Tag: ସୁରମା ପାଢ଼ୀ

ଭୁବନେଶ୍ଵର: ଆତଙ୍କବାଦୀ ମୁକାବିଲା ଏବଂ ମାଓବାଦଵୀଙ୍କ ମୁଳୋତ୍ପାଟନ କରିବାରେ ସିଆରପିଏଫ ଯବାନ ମାନେ ବେଶ ସଫଳତା ହାସଲ କରିଥବା ଦେଖା ଯାଇଛି ବୋଲି କହିଛନ୍ତି ବିଧାନସଭା ବାଚସ୍ପତି ସୁରମା ପାଢ଼ୀ। ଭୁବନେଶ୍ୱର ସିଆରପିଏଫ କ୍ୟାମ୍ପସ ପରିସରରେ ଆଜି ଅନୁଷ୍ଠିତ ସିଆରପିଏଫ ଗ୍ରୁପ ସେଣ୍ଟର ର ୫୨ ତମ ପ୍ରତିଷ୍ଠା ଦିବସରେ ମୁଖ୍ୟ ଅତିଥିଭାବେ ଯୋଗଦେଇ ବାଚସ୍ପତି ସୁରମା ପାଢ଼ୀ କହିଥିଲେ ଯେ, ସିଆରପିଏଫ ଅଧିକାରୀ ଓ ଯବାନ ମାନେ ଦେଶ ତଥା ରାଜ୍ୟର ବିଭିନ୍ନ ଗୁରୁତ୍ୱପୂର୍ଣ୍ଣ କାର୍ଯ୍ୟ ଯଥା ନିର୍ବାଚନ, ଭିଭିଆଇପି ଙ୍କ ସୁରକ୍ଷା ଠାରୁ ଆରମ୍ଭ କରି ଅନେକ କାର୍ଯ୍ୟ ରେ ନିୟୋଜିତ। ପ୍ରାଣ ବଳି ଦେଇ ଯବାନମାନେ ଆତଙ୍କବାଦୀଙ୍କ ଆକ୍ରମଣରୁ ଦେଶର ପ୍ରଜାତନ୍ତ୍ର ମନ୍ଦିରକୁ ମଧ୍ୟ ସୁରକ୍ଷା ଦେଇଛନ୍ତି। ବହୁ ବିଷମ ପରିସ୍ଥିତିର ମୁକାବିଲା କରିବାରେ ଏମାନେ ସିଦ୍ଧହସ୍ତ ବୋଲି ବାଚସ୍ପତି ମତ ଦେଇଥିଲେ।

କାର୍ଯ୍ୟକ୍ରମରେ ଯୋଗ ଦେବା ପୂର୍ଵରୁ ବାଚସ୍ପତି ସିଆରପିଏଫ ପରିସରରେ ସହିଦ ମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଆୟୋଜିତ ସଭା ରେ ସିଆରପିଏଫ, ଓଡିଶା ସେକ୍ଟରରେ ଆଇଜି ଅମିତେନ୍ଦ୍ର ନାଥ ସିହ୍ନା ଏବଂ ଭୁବନେଶ୍ୱର ସିଆରପିଏଫ ଉପ ମହାନିରୀକ୍ଷକ ଭରତ ଭୂଷଣ ସେଠୀ  ଓ ସମାଜସେବୀ ପୁଖରାଜ ଜୟପାଲ ପ୍ରମୁଖ ଯୋଗ ଦେଇଥିଲେ। ଏହି କାର୍ଯ୍ୟକ୍ରମରେ ସହିଦଙ୍କ ପତ୍ନୀ ମାନଙ୍କୁ ମୁଖ୍ୟ ଅତିଥି ସୁରମା ପାଢ଼ୀ ସମ୍ବର୍ଦ୍ଧିତ କରିଥିଲେ।

ଭୁବନେଶ୍ଵର: ଗୋବରୀନଦୀ ପଠାରେ ସାତଦିନ ବ୍ୟାପୀ ଚାଲିଥିବା ଐତିହାସିକ ବାଲିଯାତ୍ରା ମହୋତ୍ସବ କାର୍ଯ୍ୟକ୍ରମ ଗୁରୁବାର ବିଳମ୍ବିତ ରାତିରେ ଉଦଯାପିତ ହୋଇଯାଇଛି। ବାଚସ୍ପତି ସୁରମା ପାଢୀ ଉଦଯାପନୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।

କାର୍ଯ୍ୟକ୍ରମକୁ ଉପସଭାପତି ଅଭିମନ୍ୟୁ ଗୋଚ୍ଛାୟତ ପରିଚାଳନା କରିଥିଲେ। ଅନ୍ୟମାନଙ୍କ ମଧ୍ୟରେ ମହକାଳପଡା ବିଧାୟକ ଡଃ.ଦୁର୍ଗାପ୍ରସାନ୍ନ ନାୟକ ସମ୍ମାନିତ ଅତିଥି,ଦିବ୍ୟ ଜୀବନ ସଂଘ କେନ୍ଦ୍ରାପଡାର ସଭାପତି ମା ଦିବ୍ୟସ୍ୱରୁପାନନ୍ଦ ସରସ୍ୱତୀ,ଆଇନଜିବୀ ପ୍ରଦୀପ ଦାସ,ସଂଜୟ ଜେନା ପ୍ରମୁଖ ଉପସ୍ଥିତ ରହି ଅଭିଭାଷଣ ରଖିଥିଲେ। କେନ୍ଦ୍ରାପଡା ଜିଲ୍ଲାରେ ବାଲିଯାତ୍ରାର ପରମ୍ପରା ଅନ୍ୟ ସହର ଭଳି ପ୍ରାଚୀନ।

ଅତୀତରେ ଏଠାରେ ଉତ୍ପାଦିତ ସାମଗ୍ରୀକୁ ନେଇ ସାଧବ ପୁଅ ମାନେ ବିଦେଶକୁ ବେପାର ବଣିଜ କରିବାକୁ ଯିବାର ପରମ୍ପରା ରହିଥିଲା। ଏବେ ସେ ବେଳ ନଥିଲେ ମଧ୍ୟ ସେହି ଐତିହାସିକ ବାଲିଯାତ୍ରା ଆୟୋଜନ କରାଯାଇ ସେବେଳର ସ୍ମୃତିକୁ ଉଦଜୀବିତ କରିବାର ସାଂସ୍କୃତିକ ପ୍ରୟାସ ଜାରୀ ରହିଛି। ତୁଳଶୀକ୍ଷେତ୍ର କେନ୍ଦ୍ରାପଡା ମାଟିର ପରମ୍ପରା,ଐତିହ ବେଶ ସମୃଦ୍ଧ। ଏହି ମାଟିରେ ବାଲିଯାତ୍ରା ମାଧ୍ୟମରେ ଲୋକସଂସ୍କୃତିକୁ ଅଗ୍ରାଧିକାର ପ୍ରଦାନ କରାଯିବାର ପ୍ରୟାସ ନିଶ୍ଚିତ ଭାବେ ସମାଜ ପାଇଁ ମଂଗଳକର ବୋଲି ବାଚସ୍ପତି ସୁରମା ପାଢୀ ମତ ପ୍ରକାଶ କରିଥିଲେ।

କେନ୍ଦ୍ରାପଡା ଗୋବରୀନଦୀ ପଠାକୁ ସହର ସହ ଯୋଡିବା ପାଇଁ ଯେଉଁ ପୋଲନିର୍ମାଣର ପ୍ରସ୍ତାବ ଆସିଛି ତାହାକୁ କିପରି ଏକବର୍ଷ ମଧ୍ୟରେ ଶେଷ କରାଯିବ ସେ ନେଇ ସରକାର ତ୍ୱରିତ ପଦକ୍ଷେପ ଗ୍ରହଣ କରିବେ ବୋଲି ବାଚସ୍ପତି ସୁରମା ପାଢୀ ନିଜ ଅଭିଭାଷଣରେ ପ୍ରକାଶ କରିଥିଲେ। ମହାକାଳପଡା ବିଧାୟକ ଗୋବରୀନଦୀର ଉନତିକରଣ,ପୁନଃରୁଦ୍ଧାର ପାଇଁ ରାଜ୍ୟ ସରକାରଙ୍କ ପାଖରେ ଯାହା ପ୍ରସ୍ତାବ ଆସିବ ସେଥିପାଇଁ ସମସ୍ତ ପଦକ୍ଷେପ ଗ୍ରହଣ କରାଯିବ ବୋଲି ମତପ୍ରକାଶ କରିଥିଲେ। କେନ୍ଦ୍ରାପଡା ଜିଲ୍ଲା ପାଇଁ ମୋହନମାଝୀ ସରକାର ସମସ୍ତ ପଦକ୍ଷେପ ନେଉଛନ୍ତି। ଆବଶ୍ୟକ ପଡିଲେ ଜିଲ୍ଲାର ବିଭିନ୍ନ ସମସ୍ୟାର ନିରାକରଣ ପାଇଁ କେନ୍ଦ୍ର ସରକାରଙ୍କୁ ଅବଗତ କରାଯାଇ ତ୍ୱରିତ ପଦକ୍ଷେପ ଗ୍ରହଣ ପାଇଁ ପ୍ରୟାସ ହେବ ବୋଲି ମହାକାଳପଡା ବିଧାୟକ ପ୍ରକାଶ କରିଥିଲେ। ବାଲିଯାତ୍ରା ପଡିଆରେ ଦୋକାନ ବଜାର,ମୀନାବଜାର ଦେଖିବା ପାଇଁ ଅନ୍ତିମ ଦିବସରେ ପ୍ରବଳ ଭିଡ ହୋଇଥିଲା।

ଉଦଯାପନୀ ସଭାରେ ବାଚସ୍ପତି ସୁରମାପାଢୀ ଆୟୋଜିତ ବିଭିନ୍ନ ପ୍ରତିଯୋଗିତାର କୃତୀ ପ୍ରତିଯୋଗୀ ମାନଙ୍କୁ ପ୍ରମାଣପତ୍ର,କପ ପ୍ରଦାନ କରି ପୁରସ୍କୃତ କରିଥିଲେ। ମହୋତ୍ସଭର ପୁସ୍ତକକୁ ଲୋକାର୍ପଣ କରିଥିଲେ।

ଏହି ଅବସରରେ ବାଚସ୍ପତିଙ୍କୁ ତୁଳସୀକ୍ଷେତ୍ର କେନ୍ଦ୍ରାପଡାର ଆରାଧ୍ୟ ଦେବତା ଶ୍ରୀବଳଦେବଜୀଉଙ୍କ ଫଟୋଚିତ୍ର ପ୍ରଦାନ କରାଯାଇଥିଲା। ଶେଷରେ ରଂଗାରଂଗ ସାଂକୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। କେନ୍ଦ୍ରାପଡା ଜିଲ୍ଲାର ଐିତିହ ବାର୍ତାବହନ କରୁଥିବା ବାଳିଯାତ୍ରା ପଡିଆକୁ ସେତୁ ନିର୍ମାଣ ପାଇଁ ଅଚଁଳବାସୀଙ୍କ ଦାବୀକୁ ପୁରଣ କରିବା ପାଇଁ ସମସ୍ତ ସହଯୋଗ ଯୋଗାଇ ଦିଆଯିବ ତଥା ପୁଣ୍ୟତୋୟା ଗୋବରୀନଦୀର ପୁନଃରୁଦ୍ଧାର ପାଇଁ ପଦକ୍ଷେପ ନିଆଯିବ ବୋଲି ବାଚସ୍ପତି ନିଜର ପ୍ରତିକ୍ରିୟା ରଖିଥିଲେ। ଆସନ୍ତା ଶୀତକାଳୀନ ଅଧିବେଶନ ସଂପର୍କରେ ମଧ୍ୟ ବାଚସ୍ପତି ଏହି ଅବସରରେ ସୂଚନା ଦେଇଥିଲେ।

ଭୁବନେଶ୍ୱର:  କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ଅଧୀନ କେନ୍ଦ୍ରୀୟ ସଂଚାର ବ୍ୟୁରୋ, ଭୁବନେଶ୍ବର ପକ୍ଷରୁ ଖୋର୍ଦ୍ଧା ଜିଲ୍ଲାର ବୋଲଗଡଠାରେ ବିଭାଜନ ବିଭିଷୀକା ସ୍ମୃତି ଦିବସ ପାଳିତ ହୋଇଯାଇଛି। ବାଚସ୍ପତି ସୁରମା ପାଢୀ କାର୍ଯ୍ୟକ୍ରମକୁ ଉଦଘାଟନ କରି ଦେଶ ବିଭାଜନରେ କଷ୍ଟଯନ୍ତ୍ରଣା ସହିଥିବା ଅଗଣିତ ଲୋକଙ୍କ ବଳିଦାନକୁ ମନେ ପକାଇଥିଲେ । ବାଚସ୍ପତି କହିଥିଲେ, ଭବିଷ୍ୟତରେ ଆଗକୁ ବଢ଼ିବାକୁ ହେଲେ ଅତୀତର ଦୁଃଖଦାୟକ ଓ ପ୍ରେରଣାଦାୟୀ ସ୍ମୃତିକୁ ସାଥୀରେ ନେଇ ଚାଲିବାକୁ ହେବ। ଆଜିର ଯୁବପିଢ଼ି ଅଖଣ୍ଡ ଭାରତର ବିଭାଜନ କାହାଣୀକୁ ମନେ ପକାଇ ଆଗକୁ ବଢ଼ିବ। ବିଭାଜନ ପାଇଁ କେଉଁମାନେ ଦାୟୀ ତାହା ବର୍ତ୍ତମାନର ପିଢ଼ି ଜାଣିବା ଆବଶ୍ୟକ ବୋଲି ଶ୍ରୀମତୀ ପାଢ଼ୀ କହିଥିଲେ।

ଅନ୍ୟ ଅତିଥିମାନେ ଦେଶ ବିଭାଜନ ସମୟରେ ପ୍ରାଣ ହରାଇଥିବା ଲୋକମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। କାର୍ଯ୍ୟକ୍ରମ ଅବସରରେ ତ୍ରିରଙ୍ଗା ପଦଯାତ୍ରା ଆୟୋଜନ କରାଯାଇଥିଲା। ଏଥିରେ ବହୁସଂଖ୍ୟାରେ ସ୍ଥାନୀୟ ଜନସାଧାରଣ ଓ ସ୍କୁଲ କଲେଜର ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ। ଏକ ବିଶାଳ ତ୍ରିରଙ୍ଗା ପତାକା ଧରି ସ୍ଥାନୀୟ ଜନସାଧାରଣ ଦେଶପ୍ରେମର ବାର୍ତ୍ତା ଦେଇଥିଲେ ଏବଂ ‘ହର ଘର ତ୍ରିରଙ୍ଗା’ ଅଭିଯାନରେ ସାମିଲ ହେବାକୁ ପ୍ରେରିତ କରିଥିଲେ । କାର୍ଯ୍ୟକ୍ରମରେ କେନ୍ଦ୍ରୀୟ ସଂଚାର ବ୍ୟୁରୋର ନିର୍ଦ୍ଦେଶକ ଡକ୍ଚର ଗିରିଶ ଚନ୍ଦ୍ର ଦାସ, କ୍ଷେତ୍ର ପ୍ରଚାର ଅଧିକାରୀ ମହେନ୍ଦ୍ର ପ୍ରସାଦ ଜେନାଙ୍କ ସମେତ ଅନ୍ୟ ବିଶିଷ୍ଟ ବ୍ୟକ୍ତିମାନେ ସାମିଲ ହୋଇଥିଲେ।

ରଣପୁର: ନୟାଗଡ ଜିଲ୍ଲା ରଣପୁର ବ୍ଲକ ବ୍ରଜରାଜପୁର ପଞ୍ଚାୟତ ଉଚ୍ଚ ବିଦ୍ୟାଳୟର ପ୍ରତିଷ୍ଠା ଦିବସ ପାଳନ ସହ ନବ ନିର୍ମିତ ଏକ ମୁକ୍ତ ମଞ୍ଚର ଉଦଘାଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବେ ଓଡିଶା ବିଧାନସଭା ବାଚସ୍ପତି ସୁରମା ପାଢ଼ୀ, ମୁଖ୍ୟ ବକ୍ତା ଭାବେ ନୟାଗଡ ଜିଲ୍ଲା ଶିକ୍ଷା ଅଧିକାରିଣୀ ରାଜଶ୍ରୀ ପଟ୍ଟନାୟକ, ସମ୍ମାନିତ ଅତିଥି ଭାବେ ନୟାଗଡ ଜିଲ୍ଲା ଆରକ୍ଷୀ ଅଧୀକ୍ଷକ ରାହୁଲ ଜୈନ, ନୟାଗଡ ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ ତଥା ନୟାଗଡ ଜିଲ୍ଲା ପରିଷଦ କାର୍ଯ୍ୟ ନିର୍ବାହୀ ଅଧିକାରୀ ଦେବଦତ୍ତ ପଣ୍ଡା, ରଣପୁର ବିଡ଼ିଓ ସୁଧୀର କୁମାର ନାୟକ, ରଣପୁର ବ୍ଲକ ଶିକ୍ଷା ଅଧିକାରିଣୀ ବନଲତା ବେହେରା, ସମାଜସେବୀ ବିଶ୍ୱବିହାରୀ ପଟ୍ଟନାୟକ, ଚାଟାଡ଼ ଆକାଉଣ୍ଟାଟ ମନୋଜ କୁମାର ମହାପାତ୍ର, ନାଲକୋ ପ୍ରାକ୍ତନ ଜେନେରାଲ ମ୍ୟାନେଜର ପ୍ରଦୀପ କୁମାର ମହାନ୍ତି, ପୂର୍ବତନ ଆୟକର ଅଧିକାରୀ ଭାଗିରଥି ସାହୁ, ପ୍ରତିଷ୍ଠାତା ସଦସ୍ୟ ନାରାୟଣ ପରିଡା, ଶିକ୍ଷବିତ ଉମାକାନ୍ତ ମହାପାତ୍ର, ଜୟନ୍ତ କୁମାର ପରିଡା, ଅବସର ପ୍ରାପ୍ତ ପ୍ରାଧ୍ୟାପକ ବିଜୟ କୁମାର ଜେନା, ପ୍ରଧାନ ଶିକ୍ଷକ ବସନ୍ତ କୁମାର ସାହୁ ପ୍ରମୁଖ ଯୋଗ ଦେଇଥିଲେ।

ପ୍ରଥମେ ବାଚସ୍ପତିଙ୍କ ସମେତ ସମସ୍ତ ନିମନ୍ତ୍ରିତ ଅତିଥି ମହାପୁରୁଷଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟାର୍ପଣ କରିଥିଲେ। ଏହା ପରେ ବିଦ୍ୟାଳୟର ପୁରାତନ ଛାତ୍ର ତଥା ସମାଜସେବୀ ବିଶ୍ୱବିହାରୀ ପଟ୍ଟନାୟକଙ୍କ ଦ୍ୱାରା ନିର୍ମିତ ମୁକ୍ତ ମଞ୍ଚର ଉଦଘାଟନ ମାନ୍ୟବର ବାଚସ୍ପତିଙ୍କ କରକମଳରେ ଉଦଘାଟିତ ହୋଇଥିଲା। ଏହା ପରେ ଏକ ସଭାକାର୍ଯ୍ୟର ଆୟୋଜନ କରାଯାଇଥିଲା। ପ୍ରଥମେ ସମସ୍ତ ଅତିଥି ପ୍ରଭୁ ଜଗନ୍ନାଥଙ୍କ ନିକଟରେ ପୁଷ୍ପ ଓ ଧୂପ ପ୍ରଦାନ କରି ସଭାକାର୍ଯ୍ୟ ଆରମ୍ଭ କରିଥିଲେ।

ବିଦ୍ୟାଳୟର ଶିକ୍ଷକ ପ୍ରତାପ କୁମାର ମହାନ୍ତି ଅତିଥି ପରିଚୟ ପ୍ରଦାନ କରିଥିଲେ। ଶିକ୍ଷକ ମଦନ ମୋହନ ବେହେରା ବିଦ୍ୟାଳୟର ବାର୍ଷିକ ବିବରଣୀ ପଠନ କରିଥିଲେ। ଶିକ୍ଷୟିତ୍ରୀ ରାଜଶ୍ରୀ ପ୍ରଧାନ କୃତି ଛାତ୍ରଛାତ୍ରୀଙ୍କ ନାମ ଘୋଷଣା କରିଥିଲେ। ବିଦ୍ୟାଳୟ ପରିଚାଳନା କମିଟି ସଭାପତି ରଣଜିତ ପଟ୍ଟନାୟକ ସଭାକାର୍ଯ୍ୟ ପରିଚାଳନା କରିଥିଲେ।

ବାଚସ୍ପତି ନିଜ ବକ୍ତବ୍ୟରେ ପିଲାମାନଙ୍କୁ ବିଭିନ୍ନ ମହାପୁରୁଷ, ପୌରାଣିକ କଥାବସ୍ତୁ ମାଧ୍ୟମରେ ଉତ୍ତମ ଚରିତ୍ର ଗଠନ ନିମନ୍ତେ ପରାମର୍ଶ ଦେଇଥିଲେ। ଏହା ସହ ପରିବେଶ ସୁରକ୍ଷା ବିଷୟରେ ମଧ୍ୟ ପିଲାମାନଙ୍କୁ ବିଭିନ୍ନ କଥା ବୁଝାଇ ବିଶ୍ଵତାପନ ହ୍ରାସ ପାଇଁ ସଚେତନତା ସୃଷ୍ଟି କରିଥିଲେ।

ବିଦ୍ୟାଳୟର ସମସ୍ତ ଛାତ୍ରଛାତ୍ରୀ, ଶିକ୍ଷକ ଶିକ୍ଷୟତ୍ରୀ, ପରିଚାଳନା କମିଟିର ସମସ୍ତ ସଦସ୍ୟସଦସ୍ୟା ଏବଂ ଗ୍ରାମର ଗ୍ରାମବାସୀ ଏହି କାର୍ଯ୍ୟକ୍ରମରେ ସହଯୋଗ କରିଥିଲେ।

ରଣପୁର: ଓଡିଶା ବିଧାନସଭାର ବାଚଷ୍ପତି ହେବା ପରେ ନିଜ ନିର୍ବାଚନ ମଣ୍ଡଳୀକୁ ଏକ ଦିନିକିଆ ଗସ୍ତରେ ଆସିଛନ୍ତି ସୁରମା ପାଢ଼ୀ। ପ୍ରଥମେ ଚମ୍ପାଗଡ଼ ଠାରେ ସୁରମା ପାଢ଼ୀ ପହଞ୍ଚିବା ପରେ ଦଳୀୟ କର୍ମୀ ମାନେ ପୁଷ୍ପ ଗୁଚ୍ଛ ସହ ଉତ୍ତରୀୟ ଦେଇ ସ୍ୱାଗତ ସମ୍ବର୍ଦ୍ଧନା ପ୍ରଦାନ କରିଛନ୍ତି। ବିରାଟ ପଟୁଆରରେ ସ୍ଥାନୀୟ ଜଣ ସାଧାରଣ ବାଚସ୍ପତିଙ୍କୁ ପାଛୋଟି ନେଇଥିଲେ।

ଏହା ପରେ ସୁରମା ପାଢ଼ୀଙ୍କୁ ଭେଟିବା ପାଇଁ ସ୍ଥାନିୟ ଅଂଚଳର ସହ ସହ ଜନ ସାଧାରଣ କଟକ ସହର, ବେଣ୍ଟ କନ୍ଧ ନୟାଗଡ଼ ଛକ ଠାରେ ଅପେକ୍ଷା କରିଥିଲେ। ସୁରମା ପାଢ଼ୀ ଗାଡିରୁ ଓହ୍ଲାଇ ସ୍ଥାନୀୟ ଜନ ସାଧାରଣଙ୍କୁ ଭେଟି ଥିଲେ। ଏହା ପରେ କନ୍ଧ ନୟାଗଡ଼ ହନୁମାନ ମନ୍ଦିରରେ ଶ୍ରୀ ହନୁମାନଙ୍କୁ ଦର୍ଶନ କରିବା ସହ ଦୀପ ଦାନ କରି ଓଡିଶା ବାସୀଙ୍କର ଶୁଭ ମନାସୀ ଥିଲେ।

ଏହା ପରେ ସେ ଚାନ୍ଦପୁର, କେରଣ୍ଡା ଟାଙ୍ଗୀ, ରାଇପଡା ଆଦି ଗ୍ରାମ ଗସ୍ତ କରିଥିଲେ। ଶହ ଶହ ଜନ ସାଧାରଣ ରାସ୍ତା ପାର୍ଶ୍ଵରେ ରହି ସୁରମା ପାଢ଼ିଙ୍କୁ ସ୍ୱାଗତ ଜଣାଇଥିଲେ। ଏହା ସହ ଖଣ୍ଡିଆ ବନ୍ଧ ଠାରେ ଅନୁଷ୍ଠିତ ଶ୍ରୀରାମ ମନ୍ଦିରର ବିଗ୍ରହ ପ୍ରତିଷ୍ଠା ବାର୍ଷିକ ଉତ୍ସବରେ ବାଚସ୍ପତି ଯୋଗଦେଇଥିଲେ।

ଏହି କାର୍ଯ୍ୟକ୍ର ରେ ବିଜେପି ନେତା ସୁବର୍ଣ୍ଣ ସିଂ, ପ୍ରଦୀପ ସେନାପତି, ଅମୁଲ୍ୟ ସାହୁ, ଗୋପାଳ ନାୟକ, ବେଣୁଧର ରଣା, ନିର୍ମଳ ମତ୍ତଗଜ ସିଂ, ପ୍ରମୁଖ ସହଯୋଗ କରିଥିଲେ।

ଭୁବନେଶ୍ଵର: ଆଜି ଓଡିଶା ବିଧାନସଭାକୁ ନୂଆ ବାଚସ୍ପତି ମିଳିଛନ୍ତି। ବରିଷ୍ଠ ବିଜେପି ବିଧାୟିକା ସୁରମା ପାଢ଼ୀ ଆଜି ବାଚସ୍ପତି ଭାବେ ନିର୍ବାଚିତ ହୋଇଛନ୍ତି। ରଣପୁର ବିଧାୟିକା ସୁରମା ଆଜି ଓଡିଶା ବିଧାନସଭାର ବାଚସ୍ପତି ଭାବେ ସର୍ବସମ୍ମତିକ୍ରମେ ନିର୍ଦ୍ଵନ୍ଦ୍ଵରେ ନିର୍ବାଚିତ ହୋଇଛନ୍ତି।

ବାଚସ୍ପତି ଭାବେ ସୁରମ ନିର୍ବାଚିତ ହେବା ପରେ ଆଜି ଦାୟିତ୍ଵ ଗ୍ରହଣ କରିଛନ୍ତି। କାମଚଳା ବାଚସ୍ପତି ରଣେନ୍ଦ୍ର ପ୍ରତାପ ସ୍ବାଇଁଙ୍କଠାରୁ ସେ ଆଜି ଦାୟିତ୍ୱ ଗ୍ରହଣ କରିଛନ୍ତି। ଦାୟିତ୍ବ ଗ୍ରହଣ ପରେ ବାଚସ୍ପତି ଗୃହ ପରିଚାଳନା କରିଛନ୍ତି।

ଭୁବନେଶ୍ବର: ଆଜି ରାଜ୍ୟରେ ପ୍ରଥମ ଥର ପାଇଁ ବିଜେପି ସରକାର ଗଠନ ହୋଇଛି। ମୁଖ୍ୟମନ୍ତ୍ରୀ, ଉପ-ମୁଖ୍ୟମନ୍ତ୍ରୀଙ୍କ ସମେତ ଆଜି ୧୬ ଜଣିଆ ମନ୍ତ୍ରୀମଣ୍ଡଳ ମଧ୍ୟ ଶପଥ ଗ୍ରହଣ କରିଛନ୍ତି। ନୂଆ ସରକାରରେ ମୋହନ ଚରଣ ମାଝୀ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିବା ବେଳେ ଉପ-ମୁଖ୍ୟମନ୍ତ୍ରୀ ଭାବେ କନକବର୍ଦ୍ଧନ ସିଂହଦେଓ ଓ ପ୍ରଭାତୀ ପରିଡ଼ା ଶପଥ ନେଇଛନ୍ତି।

ମୋହନ୍‌ ସରକାରରେ ୮ ଜଣ କ୍ୟାବିନେଟ ଓ ୫ ଜଣ ରାଷ୍ଟ୍ରମନ୍ତ୍ରୀ ଶପଥ ଗ୍ରହଣ ପରେ ଓଡ଼ିଶା ବିଧାନସଭାର ନୂଆ ବାଚସ୍ପତି ଘୋଷଣା କରାଯାଇଛି। ରଣପୁର ବିଧାୟିକା ସୁରମା ପାଢ଼ୀଙ୍କୁ ଭାରତୀୟ ଜନତା ପାର୍ଟି (ବିଜେପି) ବାଚସ୍ପତି ଭାବେ ମନୋନୀତ କରିଛି।

ରଣପୁର: ସାଧାରଣ ନିର୍ବାଚନ ପାଖେଇ ଆସୁଥିବାରୁ ଏବେ ରଣପୁର ନିର୍ବାଚନମଣ୍ଡଳୀ ଚଳଚଂଚଳ ହାଇଛି। ସୋମବାର ଭଳି ମଙ୍ଗଳବାର ଦିନ ମଧ୍ୟ କନ୍ଧନୟାଗଡ ପଚାଂୟତରେ ପୂର୍ବତନ ମନ୍ତ୍ରୀ ସୁରମା ପାଢୀଙ୍କୁ କଳା ପତକା ପ୍ରଦର୍ଶନ କରାଯାଇଛି। ୪ ଦିନ ତଳେ ବିଜେଡି ତରଫରୁ କନ୍ଧନୟାଗଡରେ ଏକ ସ୍ୱାସ୍ଥ୍ୟ କେନ୍ଦ୍ର ଉଦଘାଟନ ବେଳେ ବିଜେପି ତରଫରୁ ସ୍ଥାନୀୟ ବିଧାୟକଙ୍କୁ କଳା ପତକା ପ୍ରଦର୍ଶନ ସହ ବିଭିନ୍ନ ସ୍ଲୋଗାନ ଦିଆଯାଇଥିଲା। ଏବେ ପୁଣି ସେହି ପଚାଂୟତରେ ବିଜେଡି ତରଫରୁ ବିଜେପି ନେତ୍ରୀଙ୍କୁ କଳା ପତକା ପ୍ରଦର୍ଶନ କରାଯିବା ସହ ଗୋବ୍ୟାକ୍ ସ୍ଲୋଗାନ ଦିଆଯାଇଥିଲା। ସୋମବାର ଦିନ ଜଙ୍କିଆ ପଚାଂୟତରେ ଏଭଳି ଘଟଣା ଘଟିଥିବା ବେଳେ ମଙ୍ଗଳବାର ପୁଣି କନ୍ଧନୟାଗଡ ପଚାଂୟତରେ ଏହି ଘଟଣାର ପୁନରାବୃତ୍ତି ଘଟିଛି।

ଘଟଣାରୁ ପ୍ରକାଶ ଗତକାଲି ରଣପୁର ବ୍ଲକ ଚାନ୍ଦପୁର ପଚାଂୟତରେ କେନ୍ଦ୍ର ସରକାରଙ୍କ ବିକଶିତ ଭାରତ ସଂକଳ୍ପ ଯାତ୍ରା ଅନୁଷ୍ଠିତ ହୋଇଥିଲା। ପରେ ଏହି କାର୍ଯ୍ୟକ୍ରମ କନ୍ଧନୟାଗଡ ପଚାଂୟତରେ ଅନଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମରେ ପୂର୍ବତନ ମନ୍ତ୍ରୀ ସୁରମା ପାଢୀ,  ରଣପୁର ବ୍ଲକ ଅଧ୍ୟକ୍ଷା ନିର୍ମଳା ବେହେରା ଯୋଗ ଦେଇଥିଲେ। କିନ୍ତୁ ସୁରମା ପାଢୀଙ୍କ ଯୋଗଦାନକୁ ବିଜେଡି ତରଫରୁ ଜୋରଦାର ବିରୋଧ କରାଯାଇଥିଲା। କେବଳ ନିର୍ବାଚିତ ପ୍ରତିନିଧି ମାନେ ଏହି ବୈଠକରେ ବସି ପାରିବେ ବୋଲି ମତ ଦେବା ସହ ସୁରମାଙ୍କୁ କଳାପତକା ଦେଖାଇବା ସହ ଗୋବ୍ୟାକ୍ ସ୍ଲୋଗାନ ଦେଇଥିଲେ।

ଖବର ପାଇଁ ଘଟଣାସ୍ଥଳରେ ଚାନ୍ଦପୁର ପୁଲିସ ପହଚିଂ ସ୍ଥିତିକୁ ନିୟନ୍ତ୍ରଣ କରିଥିଲା।

ରଣପୁର: ଧାନ ମଣ୍ଡିରେ ଚାଲିଥିବା ଚାଷୀ ମାରଣ ନୀତି ବିରୁଦ୍ଧରେ ରଣପୁର ବିଜେପି ତରଫରୁ ଗତକାଲି ଅପରାହ୍ନରେ ଏକ ପ୍ରେସ ମିଟ ହୋଇଥିଲା। ଏହି ପ୍ରେସ ମିଟରେ ପୂର୍ବତନ ସମବାୟ ମନ୍ତ୍ରୀ ସୁରମା ପାଢ଼ୀ, ଗୋପାଳପୁର ଜୋନ ଜିଲ୍ଲା ପରିଷଦ ସଭ୍ୟା ଲକ୍ଷ୍ମୀପ୍ରିୟା ତରେଇ ଓ ରଣପୁର ବ୍ଲକ ଅଧ୍ୟକ୍ଷା ନିର୍ମଳା ବେହେରା ପ୍ରମୁଖ ଉପସ୍ଥିତ ଥିଲେ।  ଧାନ ମଣ୍ଡିରେ ଚାଷୀମାନଙ୍କ ଠାରୁ ଧାନ ଠିକ ଭାବେ କିଣା ହୋଇ ପାରୁ ନ ଥିବା ତଥା ମନଇଚ୍ଛା କଟନୀ ଛଟନୀ ନେଇ ପ୍ରଶାସନ ଉପରେ ବାର୍ଷିଥିଲେ ପୂର୍ବତନ ମନ୍ତ୍ରୀ ଶ୍ରୀମତୀ ପାଢ଼ୀ। କଟନୀ ଛଟନୀ ସଂପୂର୍ଣ୍ଣ ବନ୍ଦ କରିବାକୁ ସେ ଦାବି କରିଥିଲେ।

ଶ୍ରୀମତୀ ପାଢ଼ୀ କହିଥିଲେ ଯେ, ଧାନ ମଣ୍ଡି ଖୋଲିବା ନେଇ ଅହେତୁକ ବିଳମ୍ବ ହୋଇଥିଲା। ଧାନ ମଣ୍ଡି ଖୋଲିବା ପରେ ମଧ୍ୟ ସଠିକ ସମୟରେ ଉଚିତ ମୂଲ୍ୟରେ ଚାଷୀମାନଙ୍କ ଠାରୁ ଧାନ କିଣା ଯାଉ ନାହିଁ। ନୟାଗଡ ଜିଲ୍ଲାରେ ୧୫୩ ଟି ଧାନ ମଣ୍ଡି ଖୋଲା ଯାଇଛି। ଏହି ଧାନ ମଣ୍ଡିଗୁଡିକର ଉଦଘାଟନୀ ହେଲା ପରେ ମଧ୍ୟ ଚାଷୀମାନେ ମଣ୍ଡିର ସୁବିଧା ଠିକ ଭାବେ ପାଇ ପାରୁ ନାହାନ୍ତି। ବିଭିନ୍ନ ଟୋକନ ତାରିଖ ଆସିଥିଲେ ମଧ୍ୟ ଗତ ଡିସେମ୍ବର ୨୩ ତାରିଖ ସୁଦ୍ଧା ଚାଷୀମାନେ ପ୍ରଥମ ଟୋକନ ପାଇ ପାରିନାହାନ୍ତି। ସତେ ଯେମିତି ଜଣାପଡୁଛି ଜିଲ୍ଲା ପ୍ରଶାସନ ହାତରେ କୌଣସି ଅଙ୍କୁଶ ନାହିଁ।

ଧାନ ମଣ୍ଡିଗୁଡିକରୁ ଧାନ ଉଠାଇବା ପାଇଁ ନୟାଗଡ ଜିଲ୍ଲାରେ ତିନିଜଣ ମିଲରଙ୍କୁ ଅନୁମତି ମିଳିଛି। ମଣ୍ଡିଗୁଡିକରେ ୪ ରୁ ୫ ଟି ଟୋକନ ତାରିଖ ମିଳିଥିଲେ ମଧ୍ୟ ଏ ପର୍ଯ୍ୟନ୍ତ ଚାଷୀମାନଙ୍କ ଠାରୁ ଧାନ କିଣା ଯାଇ ନାହିଁ। ମିଲରମାନେ ଧାନ ମଣ୍ଡିକୁ ଆସୁ ନାହାନ୍ତି ଏବଂ କ୍ୱିଣ୍ଟାଲ ପ୍ରତି ୮ ରୁ ୧୦ କିଗ୍ରା ଧାନ କଟନୀ ଛଟଣୀ ପାଇଁ ଜିଦରେ ଅଟଳ ରହୁଛନ୍ତି।  ଚଳିତ ବର୍ଷ ଉତ୍ତମ ଗୁଣ ଯୁକ୍ତ ଭଲ ଧାନ ଉତ୍ପାଦନ ହୋଇଥିଲେ ମଧ୍ୟ ମିଲରମାନଙ୍କ ଏହି କଟନୀ ଛଟନୀ ନୀତି ଅତ୍ୟନ୍ତ ଦୁର୍ଭାଗ୍ୟଜନକ। ଏହା ଚାଷୀମାନଙ୍କୁ ହାତୋତ୍ସାହିତ କରିଛି। ପୁଣି ଅଖା ବାଦକୁ ୧ ରୁ ୨ କିଗ୍ରା ଧାନ କାଟିବା ପାଇଁ ମଧ୍ୟ ମିଲରମାନେ କହୁଛନ୍ତି। ମିଲର ଓ ପ୍ରଶାସନର ମଧୁଚନ୍ଦ୍ରିକା ଯୋଗୁଁ ଚାଷୀ ସ୍ୱାର୍ଥରେ ବ୍ୟାଘାତ ସୃଷ୍ଟି ହେଉଛି ବୋଲି ଏହି ପ୍ରେସ ମିଟ୍ ରେ ଶ୍ରୀମତୀ ପାଢ଼ୀ ଅଭିଯୋଗ କରିଥିଲେ। ଏପରିକି ମିଲରମାନେ ଚାଷୀମାନଙ୍କୁ ଧାର୍ଯ୍ୟ ତାରିଖରେ ଧାନ ନ ବିକ୍ରି କଲେ ପରେ ଆଉ ଧାନ ନିଆଯିବ ନାହିଁ ବୋଲି ଡରାଉଥିବା ଅଭିଯୋଗ ଆସୁଛି ବୋଲି ଶ୍ରୀମତୀ ପାଢ଼ୀ କହିଥିଲେ।

ଗୌରାଙ୍ଗପୁର ସମବାୟ ସମିତିରେ ୧୬୮ ଜଣଙ୍କର ଟୋକନ ଆସିଥିଲା ବେଳେ ଜଣେ ଚାଷୀଙ୍କର ଧାନ ବିକ୍ରି ହୋଇ ପାରିନାହିଁ। ଚାଷୀ ଋଣରେ ଟଙ୍କା ଆଣି ଧାନ ଚାଷ କରିଥିବାରୁ ଠିକ ସମୟରେ ଠିକ ମୂଲ୍ୟରେ ଧାନ ବିକ୍ରି ନ ହୋଇ ପାଇବାରୁ ବାଧ୍ୟ ହୋଇ କମ ମୂଲ୍ୟରେ ବେପାରୀମାନଙ୍କୁ ଧାନ ବିକ୍ରି କରିବାକୁ ବାଧ୍ୟ ହେଉଛି। ଜିଲ୍ଲା ପ୍ରଶାସନର ଅପାରଗତା ଯୋଗୁଁ ଏପରି ହେଉଥିବା ପୂର୍ବତନ ସମବାୟ ମନ୍ତ୍ରୀ କହିଥିଲେ। ଧାନ ଏଫଏକ୍ୟୁ ମାନର ଥିବା ଯୋଗୁଁ ସମ୍ପୂର୍ଣ କଟନୀ ଛଟନୀ ବନ୍ଦ କରିବା ପାଇଁ ମଧ୍ୟ ଦାବି କରିଛନ୍ତି।