Categories
ବିଶେଷ ଖବର ରାଜ୍ୟ ଖବର

ଲୋକସେବା ଦିବସ ପାଳନ ଅବସରରେ ଏମିତି କାହିଁକି କହିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

ଭୁବନେଶ୍ବର: ଗୋପବନ୍ଧୁ ପ୍ରଶାସନିକ ଏକାଡେମୀ ପକ୍ଷରୁ ଆଜି ଅପରାହ୍ଣରେ ଲୋକସେବା ଭବନ ସ୍ଥିତ କନଭେନ୍ସନ୍ ସେଣ୍ଟର ଠାରେ ସିଭିଲ ସର୍ଭିସ ଦିବସ ପାଳିତ ହୋଇଯାଇଛି। ଆୟୋଜିତ ଏହି କାର‌୍ୟ୍ୟକ୍ରମରେ ରାଜ୍ୟର ବିଭିନ୍ନ ବିଭାଗରେ କାର‌୍ୟ୍ୟରତ ଭାରତୀୟ ପ୍ରଶାସନିକ ସେବା ଅଧିକାରୀ, ପୁଲିସ୍ ସେବା ଅଧିକାରୀ, ଓଡିଶା ପ୍ରଶାସନିକ ସେବା ଅଧିକାରୀ ଓ ଅନ୍ୟ ସମସ୍ତ ପ୍ରଶାସନିକ ସେବା ଅଧିକାରୀମାନେ ଯୋଗ ଦେଇଥିଲେ। ସମାବେଶରେ ମୁଖ୍ୟ ଅତିଥିମାନେ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଯୋଗଦେଇ ପ୍ରଶାସନିକ ଅଧିକାରୀମାନଙ୍କୁ ସମ୍ବୋଧିତ କରିଥିଲେ।

ସମାବେଶରେ ମୁଖ୍ୟମନ୍ତ୍ରୀ କହିଲେ ଯେ, ଆମର ସମ୍ବିଧାନ ଅନୁସାରେ ନାଗରିକମାନେ ହେଉଛନ୍ତି ଦେଶ ନିର୍ମାଣର ପ୍ରମୁଖ କ୍ଷେତ୍ର ଏବଂ ସେଥିପାଇଁ ସେମାନେ ଶାସନର କେନ୍ଦ୍ରବିନ୍ଦୁ ହେବା ଦରକାର। ଆମ ସରକାରଙ୍କ ଲକ୍ଷ୍ୟ ହେଉଛି ସ୍ୱଚ୍ଛ, ଉତ୍ତରଦାୟୀ ଏବଂ ଦାୟିତ୍ୱର ସହ ନାଗରିକମାନଙ୍କର କଲ୍ୟାଣକୁ ଗୁରୁତ୍ୱ ଦେବା । ବ୍ୟବସ୍ଥାରେ କେବଳ ଲକ୍ଷଣଗୁଡ଼ିକର ଚିହ୍ନଟ ପରିବର୍ତ୍ତେ ସମସ୍ୟାର ମୂଳ କାରଣଗୁଡିକ ଖୋଜି ଏହାର ସମାଧାନ କରି ସମାଜରେ ମୌଳିକ ପରିବର୍ତ୍ତନ ଆଣିବା ପାଇଁ “ଟ୍ରାନ୍ସଫର୍ମେଟିଭ ଗଭର୍ଣ୍ଣେନ୍ସ” ଉପରେ ମାନ୍ୟବର ମୁଖ୍ୟମନ୍ତ୍ରୀ ଗୁରୁତ୍ୱ ଦେଇଥିଲେ।

ଏହି ଅବସରରେ ମାନ୍ୟବର ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଥିଲେ ଯେ, ଓଡ଼ିଶାରେ ପ୍ରଶାସନିକ ସେବାରେ ଉଭୟ ଆଚରଣଗତ ଓ ଆଭିମୁଖ୍ୟରେ ଉନ୍ନତି ଘଟୁଛି । ନୂତନ ଜ୍ଞାନକୌଶଳ ପ୍ରଶାସନିକ ଅଧିକାରୀମାନେଙ୍କୁ ଅଧିକ ଉତ୍ତରଦାୟୀ ଏବଂ ଦକ୍ଷ କରାଇପାରିବ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଥିଲେ। ଏ ଦିଗରେ ‘୫ଟି’ ଉପକ୍ରମ ଏବଂ ‘ମୋ ସରକାର’ ଆମ ଶାସନ ବିଷୟରେ ଲୋକଙ୍କ ଧାରଣାରେ ବାସ୍ତବ ପରିବର୍ତ୍ତନ ଆଣିବା ପାଇଁ ଉଦ୍ଦିଷ୍ଟ ବୋଲି ସେ କହିଥିଲେ।

ପୂର୍ବରୁ ସିଭିଲ୍ ସର୍ଭିସ୍ ପାରମ୍ପରିକ ଭାବରେ ଊର୍ଦ୍ଧ୍ୱରୁ- ନିମ୍ନ ଆଭିମୁଖ୍ୟ ଆଧାରରେ ଗଠିତ ହୋଇଥିଲା, କିନ୍ତୁ ଏହି ଆଭିମୁଖ୍ୟକୁ ଅଧିକ ନାଗରିକ-କୈନ୍ଦ୍ରିକ ଶାସନ ଦୃଷ୍ଟିରୁ ସ୍ୱୀକୃତି ସହିତ କ୍ରମାଗତ ଭାବରେ ପରିବର୍ତ୍ତିତ ହେଉଛି। ବୈଷିୟିକ ଜ୍ଞାନକୌଶଳର ଅଗ୍ରଗତି, ଜନସାଧାରଣଙ୍କ ଆଶା ଏବଂ ନାଗରିକମାନେ ଶାସନର ପ୍ରକୃତ ହିତାଧିକାରୀ ବୋଲି ସ୍ୱୀକୃତି ଭଳି କାରଣରୁ ଏହି ପରିବର୍ତ୍ତନ ଘଟୁଛି।

ଅଧିକ ନାଗରିକ-କେନ୍ଦ୍ରିକ ଏବଂ ସଫଳତା ଭିତ୍ତିକ ଆଭିମୁଖ୍ୟ ଉପରେ ଗୁରୁତ୍ୱ ଦେଉଥିବା ଆମ ସରକାର ବିଭିନ୍ନ ବିଭାଗ ଏବଂ ଅଂଶୀଦାରଙ୍କ ମଧ୍ୟରେ ଅଧିକ ସହଯୋଗକୁ ପ୍ରୋତ୍ସାହିତ କରିବା ସହିତ ନିଷ୍ପତ୍ତି ନେବା ଏବଂ ସେବା ପ୍ରଦାନରେ ଉନ୍ନତି ଆଣିବା ପାଇଁ ଟେକ୍ନୋଲୋଜି ଏବଂ ଡାଟା ବିଶ୍ଲେଷଣ ଉପରେ ଗୁରୁତ୍ୱ ଦେଉଛନ୍ତି। ପ୍ରଶାସନିକ କର୍ମଚାରୀମାନେ ପରିବର୍ତ୍ତିତ ସମୟରେ ଅଧିକ ସକ୍ରିୟ, ସୃଜନଶୀଳ ହେବା ଏବଂ ପ୍ରଶାସନିକ ସେବାର ମାନସିକତା ଏବଂ ସଂସ୍କୃତିରେ ପରିବର୍ତ୍ତନ କରି “ପରିବର୍ତ୍ତନଶୀଳ ଶାସନ”ର ଉଦ୍ଦେଶ୍ୟକୁ ଫଳପ୍ରଦ କରିବାରେ ସହାୟକ ହେବାକୁ ମୁଖ୍ୟମନ୍ତ୍ରୀ କହିଥିଲେ।

ମୁଖ୍ୟ ବକ୍ତା ତଥା ଦେଶର ବିଶିଷ୍ଟ ପ୍ରଶାସନିକ ଅଧିକାରୀ ଆଇଏଏସ୍ (ଅବସରପ୍ରାପ୍ତ) ଅମରଜିତ ସିହ୍ନା ଯୋଗଦେଇ ‘ପରିବର୍ତ୍ତନକାରୀ ଶାସନ ପାଇଁ ପ୍ରଶାସନିକ ସେବା ପ୍ରସ୍ତୁତ କରିବା’ ଶୀର୍ଷକରେ ପାଓ୍ୱାର ପଏଣ୍ଟ ଉପସ୍ଥାପନ ସହ ସାରଗର୍ଭକ ବକ୍ତବ୍ୟ ରଖିଥିଲେ। ସମ୍ପ୍ରତି ବିଗତ ବର୍ଷ ଗୁଡ଼ିକରେ ରାଜ୍ୟର ଅଭିବୃଦ୍ଧି ଏବଂ ଉପଲବ୍ଧି ବିଷୟରେ ସେ ତଥ୍ୟ ପ୍ରକାଶ କରି ଓଡିଶାର’୫ଟି’ ଉପକ୍ରମ ଆଧାରରେ ବିକାଶର ଧାରା, ପ୍ରଭାବଶାଳୀ ବିପର‌୍ୟ୍ୟୟ ପରିଚାଳନା, ମିଶନ ଶକ୍ତି, କ୍ରୀଡ଼ା କ୍ଷେତ୍ରର ସଫଳତା ଏବଂ ୨୦୨୨ର ଏମଏସଏମଇ ନୀତି ଇତ୍ୟାଦି ସହ ପ୍ରଶାସନିକ ସଂସ୍କାର ବିଷୟରେ ଉଲ୍ଲେଖ କରିଥିଲେ। ଦ୍ରୁତ ବିକାଶ ଏବଂ ଐତିହାସିକ ବିକାଶ ବିଭାଜନକୁ ଦୂର କରିବା ପାଇଁ ରାଜ୍ୟ ସରକାର ନିଜର ମାନବ ସଂବଳ ବିନିଯୋଗ କରିବାକୁ ସେ ଅନୁରୋଧ କରିଥିଲେ।

ଗୋପବନ୍ଧୁ ପ୍ରଶାସନିକ ଏକାଡେମୀର ମହାନିର୍ଦ୍ଦେଶକ ରାଜ କୁମାର ଶର୍ମା ସ୍ୱାଗତ ଭାଷଣ ପ୍ରଦାନ କରିବା ସହ ଓଡ଼ିଶାରେ ସିଭିଲ୍ ସର୍ଭିସ୍ ଦିବସ-୨୦୨୩ ପାଳନ ଆଭିମୂଖ୍ୟ ସମ୍ପର୍କରେ ବକ୍ତବ୍ୟ ରଖିଥିଲେ। ନିଜ ଅଭିଭାଷଣରେ ସେ ସରକାରୀ କର୍ମଚାରୀଙ୍କ ନିଷ୍ଠା, ପରିଶ୍ରମ ଏବଂ ତ୍ୟାଗକୁ ସ୍ୱୀକୃତି ଦେବା ସହ ଏକ ସମାନ ଓ ସମୃଦ୍ଧ ସମାଜ ଗଠନ ଦିଗରେ କାର୍ଯ୍ୟ କରିବାର ପ୍ରତିବଦ୍ଧତାକୁ ଦୋହରାଇବା ପାଇଁ ସମସ୍ତଙ୍କୁ ସଚେତନ କରିଥିଲେ।

‘୫-ଟି’ ଚାର୍ଟର ଏବଂ ଆକ୍ସନ ପ୍ଲାନ କାର‌୍ୟ୍ୟକାରୀ ହେବା ଦ୍ୱାରା ଓଡ଼ିଶାରେ ସୁଶାସନର ଗତି ଉପରେ ଏକ ଗଠନମୂଳକ ପ୍ରଭାବ ପଡ଼ିଛି ବୋଲି ସେ ଆଲୋକପାତ କରିବା ସହ ସମସ୍ତଙ୍କୁ ଯଥାସମ୍ଭବ ଶ୍ରେଷ୍ଠତା ପ୍ରଦର୍ଶନ କରିବାକୁ ଉଦ୍ୟମ କରିବାକୁ ସେ ଅନୁରୋଧ କରିଥିଲେ।
ରାଜ୍ୟ ମୁଖ୍ୟ ଶାସନ ସଚିବ ଶ୍ରୀ ପ୍ରଦୀପ କୁମାର ଜେନା ଶେଷ ବକ୍ତବ୍ୟ ଓ ଧନ୍ୟବାଦ ଅର୍ପଣ କରିଥିଲେ। ରାଜ୍ୟରେ ପ୍ରଥମ ଥର ପାଇଁ ଏଭଳି ଏକ ଗୁରୁତ୍ୱପୂର୍ଣ୍ଣ କାର‌୍ୟ୍ୟକ୍ରମ ଆୟୋଜନ କରିଥିବାରୁ ଗୋପବନ୍ଧୁ ପ୍ରଶାସନର ଡିଜି ଶ୍ରୀ ରାଜ କୁମାର ଶର୍ମାଙ୍କୁ ସେ ପ୍ରଶଂସା କରିଥିଲେ। ଏହାକୁ ବାର୍ଷିକ କାର‌୍ୟ୍ୟକ୍ରମରେ ରଖିବାକୁ ସେ ଏକାଡେମୀକୁ ପରାମର୍ଶ ଦେଇଥିଲେ।

ରାଜ୍ୟର ସମସ୍ତ ପ୍ରଶାସନିକ ସେବା ଅଧିକାରୀଙ୍କ କଠିନ ପରିଶ୍ରମ ଓ ପ୍ରୟାସକୁ ସ୍ୱୀକାର କରିବା ସହ ରାଜ୍ୟର ପ୍ରତ୍ୟେକ ନାଗରିକଙ୍କ ଜୀବନଧାରଣର ମାନ ବୃଦ୍ଧି ଉଦ୍ଦେଶ୍ୟରେ ‘୫ଟି’ ମଡେଲ ଅବଲମ୍ବନ କରିବା ଉପରେ ସେ ଗୁରୁତ୍ୱାରୋପ କରିଥିଲେ। ୧୯୯୯ ମହାବାତ୍ୟାରୁ ଓଡ଼ିଶାର ଯାତ୍ରା ବିଷୟରେ ସେ ବର୍ଣ୍ଣନା କରିଥିଲେ, ଯେଉଁଥିରେ ଦଶ ହଜାର ଲୋକଙ୍କ ମୃତ୍ୟୁ ଘଟିଥିଲା ଏବଂ ବିଗତ ବର୍ଷଗୁଡ଼ିକରେ ବଡ ଧରଣର ପ୍ରାକୃତିକ ବିପର‌୍ୟ୍ୟୟରେ ଶୂନ୍ୟ ମୃତ୍ୟୁ ଘଟିଥିଲା ବୋଲି ସେ ପ୍ରକାଶ କରିଥିଲେ।

ନାଗରିକ କୈନ୍ଦ୍ରିକ ଶାସନକୁ ସୁନିଶ୍ଚିତ କରିବା ପାଇଁ ସେ ମାନ୍ୟବର ମୁଖ୍ୟମନ୍ତ୍ରୀଙ୍କ ବାର୍ତ୍ତାକୁ ଦୋହରାଇଥିଲେ। ପ୍ରକ୍ରିୟା ଏବଂ ପ୍ରକ୍ରିୟାକୁ ସରଳ କରିବା ପାଇଁ ଟେକ୍ନୋଲୋଜି ଏବଂ ଅଟୋମେସନ୍ ବିକଶିତ କରିବାର ଆବଶ୍ୟକତା ରହିଛି ବୋଲି ପ୍ରକାଶ କରିବା ସହ ଲୋକଙ୍କ ଆଶା, ଆକାଂକ୍ଷା, ଦାବୀ ଏବଂ ସରକାରଙ୍କ ସଫଳତାକୁ ଆଖି ଆଗରେ ସରକାର ଓ ଶାସନ ମଧ୍ୟରେ ସେତୁ ସଦୃଶ ଉତ୍ସର୍ଗୀକୃତ ଭାବେ କାର‌୍ୟ୍ୟ କରିବାକୁ ସେ ପରାମର୍ଶ ଦେଇଥିଲେ। ଅଭିଭାଷଣ ପରେ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗଙ୍କ ଅଧ୍ୟକ୍ଷତାରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା।

କାର‌୍ୟ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପୋଲିସ ମହାନିର୍ଦ୍ଦେଶକ ଶ୍ରୀ ସୁନିଲ କୁମାର ବଂଶଲ , ପ୍ରଧାନ ମୁଖ୍ୟ ବନ ସଂରକ୍ଷକ ତଥା ବନ ବାହିନୀ ମୁଖ୍ୟ ଶ୍ରୀ ଦେବୀଦତ୍ତ ବିଶ୍ୱାଳ ପ୍ରମୁଖ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ। ଲୋକସେବା ଭବନସ୍ଥିତ କନଭେନ୍ସନ୍ ହଲ୍ ରେ ରାଜ୍ୟର ପ୍ରଶାସନିକ ସେବାର ପ୍ରତିନିଧିତ୍ୱ କରୁଥିବା ସମସ୍ତ ଆଇଏଏସ୍, ଆଇଏଫଏସ୍, ଆଇପିଏସ୍ ଏବଂ ଓଡିଶା ପ୍ରଶାନସିକ ସେବାର ପ୍ରାୟ ୫୦୦ରୁ ଊର୍ଦ୍ଧ୍ୱ ପ୍ରଶାସନିକ ଅଧିକାରୀମାନେ ଏହି କାର‌୍ୟ୍ୟକ୍ରମରେ ଯୋଗଦେଇଥିଲେ।

ଗୋପବନ୍ଧୁ ଏକାଡେମୀ ଆନୁକୂଲ୍ୟରେ ଆୟୋଜିତ ଏହି କାର‌୍ୟ୍ୟକ୍ରମକୁ ଏକାଡେମୀର ନିର୍ଦ୍ଦେଶକ ଶ୍ରୀ ଶର୍ମାଙ୍କ ନେତୃତ୍ୱରେ ଆଇଏଏସ ଅରବିନ୍ଦ ଅଗ୍ରଓ୍ୱାଲ, ମନିଷ ଅଗ୍ରଓ୍ୱାଲ, ସୁରେନ୍ଦ୍ର ମିନା ଏବଂ ଏକାଡେମୀର ଅତିରିକ୍ତ କମିଶନର ତଥା ସ୍ୱତନ୍ତ୍ର ଶାସନ ସଚିବ ଶ୍ରୀ ହିମାଂଶୁ ପଣ୍ଡା ପରିଚାଳନା କରିଥିଲେ। ଓଡିଶା ରାଜ୍ୟ ମେଡିକାଲ କର୍ପୋରେସନ ଲିଃର ନିର୍ଦ୍ଦେଶିକା ଡା. ପୋମା ଟୁଡୁ କାର‌୍ୟ୍ୟକ୍ରମ ସଂଯୋଜନା କରିଥିଲେ।

Categories
ଆଜିର ଖବର ରାଜ୍ୟ ଖବର

ଏପ୍ରିଲ ୨୧ ରେ ପାଳନ ହେବ ରାଜ୍ୟସ୍ତରୀୟ ଲୋକସେବା ଦିବସ, ଜାଣନ୍ତୁ ଏହା କଣ

ଭୁବନେଶ୍ୱର: ଗୋପବନ୍ଧୁ ପ୍ରଶାସନିକ ଏକାଡେମୀ ପକ୍ଷରୁ ଏପ୍ରିଲ ୨୧ ତାରିଖରେ ରାଜ୍ୟସ୍ତରୀୟ  ଲୋକ ସେବା ଦିବସ-୨୦୨୩ (State Level Civil Services Day-2023)  ପାଳନ କରାଯିବ। ଏହି ଅବସରରେ ଅପରାହ୍ନ ସାଢ଼େ ୪ଟାରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଲୋକସେବା ଭବନସ୍ଥିତ କନଭେନ୍ସନ୍ ସେଣ୍ଟର ଠାରେ ଆୟୋଜିତ ହେବାକୁ ଥିବା ଏହି କାର୍ଯ୍ୟକ୍ରମକୁ ଉଦ୍ ଘାଟନ କରିବା ସହ ପ୍ରଶାସନିକ ଅଧିକାରୀଙ୍କ ସମାବେଶକୁ ସମ୍ବୋଧିତ କରିବାକୁ ସମ୍ମତି ପ୍ରଦାନ କରିଛନ୍ତି।

ଲୋକସେବା ଦିବସ ନାଗରିକମାନଙ୍କ ଉଦ୍ଦେଶ୍ୟରେ ନିଜକୁ ପୁନଃ ସମର୍ପିତ କରିବା ଏବଂ ଜନସେବା  କାର୍ଯ୍ୟରେ ଶ୍ରେଷ୍ଠତା ପ୍ରତି ସେମାନଙ୍କର ପ୍ରତିବଦ୍ଧତାକୁ ନବୀକରଣ କରିବାର ଏକ ଅବସର ଭାବରେ ପାଳନ  କରାଯାଏ। ସ୍ୱାଧୀନ ଭାରତର ପ୍ରଥମ ଗୃହମନ୍ତ୍ରୀ ସର୍ଦ୍ଦାର ବଲ୍ଲଭଭାଇ ପଟେଲ ୧୯୪୭ ମସିହାରେ ଦିଲ୍ଲୀର ମେଟକାଫ ହାଉସରେ ଭାରତୀୟ ପ୍ରଶାସନିକ ସେବାର ଯୁବ ପ୍ରୋବେସନରମାନଙ୍କୁ ଏହି ଦିବସରେ ସମ୍ବୋଧିତ କରିଥିଲେ ଏବଂ ସେମାନଙ୍କୁ ପ୍ରକୃତ ‘ସେବା ଭାବନା’କୁ ଗ୍ରହଣ କରିବା ପାଇଁ ମାର୍ଗଦର୍ଶନ କରିଥିଲେ।  ସେହି ଦିନକୁ ସ୍ମରଣୀୟ କରିବା ପାଇଁ ପ୍ରତିବର୍ଷ ଏପ୍ରିଲ ୨୧ ତାରିଖରେ  ଲୋକସେବା ଦିବସ ପାଳନ କରାଯାଉଛି।

ଗତ କିଛି ବର୍ଷ ମଧ୍ୟରେ ଓଡ଼ିଶାରେ ଶାସନ ବ୍ୟବସ୍ଥା ସମ୍ପୂର୍ଣ୍ଣ ରୂପାନ୍ତରିତ ହୋଇଛି। ଅଭିନବ ଏବଂ ବ୍ୟାପକ ‘୫ଟି’ ମଡେଲ ଯୋଗ୍ୟଲୋକଙ୍କୁ ଆବଶ୍ୟକ ସେବା ଯୋଗାଇବାରେ ଏହା ମୂଲ୍ୟବାନ ପ୍ରମାଣିତ ହୋଇଛି। ପ୍ରଶାସନିକ ସଂସ୍କାର ସରକାର ଏବଂ ନାଗରିକଙ୍କ ମଧ୍ୟରେ ଥିବା ବ୍ୟବଧାନକୁ ଦୂର କରିଛି। ସରକାରୀ ଅଧିକାରୀମାନେ ଅଧିକ ଦାୟିତ୍ୱବାନ ଓ ଉତ୍ତରଦାୟୀ ହୋଇଥିବା ବେଳେ ଲୋକମାନେ ଅଧିକ ସଚେତନ ଓ ଆକାଂକ୍ଷୀ ହୋଇଛନ୍ତି।

କାର୍ଯ୍ୟକ୍ରମରେ  ମୁଖ୍ୟ ବକ୍ତା ଭାବେ ଆଇଏଏସ୍ (ଅବସରପ୍ରାପ୍ତ) ଅମରଜିତ ସିହ୍ନା ‘ ରୂପାନ୍ତରଣ ଜାରି ରହିଥିବା  ଶାସନ ପାଇଁ ଲୋକ ସେବା ପାଇଁ ପ୍ରସ୍ତୁତ କରିବା’ (ପ୍ରିପାରିଂ ସିଭିଲ ସର୍ଭିସେସ୍ ଫର ଟ୍ରାନ୍ସଫରମେଟିଭ୍ ଗଭର୍ଣ୍ଣାନ୍ସ)  ଶୀର୍ଷକ ଆଲୋଚନାଚକ୍ରରେ ମୁଖ୍ୟ ଅତିଥି ଭାବେ ଯୋଗଦାନ କରି ବକ୍ତବ୍ୟ ରଖିବେ। ଶ୍ରୀ ସିହ୍ନା ବର୍ତ୍ତମାନ ପବ୍ଲିକ୍ ଏଣ୍ଟରପ୍ରାଇଜେସ୍ ଚୟନ  ବୋର୍ଡର ସଦସ୍ୟ ଭାବେ ଅବସ୍ଥାପିତ ଅଛନ୍ତି। ସେ ପୂର୍ବରୁ ଗତ ଜୁଲାଇ-2021 ପର୍ଯ୍ୟନ୍ତ ମାନ୍ୟବର ପ୍ରଧାନ ମନ୍ତ୍ରୀ ଙ୍କ ପରାମର୍ଶଦାତା ଥିଲେ। ତାଙ୍କର ସିଭିଲ ସର୍ଭିସ କ୍ଷେତ୍ରରେ ବିଶେଷ କରି ଗ୍ରାମୀଣ ଏବଂ ସାମାଜିକ କ୍ଷେତ୍ରରେ  ଦୀର୍ଘ 39 ବର୍ଷର ଅଭିଜ୍ଞତା ରହିଛି।

ସର୍ବଶିକ୍ଷା ଅଭିଯାନ, ଜାତୀୟ ଗ୍ରାମୀଣ ସ୍ୱାସ୍ଥ୍ୟ ମିଶନ ଇତ୍ୟାଦି, ସରକାରଙ୍କ ପ୍ରମୁଖ କାର୍ଯ୍ୟକ୍ରମର ରୂପରେଖ ପ୍ରସ୍ତୁତ କରିବାରେ ସେ ଅନ୍ୟତମ ସ୍ଥପତି ଅଟନ୍ତି । ମାନବ ବିକାଶ କାର୍ଯ୍ୟକ୍ରମକୁ ପ୍ରୋତ୍ସାହନ ଦେବା ପାଇଁ ସେ ଭାରତର ୯୦ ପ୍ରତିଶତରୁ ଅଧିକ ଜିଲ୍ଲା ଭ୍ରମଣ କରିବାର ଗୌରବ ଅର୍ଜନ କରିଛନ୍ତି। ତାଙ୍କର ପବ୍ଲିକ ପଲିସି ଉପରେ ସାତଟି ପୁସ୍ତକ  ଏବଂ ପ୍ରମୁଖ ଭାରତୀୟ ପତ୍ରିକା ଏବଂ ଖବରକାଗଜରେ  ଅନେକ ପ୍ରବନ୍ଧ ପ୍ରକାଶିତ ହୋଇଛି।  ତାଙ୍କର ଶେଷ ପୁସ୍ତକ “ଆନ୍ ଇଣ୍ଡିଆ ଫର ଏଭ୍ରି ଓ୍ୱାନ୍- ଏପାଥ୍ ଟୁ ଇନକ୍ଲୁସିଭ୍ ଡେଭଲପମେଣ୍ଟ” – ଏକ ପ୍ରାମାଣିକ କାର୍ଯ୍ୟ ଭାବରେ ବ୍ୟାପକ ପ୍ରଶଂସିତ ଏବଂ ସ୍ୱୀକୃତି ଲାଭ କରିଛି।

ଲୋକ ସେବା ଦିବସ ଓଡିଶାରେ ପ୍ରଥମ ଥର ପାଇଁ ଅନୁଷ୍ଠିତ ହେଉଥିବା ବେଳେ ଗୋପବନ୍ଧୁ ପ୍ରଶାସନ ଏକାଡେମୀର ମହାନିର୍ଦେଶକ ରାଜ କୁମାର ଶର୍ମା  ସ୍ୱାଗତ ଭାଷଣ ଦେବା ସହ ଓଡ଼ିଶାରେ ଲୋକ ସେବା ଦିବସ-୨୦୨୩ ପାଳନର ଲକ୍ଷ୍ୟ ଓ ଉଦ୍ଦେଶ୍ୟ ସଂପର୍କରେ ବକ୍ତବ୍ୟ ପ୍ରଦାନ କରିବେ। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ  ରାଜ୍ୟ ମୁଖ୍ୟ ଶାସନ ସଚିବ ଶ୍ରୀ ପ୍ରଦୀପ କୁମାର ଜେନା, ପୋଲିସ ମହାନିର୍ଦ୍ଦେଶକ ଶ୍ରୀ ସୁନିଲ କୁମାର ବଂଶଲ , ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ଏବଂ ଶ୍ରୀ ପ୍ରଧାନ ମୁଖ୍ୟ  ବନ ସଂରକ୍ଷକ ଶ୍ରୀ ଦେବୀଦତ୍ତ ବିଶ୍ୱାଳ ପ୍ରମୁଖ ସମ୍ମାନିତ ଅତିଥି ଭାବେ ଉପସ୍ଥିତ ରହିବେ। ଆସନ୍ତା କାଲି ୨୧ ତାରିଖ ଅପରାହ୍ନ ସାଢ଼େ ୪ଟାରେ ଭୁବନେଶ୍ୱର ଲୋକସେବା ଭବନସ୍ଥିତ କନଭେନ୍ସନ୍ ହଲ୍ ରେ ରାଜ୍ୟରେ ପ୍ରଶାସନିକ ସେବାର ପ୍ରତିନିଧିତ୍ୱ କରୁଥିବା ସମସ୍ତ ବରିଷ୍ଠ ଅଧିକାରୀମାନେ ଏହି କାର୍ଯ୍ୟକ୍ରମରେ ଯୋଗଦେବେ।

Categories
ଆଜିର ଖବର ରାଜ୍ୟ ଖବର

ଖୋର୍ଦ୍ଧା: ପଞ୍ଚାୟତି ରାଜ ଏବଂ ଲୋକସେବା ଦିବସ ପାଳିତ

ଖୋର୍ଦ୍ଧା: ଆଜି ପୂର୍ବାହ୍ନ ୧୧ ଟା ରେ ଜିଲ୍ଲା ପରିଷଦ ସମିଳନୀ କକ୍ଷରେ ପଂଚାୟତ ରାଜ ଦିବସ ତଥା ଲୋକ ସେବା ଦିବସ ପାଳିତ ହୋଇ ଯାଇଛି। ଏହି ପରିପ୍ରେକ୍ଷୀରେ ବୈଠକରେ ଜିଲ୍ଲାପାଳ କେ ସୁଦର୍ଶନ ଚକ୍ରବର୍ତ୍ତୀ ଅଧ୍ୟକ୍ଷତା କରିଥିବାବେଳେ, ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ ଦିଗନ୍ତ ରାଉତ ରାଏ, ପରିଚାଳନା କରିଥିଲେ।

ବୈଠକ ପ୍ରାରମ୍ଭରେ ସ୍ବର୍ଗତ ବିଜୁ ପଟ୍ଟନାୟକଙ୍କ ଜନ୍ମଦିବସ ଉପଲକ୍ଷେ ଅତିଥିମାନଙ୍କ ଉପସ୍ଥିତି ରେ ଶ୍ରଦ୍ଧା ସୁମନ ଅର୍ପଣ କରାଯାଇଥିଲା। ଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷା ରୂପଶ୍ରୀ ରାଣୀ ଗୁମାନ ସିଂହ, ଗ୍ରାମପଂଚାୟତମାନଙ୍କର ସରପଞ୍ଚ, ଜ଼ିଲ୍ଲା ପରିଷଦର ଅଧିକାରୀ ଓ କର୍ମଚାରୀ, ଜିଲ୍ଲା ପଞ୍ଚାୟତ ଅଧିକାରୀ, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ, ଜ୍ୟୋତ୍ସ୍ନାମୟୀ ଆଚାର୍ଯ୍ୟ,ମେଡ଼ିଆ ଉପସ୍ଥିତ ଥିଲେ।

କିଛି ସମୟ ଧରି ବିଜୁପଟ୍ଟନାୟକଙ୍କ ଜୀବନୀ ଉପରେ ଆଧାରିତ ଏକ ଛୋଟ ଭିଡ଼ିଓ ପ୍ରଦର୍ଶନ କରା ଯାଇଥିଲା। ପରେ ଭଲ କାମ କରିଥିବାରୁ ସରପଞ୍ଚମାନଙ୍କୁ ପୁରସ୍କାର ରାଶି ସ୍ୱରୂପ ଜଣଙ୍କୁ ୧ ଲକ୍ଷ ଟଙ୍କା ସହ ମାନପତ୍ର ପ୍ରଦାନ କରାଯାଇଥିଲା।

ଶେଷରେ ଜିଲ୍ଲା ପଂଚାୟତ ଅଧିକାରୀ ଧନ୍ୟବାଦ ଦେବା ପରେ ସଭା ସାଙ୍ଗ ହୋଇଥିଲା।

Categories
ଆଞ୍ଚଳିକ

ବ୍ଲକ ସ୍ତରୀୟ ପଞ୍ଚାୟତିରାଜ ଓ ଲୋକସେବା ଦିବସ ପାଳନ ବେଳେ ଗୀତ ବୋଲିଲେ ଏବିଡିଓ

ରମେଶ ମହାନ୍ତି

ଜଗତସିଂହପୁର: ତିର୍ତ୍ତୋଲ ବ୍ଲକ ସଭାଗୃହରେ ଆଜି ବ୍ଳକ୍ ସ୍ତରୀୟ ପଞ୍ଚାୟତିରାଜ ଓ ଲୋକସେବା ଦିବସ ପାଳିତ ହୋଇଯାଇଛି। ତିର୍ତ୍ତୋଲ ପଞ୍ଚାୟତ ସମିତିର ଅଧ୍ୟକ୍ଷା ସୁଜାତା ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ବିଡିଓ ଅଟଳ ବିହାରୀ ସ୍ୱାଇଁ, ଏବିଡିଓ ସତ୍ୟଜିତ୍ ସ୍ୱାଇଁ, ଜିଲ୍ଲାପରିଷଦ ପ୍ରବୀର ରାୟ, ଲିପାଲି ରାଉଳ, ଶନାତନ ଦଳେଇ, ଉପାଧ୍ୟକ୍ଷ ଆଶିଷ କୁମାର ସେଠୀ ମଞ୍ଚାସୀନ ଥିଲେ।

ଅନ୍ୟମାନଙ୍କ ମଧ୍ୟରେ ତିର୍ତ୍ତୋଲ ସରପଞ୍ଚ ମନୋରଞ୍ଜନ ମହାପାତ୍ର, କନିମୂଳ ସରପଞ୍ଚ ବେଦଦ୍ୟୁତି ପୃଷ୍ଟି, ଦାଇଁଲୋ ସରପଞ୍ଚ ଧନଞ୍ଜୟ ସୁତାର, ତରଜଙ୍ଗା ସରପଞ୍ଚ ବସନ୍ତ ସେଠୀ, ପଟିଲୋ ସରପଞ୍ଚ ଚିତ୍ତରଞ୍ଜନ ରଥ, ଆମ୍ବିରୀ ସରପଞ୍ଚ, କନକପୁର ସରପଞ୍ଚ ନମିତା ରାଉଳ, ସମିତି ସଭ୍ୟ ଅଜୟ ରାଉଳ, କଟରା ସମିତିସଭ୍ୟ ବାଇଧର ବଳ, ତୁଳଙ୍ଗ ସମିତି ସଭ୍ୟ ମମତା ନାୟକ, କୋଲର ସମିତି ସଭ୍ୟ ରଞ୍ଜିତ ପାଲ୍ ଙ୍କ ସମେତ ବିଭିନ୍ନ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ ମାନେ ଯୋଗଦେବା ସହିତ ବିଭିନ୍ନ ବିଭାଗର କର୍ମଚାରୀମାନେ ଯୋଗଦେଇଥିବା ଦେଖିବାକୁ ମିଳିଥିଲା।

କାର୍ଯ୍ୟକ୍ରମ ଶେଷରେ ସଭା ସ୍ଥଳରେ ମଞ୍ଚାସୀନ ତିର୍ତ୍ତୋଲ ବ୍ଳକର ଏବିଡିଓ ଏକ ସୁମଧୁର ଓଡ଼ିଆ ଭଜନ ” ଜନମି ଥିଲି ମୁଁ ଶିରି କ୍ଷେତ୍ର ଦିନେ “ଗାନ କରିଥିଲେ।