Tag: ସଂସ୍କୃତି ଭବନ ସମ୍ମିଳନୀ କକ୍ଷ

ଖୋର୍ଦ୍ଧା: ଆଜି ଜିଲ୍ଲା ସଂସ୍କୃତି ଭବନ ସମ୍ମିଳନୀ କକ୍ଷ ପରିସରରେ ଜିଲ୍ଲା ସମାଜ କଲ୍ୟାଣ ବିଭାଗ ଆନୁକୁଲ୍ୟରେ ଜିଲ୍ଲାସ୍ତରୀୟ ପଂଚମ ରାଷ୍ଟ୍ରିୟ ପୋଷଣ ମାସ ଅନୁଷ୍ଠିତ ହୋଇଯାଇଛି। ଏହି ସମାରୋହରେ ଖୋର୍ଦ୍ଧା ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଅଧ୍ୟକ୍ଷତା କରିଥିଲେ।

ସମାରୋହର ପ୍ରାରମ୍ଭରେ ଜିଲ୍ଲା ସମାଜ କଲ୍ୟାଣ ଅଧିକାରୀ ପୁଷ୍ପାଞ୍ଜଳୀ ମିଶ୍ର ସ୍ୱାଗତ ଭାଷଣ ସହ ପୋଷଣ ମାସ ପାଳନର ଲକ୍ଷ୍ୟ ଓ ଉଦେ୍ଦଶ୍ୟ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିଥିଲେ। ଜିଲ୍ଲାପାଳ ସମାରୋହରେ ଉପସ୍ଥିତଥିବା ସମସ୍ତ କ୍ଷେତ୍ର ଅଧିକାରୀମାନଙ୍କୁ ନିସ୍ୱାର୍ଥପର ସେବା ମାଧ୍ୟମରେ ନିଜ ଅଂଚଳର କୁପୋଷଣ କୁ ରୋକିବାରେ କର୍ତବ୍ୟ ପରାୟଣ ହେଲେ ଏହି ସମାରୋହ ପାଳନର ଯର୍ଥାର୍ଥତା ରହିପାରିବ ବୋଲି ମତବ୍ୟକ୍ତ କରିଥିଲେ।

ସମାରୋହରେ ଉପସ୍ଥିତ ଥିବା ଉଦ୍ୟାନ କୃଷି ସହକାରୀ ନିଦେ୍ର୍ଦଶକ ସ୍ମିତା ମହାନ୍ତି, ଜିଲ୍ଲା ଯୋଗାଣ ଅଧିକାରୀ ସୁଗୁଦା ମୁର୍ମୁ, ଜିଲ୍ଲା ଶିଶୁ ସୁରକ୍ଷା ଅଧିକାରୀ ବାଣିଶ୍ରୀ ପଟ୍ଟନାୟକ, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଜ୍ୱୋସ୍ନାମୟୀ ଆଚାର୍ଯ୍ୟ ପ୍ରମୁଖ ଶିଶୁମାନଙ୍କ ମଧ୍ୟରେ କୁପୋଷଣ ଦୂରୀକରଣ ସମ୍ପର୍କରେ ନିଜ ନିଜର ବକ୍ତବ୍ୟମାନ ରଖିଥିଲେ। ଜିଲ୍ଲାର ସମସ୍ତ ଶିଶୁ ବିକାଶ ପ୍ରକଳ୍ପ ଦ୍ୱାରା କୁପୋଷଣ ନିରାକରଣ ଲାଗି ଏକ ଖାଦ୍ୟ ପ୍ରଦର୍ଶନୀ କରାଯାଇଥିଲା। ଯାହାକୁ ଅତିଥିମାନେ ବୁଲି ଦେଖିବା ସହ ପ୍ରଦର୍ଶିତ ଖାଦ୍ୟର ପୃଷ୍ଟି ସମ୍ବନ୍ଧୀୟ ତଥ୍ୟ ପଚାରି ବୁଝିଥିଲେ।

କୁପୋଷଣ ନିରାକରଣରେ ପ୍ରମୁଖ ଭୂମିକା ଗ୍ରହଣ କରିଥିବା ଅଙ୍ଗୱାଡି କର୍ମୀ, ଆଶା କର୍ମୀ, ମହିଳା ସ୍ୱାସ୍ଥ୍ୟ କର୍ମୀ, ମହିଳା ପରିଦର୍ଶିକାଙ୍କୁ ପ୍ରଶଂସା ପତ୍ର ସହ ସମ୍ମାନିତ କରାଯାଇଥିଲା। କୁପୋଷଣ ଦୂରୀକରଣ ର ବିଭିନ୍ନ ମାଧ୍ୟମ ତଥା କୌଶଳ ସମ୍ପର୍କରେ ଉପସ୍ଥିତ ଶିଶୁ ରୋଗ ବିଶେଷଜ୍ଞ ଡିଆଇସି ଖୋର୍ଦ୍ଧା ର ଡା. ହେମନ୍ତ କୁମାର ମିଶ୍ର ନିଜର ମତ ରଖିଥିଲେ। ସୁସ୍ଥ ଶିଶୁମାନଙ୍କ ମାଆଙ୍କୁ ପୁରସ୍କାର ସହ ପୋଷଣ ଯୋଗାଉଥିବା ବୃକ୍ଷ ଯଥା ଅମୃତଭଣ୍ଡା, ସଜନା ଓ ଲେମ୍ବୁ ଗଛ ଉଦ୍ୟାନ କୃଷି ବିଭାଗ ପକ୍ଷରୁ ପ୍ରଦାନ କରାଯାଇଥିଲା।

ସର୍ବଶେଷରେ ଖୋର୍ଦ୍ଧା ଜିଲ୍ଲା ଯୋଜନା ଅଧିକାରୀ(ଆଇସିଡିଏସ) ଶିଖାରାଣୀ ପୋଦ୍ଦାର ଧନ୍ୟବାଦ ଦେଇଥିଲେ । କାର୍ଯ୍ୟକ୍ରମ କୁ ଜିଲ୍ଲା କାର୍ଯ୍ୟକ୍ରମ ସଂଯୋଜକ (ମମତା ଯୋଜନା) ସୁରଥ ଚନ୍ଦ୍ର ବିଶ୍ୱାଳ, ଜିଲ୍ଲା ଯୋଜନା ସହାୟକ (ମମତା ଯୋଜନା) ଲକି ପ୍ରସାଦ ବଳିୟାରସିଂହ, ପୂର୍ଣ୍ଣଚନ୍ଦ୍ର ପ୍ରଧାନ ପ୍ରମୁଖ ପରିଚାଳନା କରିଥିଲେ। ଏଥିରେ ଜିଲ୍ଲାର ସମସ୍ତ ଶିଶୁ ବିକାଶ ପ୍ରକଳ୍ପ ଅଧିକାରୀ ସହଯୋଗ କରିଥିଲେ।