ନୂଆଦିଲ୍ଲୀ: ଜଣେ ବ୍ୟକ୍ତି କାର ସହିତ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ଘରେ ପ୍ରବେଶ କରିବାକୁ ଚେଷ୍ଟା କରିଛନ୍ତି। ତେବେ କୌଣସି ଘଟଣା ଘଟିବା ପୂର୍ବରୁ ସୁରକ୍ଷା କର୍ମୀମାନେ ତାଙ୍କୁ ଧରିଥିଲେ। ଏହି ବ୍ୟକ୍ତି ଦିଲ୍ଲୀ ପୋଲିସର ସ୍ପେଶାଲ ସେଲ ଦଳର ହେପାଜତରେ ଅଛନ୍ତି ଏବଂ ତାଙ୍କୁ ପଚରାଉଚରା କରାଯାଉଛି। ବର୍ତ୍ତମାନ, ବ୍ୟକ୍ତି ଜଣକ ଭୁଲରେ ଗାଡିରେ ପ୍ରବେଶ କରିଛନ୍ତି କିମ୍ବା ଏହା ପଛରେ କିଛି ଷଡଯନ୍ତ୍ର ଅଛି, ତାହା ସ୍ପଷ୍ଟ ହୋଇନାହିଁ।
ଦିଲ୍ଲୀ ପୋଲିସ ସୂତ୍ରରୁ ପ୍ରକାଶ ଯେ, ଜଣେ ଅଜ୍ଞାତ ବ୍ୟକ୍ତି ଏନଏସଏସ ଅଜିତ ଡୋଭାଲଙ୍କ ବାସଭବନରେ ପ୍ରବେଶ କରିବାକୁ ଚେଷ୍ଟା କରିଥିଲା। ଉକ୍ତ ବ୍ୟକ୍ତିଙ୍କୁ ସୁରକ୍ଷା ବାହିନୀ ଅଟକାଇ ଅଟକ ରଖିଛି। ଅଧିକ ତଦନ୍ତ ଚାଲିଛି। ”ପ୍ରାଥମିକ ଅନୁସନ୍ଧାନ ଅନୁଯାୟୀ ବ୍ୟକ୍ତି ଜଣଙ୍କ ମାନସିକ ସ୍ତରରେ ଅସୁସ୍ଥ ଥିବା ପୋଲିସ କହିଛି। ବ୍ୟକ୍ତି ଜଣକ ଏକ ଭଡା କାର୍ ଚଳାଉଥିଲା। ସନ୍ଦିଗ୍ଧ ବ୍ୟକ୍ତି ପଚରାଉଚରା ବେଳେ କହିଛନ୍ତି ଯେ, ତାଙ୍କ ଶରୀରରେ ଏକ ଚିପ ଅଛି ଏବଂ ରିମୋଟ କଣ୍ଟ୍ରୋଲ ସହିତ ଅନ୍ୟ କେହି ଏହାକୁ ନିୟନ୍ତ୍ରଣ କରୁଛନ୍ତି।
ପ୍ରକାଶ ଯୋଗ୍ୟ ଯେ, ଅଜିତ ଡୋଭାଲଙ୍କୁ ଭାରତର ଜେମ୍ସ ବଣ୍ଡ ମଧ୍ୟ କୁହାଯାଏ। ସେ ମଧ୍ୟ ଆତଙ୍କବାଦୀ ସଂଗଠନର ଟାର୍ଗେଟରେ ଅଛନ୍ତି। ଅତୀତରେ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ ଅଜିତ ଡୋଭାଲଙ୍କ ଘର ଏବଂ କାର୍ଯ୍ୟାଳୟର ଏକ ତଥ୍ୟ ସଂଗ୍ରହ କରିଥିଲା। ଜମ୍ମୁ କାଶ୍ମୀର ପୋଲିସ ଦ୍ୱାରା ଗିରଫ ହୋଇଥିବା ଜୈଶ ଆତଙ୍କବାଦୀ ହିଦୟତୁଲ୍ଲା ନିଜେ ଏହି ସୂଚନା ଦେଇଛନ୍ତି। ଉରି ଏବଂ ବାଲାକୋଟରେ ଭାରତର ଏୟାର ଷ୍ଟ୍ରାଇକ୍ ପରେ ପାକିସ୍ତାନୀ ଆତଙ୍କବାଦୀ ଗୋଷ୍ଠୀ ଅଜିତ ଡୋଭାଲଙ୍କ ବିରୋଧରେ କ୍ରମାଗତ ଷଡଯନ୍ତ୍ର କରୁଛନ୍ତି।
