ଭୁବନେଶ୍ୱର: ଓଡ଼ିଶାର ବିଭିନ୍ନ ଗ୍ରାମାଞ୍ଚଳ ଓ ସହରାଞ୍ଚଳର କ୍ଷୁଦ୍ର ଉଦ୍ୟୋଗୀମାନଙ୍କୁ ସଶକ୍ତ କରିବା ସହିତ ସେମାନଙ୍କ ବ୍ୟବସାୟକୁ ଆଉ ଏକ ସୋପାନକୁ ନେବା ଲକ୍ଷ୍ୟରେ ‘ସ୍ୱକଳ୍ପ ସହଯୋଗ’ ଆୟୋଜନ କରାଯାଉଛି। ବୁଧବାର ଦିନ ବିଶ୍ୱ ଦକ୍ଷତା କେନ୍ଦ୍ରଠାରେ ଆୟୋଜିତ କାର୍ଯ୍ୟକ୍ରମରେ ସ୍ୱକଳ୍ପ ଉଦ୍ୟୋଗୀଙ୍କ ସହିତ ମେଣ୍ଟର, ଶିଳ୍ପ ବିଶେଷଜ୍ଞ ଏବଂ ବିଭିନ୍ନ ସହଯୋଗୀ ସଂସ୍ଥାର ଅଧିକାରୀମାନେ ଯୋଗ ଦେଇଥିଲେ। ବର୍ତ୍ତମାନର ପ୍ରତିଯୋଗିତାମୂଳକ ବଜାରରେ ସ୍ୱକଳ୍ପ ଉଦ୍ୟୋଗୀମାନେ ବୈଷୟିକ ଜ୍ଞାନକୌଶଳକୁ ଆଧାରକରି ନିଜ ନିଜ ବ୍ୟବସାୟକୁ କିପରି ଆଗକୁ ନେଇପାରିବେ ତା’ ଉପରେ ଏହି କାର୍ଯ୍ୟକ୍ରମରେ ବିଶେଷ ଆଲୋଚନା କରାଯାଇଥିଲା।
ଏହି କାର୍ଯ୍ୟକ୍ରମରେ ଓଡ଼ିଶା ଦକ୍ଷତା ବିକାଶ ପ୍ରାଧୀକରଣର ଅଧ୍ୟକ୍ଷା ତଥା ବିଶ୍ୱ ଦକ୍ଷତା କେନ୍ଦ୍ରର ସିଇଓ ଅଳକା ମିଶ୍ର ଯୋଗଦେଇ କ୍ଷୁଦ୍ର ଉଦ୍ୟୋଗୀମାନଙ୍କୁ ଉତ୍ସାହିତ କରିଥିଲେ। ‘ସ୍ୱକଳ୍ପ ସହଯୋଗ’ରେ ରାଜ୍ୟର ବିଭିନ୍ନ ସ୍ଥାନରୁ ୧୦୦ରୁ ଅଧିକ କ୍ଷୁଦ୍ର ଉଦ୍ୟୋଗୀ ଭାଗ ନେଇଥିଲେ। ଉଦ୍ୟୋଗୀ ଦକ୍ଷତା ବିକାଶ କାର୍ଯ୍ୟକ୍ରମ ‘ସ୍ୱକଳ୍ପ’ ଅଧୀନରେ ସ୍ୱକଳ୍ପ ସହଯୋଗ କରାଯାଉଛି।
ଏହି କାର୍ଯ୍ୟକ୍ରମରେ କୋସା, ଡିଆଇଭିଏଭିଆଇ – ଗାଓଁ କା ବଜାର, ମିଲେଟ ମ୍ୟାଜିକ ଫାଉଣ୍ଡେସନ, ଓଏନଡିସି ଏବଂ ଭାରତ ପେ’ ସହଯୋଗୀ ସଂସ୍ଥା ଭାବେ ଯୋଡ଼ି ହୋଇଛନ୍ତି। ଏହା ମାଧ୍ୟମରେ ଆଗାମୀ ଦିନରେ ସ୍ୱକଳ୍ପ ଉଦ୍ୟୋଗୀମାନଙ୍କୁ ୠଣ ସହାୟତା, ଅନଲାଇନ ମାର୍କେଟିଙ୍ଗ୍, ଡିଜିଟାଲ କାରବାର ଏବଂ ବୈଷୟିକ ସହାୟତା ଆଦି ଯୋଗାଇଦେବାକୁ ଲକ୍ଷ୍ୟ ରହିଛି।
‘‘୧୦୦ରୁ ଅଧିକ ସ୍ୱକଳ୍ପ ଉଦ୍ୟୋଗୀଙ୍କ ସହିତ ମେଣ୍ଟର ଏବଂ ପାର୍ଟନରମାନଙ୍କୁ ଯୋଡ଼ିବା ପାଇଁ ସ୍ୱକଳ୍ପ ସହଯୋଗର ପରିକଳ୍ପନା କରାଯାଇଛି। ଏହା ସେମାନଙ୍କ ବ୍ୟବସାୟକୁ ଆଗକୁ ନେବାରେ ବିଶେଷ ସହାୟକ ହେବ। ମେଣ୍ଟର ଓ ପାର୍ଟନରମାନଙ୍କ ଭଳି ବିଶେଷଜ୍ଞମାନଙ୍କ ମାର୍ଗଦର୍ଶନ ଫଳରେ ଉଦ୍ୟୋଗୀମାନେ ସଶକ୍ତ ହୋଇପାରିବେ। ବିଭିନ୍ନ ସମସ୍ୟାର ମୁକାବିଲା କରିବା ସହ ବିଭିନ୍ନ ସୁଯୋଗର ଲାଭ ନେବା ଦିଗରେ ଏହା ସେମାନଙ୍କ ଭିତରେ ଆତ୍ମବିଶ୍ୱାସ ବଢ଼ାଇବ। ସ୍ୱକଳ୍ପ ବନ୍ଧୁ ଓ ସ୍ୱକଳ୍ପ ସୁରକ୍ଷା ଭଳି କାର୍ଯ୍ୟକ୍ରମ ଜରିଆରେ ଉଦ୍ୟୋଗୀମାନଙ୍କ ସାମଗ୍ରିକ ବିକାଶ ପାଇଁ ଆମେ ପ୍ରତିଶ୍ରୁତିବଦ୍ଧ। ଏହି କାର୍ଯ୍ୟକ୍ରମଗୁଡ଼ିକ ସେମାନଙ୍କୁ ବୀମା ସହାୟତା ଦେବା ସହ ଉପଯୁକ୍ତ ମେଣ୍ଟରମାନଙ୍କ ସହ ଯୋଡ଼ି ହେବାରେ ସାହାଯ୍ୟ କରିବ। ଏସବୁ ଜରିଆରେ ସମସ୍ତଙ୍କ ପାଇଁ ଦୀର୍ଘସ୍ଥାୟୀ ବିକାଶ ଓ ସମୃଦ୍ଧିର ବାଟ ପ୍ରଶସ୍ତ କରୁଛି ସ୍ୱକଳ୍ପ’’, କହିଛନ୍ତି ପାଲାଡିୟମ ଇଣ୍ଡିଆର ନିର୍ଦ୍ଦେଶକ ସନ୍ଦୀପ ଲାଞ୍ଜେୱର।
ଏହି କାର୍ଯ୍ୟକ୍ରମରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର ଅତିରିକ୍ତ ସଚିବ ତଥା ବିଶ୍ୱ ଦକ୍ଷତା କେନ୍ଦ୍ରର ସିଓଓ ପିନାକୀ ପଟ୍ଟନାୟକ, କାରେଟ୍ କାପିଟାଲର ସହପ୍ରତିଷ୍ଠାତା ପ୍ରଜକ୍ତ ରାଉତ, କୋସାର ସହପ୍ରତିଷ୍ଠାତା ବିଜୟ କ୍ରିଷ୍ଣାପା, ମେସୋର ଜୋନାଲ ମ୍ୟାନେଜର ଶୁଭଦୀପ ଶାହ, ୟୁନାଇଟେଡ୍ ଇଣ୍ଡିଆ ଇନସ୍ୟୁରାନ୍ସ କମ୍ପାନିର ବରିଷ୍ଠ ଶାଖା ପ୍ରବନ୍ଧକ ରିଚା ପ୍ରମୋଦ ଖୁସୱା, ହିଣ୍ଡାଲକୋ ଇଣ୍ଡଷ୍ଟ୍ରିଜର ସହକାରୀ ଉପସଭାପତି ଡକ୍ଟର ଲୋପାମୁଦ୍ରା ପ୍ରିୟଦର୍ଶିନୀ, ଜେଏସଡବ୍ଲ୍ୟୁ ଗ୍ରୁପର ସିଏସଆର୍ ଏବଂ କର୍ପୋରେଟ୍ ରିଲେସନସ୍ର ମୁଖ୍ୟ ପ୍ରଶାନ୍ତ ବିଶ୍ୱାଳ, ପ୍ରିମିୟମ ଇଣ୍ଡଷ୍ଟ୍ରିଜର କାର୍ଯ୍ୟନିର୍ବାହୀ ନିର୍ଦ୍ଦେଶକ ତଥା ଆଇଏମସି ପରିଚାଳନା ପରିଷଦର ଅଧ୍ୟକ୍ଷ ବିଭୁ ପ୍ରସାଦ ସାହୁ, ଭାରତ ପେ’ର ସେଲ୍ସ ମ୍ୟାନେଜର ବିଶ୍ୱ ପ୍ରକାଶ ରାଉତ, ମିଲେଟ୍ ମ୍ୟାଜିକ ଫାଉଣ୍ଡେସନର ପ୍ରତିଷ୍ଠାତା ଶ୍ୟାମା ଝା, ଡିଆଇଭିଏଭିଆଇର ପ୍ରତିଷ୍ଠାତା ଦେବୀକା ମୁଖାର୍ଜୀ, ବିଶ୍ୱ ଦକ୍ଷତା କେନ୍ଦ୍ରର ଜେନେରାଲ ମ୍ୟାନେଜର (ଏମଏସଓପି) ଜିତେନ୍ଦ୍ର ମୋହନ ସାହୁ, ସ୍ୱକଳ୍ପ ଟିମ୍ ଲିଡର ତଥା ପାଲଡିୟମ ଇଣ୍ଡିଆର ସହଯୋଗୀ ନିର୍ଦ୍ଦେଶକ ସୌମେନ୍ଦ୍ର ଚୌଧୁରୀ ପ୍ରମୁଖ ଯୋଗ ଦେଇଥିଲେ।
ଓଡ଼ିଶା ଦକ୍ଷତା ବିକାଶ ପ୍ରାଧୀକରଣ ଅଧୀନରେ ତଥା ବିଶ୍ୱ ଦକ୍ଷତା କେନ୍ଦ୍ର ଦ୍ୱାରା ‘ସ୍ୱକଳ୍ପ’ର ପରିଚାଳନା କରାଯାଉଛି। ସ୍ୱକଳ୍ପ କାର୍ଯ୍ୟକ୍ରମର ମୁଖ୍ୟ ସହଯୋଗୀ ସଂସ୍ଥା ଭାବେ ପାଲାଡିୟମ କନସଲ୍ଟିଂ ଇଣ୍ଡିଆ କାମ କରୁଛି।
‘ସ୍ୱକଳ୍ପ’ ଅଧୀନରେ ପର୍ଯ୍ୟାୟକ୍ରମେ ଓଡ଼ିଶାର ୧୦ ହଜାର ଯୁବକ ଯୁବତୀଙ୍କୁ ଆତ୍ମନିଯୁକ୍ତି ତଥା ଉଦ୍ୟୋଗୀ ଦକ୍ଷତା ବିକାଶ ଲାଗି ତାଲିମ ଦିଆଯାଉଛି। ସେମାନଙ୍କ ମଧ୍ୟରୁ ୧ ହଜାର ବ୍ୟକ୍ତି କିପରି ନିଜ ନିଜ ଅଞ୍ଚଳରେ ବିଭିନ୍ନ ପ୍ରକାର ବ୍ୟବସାୟ ପ୍ରତିଷ୍ଠା କରିପାରିବେ ସେଥିପାଇଁ ଲକ୍ଷ୍ୟ ରଖାଯାଇଛି। ଏହି କାର୍ଯ୍ୟକ୍ରମରେ ୨୫ ପ୍ରତିଶତ ମହିଳାଙ୍କ ଅନ୍ତର୍ଭୁକ୍ତିକୁ ପ୍ରାଥମିକତା ଦିଆଯାଉଛି।
