Categories
ଆଜିର ଖବର ଆଞ୍ଚଳିକ

ସରକାରୀ ଚିଠାରେ ଦଳୀୟ ନିଯୁକ୍ତି: ସୋସିଆଲ ମିଡିଆରେ ଘୂରିବୁଲୁଛି ଖୋର୍ଦ୍ଧା ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷଙ୍କ ସରକାରୀ ଲେଟର ହେଡ

ଭୁବନେଶ୍ବର: “ଓଡିଶା ଶାସନ”ର ସରକାରୀ ଚିଠାରେ ବିଜୁ ଜନତା ଦଳର ଦଳୀୟ ନିଯୁକ୍ତି। ଶୁଣିଲେ ଟିକେ ଅପ୍ରାସଙ୍ଗିକ ଲାଗୁଛି, କିନ୍ତୁ ଏଭଳି ଏକ ବିଚିତ୍ର ଘଟଣା ସାମ୍ନାକୁ ଆସିଛି ବାଣପୁର ଏନଏସି ବିଜୁ ଜନତା ଦଳର କାର୍ଯ୍ୟକାରୀ ସଭାପତି ନିଯୁକ୍ତିକୁ ନେଇ। ଚିଲିକା ବିଧାୟକ ତଥା ଖୋର୍ଦ୍ଧା ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ପ୍ରଶାନ୍ତ ଜଗଦ୍ଦେବ ସରକାରୀ ଲେଟର ହେଡରେ ଦଳୀୟ ନିଯୁକ୍ତି ଲାଗି ଦେଇଥିବା ନିର୍ଦ୍ଦେଶନାମାରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ସୋସିଆଲ ମିଡିଆରେ ଲେଟର ହେଡ୍‌ ଘୂରି ବୁଲିବା ପରେ ଏହି ଘଟଣାଟି ସାମ୍ନାକୁ ଆସିଛି।

ଗତ ଦୁଇ ତାରିଖରେ ବିଧାୟକଙ୍କ ସରକାରୀ ସିଲ ଥାଇ ବିଜେଡି କର୍ମୀ ଉମାକାନ୍ତ ଲାଠିଙ୍କୁ ଦଳର ବାଣପୁର ବିଜ୍ଞାପିତ ଅଞ୍ଚଳର କାର୍ଯ୍ୟକାରୀ ସଭାପତି ଭାବେ ନିଯୁକ୍ତି ଦେଇଛନ୍ତି ଖୋଦ ବିଧାୟକ ମହୋଦୟ।

ମୁଖ୍ୟତଃ ସେ ହେଉଛନ୍ତି ବିଧାୟକ ତଥା ଜିଲ୍ଲା ଯୋଜନା ବୋର୍ଡର ଅଧ୍ୟକ୍ଷ। ଏହି ଦୁଇଟି ପଦବୀ ହେଉଛି ସରକାରୀ ପଦବୀ। ବିଧାୟକ ବିଧାନସଭାର ପଦବୀ ହୋଇଥିବା ବେଳେ ଯୋଜନା ବୋର୍ଡର ଅଧ୍ୟକ୍ଷ ହେଉଛି ସଂପୂର୍ଣ୍ଣ ସରକାରୀ ପଦବୀ। ଏହିପରି ପଦବୀରେ ଥିବା ବିଧାୟକମାନଙ୍କୁ ଦୁଇ ପ୍ରକାରର ଲେଟର ହେଡ ପ୍ରଦାନ କରାଯାଇଥାଏ। ଗୋଟିଏ ବିଧାୟକ ଭାବେ ବିଧାନସଭାର ଅନ୍ୟଟି ଯୋଜନା ବୋର୍ଡର ଅଧ୍ୟକ୍ଷ ଭାବେ ଜିଲ୍ଲାର ଲେଟର ହେଡ।

ଯେତେବେଳେ ବିଧାୟକଙ୍କ ବିଧାନସଭା ନିର୍ବାଚନ ସଂପର୍କିତ କାମ ପାଇଁ ସୁପାରିଶ କରିବେ ସେତେବେଳେ ସେ ବିଧାୟକ ଭାବେ ମିଳିଥିବା ଲେଟର ହେଡକୁ ବ୍ୟବହାର କରିପାରିବେ। ସେହିପରି ଯୋଜନା ବୋର୍ଡ ସଂପର୍କିତ କୌଣସି କାମ ପାଇଁ ଜିଲ୍ଲାରେ ସେ ଜିଲ୍ଲା ଅଧ୍ୟକ୍ଷ ଲେଟରହେଡ ବ୍ୟବହାର କରିବେ। ଏହା ସରକାରୀ ନିୟମ ରହିଛି। କିନ୍ତୁ ଯେତେବେଳେ ଦଳୀୟ କାମ କରିବେ ସେତେବେଳେ ଏହି ଦୁଇଟି ସେ ବ୍ୟବହାର କରିପାରିବେ ନାହିଁ। ସେଥିପାଇଁ ଦଳ ତରଫରୁ କିମ୍ବା ଦଳୀୟ ଚିହ୍ନ ଥାଇ ଲେଟର ହେଡରେ ସେ କାହାକୁ ଲେଖି ଦେଇପାରନ୍ତି।

ହେଲେ ବିଧାୟକ ସଂପୂର୍ଣ୍ଣ ଭାବେ ସରକାରୀ ନିୟମକୁ ଫୁ କରି ବେଫିକର ଭାବେ ଜିଲ୍ଲା ଯୋଜନା ବୋର୍ଡର ଲେଟର ହେଡକୁ ଦଳୀୟ କାମରେ ବ୍ୟବହାର କରିଛନ୍ତି। ଏହାକୁ ନେଇ ବିଭିନ୍ନ ମହଲରେ ବିରୋଧର ସ୍ବର ଉଠିବାରେ ଲାଗିଛି।