ନୂଆଦିଲ୍ଲୀ: ସାରା ଦେଶରେ ଉତ୍ତାପ ବୃଦ୍ଧି ପାଇବାରେ ଲାଗିଛି। ଧୀରେ ଧୀରେ ତାପମାତ୍ରା ବୃଦ୍ଧି ପାଉଛି। ଏହି ସମୟରେ କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ଉତ୍ତାପ ଜନିତ ରୋଗ ସମ୍ପର୍କରେ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ସତର୍କ କରାଇ ଦେଇଛନ୍ତି। ସେ ସମସ୍ତଙ୍କୁ ‘ନ୍ୟାସନାଲ ଆକ୍ସନ ପ୍ଳାନ’ ପ୍ରତି ଧ୍ୟାନ ଦେବାକୁ କହିଛନ୍ତି। କୁହାଯାଇଛି ଯେ, ଦେଶର କେତେକ ସ୍ଥାନରେ ତାପମାତ୍ରା ଏକ ଉଚ୍ଚ ସ୍ତରରେ ପହଞ୍ଚିସାରିଛି। ଏଭଳି ପରିସ୍ଥିତିରେ ଉତ୍ତାପ ଦ୍ଵାରା ହେଉଥିବା ରୋଗ ମଧ୍ୟ ବୃଦ୍ଧି ପାଇବାରେ ଲାଗିବ। ଏହାକୁ ଦୃଷ୍ଟିରେ ରଖି କେନ୍ଦ୍ର ସମସ୍ତ ରାଜ୍ୟକୁ ସତର୍କ କରିସାରିଛି।
ଚିଠିରେ ଦର୍ଶାଯାଇଛି ଯେ, ମାର୍ଚ୍ଚ ୧ ତାରିଖ ୨୦୨୩ ଠାରୁ ସମସ୍ତ ରାଜ୍ୟ ତଥା ଜିଲ୍ଲାରେ ଜାତୀୟ ଜଳବାୟୁ ପରିବର୍ତ୍ତନ ଏବଂ ମାନବ ସ୍ୱାସ୍ଥ୍ୟ (NPCCHH) ଅଧୀନରେ ଥିବା ଉତ୍ତାପ ଜନିତ ରୋଗ ଉପରେ ପ୍ରତିଦିନ ମନିଟରିଂ ଇଣ୍ଟିଗ୍ରେଟେଡ୍ ସ୍ୱାସ୍ଥ୍ୟ ସୂଚନା ପ୍ଲାଟଫର୍ମ (IHIP) ରେ କରାଯିବ।