ଭୁବନେଶ୍ବର: ଗତକାଲି ନବୀନ ପଟ୍ଟନାୟକ ବିଧାନସଭାରେ ଶେଷ ତାଲିକା ଘୋଷଣା କରିଛନ୍ତି। ଏଥିରେ ସେ କୋରେଇରୁ ସନ୍ଧ୍ୟାରାଣୀ ଦାସ, ଖଣ୍ଡପଡାରୁ ସାବିତ୍ରୀ ପ୍ରଧାନ ଏବଂ ନୀଳଗିରିରୁ ସୁକାନ୍ତ ନାୟକଙ୍କ ନାମ ଘୋଷଣା କରିଛନ୍ତି। ତେବେ ନବୀନ ସବୁଠାରୁ ଚମତ୍କାର ଦେଖାଇଛନ୍ତି କୋରେଇ ଆସନର ପ୍ରାର୍ଥୀ ଘୋଷଣା କରି। ଏହା ଆସନରୁ ପ୍ରାର୍ଥୀ ହୋଇଛନ୍ତି ସନ୍ଧ୍ୟାରାଣୀ ଦାସ।
ସନ୍ଧ୍ୟାରାଣୀଙ୍କ ନାମ ଘୋଷଣା ପରେ ହଠାତ ସେ କିଏ ବୋଲି କେହି କିଛି ଜାଣିପାରିଲେ ନାହିଁ। ତେବେ କିଛି ସମୟ ପରେ ପରେ ଜଣାପଡିଲା ଯେ, କିଏ ଏହି ସନ୍ଧ୍ୟାରାଣୀ ଦାସ। ସେ ହେଉଛନ୍ତି କୋରେଇର ପୂର୍ବତନ ବିଧାୟକ ତଥା ଓଡିଶାର ଜଣେ ଟାଣୁଆ ନେତା ସ୍ବର୍ଗତ ଅଶୋକ ଦାସଙ୍କ ଧର୍ମପତ୍ନୀ। ତେବେ ତାଙ୍କର ଆଉ ଏକ ବଡ ପରିଚୟ ହେଉଛି ସେ ହେଉଛନ୍ତି ବିଜେଡିର ସଂଗଠାନିକ ସଂପାଦକ ପ୍ରଣବ ପ୍ରକାଶ ଦାସଙ୍କ ବୋଉ। ପ୍ରଣବ ବର୍ତ୍ତମାନ ସମ୍ବଲପୁରର ଲୋକସଭା ପ୍ରାର୍ଥୀ ଅଛନ୍ତି।
ସ୍ବର୍ଗତ ଅଶୋକ ଦାସ ଏହି ଆସନରୁ ପାଞ୍ଚଥର ବିଧାୟକ ଭାବେ ନିର୍ବାଚିତ ହୋଇଥିଲେ। ଶେଷଥର ସେ 2000 ମସିହାରେ ନିର୍ବାଚିତ ହୋଇଥିଲେ। ତାଙ୍କର କୋରେଇ ଅଞ୍ଚଳରେ ବେଶ ଭଲ ସଂଗଠନ ରହିଛି। ଏ ପର୍ଯ୍ୟନ୍ତ କୋରେଇରେ ତାଙ୍କର ସମର୍ଥକ ରହିଛନ୍ତି। ସେଥିପାଇଁ ନବୀନ ତାଙ୍କର ଧର୍ମପତ୍ନୀ ସନ୍ଧ୍ୟାରାଣୀ ଦାସଙ୍କୁ ପ୍ରାର୍ଥୀ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି।
କୋରେଇର ବର୍ତମାନ ବିଧାୟକ ଅଶୋକ ବଳ ସେହି ଆସନ ପାଇଁ ଏଥର ଆଶାୟୀ ଥିଲେ। ସେହିପରି ଗତଥର ବିଧାୟକ ଥିବା ଆକାଶ ଦାସ ନାୟକ ମଧ୍ୟ ଏହି ଆସନରୁ ଏଥର ଆଶାୟୀ ଥିଲେ। ହେଲେ ବିଜେଡି ତାଙ୍କୁ ଏଥର ଟିକେଟ ଦେବ ନାହିଁ ବୋଲି ଅନୁଭବ କରି ଦଳତ୍ୟାଗ କରି ବିଜେପିରେ ଯୋଗ ଦେଇଛନ୍ତି। ସେ କୋରେଇ ଆସନରୁ ବର୍ତ୍ତମାନ ବିଜେପି ପ୍ରାର୍ଥୀ ହୋଇଛନ୍ତି।
