ଦିଲ୍ଲୀ: କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହ ଆଜି ମଧ୍ୟପ୍ରଦେଶର ଭୋପାଳ ଠାରେ ଦେଶରେ ପ୍ରଥମ ଥର ପାଇଁ ହିନ୍ଦୀ ଭାଷାରେ ଡାକ୍ତରୀ ପାଠ୍ୟକ୍ରମ ଆରମ୍ଭ କରିଛନ୍ତି। ଏହି କାର୍ଯ୍ୟକ୍ରମ ଅବସରରେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ଚୌହାନଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ମଧ୍ୟ ଉପସ୍ଥିତ ଥିଲେ।
ତାଙ୍କ ବକ୍ତବ୍ୟରେ, କେନ୍ଦ୍ର ଗୃହ ମନ୍ତ୍ରୀ କହିଥିଲେ ଯେ, ଏହି ଦିନଟି ସ୍ୱାଧୀନତାର ଅମୃତ ମହୋତ୍ସବ ବର୍ଷରେ ଚିକିତ୍ସା କ୍ଷେତ୍ର ନିମନ୍ତେ ଏକ ବହୁତ ଗୁରୁତ୍ୱପୂର୍ଣ୍ଣ ବର୍ଷ, ସମୟ ଆସିବ ଏହା ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହେବ। ଆଜି ଦେଶର ଶିକ୍ଷା କ୍ଷେତ୍ରର ପୁର୍ନନିର୍ମାଣର ଦିନ ବୋଲି ସେ କହିଥିଲେ। ଶ୍ରୀ ଶାହ କହିଥିଲେ ଯେ, ପ୍ରାଥମିକ, ବୈଷୟିକ ଏବଂ ଚିକିତ୍ସା ଶିକ୍ଷା କ୍ଷେତ୍ରରେ ମାତୃଭାଷାକୁ ଗୁରୁତ୍ୱ ପ୍ରଦାନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂତନ ଶିକ୍ଷା ନୀତିରେ ଏକ ବଡ଼ ଐତିହାସିକ ନିଷ୍ପତ୍ତି ନେଇଛନ୍ତି। ସେ ଆହୁରି ମଧ୍ୟ କହିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଡାକ୍ତରୀ ଶିକ୍ଷା ଏବଂ ବୈଷୟିକ ଶିକ୍ଷାକୁ ଆଂଚଳିକ ଭାଷା, ଯଥା -: ହିନ୍ଦୀ, ତାମିଲ୍, ତେଲୁଗୁ, ମାଲାୟଲମ୍, ଗୁଜରାଟୀ, ବେଙ୍ଗଲୀ ଭାଷାରେ ଶିକ୍ଷଶ ପ୍ରଦାନ କରିବାକୁ ଆହ୍ୱାନ ଦେଇଛନ୍ତି ଏବଂ ଶ୍ରୀ ମୋଦୀଙ୍କର ଏହି ଇଚ୍ଛାକୁ ପୂରଣ କରିବାରେ ଶିବରାଜ ସିଂହ ଚୌହାନଙ୍କ ନେତୃତ୍ୱାଧୀନ ମଧ୍ୟପ୍ରଦେଶର ସରକାର ହେଉଛନ୍ତି ଦେଶରେ ପ୍ରଥମ।
ଅମିତ ଶାହ କହିଥିଲେ ଯେ ଆଜି ଡାକ୍ତରୀ ଶିକ୍ଷା ହିନ୍ଦୀ ଭାଷାରେ ଆରମ୍ଭ ହେଉଛି ଏବଂ ବହୁତ ଶୀଘ୍ର ବୈଷୟିକ ଶିକ୍ଷାର ବହି ଗୁଡିକ ସାରା ଦେଶରେ ଆଠ ଗୋଟି ଭାଷାରେ ଉପଲବ୍ଧ ହେବ ଏବଂ ଖୁବ୍ ଶୀଘ୍ର ସାରା ଦେଶରେ ଛାତ୍ରଛାତ୍ରୀ ମାନେ ବୈଷୟିକ ଶିକ୍ଷା ଏବଂ ଡାକ୍ତରୀ ଶିକ୍ଷା ସେମାନଙ୍କ ନିଜ ମାତୃଭାଷାରେ ଲାଭ କରି ପାରିବେ। ସେ କହିଥିଲେ ଯେ, ଆଜି ଠାରୁ ଏହି ଦିନଟି ବହୁତ ଗୁରୁତ୍ୱପୂର୍ଣ୍ଣ, କାରଣ ଛାତ୍ରଛାତ୍ରୀ ମାନେ ନିଜ ମାତୃଭାଷାରେ କେବଳ ବୈଷୟିକ ଏବଂ ଡାକ୍ତରୀ ଶିକ୍ଷା ଗ୍ରହଣ କରିବେ ନାହିଁ, ବରଂ ନିଜ ଭାଷାରେ ଗବେଷଣା ମଧ୍ୟ କରି ପାରିବେ।
କେନ୍ଦ୍ର ଗୃହ ମନ୍ତ୍ରୀ କହିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ନୂତନ ଶିକ୍ଷା ନୀତିକୁ କାର୍ଯ୍ୟକାରୀ କରିବା କ୍ଷେତ୍ରରେ ମଧ୍ୟ ପ୍ରଦେଶ ହେଉଛି ପ୍ରଥମ ରାଜ୍ୟ ଏବଂ ଏହାକୁ ଖୁବ୍ ଭଲ ଭାବେ ମଧ୍ୟ କାର୍ଯ୍ୟକାରୀ କରି ପାରିଛି। ଶ୍ରା ଶାହ କହିଥିଲେ ଯେ, ଚିନ୍ତା କରିବାର ପ୍ରକ୍ରିୟା ଅର୍ଥାତ୍ ସୃଜନଶୀଳତାର ପ୍ରକ୍ରିୟା ମାତୃ ଭାଷାରେ ଉତ୍ତମ ରୂପେ ହୋଇ ପାରିବ ଏବଂ ମାତୃ ଭାଷାରେ କୁହା ଯାଉଥିବା କଥା ହୃଦୟକୁ ଭଲ ଭାବେ ଛୁଇଁଥାଏ। ସେ କହିଥିଲେ ଯେ, ମସ୍ତିଷ୍କ ନିଜର ମାତୃ ଭାଷାରେ ଚିନ୍ତା କରିବା, ସଂଶୋଧନ କରିବା, ଗବେଷଣା କରିବା, ତର୍କ କରିବା, ବିଷ୍ଲେଶଣ କରିବା ଏବଂ ପରିଶେଷରେ ନିର୍ଣ୍ଣୟରେ ପହଂଚିବାର ପ୍ରକ୍ରିୟା କରିଥାଏ। ସେ କହିଥିଲେ ଯେ, ଯଦି ମାତୃଭାଷାରେ ଅଧ୍ୟୟନ ଏବଂ ଗବେଷଣା କରାଯାଏ, ତେବେ ଭାରତୀୟ ଛାତ୍ର ଅନ୍ୟ କୌଣସି ଦେଶର ଛାତ୍ର ମାନଙ୍କ ଠାରୁ କୌଣସି ଗୁଣରେ କମ୍ ଦକ୍ଷ ନୁହନ୍ତି, ସେମାନେ ଗବେଷଣା କ୍ଷେତ୍ରରେ ଭାରତର ନାମକୁ ନିଶ୍ଚିତ ରୂପେ ଉଜ୍ଜ୍ୱଳ କରିବେ।
ଅମିତ ଶାହ କହିଥିଲେ ଯେ, ଏକ ବିଂଶ ଶତାବ୍ଦୀରେ କେତେକ ଶକ୍ତି ବ୍ରେନ୍ ଡ୍ରେନ୍ ସିଦ୍ଧାନ୍ତ ଗ୍ରହଣ କରିଥିଲେ ଏବଂ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ସିଦ୍ଧାନ୍ତକୁ ବ୍ରେନ୍ ଗେନ୍ ସିଦ୍ଧାନ୍ତରେ ପରିବର୍ତ୍ତନ କରୁଛନ୍ତି। ସେ କହିଥିଲେ, ଆଜି ଶ୍ରୀ ମୋଦୀଙ୍କର ନେତୃତ୍ୱରେ ନୂତନ ଶିକ୍ଷା ନୀତି ଆମର ଭାଷାକୁ ଗୁରୁତ୍ୱ ଦେବା ଆରମ୍ଭ କରିଛି। ଆମେ ଦେଶରେ ଜେଇଇ, ଏନ୍ଇଇଟି ଏବଂ ୟୁଜିସି ପରୀକ୍ଷା ଗୁଡିକୁ ୧୨ଟି ଭାଷାରେ ଆୟୋଜିତ କରିବା ଆରମ୍ଭ କରି ଦେଇଛୁ। ସମାନ ରୂପରେ, କମନ ୟୁନିଭର୍ସିଟି ଏଂଟ୍ରାନ୍ସ ଟେଷ୍ଟ ୧୩ଟି ଭାଷାରେ ଆରମ୍ଭ ହେବାକୁ ଯାଉଛି ଏବଂ ୧୦ଟି ରାଜ୍ୟ ତାମିଲ୍, ତେଲୁଗୁ, ମରାଠୀ, ବଙ୍ଗାଳୀ, ମାଲାୟଲମ୍ ଏବଂ ଗୁଜରାଟୀ ଭାଷାରେ ଅବୁଦାଦ କରି ବୈଷୟିକ ପାଠ୍ୟକ୍ରମକୁ ପଢ଼ାଇବା ଆରମ୍ଭ କରି ଦେଇଛନ୍ତି।
କେନ୍ଦ୍ର ଗୃହ ମନ୍ତ୍ରୀ କହିଥିଲେ ଯେ, ନିଜ ଭାଷାରେ ଶିକ୍ଷା ଲାଭ କରିବା ନିଶ୍ଚିତ ରୂପରେ ଛାତ୍ରଛାତ୍ରୀ ମାନଙ୍କର ଦକ୍ଷତାକୁ ବୃଦ୍ଧି କରିବ। ସେ କହିଥିଲେ, ସାରା ଦେଶର ଛାତ୍ରଛାତ୍ରୀ ମାନେ ସେମାନଙ୍କର ଭାଷାକୁ ନେଇ ରହିଥିବା ହୀନମନ୍ୟତାରୁ ବାହାରକୁ ବାହାରି ଆସିବା ଉଚିତ୍, କାରଣ ବର୍ତ୍ତମାନ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏକ ସରକାର ଚାଲିଛି ଏବଂ ସେମାନେ ନିଜ ଦକ୍ଷତାକୁ ନିଜ ମାତୃଭାଷାରେ ପ୍ରଦର୍ଶନ କରି ପାରିବେ। ସେ ଏହା ମଧ୍ୟ ଉଲ୍ଲେଖ କରିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯେତେବେଳେ ଆମ ଦେଶର ସରକାରୀ ଭାଷା – ହିନ୍ଦୀ ଭାଷାରେ ବିଶ୍ୱ ସ୍ତରୀୟ ମଂଚରେ କଥାବାର୍ତ୍ତା କରନ୍ତି ସେତେବେଳେ ସେ ବିଶ୍ୱ ପାଇଁ ଏକ ବାର୍ତ୍ତା ଦେଇଥାନ୍ତି, ଯେତେବେଳେ ଶ୍ରୀ ମୋଦୀ ବିଶ୍ୱ ସ୍ତରୀୟ ମଂଚରେ ହିନ୍ଦୀ ଭାଷାରେ କଥାବାର୍ତ୍ତା କରନ୍ତି, ସେତେବେଳେ ଆମର ଯୁବକଙ୍କ ଆତ୍ମବିଶ୍ୱାସ ବୃଦ୍ଧି ପାଇଥାଏ।
ଶୀ ଶାହ ସୂଚନା ଦେଇଥିଲେ ଯେ, ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ବୈଷୟିକ ଏବଂ ଡାକ୍ତରୀ ଶିକ୍ଷା କ୍ଷେତ୍ରରେ ଅନେକ ପରିବର୍ତ୍ତନ କରିଛନ୍ତି। ସେ ଏହା ମଧ୍ୟ କହିଥିଲେ, ୨୦୧୪ ମସିହାରେ ଦେଶରେ ୩୮୭ ମେଡିକାଲ୍ କଲେଜ ଥିଲା ଏବଂ ଆଜି ସେଗୁଡିକର ସଂଖ୍ୟା ବୃଦ୍ଧି ପାଇ ୫୯୬ ହୋଇଛି, ଏମ୍ବିବିଏସ୍ ଆସନ ସଂଖ୍ୟା ୫୧,୦୦୦ ରୁ ୭୯,୦୦୦କୁ ବୃଦ୍ଧି ହୋଇଛି, ଆଇଆଇଟି ସଂଖ୍ୟା ପୂର୍ବରୁ ୧୬ ଥିବା ବେଳେ ବର୍ତ୍ତମାନ ୨୩ ହୋଇଛି, ଆଇଆଇଏମ୍ ଗୁଡିକର ସଂଖ୍ୟା ୧୩ ରୁ ୨୦ ଏବଂ ଆଇଆଇଆଇଟି ସଂଖ୍ୟା ୯ ରୁ ୨୫ କୁ ବୃଦ୍ଧି ପାଇଛି। ୨୦୧୪ ମସିହାରେ, ଭାରତରେ ୭୨୩ଟି ବିଶ୍ୱ ବିଦ୍ୟାଳୟ ଥିଲା ଏବଂ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବିଶ୍ୱ ବିଦ୍ୟାଳୟ ଗୁଡିକର ସଂଖ୍ୟା ୧,୦୪୩ ରହିଛି। ଶ୍ରୀ ମୋଦୀଙ୍କ ନୂତନ ଶିକ୍ଷା ନୀତି ମାଧ୍ୟମରେ ଆମର ଭାଷାକୁ ନେଇ ରହିଥିବା ଆତ୍ମାଭିମାନକୁ ପୁନସ୍ଥାପନ କରିବା ଏବଂ ଦେଶରେ ବୈଷୟିକ ଶିକ୍ଷା, ଡାକ୍ତରୀ ଶିକ୍ଷା ଏବଂ ଆଇନ ଅଧ୍ୟୟନ ପାଇଁ ପଦକ୍ଷେପ ଗ୍ରହଣ କରିବା କାରଣରୁ ଏକ ଶିକ୍ଷା ଭିତ୍ତିକ ବିପ୍ଳବ ସୃଷ୍ଟି ହେବାକୁ ଯାଉଛି ବୋଲି ସେ ଉଲ୍ଲେଖ କରିଥିଲେ।
ଶ୍ରୀ ଶାହ କହିଥିଲେ ଯେ, ଇଂରାଜୀ ଭାଷାର ପ୍ରଚାର ପ୍ରସାର କରୁଥିବା ଲୋକମାନେ ଭାଷାକୁ ବୌଦ୍ଧିକ କ୍ଷମତା ସହିତ ଯୋଡି ଦେଇଛନ୍ତି, କିନ୍ତୁ ଭାଷା ଏବଂ ବୌଦ୍ଧିକ ଦକ୍ଷତା ମଧ୍ୟରେ କୌଣସି ସମ୍ପର୍କ ନାହିଁ। ଭାଷା କେବଳ ଅଭିବ୍ୟକ୍ତିର ମାଧ୍ୟମ ହୋଇଥିବା ବେଳେ ବୌଦ୍ଧିକ ଦକ୍ଷତା ହେଉଛି ଏକ ପ୍ରାକୃତିକ ଉପହାର, ଯାହା ଶିକ୍ଷା ମାଧ୍ୟମରେ ଉନ୍ନତ ହୋଇପାରିବ ଏବଂ ଯଦି ଶିକ୍ଷା ମାତୃ ଭାଷାରେ ପ୍ରଦାନ କରାଯାଏ ତେବେ, ତାହା ବୌଦ୍ଧିକ କ୍ଷମତାକୁ ଉନ୍ନତ କରିବା କ୍ଷେତ୍ରରେ ବହୁତ ଲାଭଦାୟକ ହେବ।
ସେ କହିଥିଲେ ଯେ, ଆଜିର ଏହି ଆରମ୍ଭ ସହିତ, ବିଶ୍ୱ ସ୍ତରୀୟ ଗବେଷଣା କ୍ଷେତ୍ରରେ ଭାରତ ଆଗକୁ ବଢ଼ିବ ଏବଂ ଆମର ଛାତ୍ର ମାନଙ୍କର ବୌଦ୍ଧିକ ସାମର୍ଥ୍ୟ ମଧ୍ୟ ବିଶ୍ୱ ଆଗରେ ଉପସ୍ଥାପିତ ହେବ।
****
SSP