ନୂଆଦିଲ୍ଲୀ: ପଞ୍ଜାବରେ ଖାଲିସ୍ତାନକୁ ସମର୍ଥନ କରି କାନ୍ଥରେ ପୁଣି ଥରେ ସ୍ଲୋଗାନ ଲେଖାଯାଇଛି। ଏଥର ଶ୍ରୀ ମୁକ୍ତସର ସାହିବରେ ଥିବା ଏସଏସପି କାର୍ଯ୍ୟାଳୟର କାନ୍ଥରେ ଏହି ସ୍ଲୋଗାନଗୁଡ଼ିକ ଲେଖାଯାଇଛି। ଏଠାରେ ଦ୍ୱିତୀୟ ଥର ଏପରି କାର୍ଯ୍ୟ କରାଯାଇଛି। ଏହାପୂର୍ବରୁ ମଧ୍ୟ ଏହି କାନ୍ଥରେ ଏଭଳି ସ୍ଲୋଗାନ ଲେଖିବାର ମାମଲା ସାମ୍ନାକୁ ଆସିଥିଲା।
ପଞ୍ଜାବରେ ମାହୋଲ ଖରାପ କରିବା ପାଇଁ ନିରନ୍ତର ଉଦ୍ୟମ କରାଯାଉଛି। ଶିଖ୍ ଫର ଜଷ୍ଟିସ୍ (SFJ) ଦ୍ୱାରା ଏକ ଭିଡିଓ ମଧ୍ୟ ଜାରି କରାଯାଇଛି। ଭିଡିଓରେ କୁହାଯାଇଛି ଯେ, ପ୍ରତ୍ୟେକ ଘରେ ଆତଙ୍କ ଖେଳିଯାଇଛି। କେବଳ ଏତିକି ନୁହେଁ ଏହି ଭିଡିଓରେ ରାହୁଲ ଗାନ୍ଧୀଙ୍କୁ ମଧ୍ୟ ଧମକ ଦିଆଯାଇଛି।
ବାସ୍ତବରେ, ଜାନୁଆରୀ ଦ୍ୱିତୀୟ ସପ୍ତାହ ଅର୍ଥାତ ଜାନୁୟାରୀ ୧୧ ତାରିଖ ୨୦୨୩ରେ ରାହୁଲ ଗାନ୍ଧୀଙ୍କ ଯାତ୍ରା ପଞ୍ଜାବରେ ଆରମ୍ଭ ହେବାକୁ ଯାଉଛି। ଦ୍ୱିତୀୟ ଥର ପାଇଁ ରାହୁଲ ଗାନ୍ଧୀଙ୍କୁ ଧମକ ଦିଆଯାଇଛି। ପଞ୍ଜାବର ରାସ୍ତାରେ ଚାଲିକି ଦେଖାଅ ବୋଲି କହି ରାହୁଲଙ୍କୁ ଚେତାବନୀ ଦିଆଯାଇଛି।
ଦୁଇ ସପ୍ତାହ ପୂର୍ବରୁ ରାହୁଲଙ୍କୁ ମଧ୍ୟ ସମାନ ଧମକ ଦିଆଯାଇଥିଲା। ରାତିରେ ଶ୍ରୀ ମୁକ୍ତସର ସାହିବ ସରକାରୀ ମହାବିଦ୍ୟାଳୟର କାନ୍ଥରେ ଖାଲିସ୍ତାନୀ ସମର୍ଥକମାନେ ସ୍ଲୋଗାନ ଲେଖିଥିଲେ। ଖାଲିସ୍ତାନ ଜିନ୍ଦାବାଦର ସ୍ଲୋଗାନ ସହିତ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଏବଂ କଂଗ୍ରେସ ନେତା ରାହୁଲ ଗାନ୍ଧୀଙ୍କ ବିଷୟରେ ମଧ୍ୟ ଆପତ୍ତିଜନକ ଶବ୍ଦ ବ୍ୟବହାର କରାଯାଇଥିଲା। ତେବେ ପ୍ରଶାସନ ଏହି କାନ୍ଥରୁ ସ୍ଲୋଗାନ ହଟାଇ ଦେଇଥିଲା। ଶିଖ ଫର ଜଷ୍ଟିସ ଆତଙ୍କବାଦୀ ଗୁରୁପତୱନ୍ତ ସିଂ ପନ୍ନୁ ଏହି ମାମଲା ପାଇଁ ଦାୟୀ ବୋଲି ଘୋଷଣା କରିଛନ୍ତି।