟତ ରାଜ ଓ ପାନୀୟ ଜଳ ବିଭାଗର ମାନ୍ୟବର ମନ୍ତ୍ରୀ ରବି ନାରାୟଣ ନାଏକ ରେଢ଼ାଖୋଲ ଉପଖଣ୍ଡର ରେଢ଼ାଖୋଲ ଓ ନାକଟିଦେଉଳ ବ୍ଲକରେ ଚାଲିଥିବା ବିଭିନ୍ନ ବିଭାଗର ଉନ୍ନତିମୂଳକ କାର୍ଯ୍ୟର ସମୀକ୍ଷା କରିଛନ୍ତି। ସ୍ଥାନୀୟ ରେଢ଼ାଖୋଲ ବିଜ୍ଞାପିତ ଅଞ୍ଚଳ ପରିଷଦ ସମ୍ମିଳନୀ କକ୍ଷରେ ଅନୁଷ୍ଠିତ ସମୀକ୍ଷା ବୈଠକରେ ମୁଖ୍ୟତଃ କୃଷି ବିଭାଗ,ବନବିଭାଗ,ଜଳ ସେଚନ, ଯୋଗାଣ ବିଭାଗ, ରାସ୍ତା ଓ କୋଠାବାଡ଼ି, ଗ୍ରାମ୍ୟ ଉନ୍ନୟନ ଜାତୀୟ ରାଜପଥ,ପାନୀୟ ଜଳ,ସ୍ୱାସ୍ଥ୍ୟ,ପାନୀୟ ଜଳ, ଶିକ୍ଷା, ପ୍ରଧାନମନ୍ତ୍ରୀ ଆବାସ ଯୋଜନା,ବିଦ୍ୟୁତ ବିଭାଗ, ସୁଭଦ୍ରା, ରେଢ଼ାଖୋଲ ଏନଏସିର ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ବିଭିନ୍ନ ବିଭାଗ ନିଜର ବିଭାଗରେ ଚାଲିଥିବା ବିଭିନ୍ନ କାର୍ଯ୍ୟ ମାନ୍ୟବର ମନ୍ତ୍ରୀଙ୍କ ପାଖରେ ଉପସ୍ଥାପନ କରିଥିଲେ।

ବିଭାଗୀୟ କାର୍ଯ୍ୟକୁ ସଠିକ ଭାବେ ଆଗକୁ ନେବା ରେଢ଼ାଖୋଲ ଅଞ୍ଚଳ ସହିତ ସମ୍ବଲପୁର ଜିଲ୍ଲାକୁ ରାଜ୍ୟରେ ଏକ ନମ୍ବର କରିବା ପାଇଁ ସମସ୍ତେ ସଂକଳ୍ପ ହୋଇ କାମ କରିବାକୁ ଅଧିକାରୀମାନଙ୍କୁ ପରାମର୍ଶ ଦେଇଥିଲେ। ଲୋକ ମାନେ ଯେମିତି ଉନ୍ନତ ସେବା ପାଇବେ ସେଥି ପ୍ରତି ଦୃଷ୍ଟି ଦେବାକୁ ସମସ୍ତ ଅଧିକାରୀ ମାନଙ୍କୁ ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ଆମ ସରକାର ୧୦୦ ଦିନ ପାର କରିସାରିଛି।

ବିଭିନ୍ନ ଲୋକାଭିମୁଖୀ ଯୋଜନା ହାତକୁ ନେବା ସହିତ ଆଗକୁ ମଧ୍ୟ ଏହି ଡବଲ ଇଞ୍ଜିନ ସରକାର ଲୋକଙ୍କ ପାଇଁ ବହୁତ କାର୍ଯ୍ୟ କରିବାକୁ ଯାଉଛି ବୋଲି ମନ୍ତ୍ରୀ କହିଛନ୍ତି। ନୂଆଁ ପ୍ରକଳ୍ପ ଚିନ୍ତା କରନ୍ତୁ ତାହାକୁ କାର୍ଯ୍ୟକାରୀ କରାଯିବ ବୋଲି ମାନ୍ୟବର ମନ୍ତ୍ରୀ କହିଛନ୍ତି। ସରକାର ଜମି ହିଁ ଜମି ଦେବା, ଖେଳ ପଡିଆ କ୍ଲଷ୍ଟର କଲୋନୀ ନିର୍ମାଣ ଉପରେ ମାନ୍ୟବର ମନ୍ତ୍ରୀ ଆଲୋଚନା କରିଥିଲେ।

ଆଜିର ଏହି ବୈଠକରେ ଅନ୍ୟ ମାନଙ୍କ ମଧ୍ୟରେ ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଧର୍ମେନ୍ଦ୍ର ମଲ୍ଲିକ, ରେଢ଼ାଖୋଲ ଏନଏସି ଅଧ୍ୟକ୍ଷ ଶିବନାରାୟଣ ସାହୁ,ରେଢ଼ାଖୋଲ ବନଖଣ୍ଡ ଅଧିକାରୀ ଅରବିନ୍ଦ ମହାନ୍ତି, ରେଢ଼ାଖୋଲ ବିଡ଼ିଓ ମନୋଜ ମେହେର, ରେଢ଼ାଖୋଲ ବିଜ୍ଞାପିତ ଅଞ୍ଚଳ ପରିଷଦର ନିର୍ବାହୀ ଅଧିକାରୀ ବିରଞ୍ଚି ଧରୁଆ ସମେତ ସମସ୍ତ ଜିଲ୍ଲା ଏବଂ ଉପଖଣ୍ଡ ସ୍ତରୀୟ ଅଧିକାରୀ ମାନେ ଉପସ୍ଥିତ ଥିଲେ।

ରେଢ଼ାଖୋଲ (କନ୍ଦର୍ପ ବେହେରା ): କଥାରେ ଅଛି ରଖେ ହରି ତ ମାରିବ କିଏ? ରେଢ଼ାଖୋଲ ରେଳ ଷ୍ଟେସନ ଠାରୁ ୪କିମି ଦୂର ଅଙ୍ଗାରପୁଡ଼ା ଗ୍ରାମରେ ବିଳମ୍ବିତ ରାତିରେ ଟ୍ରେନରୁ ପାଞ୍ଚ ବର୍ଷର ଶିଶୁ ଖସି ପଡିଥିଲା। କିନ୍ତୁ ରାତିରେ ଶିଶୁକୁ ଆର ପି ଏଫ ସୁରକ୍ଷିତ ଉଦ୍ଧାର କରିଥିଲା।

ଖବରରୁ ପ୍ରକାଶ ଯେ, ବ୍ରହ୍ମପୁର ନିବାସୀ ମାନସ ହୋତା ସପରିବାର ଭୁବନେଶ୍ୱର ଦୁର୍ଗ-ପୁରୀ ଏକ୍ସପ୍ରେସରେ ଭୁବନେଶ୍ୱର ଯାଉଥିଲେ। ସାଙ୍ଗରେ ପାଞ୍ଚ ବର୍ଷର ପୁଅ ପ୍ରିତିଶ ପ୍ରଜ୍ଞ୍ୟା ହୋତା ମଧ୍ୟ ଥିଲେ। ହେଲେ ରାତି ପାଖା ପାଖି ୨ଟା ସମୟରେ ଶିଶୁଟି ରେଢ଼ାଖୋଲ ଠାରୁ ଚାରି କିଲୋମିଟର ଦୂର ଅଙ୍ଗାରପୁଡା ଗ୍ରାମରେ ଶିଶୁଟି ପଡିଯାଇଥିଲା। ଶିଶୁଟିର ପିତା ମାତା ପୁଅ ଟ୍ରେନ ତଳକୁ ପଡିବା ସମ୍ପର୍କରେ ଆଦୌ ଜାଣିପାରି ନ ଥିଲେ। ଟ୍ରେନ ଟି ଅନୁଗୋଳ ପହଁଚିଲା ବେଳକୁ ପୁଅ ଟିକୁ ନ ପାଇ ପିତା ମାନସ ହୋତା ରେଳ ବିଭାଗ କୁ ଫୋନ୍ କରିଥିଲେ। ଏହା ଭିତରେ ଏକ ମାଲ ବାହି ଟ୍ରେନ ସେଇ ରୁଟ ଦେଇ ଯାଉଥିବା ବେଳେ ଏକ ମୃତ ଦେହ ପଡ଼ିଥିବା ରେଢ଼ାଖୋଲ ଷ୍ଟେସନକୁ ସୂଚନା ଦେବା ପରେ ରେଢ଼ାଖୋଲ ଆର ପି ଏଫ ପହଂଚି ମୃତ ବଦଳରେ ଶିଶୁଟିକୁ ଜୀବନ୍ତ ଉଦ୍ଧାର କରି ରେଢ଼ାଖୋଲ ଡାକ୍ତରଖାନାରେ ଭର୍ତ୍ତି କରିଥିଲେ।

ଟ୍ରେନ ଟି ଢେଙ୍କାନାଳ ପହଁଚିଲା ବେଳକୁ ପୁଅ ରେଢ଼ାଖୋଲ ରେ ଥିବା ଜାଣି ପାରି ଥିଲେ ଶିଶୁଟିର ପିତାମାତା। ଶିଶୁ ଟି ରାତି ତମାମ ଟ୍ରାକ ପାଖରେ ପଡି ରହିଥିଲା। ମୁହଁ ରେ ସାମାନ୍ୟ ଆଘାତ ଲାଗିଛି। ବେକରେ ଏକ ଲକେଟ ପିନ୍ଧି ଥିବାରୁ ଭଗବାନ ତାକୁ ବଞ୍ଚାଇଦେଲେ ବୋଲି କୁହାଯାଉଛି।

ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ନାକଟିଦେଉଳ ଥାନାର ସାହେବି ଗ୍ରାମରେ ଜଣେ ଯୁବତୀକୁ ଦୁଷ୍କର୍ମ ପରେ ହତ୍ୟା ଘଟଣାରେ ମୃତ ଯୁବତୀଙ୍କ ଶବକୁ ପରିବାର ଲୋକେ କି ଗାଁ ଲୋକେ ଦାହ କରିବାକୁ ପ୍ରଶାସନକୁ ରୋକ ଠୋକ ମନା କରିଦେଇଥିଲେ।  ପ୍ରଶାସନ ବାଧ୍ୟ ହୋଇ ରେଢ଼ାଖୋଲରେ ଶବକୁ ଦାହ କରିଥିବା ଜଣା ପଡିଛି।

ଯୋଉ ଝିଅ ପାଇଁ ଦୁଇ ଦିନ ଧରି ରାସ୍ତା ରୋକ କରି ଆନ୍ଦୋଳନ କରୁଥିଲେ ସେଇ ଗ୍ରାମବାସୀ ମାନବିକତା ହରାଇଲେ। ମାନବିକତା ଦୃଷ୍ଟିରୁ ଶବ ଟିକୁ ଦାହ କରିବାର ଆବଶ୍ୟକତା ଥିଲା ହେଲେ ଶେଷରେ ତାଙ୍କ ଶବକୁ ଅସମ୍ମାନ କଲେ।

ସୂଚନା ଥାଉକି, ଶୁକ୍ରବାର ଦିନ ଗାଧୁଆ ତୁଠରେ ଦୁଷ୍କର୍ମର ଶିକାର ହୋଇ ମୃତ ବରଣ କରିଥିଲେ ସାହେବି ଗ୍ରାମର ସୁଭାଷିନୀ ମାଟିଆରୀ (୨୫)। ସେହି ଗ୍ରାମର ଶିଶିର ବେହେରା (ହରି) ଦୁଷ୍କର୍ମ କରି ମାରିଦେଇ ଗ୍ରାମ ନିକଟସ୍ଥ ଜଙ୍ଗଲରେ ପକାଇ ଦେଇଥିବା ବେଳେ ରବିବାର ଦିନ ସୁଭାଷିନୀର ମୃତ ଦେହ ମିଳିଥିଲା। ଏ ନେଇ ଗ୍ରାମବାସୀ ବିଭିନ୍ନ ଦାବି ନେଇ ରାସ୍ତା ରୋକ କରିଥିବା ବେଳେ ରବିବାର ଦିନ ରାତ୍ରିରେ ଶବକୁ ବ୍ୟବଚ୍ଛେଦ ପାଇଁ ବୁର୍ଲା ପଠାଯାଇଥିଲା।

ତେବେ ପ୍ରଶାସନ ବୁର୍ଲାରୁ ଶବକୁ ଆଣି ରେଢ଼ାଖୋଲ ଡାକ୍ତରଖାନାରେ ରଖିଥିଲେ। ଶବ ଗ୍ରାମକୁ ଆସିବା ଜାଣି ଗ୍ରାମବାସୀ ଉତ୍ୟକ୍ତ ହୋଇଥିଲେ। ଏ ନେଇ ପ୍ରଶାସନ ପକ୍ଷରୁ ଉପଜିଲ୍ଲାପାଳ ରଶ୍ମିରଂଜନ ମହନ୍ତ, ଅତିରିକ୍ତ ଏସ ପି ଅଜୟ କୁମାର ମିଶ୍ର, ଆଲବିନୁସ କେରକେଟା, ଏସ ଡି ପି ଓ ପ୍ରଶାନ୍ତ କୁମାର ମେହେର, ନାକଟିଦେଉଳ ବିଡ଼ିଓ ଧନାଇ ଚରଣ ଟୁଡୁ, ତହସିଲଦାର ଅମର ଜେ ଡୁଙ୍ଗଡୁଙ୍ଗ ଙ୍କ ସହ ବିଭିନ୍ନ ଥାନାର ଥାନାଧିକାରୀ, ୨ ପ୍ଲାଟୁନ ପୋଲିସ ଫୋର୍ସ ସାହେବୀ ଗ୍ରାମରେ ଉପସ୍ଥିତ ଥିଲେ। ହେଲେ ଶବକୁ ଦାହ କରିବା ପାଇଁ ଗ୍ରାମ ବାସୀ ରାଜି ହୋଇ ନ ଥିଲେ।

ପ୍ରଥମେ କୁଟାସିଂହା, ଝାରବେଡା ଓ ଶେଷରେ ସାହେବୀ ଗ୍ରାମରେ ଶବ ଦାହ ପାଇଁ ଗ୍ରାମବାସୀଙ୍କ ପକ୍ଷରୁ ବାରଣ କରାଯାଇଥିଲା। ବାଧ୍ୟ ହୋଇ ରେଢ଼ାଖୋଲ ଏନଏସି ରେ ଥିବା ଶବ ଦାହ ଗୃହରେ ଶବ ଦାହ କରାଗଲା ବୋଲି ଜଣାପଡିଛି।

ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ରେଢ଼ାଖୋଲ ବନଖଣ୍ଡ ଚାରମାଳ ରେଞ୍ଜ ଗିରିଧିଖମଣ ଗ୍ରାମରୁ ଆଜି ଭୋରରୁ ୨୦୨ ବଣ୍ଡଲ କେନ୍ଦୁପତ୍ର ଜବତ କରିଛି ବନବିଭାଗ।

ସୂଚନାଯୋଗ୍ୟ ଯେ, ଚାରମାଳ ଅଞ୍ଚଳରୁ ଏକ ପିକ‌ଅପ ଭ୍ୟାନରେ ବେଆଇନ ଭାବରେ ପଶ୍ଚିମବଙ୍ଗ ରାଜ୍ୟକୁ ଚାଲାଣ ହେଉଥିବା ସମୟରେ ବନ ବିଭାଗ ଖବର ପାଇ ଏସି‌ଏଫ ଗଜେନ୍ଦ୍ର କୁମାର ଅନଦାଜାଙ୍କ ନେତୃତ୍ୱରେ ଏକ ଟିମ୍ ଚଢାଉ କରି ବେଆଇନ ଭାବେ ଚାଲାଣ ହେଉଥିବା ୨୦୨ ବଣ୍ଟଲ କେନ୍ଦୁପତ୍ର ସହ ଏକ ପିକ‌ଅପ ଭ୍ୟାନକୁ ଜବତ କରିଥିଲା।

ତେବେ ଚଢ଼ାଉ ସମୟରେ ମାଫିଆ ମାନେ ଫେରାର ହୋଇଯାଇଛନ୍ତି। ଏହି ଚଢ଼ାଉ ରେ ଏସିଏଫ ମୈତ୍ରୀ ମଞିତ ବିଶ୍ଵାଳ, ବଡ଼ମାଳ ରେଞ୍ଜ ଅଧିକାରୀ ପ୍ରଦୀପ ସେଠୀ, ଫରେଷ୍ଟର ବିଜୟ କୁମାର ବିଶ୍ବାଳ ଓ ଫରେଷ୍ଟ ଗାର୍ଡ ଅଜିତ କୁମାର ସାହୁ ସାମିଲ ହୋଇଥିଲେ।