ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: କିଛିଦିନ ହେଲା ଖଲିକୋଟ ସଂଲଗ୍ନ ଜାତୀୟ ରାଜପଥ – ୧୬ରେ ଅପରାଧିକ ଗତିବିଧି ବୃଦ୍ଧି ପାଇବାରେ ଲାଗିଛି। ପ୍ରତ୍ୟେକ ଦିନ କୌଣସି ନା କୌଣସି ବ୍ୟକ୍ତିଙ୍କଠାରୁ ଡ଼କାୟତ ହେଉଥିବା ନେଇ ଥାନାରେ ଅଭିଯୋଗ ହେଉଥିଲେ ମଧ୍ୟ ପୋଲିସ୍ର ହାତ ଖାଲି ଥିଲା। ଆଜି ଏଭଳି ଏକ ଗ୍ୟାଙ୍ଗ ଡ଼କାୟତ ଉଦ୍ୟମ କରିଥିବା ସମୟରେ ପୋଲିସ୍ ହାତରେ ଧରାପଡ଼ିଛନ୍ତି।
ଘଟଣାରୁ ପ୍ରକାଶ ଯେ ଖଲିକୋଟ ଥାନା ଅନ୍ତର୍ଗତ ବଡ଼ଘାଟି ଫରେଷ୍ଟ ଗେଟ୍ ନିକଟରେ କିଛି ଡ଼କାୟତ ଏକତ୍ରିତ ହୋଇ ଡ଼କାୟତ ଉଦ୍ୟମ କରିବା ନେଇ ଖଲିକୋଟ ପୋଲିସ୍ ପାଖରେ ସୂଚନା ମିଳିଥିଲା। ସଂଗେ ସଂଗେ ଥାନା ଏସ୍ଆଇ ଅମ୍ବିକା ବେନିୟା, ଥାନା କର୍ମଚାରୀ ଆର୍.ପି. ଭଟ୍ଟମିଶ୍ର, ଆର୍ କେ ନାୟକ, ଏସ୍.କେ ନାୟକ, ଜୟକ୍ରିଷ୍ଣା, ଏଚ୍କେ ନାୟକ, ପି. ରୋହିତ, ଏସ୍କେ କୁଡ଼ୁମ୍ବା, ବୈଦ୍ୟ ଏବଂ ଏନ୍ ବେହେରା ଘଟଣାସ୍ଥଳରେ ପହଞ୍ଚିଥିଲେ। ଏମାନେ ୪ ଜଣ ଡ଼କାୟତକୁ ଧରିଥିବାବେଳେ ଅନ୍ୟ ଜଣେ ଫେରାର୍ ହୋଇଯାଇଥିଲା।
ଡ଼କାୟତମାନେ ହେଲେ କୋଦଳା ବି. ନୂଆପଲି ଗ୍ରାମର ସନ୍ତୋଷ ଖଟେଇ (୨୯), କୋଦଳା ଥାନା କାଲିମେଘ ଗ୍ରାମର ମୁନାରାମ୍ ଜେନା (୨୧), ଫାସି ଗ୍ରାମର ରାଜ ଗୋପାଳ ମହାପାତ୍ର, ଖଲିକୋଟ ଥାନା କହ୍ନେଇପୁର ଗ୍ରାମର ଧର୍ମି ଓରଫ୍ ଧିରେନ୍ଦ୍ର ଦାସ (୨୪)। ପୋଲିସ୍ ସେମାନଙ୍କ ନିକଟରୁ ୬ ଏମ୍ ଏମ୍ର ଟି ପିସ୍ତଲ (୧୧ଗୁଳି), ସିଙ୍ଗେଲ ସଟ୍ ପିସ୍ତଲ ୨ଟି, ରିଭଲ୍ଭର ଗୋଟିଏ, ଏୟାର ଗନ ଗୋଟିଏ, ତିନୋଟି ମଟର ସାଇକେଲ୍, ୨ଟି ଖଣ୍ଡା, ୩ଟି ମୋବାଇଲ୍ ଫୋନ୍, ଲଙ୍କା ଗୁଣ୍ଡ, ଟର୍ଚ ଏବଂ ମାସ୍କ ଜବତ କରିଛି। ଖଲିକୋଟ ଥାନା କେସ ନଂ ୪୮/୨୧ରେ ସମସ୍ତ ଅଭିଯୁକ୍ତଙ୍କୁ କୋର୍ଟଚାଲଣ କରାଯାଇଥିବା ଥାନାଧିକାରୀ ସୂଚନା ଦେଇଛନ୍ତି।