ନୂଆଦିଲ୍ଲୀ: ଭାରତୀୟ ଗଣତନ୍ତ୍ର ଉପରେ କଂଗ୍ରେସ ନେତା ରାହୁଲ ଗାନ୍ଧୀ ଲଣ୍ଡନରେ ଦେଇଥିବା ବିବୃତ୍ତି ଉପରେ ଭାରତୀୟ ଜନତା ପାର୍ଟିର ହଙ୍ଗମା ଏବଂ ବିରୋଧୀ ଦଳର ଆଦାନୀ-ହିନ୍ଦନବର୍ଗ ମାମଲାରେ ମିଳିତ ସଂସଦୀୟ କମିଟି (ଜେପିସି) ତଦନ୍ତ ଦାବିରେ ଗୁରୁବାର ଦିନ କ୍ରମାଗତ ଚତୁର୍ଥ ଦିନ ସଂସଦର ଉଭୟ ଗୃହର ପ୍ରକ୍ରିୟା ବାଧାପ୍ରାପ୍ତ ହୋଇଛି। ଅପରାହ୍ନ ୨ ଟା ପର୍ଯ୍ୟନ୍ତ ଗୃହକୁ ମୁଲତବୀ ରଖାଯାଇଛି।
ଆଶା କରାଯାଉଛି ଯେ, ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀ ଗୁରୁବାର ସଂସଦର ପ୍ରକ୍ରିୟାରେ ଅଂଶଗ୍ରହଣ କରିବେ ଏବଂ ତାଙ୍କ ମନ୍ତବ୍ୟରୁ ଆସିଥିବା ବିବାଦ ଉପରେ କହିବେ। ରାହୁଲ ଗାନ୍ଧୀଙ୍କ କ୍ଷମା ପ୍ରାର୍ଥନା ପାଇଁ ବିଜେପିର ଦାବିକୁ କଂଗ୍ରେସ ସମ୍ପୂର୍ଣ୍ଣ ରୂପେ ପ୍ରତ୍ୟାଖ୍ୟାନ କରିଛି।
ସଂସଦରେ ପ୍ରବଳ ହଟ୍ଟଗୋଳ ପୂର୍ବରୁ ଆଇନ ମନ୍ତ୍ରୀ କିରେନ ରିଜିଜୁ ଆଜି ଚାପ ବଢାଇ କଂଗ୍ରେସ ନେତାଙ୍କୁ ଲଣ୍ଡନରେ ମିଛ କହିବା ସହ ଦେଶକୁ ସମାଲୋଚନା କରିଥିବା ଅଭିଯୋଗ କରିଛନ୍ତି। ସାମ୍ବାଦିକମାନଙ୍କ ସହ କଥାବାର୍ତ୍ତା କରି କିରେନ ରିଜିଜୁ କହିଛନ୍ତି ଯେ, ଦେଶରେ ସର୍ବାଧିକ କଥା ହେଉଥିବା ତଥା ଦିନରାତି ସରକାରଙ୍କୁ ଆକ୍ରମଣ କରୁଥିବା ବ୍ୟକ୍ତି ବିଦେଶ ଯାଇ କହିଛନ୍ତି ଯେ ଭାରତରେ ବାକ ସ୍ୱାଧୀନତା ନାହିଁ।
ସେ ଆହୁରି ମଧ୍ୟ କହିଛନ୍ତି ଯେ, “ରାହୁଲ ଗାନ୍ଧୀ କଂଗ୍ରେସକୁ ବୁଡ଼ାଇ ପାରନ୍ତି, ଆମେ ସେଥିପ୍ରତି ଧ୍ୟାନ ଦେଉନାହୁଁ। କିନ୍ତୁ ଯଦି ସେ ଦେଶର କ୍ଷତି କରିବାକୁ କିମ୍ବା ଅପମାନିତ କରିବାକୁ ଚେଷ୍ଟା କରନ୍ତି, ତେବେ ଆମେ ଦେଶର ନାଗରିକ ଭାବରେ ଚୁପ୍ ରହିପାରିବା ନାହିଁ। କଂଗ୍ରେସକୁ ଦେଶ ପ୍ରତ୍ୟାଖ୍ୟାନ କରିଛି ଏହାର ଅର୍ଥ ନୁହେଁ ଯେ ଏହା ବିଦେଶ ଯାଇ ଦେଶର ଭାବମୂର୍ତ୍ତିକୁ ନଷ୍ଟ କରିବେ।
